Lhuwa kachikinin xala makgasa xkamawakakan kkiwi tiku nitlan likatsi xlakata xnikgolh. Anta kRoma xkachiwakakan o xkaxtokgowakakan uma tuku xkalimakgapatikan, chu tlan xtitaxtukgo lhuwa kilhtamaku xlakata xnilh xpalakata tasipanit, xlakata ni xwa chuchut, ni xwayan, chu kkalakgwan xwaka. Xlakata lu limaxana xʼakxilhkgo tiku chuna naniy, chuna xkamakgnikan tiku xtlawakgo tuku tlakg nitlan.

Pero ¿nachuna xtlawakan kxamakgan Israel? Limapakgsin nema maxkika Moisés xwan: «Chu komo naʼanan chatum chixku tiku nakgalhi talakgalhin nema lakgchan namakgnikan, chu makgnikanita, chu mawakanitata kkgantum kiwi, xanin xmakni ni tantaskaka natawaka kkiwi; watiya uma kilhtamaku namaknuya», o naʼakgtapukan (Deut. 21:22, 23). Liwana tasiya pi kilhtamaku nema lichuwinan Tatsokgni xaHebreo pulana xmakgnikan chu alistalh xmawakakan kkiwi.

Xlakata uma Levítico 20:2 wan: «Katiwa chixku xla xkamanan Israel, chu katiwa tiku makgwi kʼIsrael, chu namakamastani Mólek xkamanan, lakgchan namakgnikan. Tiku xalak kachikin naʼaktalamakgnikgo». Chu tiku «skuwanan o tiku wan tuku aku nala» na chuna namakgnikan (Lev. 20:27).

Nachuna kʼDeuteronomio 22:23, 24 likgalhtawakgayaw: «Komo xʼanalh chatum tsumat chu nina tiku tatalakgxtuminit chu skinkanita, chu chatum chixku xtekgsli anta kkachikin chu xtatalakgxtumilh, wixin milimaxtutkan xchatiykan anta niku laktanukan kkachikin chu nakaʼaktalamakgniyatit, chu nanikgo, tsumat xlakata ni skilh tamakgtay, chu chixku xlakata mamaxanilh xpuskat xtalataman. Chuna namalakgsputuya tuku nitlan kmilakgstipan». Akxilhaw pi chuna xlismanikgo nakaʼaktalamakgnikan tiku xtlawakgo tuku tlakg nitlan. *

Deuteronomio 21:23 wan: «Xlakatin Dios lu nitlan litaxtu uma chixku». Wa xlakata nakamawakakan kkgantum kiwi xmakni tiku lu nitlan xlikatsi «xlakatin Dios lu nitlan», uma xkalistakyawakan israelitas.