LU KINKAMAKGTAYAYAN akxni akxilhaw lhuwa xtatayananin Jehová tiku kajku kaman chu ni lhuwa tuku kgalhiputunkgo kxlatamatkan xlakata tlakg naskujnikgo Dios (Mat. 6:22). ¿Tuku talakgpalinit kxlatamatkan chu tuku taʼakglhuwit titaxtukgonit? Xlakata nakatsiyaw xtakgalhtin, kakalakgapaswi makgapitsin natalan tiku skujmakgo kʼMéxico.

Dustin chu Jassa, xalak Estados Unidos, tamakgaxtokgkgolh enero kkata 2007. Ni lhuwa kilhtamaku xtitaxtunit tlawakgolh tuku xtlawaputunkgo: tamawakgolh akgtum aktsu barco chu anta xwilakgo putum kata. Uma aktsu barco anta xwi lakatsu kʼAstoria (Oregón, Estados Unidos), akgtum lu stlan kachikin lakatsu kʼocéano Pacífico, uma kachikin limakgstiliwi laktsu sipi, anta anan lhuwa kiwi chu sipi nema kgalhikgo miki. Dustin wa: «Kaniwa niku nalakapina lu stlan tasiya». Dustin chu xpuskat lu xlakpuwankgo pi xlipawankgo Jehová chu ni lhuwa tuku xkgalhikgo xlatamatkan, xlakata niku xwilakgo kaj akgtum aktsu barco 8 metro xlilanka, ni putum semana kskujkgo, xʼankgo tamakxtumit niku tanu tachuwin chu precursores auxiliares xlitaxtukgo makgapitsi papaʼ. Pero ni lhuwa kilhtamaku akxilhkgolh pi ni xlikana tuku xlakpuwankgo. Dustin wan: «Tlakg lhuwa kilhtamaku xaklimakgxtakga naklakkaxtlawa barco ni xawa ktamakxtumit. Kaʼakxilhwi  pi xtalakaskin xaklakgpaliw kilatamatkan komo pulana xwiliputunaw Jehová kkilatamatkan».

Jassa wan: «Akxni nina xaktamakgaxtokga xaklama kʼMéxico, niku xakan congregación xaʼinglés. Lu klakgatilh chu xaktaspitputun». Xlakata tlakg xʼamputunkgolh skujnikgo Dios kʼatanu país, Dustin chu Jassa tsukukgolh likgalhtawakgakgo akxni xkakninanikgo Dios kfamilia biografías xla natalan tiku alakatanu país skujmakgo niku latamanin lu lakgatikgo xtachuwin Dios (Juan 4:35). Dustin lakapastaka: «Akinin na xmakgkatsiputunaw tapaxuwan nema xtitaxtumakgo natalan». Makgapitsi xʼamigos tiku xlamakgo kʼMéxico kawanilh pi aku xtatlawanit akgtum grupo chu xlakaskinkgo tamakgtay, xla chu xpuskat lakgpalikgolh tuku xtalakaskin: makgxtakgkgolh xtaskujutkan, stakgolh xbarcokan chu ankgolh skujnikgo Dios kʼama país.

Dustin chu Jassa latamakgolh kachikin Tecomán (Colima), nema lakatsu xwi océano Pacífico, pero 4,345 kilómetros tlakg makgat kʼsur niku wi Astoria. Dustin wan: «Klakgpaliw anta niku xaklamaw niku lu stlan chu lu stlan snokgnan un niku kaw klhkaknan chu chankan lhuwa limunax. Pulana ni xtekgskgo taskujut, chu xlakata ni lhuwa xkgalhikgo tumin, akgatanu semana kaj arroz chu stapu xwakgo makgtiy akgatunu kilhtamaku. Jassa wa: «Pero akxni nialh xakwaputunaw uma, latamanin tiku xkalimakgalhtawakgemaw Biblia tsukukgolh kinkamaskiwikgoyan mangos, sekgna, papayas chu ¡lhuwa limunax!». Titaxtulh kilhtamaku tsukukgolh skujkgo kʼakgtum escuela kʼInternet niku xmasiyakan tanu tanu tachuwin chu xtapakgsi kTaiwán. Tumin nema tlajakgo kamakgtaya xlakata nakgalhikgo tuku maklakaskinkgo.

Pero ¿paxuwakgo xlakata la linkgo xlatamatkan? Xchatiykan wankgo: «Xlakata unu lamaw lu tlan tuku kinkaʼakgspulanitan. La ktalalinaw Jehová chu kintamakgaxtokgatkan lu tatliwakglhnit ni xaklakpuwanitaw pi chuna xʼama la. Putum kilhtamaku lhuwa tuku akxtum ktlawayaw: akxtum kanaw lichuwinanaw Dios, lakkaxwiliyaw tuku naʼakxilhaw ktamakxtumit, chu lichuwinanaw la tlan nakkamakgtayayaw tiku kalimakgalhtawakgeyaw Biblia. Nachuna, nialh kkgalhiyaw taʼakglhuwit nema pulana xkgalhiyaw». Dustin chu Jassa wankgo: «La uku katsiyaw pi ni putum xakkatsiyaw tuku kilhchanima texto xla Salmo 34:8: “Kalikxilhtit xlakata nakatsiyatit la ixlitlan katsi Kintikukan”».

Liwaka akgtiy mil akgnajatsa ciento natalan, tiku tamakgaxtokgnit chu tiku ni, tiku kgalhikgo liwaka 20 chu 30 kata, ankgonit skujnikgo Dios kachikin xla  México niku tlakg talakaskin tiku lichuwinankgo xTamapakgsin Dios. ¿Tuku xlakata lhuwa xtatayananin Jehová tlawakgo uma? Akxni katlawanika uma takgalhskinin makgapitsi tiku chuna tlawakgonit, pulaktutu wankgolh tuku xlakata. ¿Tuku umakgolh?

Paxkikgo Jehová chu latamanin. Leticia, tiku tamunulh akxni xkgalhi 18 kata, xla wan: «Xakkatsi pi naktamakamastani Jehová, xwamputun xliputum naku chu latamat nakskujnani. Tlakg xakmaxkiputun kinkilhtamaku chu kilitliwakga kxtaskujut, chu chuna xaklimasiyanilh la lhuwa kpaxki» (Mar. 12:30). Hermilo, tiku la uku tatamakgaxtokgnit Leticia, liwaka 20 kata xkgalhi akxni alh skujnani Dios niku tlakg xtalakaskin. Xla wan: «Kakxilhli pi limasiyakan tapaxkit akxni kamakgtayakan latamanin xtakanajlakan» (Mar. 12:31). Wa xlakata, alh kʼalakatanu aktsu kachikin chu makgxtakgli lanka kachikin Monterrey, niku xliskujma kʼakgtum banco chu lu lhuwa tuku xkgalhi.

Xlakata putum kilhtamaku nalipaxuwaya. Nina lhuwa kilhtamaku akxni xtamununita, Leticia taʼalh chatum precursora tiku lhuwata kata lakskujnanima Dios kʼakgtum aktsu kachikin, niku lichuwinankgolh Dios akgtum papaʼ. Xla wan: «Nila xakkanajla. Lu xaklipaxuwa xlakata xakaʼakxilha la latamanin lu tlan makgamakglhtinankgo xTamapakgsin Dios. Akxni kgalhsputli papaʼ kwa: “¡Wa uma tuku ktlawaputun kkilatamat!”». Xtachuna uma tuku akgspulalh Essly, chatum tala tsumat tiku liwaka puxam kata kgalhi. Tapaxuwan nema akxilhli xkgalhikgo amakgapitsin, tlawalh pi xʼalh niku tlakg talakaskin tiku lichuwinankgo Dios. Akxni stakkgolh lakgapasli lhuwa xtatayananin Jehová tiku xtlawamakgolh uma taskujut. Xla lakapastaka: «Akxni kaʼakxilhli pi lu xpaxuwakgo akit nachuna xaktlawaputun». Lhuwa natalan laktsuman nachuna tlawakgonit. Anta kʼMéxico max wilakgolh akgchaxan ciento tatipuxam natalan laktsuman tiku nina tamakgaxtokgkgo, skujmakgolh niku lu talakaskin tiku chuwinankgo Dios. ¡Lu tlan liʼakxilhtit xpalakata tiku kajku kamanan chu tiku linkgoya xkata!

Xlakata nakgalhikgo lu tlan latamat. Akxni Essly masputulh secundaria, xʼama maxkikan akgtum beca kʼuniversidad. Makgapitsi kamanan xwanikgo pi xmakglhtinalh chu «xlatamalh la amakgapitsin», uma wamputun, pi xʼalh kʼuniversidad, chu xkgalhilh akgtum carrera chu xtamawalh akgtum putlaw chu xʼalh paxialhnan putum kakilhtamaku. Xla ni tlawalh tuku wanika. Essly wan: «Lhuwa kiamigos tiku na kstalaninanin Cristo xwankgonit wa uma tuku putsakgolh chu kakxilhli pi nialh pulana xwilikgo tuku xaʼespiritual. Chu nakkatsilh pi akxni tlakg xputsakgo tuku xalak kakilhtamaku, tlakg ni tlan xlimakgkatsikgo chu tlakg xkgalhikgo taʼakglhuwit. Akit xaklimaklakaskimputun kilatamat xlakata naklakskujnani Jehová».

 Essly kaj katsinilh tuku xmakgtayalh nakgalhi tuku xmaklakaskilh xlakata tlan xlitaxtulh precursora, chu alistalh alh latama niku tlakg xtalakaskin tiku lichuwinankgo Dios. Chu asta katsiniputulh akgtiy tachuwin: otomí chu tlapaneco. Chu akxni lakapastaka umakgolh akgtutu kata nema limaklakaskinit xlakata nalichuwinan Dios uma klakgamakgat kachikinin Essly wan: «Nakskuja niku lu talakaskin tiku lichuwinankgo Dios tlawa pi lu naklipaxuwa. Pero tuku tlakg tlan wa pi tlan ktalalin Jehová». Phillip chu Racquel, tiku liwaka 30 kata kgalhikgo nachuna lakpuwankgo. Uma tamakgaxtokgat xalak Estados Unidos wankgo: «Uma kakilhtamaku lu lakapala talakgpalima wa xlakata lhuwa latamanin pekuankgo. Nalichuwinanaw Dios niku lhuwa latamanin kgaxmatkgo tlawa pi tlan nalimakgkatsiyaw. ¡Xlikana lu tlan kitaxtu!».

Xlikana, ankan lichuwinankan Dios niku tlakg talakaskin namin kilhtamaku natitaxtukan tuku nitlan. Pulaktum la nakgalhikan tuku maklakaskinkan. Xlakata natayaniya talakaskin nalatapaya la lamakgolh tiku anta wilakgolh. Verónica, tiku lhuwa kata litaxtunit la precursora wan: «Kʼakgtum kachikin xaktlawa chu xaksta liwat nema ni lu xatapalaxla, kʼatanu xaksta lhakgat chu xakakgsitnan. La uku kskuja kʼakgtum chiki chu kkamasiyani tiku aku natlatni la nakatachuwinankgo xkamanan».

Tuwa tamakgkatsi latamakan chu tlawakan xtalismaninkan tiku xala atanu kachikin, uma tlakg tamakgkatsi komo niku pina chuwinankan akgtum tachuwin indígena chu makgat wi. Chuna kaʼakgspulalh Phillip chu Racquel akxni ankgolh kʼakgtum kachikin niku chuwinankan náhuatl. Phillip wan: «Tuku xla xlismanikgonit lu lhuwa xtalakgpali». ¿La smanikgolh kʼuma kachikin? Xla wampara: «Xaʼakxilhaw tuku tlan xtlawakgo tiku náhuatl, chuna la talalinkgo familias chu la lichuwinankgo tuku xaxlikana chu la kamaxkikgo tuku kgalhikgo putum amakgapitsin». Racquel wan: «Lhuwa tuku kkatsiniw akxni anta xlamaw chu akxni akxtum xakalitachuwinanaw Dios kinatalankan xla uma kachikin».

Max wix na skujnaniputuna Dios niku tlakg makgat, pero ¿tuku militlawat xlakata napina? Natalan tiku chuna tlawakgonit kawanikgo amakgapitsin pi akxni nina pinita, ni lhuwa tuku kakgalhi kmilatamat chu kalipaxuwa tuku kgalhiya (Filip. 4:11, 12). ¿Tuku tlakg talakaskin natlawaya? Leticia wan: «Ni xakmakglhtinan taskujut nema xtlawalh pi lhuwa kilhtamaku xaktawi lakatum kachikin. Xaklakaskin pi xakkgalhilh kilhtamaku xlakata tlan xakalh alakatanu kachikin akxni xaklakaskilh». Hermilo wan: «Kkatsinilh nakchakganan, xakanan [o sakganan] chu tlawakan liwat». Chu Verónica wan: «Akxni xaktawilakgolh kintlat chu kinatalan, xakmakgtayanan klikaxakat chu kkatsinilh la tlawakan liwat nema ni laktapalaxla. Chu na kkatsinilh nakmaki tumin».

Levi chu Amelia xalak Estados Unidos tiku akgtsayan kata lata tamakgaxtokgkgonit. Xlakan wankgo pi oraciones lu kamakgtayakgonit xlakata naʼankgo skujnikgo Dios kʼMéxico. Levi lakapastaka: «Akxilhwi la xlilhuwa tumin xakamaw maklakaskinaw akgtum kata kʼatanu país, chu alistalh skiniw Jehová pi xkinkamakgtayan xakmakgatsiw uma tumin». Ni lhuwa papaʼ alistalh xkgalhikgoya uma tumin, wa xlakata tunkun ankgolh alakatanu país. Levi wampara: «Xlakata kinkakgalhtin oración nema ktlawaniw, Jehová kinkamakgtayan. La uku akinin kilitlawatkan tuku kinkalakgchanan». Amelia wan: «Xaklakpuwanaw pi kaj akgtum kata xakamaw tawilayaw, pero makgatsinitaw akgtujun kata chu ni lakpuwanaw nakanaw. Xlakata lamaw unu makgkatsiyaw pi lu kinkamakgtayayan Jehová. Chali chali akxilhaw xtapaxkit Jehová».

Adam chu Jennifer, lu kamakgtayalh oración, uma atanu tamakgaxtokgat xalak Estados Unidos nema makgtayanankgo kʼMéxico kʼakgtum congregación xaʼinglés. Uma tamakgaxtokgat wan: «Ni kalakpuwanti pi talakaskin lu tlan natawila milatamat. Kawani Jehová pi makgat skujnaniputuna chu alistalh katlawa tuku skini kmioración. Ni lhuwa tuku kakgalhi kmilatamat, chu kamalakgacha akgtum carta ksucursal xla país niku pimputuna skujnaniya Dios, akxni naʼakxilha la xlilhuwa tumin maklakaskina, chu ni kaj lakpuwanti natlawaya, katlawa». * Komo chuna natlawaya, naʼakxilha la tlan tlakg nalipaxuwaya kmilatamat chu nakgalhiya lhuwa tuku xaʼespiritual.