1, 2. ¿Tuku lu lanka talakgalhaman kgalhiyaw xtatayananin Jehová, chu tuku makgkatsiya xlakata uma?

LHUWA akxilhkgo la akgtum lanka talakgalhaman nakamaxkikan akgtum premio akxni wi tuku lu xlakaskinka tlawakgo. Akgtum liʼakxilhtit, makgapitsin kamaxkikanit Premio Nobel xlakata makgtayakgonit naʼanan takaksni akxni xʼanan lhuwa taʼakglhuwit. Pero tlakg lanka talakgalhaman pi Dios nakinkalimaklakaskinan xlakata nakamakgtayayaw latamanin natalakatsuwinikgo xMalakatsukinakan.

² Xtatayananin Jehová kgalhiyaw lu lanka talakgalhaman. Xlakata Dios chu Cristo kinkamapakgsiyan kawaniyaw latamanin natalakatsuwinikgo Dios (2 Cor. 5:20). Jehová kinkalimaklakaskinan xlakata latamanin natalakatsuwiniputunkgo, chu chuna lhuwa millón nema wilakgo k235 kachikin xatapaxuwan talalinkgo Dios chu nakgalhkgalhikgo nalatamakgo putum kilhtamaku (Tito 2:11). Xlakata lu skujniputunaw Dios kawaniyaw «wanti lakaskin, kawalh nchuchut xla latamat ntu nkaj litlan mastakan» (Apoc. 22:17). Xlakata lu xlakaskinka akxilhaw taskujut nema lakgatayanitaw chu lu liskujaw, tlan wankan pi “tlawamaw wa ntu xatlan tatlaw” (Tito 2:14). Kaʼakxilhwi la akxni lu skujniyaw Jehová kamakgtaya latamanin natalakatsuwinikgo Jehová. Xapulana niku tlan limasiyayaw wa akxni lichuwinanaw.

3. ¿Tuku kinkamasiyaniyan tachuwin «lu tlawaputun Jehová»?

³ Xlakata la namapakgsinan xKgawasa Dios nakgantaxtu Isaías 9:7: «Xlakata Jehová tiku kapulalin lhuwa soldados chuna tlawaputun uma nakgantaxtu». Uma tachuwin masiya pi kinTlatkan xalak akgapun lu kalakgmaxtuputun latamanin. Xliʼakxilhtit Jehová liwana  kinkamasiyaniyan pi talakaskin chuntiya nalichuwinanaw xTamapakgsin chu xatapaxuwan natlawayaw. Akxni lu kamakgtayaputunaw latamanin litasiya pi Jehová nachuna lakaskin. Wa xlakata, ¿liwana lakapastaknita nalichuwinana xalakwan xalaksasti tamakatsin chuna la matlaniya? (1 Cor. 3:9.)

4. ¿Tuku liʼakxilhtit wililh Jesús xlakata nikxni makgxtakgli Dios chu lu lhuwa xlichuwinan?

⁴ Kalakapastakti Jesús, chu lu tlan xliʼakxilhtit xlakata nikxni makgxtakgli Dios chu lu lhuwa xlichuwinan. Maski lhuwa putsastalanika, chuntiya lichuwinalh Dios asta akxni makgnika (Juan 18:36, 37). Asta akxni xtalakatsuwima kilhtamaku namakgnikan, tlakg skujli xlakata xkamakgtayaputun latamanin nalakgapaskgo Jehová.

5. Chuna la kxliʼakxilhtit higuera, ¿tuku tlawalh Jesús?

⁵ Otoño xla kata 32, Jesús lichuwinalh parábola xla chatum chixku tiku xkgalhi kgantum higuera kxtachanan nema akgtutu kata ni tsinu maxkilh xtawakat. Akxni xmalana wa pi xtankamika, xkuentajtlawana skilh kilhtamaku xlakata xwilinika abono (kalikgalhtawakga Lucas 13:6-9). Asta ama kilhtamaku kaj ni lhuwa tiku litaxtukgolh kstalaninanin Jesús. Chuna la limasiyalh kxliʼakxilhtit, kʼuma ni lhuwa kilhtamaku nema xkgalhi, max akgchaxan papaʼ, tlakg lhuwa lichuwinalh Dios kJudea chu kPerea. Chu akxni ni lhuwa kilhtamaku xtsankga namakgnikan kalakgtasalh judíos tiku ni «nkgaxmatkgo[lh]» (Mat. 13:15; Luc. 19:41).

6. ¿Tuku xlakata tlakg nalichuwinanaw Dios?

⁶ Xlakata lu talakatsuwinit xlisputni uma kakilhtamaku, lu xlakaskinka tlakg nalimawakayaw la lichuwinanaw Dios (kalikgalhtawakga Daniel 2:41-45). ¡Lu lanka talakgalhaman xtatayananin Jehová nawanaw! Unu kKatiyatni kajwatiya akinin tiku tlan kamaxkiyaw xaxlikana takgalhkgalhin latamanin nema nalakkaxtlawa xtaʼakglhuwitkan. Nina makgas, chatum tiku tsokga periódico wa pi takgalhskinin «¿Tuku xlakata kaʼakgspula tuku nitlan tiku tlan likatsikgo?» nila takgalhti. Kstalaninanin Cristo, Dios kinkawaninitan nakaliniyaw xtakgalhtin takgalhskinin Biblia putum latamanin tiku nakgaxmatputunkgo chu uma lanka talakgalhaman. Lhuwa tuku xlakata «naliakgpuwantiya[w] spiritu» xlakata tlan natlawayaw taskujut nema lakgayaw (Rom. 12:11). Xlakata kgalhiyaw xtasikulunalin Dios, chuna la lhuwa nalichuwinanaw nakamakgtaya latamanin nalakgapaskgo chu napaxkikgo.

7, 8. ¿La malanki Jehová tuku akinin makgxtakgaw?

⁷ Chuna la limasiya tuku titaxtulh apóstol Pablo, xlakata la lichuwinanaw Dios akinin na tlan “ni xaklhtataw” chu “xakkilhtsinkstamaw” (2 Cor. 6:5). Uma tachuwin masiya tuku wamputun, wi tuku namakgxtakgaw, chu max nakinkamalakapastakayan precursores tiku pulana wilikgo kxlatamatkan nalichuwinankgo Dios chu chuntiya naskujkgo. Na kalakpuwanti misioneros tiku putum xkilhtamaku limaklakaskinkgo xlakata nalichuwinankgo Dios kʼatanu países (Filip. 2:17). ¿Chu tuku nawanaw xlakata lakgkgolotsin tiku min kilhtamaku ni wayankgo o ni lhtatakgo xlakata nakakuentajtlawakgo xborrego Jehová? Chu na wilakgo natalan tiku linkgo lhuwa kata chu tatatlakgo nema lu liskujkgo xlakata naʼankgo kputum tamakxtumit chu lichuwinankgo Dios. Lu tlan limakgkatsiyaw akxni kalakapastakaw putum uma natalan tiku wi tuku makgxtakgkgonit. Tuku tlawakgo lakgpalikgo tuku lakpuwankgo amakgapitsin xlakata la lichuwinanaw Dios.

⁸ Akgtum carta nema kamalakgachanika periódico Boston Target, xla Lincolnshire (Reino Unido), chatum tiku likgalhtawakga wan: «Latamanin makgatsankgatilhamakgo takanajla nema kgalhikgo [...]. ¿Tuku tlawakgo putum kilhtamaku tiku pulalinkgo  umakgolh pusikulan? Xlakan ni tlawakgo la Cristo tiku kaputsa latamanin [...]. Tasiya pi kajwatiya xtatayananin Jehová kamakgtayaputunkgo latamanin, xlakata ankgo kaputsakgo chu lichuwinankgo tuku xaxlikana». Kʼuma kakilhtamaku niku latamanin putsakgo tuku kgalhiputunkgo, akxni akinin wi tuku makgxtakgaw uma malanki kiDioskan Jehová (Rom. 12:1).

9. ¿Tuku nakinkamakgtayayan chuntiya lhuwa «natlawaputun[aw] ntu xatlan tatlaw»?

⁹ Pero ¿tuku natlawayaw komo akxilhaw pi nialh lhuwa lichuwinamaw Dios? Tlan nalakapastakaw la Jehová limaklakaskin la lichuwinamaw xtukuwani (kalikgalhtawakga Romanos 10:13-15). Talakgmaxtut nakgalhikan komo naputsakan xtukuwani Jehová chu nakanajlanikan, pero niti chuna natlawa komo ni lichuwinanaw. Akxni katsiyaw uma chuntiya lhuwa «natlawaputun[aw] ntu xatlan tatlaw» chu tlakg nalichuwinanaw xalakwan xalaksasti xla xTamapakgsin Dios.

10. ¿Tuku xlakata tlan nawanaw pi xatlan kintayatkan tlawa pi tiku kinkaʼakxilhkgoyan natalakatsuwinikgo Jehová?

¹⁰ Maski lu xlakaskinka nalichuwinanaw Dios, ni kajwatiya uma nakamakgtaya latamanin xlakata natalakatsuwinikgo. Tuku na nakamakgtaya natalakatsuwinikgo Dios wa kintayatkan. Pablo lichuwinalh tuku lu xlakaskinka akxni tsokgli: «Ti ni xati nakmaxkiyaw nkilhtamaku naliʼakgchakgxkgoy, lakimpi ti ni naliʼakgsan nkintaskujutkan» (2 Cor. 6:3). Chuna la lichuwinanaw chu kintayatkan malanki xtamasiyat Dios, chu lakgatikgo amakgapitsin (Tito 2:10). Wa xlakata makglhuwa katsiyaw tuku tlan kitaxtu akxni latamanin akxilhkgo tlan kintayatkan.

11. ¿Tuku xlakata talakaskin natlawayaw oración chu nalakapastakaw la kintayatkan nakamakgtaya tiku kinkaʼakxilhkgoyan?

¹¹ Maski kintayatkan tlan kamakgtaya latamanin, katsiyaw pi komo nitlan tayat kkgalhiyaw na katlawani tuku nitlan. Wa xlakata  komo wilaw kkimputaskujutkan, kkinchikkan o kʼescuela, kaliskujwi xlakata ni lixkajni nawankan la lichuwinanaw Dios chu kintayatkan. Komo katsiyaw pi talakgalhin chu xtlawaw, lu nitlan tuku xkinkaʼakgspulan (Heb. 10:26, 27). Uma tuku lichuwinanitawa chu oración nakinkamakgtayayan nalakapastakaw tuku tlawamaw chu tuku limasiya kilatamatkan. Chuna la uma kakilhtamaku tlakg nitlan tuku tlawakgo, latamanin tiku tlan likatsikgo tlakg tlan naʼakxilhkgo «pi ni talakxtumikgo tiku tlan likatsi chu tiku lixkajni likatsi, tiku lakskujnani Dios chu tiku nina lakskujnani» (Mal. 3:18). Xlikana, kintayatkan lu xlakaskinka xlakata atanu latamanin tlan natalalimparakgo Dios.

12-14. ¿La kamakgtaya amakgapitsin akxni akinin tayaniyaw tuku nitlan chu tuku lakpuwankgo xlakata la lichuwinanaw Dios? Kalichuwinanti akgtum liʼakxilhtit.

¹² Kʼakgtum carta nema katsokgnanilh kstalaninanin Cristo xalak Corinto, Pablo lichuwinalh pi xtitaxtunit tuku nitlan, tuku tuwa, xmakgsnokgkanit chu xtamaknukanit kpulachin (kalikgalhtawakga 2 Corintios 6:4, 5). Akxni tayaniyaw tuku nitlan titaxtuyaw xlakata kintakanajlakan nakamakgtaya tiku kinkaʼakxilhkgoyan nakatsiputunkgo tuku xaxlikana. Kawiliw akgtum liʼakxilhtit. Nina makgas, tiku ni kinkaʼakxilhputunkgoyan xmasputuputunkgo xtatayananin Jehová kʼakgtum kachikin xla Angola. Xlakata uma, kastiliwilikgolh 2 xtatayananin Jehová chu 30 latamanin tiku xʼankgo kkintamakxtumitkan chu alistalh kamamakxtumikgolh latamanin xlakata xʼakxilhkgolh la xkakgesnokgkan chu xkataxtuni xkgalhnikan uma tiku ni xtlawakgonit tuku nitlan. Nipara lakpuskatin chu kamanan lakgtaxtunikgolh, uma xtlawaputun pi latamanin xpekuankgolh chu niti xkgalhakgaxmatkgolh xtatayananin Jehová. Pero akxni akxilhkgolh uma, ¡lhuwa tiku kaskinikgolh xtatayananin Jehová xkalimakgalhtawakgekgolh Biblia! Lata uma kilhtamaku, la xlichuwinankan Dios tlakg taliwakalh chu kgalhikgolh lhuwa tasikulunalin.

¹³ Uma liʼakxilhtit masiya la kamakgtaya latamanin akxni tayaniyaw tuku nitlan kinkatlawanikanan xpalakata tatayayaw tuku wan Biblia. ¡Max lhuwa tiku tlan talalimparakgolh Dios xlakata Pedro chu amakgapitsi apóstoles ni pekuankgolh! (Hech. 5:17-29.) Kimpalakatakan, tiku kataskujaw o kataʼanaw kʼescuela chu kifamiliajkan max nakatsinikgo xaxlikana xlakata naʼakxilhkgo la tatayayaw tuku xaʼakgstitum.

¹⁴ Putum kilhtamaku anankgo natalan tiku kaputsastalanimaka. Akgtum liʼakxilhtit, kʼArmenia, max tipuxum katamaknuka kpulachin xlakata ni makgtanukgolh tuku xalak kakilhtamaku, chu papaʼ nema aku mimakgolh max atanu tiku nakatamaknukan. Anta kʼEritrea, 55 kskujnin Jehová katamaknukanit kpulachin, chu makgapitsi liwaka 60 kata kgalhikgo. Anta kCorea del Sur akgtujun ciento tanumakgo kpulachin xlakata xtakanajla. Anta, liwaka tutumpuxam kata chuna lama. Kaskiniw Jehová pi la tayanimakgo uma skujni tiku nikxni makgxtakgkgo namalanki xtukuwani chu nakamakgtaya tiku paxkikgo tuku xaʼakgstitum natatayakgo xaxlikana takanajla (Sal. 76:8-10).

15. Kawili akgtum liʼakxilhtit nema limasiya pi komo tlawayaw tuku xaʼakgstitum latamanin nakatsiputunkgo xaxlikana.

¹⁵ Xlakata akinin tlawayaw tuku xaʼakgstitum na tlan nakamakgtaya latamanin nakatsinikgo xaxlikana (kalikgalhtawakga 2 Corintios 6:4, 7). Kaʼakxilhwi uma liʼakxilhtit. Kʼakgtum autobús, chatum tala xwilima tumin niku xokgokan boleto akxni chatum tiku xlakgapasa wanilh pi xtawakalh chu ni xmastalh xpasaje, xlakata lakatsu niku xʼama. Tala wanilh pi tuku xatlan xwa pi kxokgolh, maski ni makgat niku xʼama. Akxni uma puskat taktalh kʼautobús, tiku xmatlawanima putlaw kgalhskilh tala: «¿Wix xtatayana Jehová?». Kintalakan wa: «Chuna, ¿tuku xlakata?». Xla kgalhtinalh: «Kkgaxmatli tuku wanti, chu akit kkatsi pi tiku xtatayana Jehová wa latamanin tiku ni akgskgawinankgo chu nikxni kgalhanankgo». Lhuwa  papaʼ alistalh uma chixku talakatsuwinilh uma tala kʼakgtum tamakxtumit chu wanilh: «¿Kilakapastaka? Akit tiku xmatlawanima autobús tiku tachuwinanti. Akxni kakxilhli xatlan mintayat, ktsukulh kkatalikgalhtawakga Biblia xtatayananin Jehová». Xlikana, latamanin katsikgo pi ni kgalhananaw chu uma tlawa pi nakinkalipawankgoyan.

16. 1) ¿Tuku xlakata lakgchan kxnakujkan latamanin tayat la ni lakapala sitsikan, tapaxkit chu talakgalhaman? 2) Kawanti akgtum liʼakxilhtit xlakata tuku katlawanikgo tiku pulalinkgo ni xaxlikana takanajla tiku tapakgsinikgo.

¹⁶ Kamakgtayayaw latamanin nakatsiputunkgo xlakata Dios akxni limasiyayaw pi paxkinanaw, ni lakapala sitsiyaw chu lakgalhamananaw. Max tiku kinkaʼakxilhkgoyan wi tiku tlakg katsiputunkgo xlakata Jehová, tuku lakapastaknit natlawa chu xkachikin. Xtayatkan chu la likatsikgo xaxlikana kstalaninanin Cristo ni kaj masiya pi kgalhikgo akgtum takanajla, nema kaj kaʼakgskgawi latamanin. Makgapitsi tiku pulalinkgo ni xaxlikana takanajla lu lhuwa tumin kgalhikgo xlakata kaʼakgskgawikgonit tiku kapulalinkgo chu laktlawakgonit uma tumin klaklanka chiki chu putlaw, chu wi tiku asta tamawanikgonit xchichi chiki nema kgalhi aire acondicionado. Makgapitsi tiku kaj wankgo pi kstalaninanin Cristo nipara tsinu wi tuku namastakgo chu ni namatajinankgo (Mat. 10:8). Xtachuna la nixatlan xsacerdotes Israel xalamakgasa, «stakyawanankgo kaj xlakata nakaxokgonikan», chu tuku tlakg nitlan masiyakgo tuku Biblia ni wan (Miq. 3:11). Ama lixkajnit tayat niti makgtaya xlakata tlan natalalimparakgo Dios.

17, 18. 1) ¿La lakgachixkuwiliyaw Jehová akxni masiyayaw xtayat? 2) ¿Tuku kinkamatliwakglhan xlakata chuntiya natlawayaw tuku lu xatlan?

¹⁷ Xaxlikana xtamasiykan kstalaninanin Cristo chu tuku lu tlan tlawakgo chan kxnaku latamanin. Chatum puskat tiku lina kata chu ninit xchixku wanilh chatum precursor pi ni xkgalhi kilhtamaku. Wanilh pi akxni tlakgli timbre, xla xtawakanit kʼakgtum escalera chu xlakgpaliputun xfoco kcocina. Xla wanilh: «Ni miʼakstu militlawat uma». Lakgpalinilh foco chu alh. Akxni xkgawasa uma puskat katsilh tuku xlanit tunkun alh putsa tala xlakata xpaxtikatsinilh; titaxtulh kilhtamaku matlanilh nalikgalhtawakga Biblia.

¹⁸ ¿Tuku xlakata chuntiya natlawaya tuku xatlan? Max xlakata katsiya pi akxni lichuwinanaw Dios chu tlawayaw tuku xla lakaskin, lakgachixkuwiyaw chu kamakgtayayaw atanu nalakgtaxtukgo (kalikgalhtawakga 1 Corintios 10:31-33). Lu tlawaputunaw tuku xatlan akxni lichuwinanaw xalakwan xalaksasti chu kgalhiyaw xtayat kstalaninanin Cristo xlakata masiyaniputunaw Dios pi paxkiyaw chu latamanin (Mat. 22:37-39). Komo liwana tlawayaw tuku xatlan, la uku nakgalhiyaw tapaxuwan chu lu tlan namakgkatsiyaw. Nachuna, tlan xatapaxuwan nakgalhkgalhiyaw kilhtamaku akxni putum latamanin natatayakgo xaxlikana takanajla xlakata nalakgachixkuwikgo kiMalakatsukinakan, Jehová.