KLAKPUWA pi wi tuku nitlan xwi akxni lakachilh kinkgawasa Gary kkata 1958. Pero titaxtukgolh akgkaw papaʼ xlakata makuchinanin xwankgolh tuku xkgalhi, chu akgkitsis kata xlakata makuchinanin xalak Londres xwankgolh pi xlikana. Lu klilakgaputsalh akxni Louise, tsumat nema kkgalhilh akgnajatsa kata alistalh, tlakg nitlan lakachilh nixawa Gary.

Makuchinanin kiwanikgolh: «Xchatiykan kgalhikgo síndrome Bardet-Biedl, chu uma tajatat nila makuchikan». * Kʼama kilhtamaku ni lhuwa tuku xkatsikan xlakata uma tajatat. Tiku kgalhikgo uma tajatat tsinu tsinu nialh lakawanankgo, kgelanka wankgo, kgalhikgo polidactilia (tlakg lhuwa laktsu makan o tantun), ni stakkgo chuna la xlilat, nila mapakgsikgo la matsuwi xmaknikan, kgalhikgo diabetes, osteoartritis chu xpastapu ni liwana skuja. Xlikana, lu tuwa xʼama kitaxtu nakkakuentajtlawa kinkamanan. Tuku la uku takatsi wa pi 1 xla 125,000 latamanin kgalhikgo uma tajatat kʼGran Bretaña, maski max tlakg anan tiku tatatlakgo pero ni lu snun xtajatat.

Ktachuwinalh chatum xtatayana Jehová akxni aku xaktamakgaxtokgnit, chu tunkun kkatsilh pi xaktekgsnit xaxlikana. Pero kinchixku, ni lakgatilh. Xtaskujut xtlawa pi lakalhuwa xakaw latamayaw, wa xlakata nila xakan kʼakgtum congregación. Maski chuna, chuntiya xaktlawa oración chu xaklikgalhtawakga Biblia. Lu kimatliwakglhli akxni kkatsilh pi Jehová nikxni makgxtakga tiku putsa chu xla litaxtu «xtamakgtay tiku lakgaputsama, chu xputatsekgni akxni titaxtuma tuku nitlan» (Sal. 9:9, 10, TNM).

Xlakata Gary ni lu liwana xlakawanan, akxni xkgalhi akgchaxan kata kmalakgachaw escuela kʼcosta sur xla Inglaterra xlakata tlan xmasiyanika. Makglhuwa xkintachuwinan chu xkiwani tuku xlilakgaputsa, chu akit xaklimaklakaskin uma kilhtamaku xlakata xaklikgalhtawakganilh makgapitsi textos xalak Biblia. Ni lhuwa kata alistalh akxni xlakachinita Louise, kiwanika pi xakkgalhi esclerosis múltiple chu fibromialgia. Gary taspitli kchiki akxni xkgalhi 16 kata, chu tlakg snunalh xtalakawan chu kkata 1975 wanka pi lakgaxokgo xwanit. Akgtiy kata alistalh, kinchixku kinkaʼakgxtakgwilin.

Ni xlimakgas akxni taspitli Gary tsukuw anaw kʼakgtum congregación nema lu paxkinankgo chu ktamunulh kkata 1974. Lu kpaxtikatsinilh akxni chatum kgolotsin xla congregación makgtayalh Gary naʼakgatekgsa tuku xlakata talakgpali xmakni. Atanu natalan kimakgtayakgolh kkinchik. Alistalh, makglhtinaw lanka tasikulunalin pi tiku mastakgo tamakgtay kkachikin mastakgolh talakaskin pi kgalhkitsis umakgolh natalan xkinkamakgtayakgon.

Gary staktilhalh xtakanajla chu tamunulh kkata 1982. Xla precursor auxiliar xwamputun chu akxtum skujwi la precursores lhuwa kata. Kinkgawasa lu lipaxuwalh akxni akgtum kilhtamaku superintendente de circuito kgalhskilh: «Gary, ¿tuku xlakata ni liskuja la precursor regular?».  Uma tachuwin wa tuku xmaklakaskin, chu kkata 1990 precursor regular litaxtulh.

Gary makgtiy lakgpalinikanit xtantin xapulana kkata 1999 chu xlimakgtiy kkata 2008, pero xtajatat Louise tlakg snun. Louise lakgaxokgo lakachilh, chu akxni kakxilhli pi xkgalhi kganchaxan laktsu xtantun, kkatsilh pi na xkgalhi síndrome xla Bardet-Biedl. Makgapitsi análisis masiyakgolh pi nitlan xwi xpulakni. Chuna la titaxtukgonit kata makglhuwa chukukanit, makgkitsis xlakata xpastapu. Xtachuna la Gary xla diabética.

Xlakata Louise katsi pi akxni chukukan lu tuwa, pulana katachuwinan tiku nachukukgo, tiku wilinikgo anestesia chu tiku skujkgo kʼhospital xlakata ni nawilinikan kgalhni. Xlakata uma, tlan katalalin putum tiku skujkgo kʼhospital.

Kkinchikkan lhuwa tuku tlawayaw, xlakata la kakninaniyaw Jehová. Makgasa ni xwi lhuwa aparatos electrónicos nema anan la uku, wa xlakata lhuwa hora xakkalikgalhtawakgani kinkamanan. La uku, xlakata anan lhuwa tuku grabarlikanit kʼCD, DVD chu sitio xla Internet www.pr418.com, kimputumkan tlan lipaxuwayaw akxni akgatunu semana likgalhtawakgayaw Biblia chu tanu tanu hora tlawayaw chu mastayaw kintakgalhtinkan ktamakxtumit.

Min kilhtamaku Gary katsini tuku wan likgalhtawakga xlakata nakgalhtinan chu tlan masta taʼakgchuwin ktamakxtumit Niku Masiyakan xlakata la Lichuwinankan Dios chuna la lakkaxwili xtalakapastakni. Kkata 1995 tsukulh liskuja la siervo ministerial chu lhuwa makgtayanan kPukgalhtawakga xla xTatayananin Jehová ksonido chu kamakgamakglhtinan natalanin.

Natalan taʼankgo lichuwinankgo Dios chu matlawanikgo xsilla xla ruedas nema maklakaskin xlakata kgalhi artritis. Chatum tala makgtayanit namasiyani xlakata Biblia chatum tiku katsiputun xaxlikana. Gary na makgtayanit chatum tala tiku ni xlichuwinan Dios puxamakitsis kata. La uku xchatiykan ankgo ktamakxtumit.

Kintse masiyanilh Louise natlawa tejido akxni xkgalhi akgnajatsa kata, chu tiku xkuentajtlawa chu akit masiyaniw natsapanan. Xla lu lakgati, tlawa laktsu tsujmit, o pilisalh nema kgalhi lhuwa colores nema kamaskiwi lakgskgatan xalak congregación chu tiku kgalhikgoya kata. Nachuna tlawa tarjetas nema tlan kamamakgkatsini amakgapitsi o xla tapaxtikatsini chu kgalhikgo dibujos nema kaslamawakan. Tiku makgamakglhtinankgo uma tarjetas lu xlakaskinka kaʼakxilhkgo. Akxni Louise tsumatku xwanit katsinilh natsokgnan chu ni naʼakxilha teclado. La uku xlakata kgalhi akgtum computadora nema chuwinan tlan tsokga correos nema kamalakgachani xʼamigos. Tamunulh akxni xkgalhi 17 kata, chu lata ama kilhtamaku akxni anan campañas xlakata tlakg nalichuwinankan Dios, akxtum liskujaw la precursoras auxiliares. Xla chu Gary katsinikgo textos xalak Biblia xlakata nalichuwinankgo takanajla nema kgalhikgo xlakata Dios natlawa pi tiku «lakgaxokgo nalakawanamparakgo» chu «ni chatum lataman nawan: “Ktatatlay”» (Is. 33:24; 35:5).

Lu klipaxuwayaw tuku xaxlikana masiya xTachuwin Jehová. Kkinakujkan na anan lhuwa tapaxtikatsinit xlakata tamakgtay nema kinkamaxkinitan congregación, komo ni xkinkamakgtayan nila lhuwa tuku xtlawaw. Xlikana, xlakata xtamakgtay Jehová, lipaxuwayaw kkilatamatkan.