Anan tuku litasiya pi umakgolh kamanan xalak akgapun xwankgonit. ¿Tuku umakgolh nema limasiya pi chuna?

Génesis 6:2 wan: «Xkaman xaxlikana Dios tsukukgolh akxilhkgo xlaktsuman lakchixkuwin, pi xlakan lakswan xwankgonit; chu tsukukgolh katiyakgo xlakata xlakpuskatin nawankgo, chu tiyakgolh putum tiku xlakan lakgatikgolh».

Anta kTatsokgni xaHebreo, maklakaskin tachuwin «xkaman xaxlikana Dios» chu «xkaman Dios» nema wilakgolh kʼGénesis 6:2, 4; Job 1:6; 2:1; 38:7, chu Salmo 89:6. ¿Tuku masiya umakgolh textos xlakata «xkaman Dios»?

«Xkaman xaxlikana Dios» nema lichuwinan Job 1:6 wa ángeles tiku xtamakxtumikgonit kxlakatin Dios. Chu na anta xwi Satanás, tiku xkilatapulinit kKatiyatni (Job 1:7; 2:1, 2). Anta kJob 38:4-7 wan pi «xkaman Dios pixlanka malankikgolh chu makgapakgxnankgolh» akxni Jehová wililh «tuku tliwakglh litawi» Katiyatni. Umakgolh kamanan wa ángeles, xlakata nina xkatlawakanit latamanin. Chu «xkaman Dios» nema lichuwinan Salmo 89:6 wa ángeles tiku xtawilakgocha kʼakgapun, ni latamanin tiku kgalhikgo xmaknikan.

Wa xlakata, ¿tiku xwankgonit umakgolh «xkaman xaxlikana Dios» nema lichuwinan Génesis 6:2, 4? Xlakata tuku lakputsananiw kBiblia, pi wa ángeles tiku minkgolh kKatiyatni.

Makgapitsi nila kanajlakgo pi analh ángeles tiku tatalakgxtumiputunkgolh lakpuskatin, xlakata Jesús wa pi kʼakgapun ni latatalakgxtumi chu ni tamakgaxtokgkgo (Mateo 22:30). Pero, minit kilhtamaku makgapitsi ángeles chixku litaxtukgolh chu asta wayankgolh chu katakgotnankgolh latamanin (Gén. 18:1-8; 19:1-3). Wa xlakata, tlan wankan pi akxni xlitaxtukgolh la chixku tlan tatalakgxtumikgolh lakpuskatin.

Biblia wan tuku tlan nalikanajlayaw pi chuna lalh. Anta kJudas 6, 7 Xasasti Talaccaxlan, (Coyutla) tamalakxtumikan xtalakgalhinkan lakchixkuwin xalak Sodoma, tiku «xtamakgpaxuwamanalh xmaknikan, y lhuwa wantu niaj xlitlawatkan xwanit xlakan wakg xtatlawamanalh» xtachuna «ángeles wanti [...] taʼakgxtakgmakgalh xatlan xputawilhkan anta niku xkawilikanit». Tuku nachuna tlawakgolh umakgolh ángeles chu latamanin kSodoma wa pi na «xtamakgpaxuwamanalh xmaknikan, y lhuwa wantu niaj xlitlawatkan xwanit xlakan wakg xtatlawamanalh». Atanu texto wa, 1 Pedro 3:19, 20, wan pi umakgolh ángeles katamalakxtumikan tiku ni kgalhakgaxmatnankgolh «akxni xkilhtamaku xlama Noé» (2 Ped. 2:4, 5). Chuna, tuku tlawakgolh ángeles tiku ni kgalhakgaxmatnankgolh kxkilhtamaku Noé tlan tamalakxtumiyaw talakgalhin xla Sodoma chu Gomorra.

Xlakata tuku akxilhwi tlan akgatekgsaw pi «xkaman xaxlikana Dios» nema wi Génesis 6:2, 4, wa ángeles tiku la latamanin litaxtukgolh chu tatalakgxtumikgolh lakpuskatin.

Apóstol Pedro lichuwinalh espíritus tiku «ni kgalhakgaxmatnankgolh akxni Dios xkgalhkgalhinama kxkilhtamaku Noé» (1 Ped. 3:20, TNM). Liwana tasiya pi wa ángeles tiku tatayakgolh Satanás. Judas na lichuwinalh xlakata «ángeles wanti [...] taʼakgxtakgmakgalh xatlan xputawilhkan anta niku xkawilikanit», nema Dios «katamaknunit [...] kpulachin kalimakgakgalhima asta nalakgchan kilhtamaku akxni Dios nakatatlaway kuenta» (Jud. 6, Xasasti Talaccaxlan, [Coyutla]).

¿Tuku ni kgalhakgaxmatkgolh umakgolh ángeles kxkilhtamaku Noé? Akxni nina xmin Munkaklat tlawakgolh xmaknikan la xla latamanin, tuku Dios ni xkawaninit xtlawakgolh (Gén. 6:2, 4). Chu ni kajwatiya uma, asta tatalakgxtumikgolh lakpuskatin, tuku ni xlitlawatkan xlakata ni katlawaka chuna natlawakgo (Gén. 5:2). Umakgolh xalixkajni ángeles tiku ni kgalhakgaxmatnankgolh nakamalakgsputukan akxni Dios lakkaxwilinit. La uku, chuna la tsokgli Judas, Dios «katamaknunit [...] kpulachin» xaʼespíritual.

¿Tukuya kilhtamaku chu la alh kamakatsini Jesús «espíritus tiku xatachin xwilakgolh»? Pedro wan pi chuna lalh akxni Jesús «staknampa kʼespíritu», uma wamputun akxni lakastakwanalh (1 Ped. 3:18, 19, TNM). Na chuna wa, pi Jesús alh kamakatsini. Xlakata limaklakaskilh tachuwin alh kamakatsini, litasiya pi uma tamakatsin mastalh akxni apóstol nina xtsokgnit xapulana xcarta. Wa xlakata, litasiya pi akxni xlakastakwananita, Jesús kamakatsinilh xalixkajni ángeles tuku nitlan xʼama kaʼakgspula. Tuku kamakatsinilh ni xkamaxki takgalhkgalhin, wata xkamakatsini pi xʼamaka kamalakgsputukan (Jon. 1:1, 2). Jesús tlan xkawani pi nakamalakgsputukan, xlakata xtakanajla chu nikxni makgxtakgli Dios, chu xlakata malakastakwanika, xlitasiyanit pi Akgskgawini nila xmapakgsi (Juan 14:30; 16:8-11).

Kilhtamaku nema aku mima, Jesús nakachiwili Satanás chu ángeles tiku makgxtakgkgolh Dios chu nakamalakgacha niku kapulhman (Luc. 8:30, 31; Apoc. 20:1-3). Xlakata nina chin uma kilhtamaku, ángeles tiku makgxtakgkgolh Dios nila tuku tlawakgo. Xlakata nakamalakgsputukan niti la machokgo (Apoc. 20:7-10).