1, 2. ¿Tuku tlan natlawakgo xʼamigos Jehová?

MONIKA chatum kstalanina Cristo wan: «Atsinu ni chan puxamakukitsis kata lata ktamakgaxtokgnitaw. Kinchixku chu akit liwana klalakgapasaw, pero maski lhuwata kilhtamaku klalakgapasaw chuntiya taxtu tuku ni xaklalakgapasniyaw». Xlikana, chuna kaʼakgspula lhuwa tamakgaxtokgat chu amigos.

² Xlikana putum tlakg kalakgapasputunaw tiku kapaxkiyaw. Xliputum tiku katalalinaw, Jehová wa tiku tlakg xlakaskinka. Pero nikxni liwana nalakgapasaw (Rom. 11:33). Nakgalhiyaw putum kilhtamaku xlakata nalipaxuwayaw chu tlakg xlakaskinka naʼakxilhaw xtayat (Ecl. 3:11).

3. ¿Tuku naʼakxilhaw kʼuma artículo?

³ Artículo nema titaxtulha tlawalh tlakg xlakaskinka xakxilhwi pi Jehová tlan talalinkan chu ni laksakpaxkinan. La uku naʼakxilhaw apulaktiy xtayat: lhuwa maskiwinan chu tlan lakapastaknan. Chuna tlakg naʼakgatekgsaw tuku xlakata «[Jehová] wakg akxtum kalakgalhaman lakchixkuwin xala nak katiyatni, kamasini ixlitlan katsi wakg lata tu katlawanit» (Sal. 145:9).

4. ¿Tuku wamputun lhuwa maskiwinankan?

⁴ ¿Tuku wamputun lhuwa maskiwinan? Jesús wa pi: «Xaliwaka ntlan [...] nalilatapaya ntu natakinana, ni xawa ntu namakgamakglhtinana» (Hech. 20:35). Uma tachuwin xlikana masiya tuku kilhchani lhuwa maskiwinankan. Tiku lhuwa maskiwinan masta xkilhtamaku, xlitliwakga chu tuku kgalhi xlakata nakalimakgtaya amakgapitsin chu xatapaxuwan tlawa. Akxni lhuwa maskiwinankan ni wa la xlilanka tuku masta, wata tuku xlakata tlawa (kalikgalhtawakga 2 Corintios 9:7). Ni anan atanu tiku lhuwa tuku maskiwinan la  Jehová, «Dios tiku xapaxuwana» (1 Tim. 1:11, TNM).

5. ¿La limasiya Jehová pi lhuwa maskiwinan?

⁵ ¿La limasiya Jehová pi lhuwa maskiwinan? Xla kamaxki putum tuku maklakaskinkgo latamanin, asta tiku ni kakninanikgo. Chuna la akxilhwa «[Jehová] wakg akxtum kalakgalhaman lakchixkuwin». «Liputum maxkikgoy kxkgakganat chichini hasta maski wa yama chixkuwin wanti laklixkajnit xtapuwankan, na xawa wanti lakwan xtapuwankan, chu na wa makamin sen kxokgspunkan wanti xatlan, chu wanti nitlan xtayat.» (Mat. 5:45, Hua Xasasti Talaccaxlan, TXS, 1999.) Wa xlakata, apóstol Pablo tlan kawanilh tiku ni xkanajlanikgo Dios pi «tlan xla ntu ntlaway xampi kinkamakaminiyan sin xala kakgapun, chu ntlan lananat, chu na kinkalimaxajan listakwan, chu ntapaxuwan» (Hech. 14:17). Xlikana, Jehová lhuwa tuku kamaskiwi latamanin (Luc. 6:35).

6, 7. 1) ¿Tiku kamaxki Jehová tuku maklakaskimakgolh? 2) ¿Tuku liʼakxilhtit masiya pi Jehová kakuentajtlawa xlakskujnin?

⁶ Jehová lu kamaxkiputun tuku maklakaskimakgolh xlakskujnin tiku ni makgxtakgkgo. Mapakgsina David wa: «Akit makgasa klatamanit y chi kkgolunita; pero nak wakg kilatamat nikxni kakxilhnit akgxtakgwilinit Dios chatum ti tanks lamaj, nipara ixkamanan kkakxilhnit para taskiwayan» (Sal. 37:25). Lhuwa kstalaninanin Cristo tiku nikxni makgxtakgnankgo akxilhkgonit la kgantaxtu uma kxlatamatkan. Kaʼakxilhwi akgtum liʼakxilhtit.

⁷ Titaxtunita makgapitsi kata, chatum precursora wanikan Nancy tuwa tuku titaxtulh. Xla lakapastaka: «Xakmaklakaskin 66 dolares xlakata xakxokgolh kirenta lichali chu ni xakkatsi niku xakama tiya tumin. Kwanilh Jehová kintaʼakglhuwit, chu kkalh skuja. Xakskuja kʼakgtum restaurante chu ama tsisni ni xaklakpuwan pi lhuwa xakama makglhtinan propinas, xlakata ama kilhtamaku ni lu xminkgokan. Wa xlakata, lu kaks klilakawa akxni lhuwa tsukulh minkgokan wayankgokan. Akxni ktaxtulh, kputlakgelh tumin xla kimpropinas: 66 dolares xwanit». Nancy liwana xkatsi pi Jehová maskiwilh tuku xmaklakaskima (Mat. 6:33).

8. ¿Tuku tlakg xalanka tamaskiwin mastanit Jehová?

⁸ Tlakg xalanka tamaskiwin nema Jehová mastanit putum tlan makglhtinanaw. ¿Tukuya tamaskiwin? Wa xKgawasa xlakata nalakgmaxtunan. Jesús wa: «Lhuwa chuna mpaxkilh Dios ntachixkuwitat, wa ntilimastalh nchastum xKam, lakimpi xlipaks wa nti nkanajlaniy, ni katitsankgalh, [...] wata nakgalhiy xlatamat wa ntu xaliankgaIhin» (Juan 3:16). Kʼuma texto tachuwin ntachixkuwitat kilhchani putum latamanin tiku namakgamakglhtinankgo tamaskiwin nema Jehová masta. Tiku nakanajlani Jesús namakglhtinankgo «xaxlikana latamat, [...] nitu nakatsankgani[...]» (Juan 10:10). ¿Anan tuku tlakg limasiya pi Jehová lhuwa tuku maskiwinan?

9. ¿La tlan nachuna lhuwa namaskiwinanaw la Jehová?

 ⁹ ¿La tlan nachuna lhuwa namaskiwinanaw la Jehová? Xtachuna la xla «wa nti xataxajni nkinkamaxkiyan xlipaks nkatuwa ntu lilatamayaw» chu nalipaxuwayaw, akinin «na ni anan talakgkatsan nalimakgtayanan[aw]» tuku kgalhiyaw chu xlakan tlan napaxuwakgo (1 Tim. 6:17-19). Lu tlan limakgkatsiyaw akxni kamaskiwiyaw tiku kapaxkiyaw chu tiku wi tuku maklakaskimakgolh (kalikgalhtawakga Deuteronomio 15:7). ¿Tuku tlan natlawayaw xlakata lhuwa tuku namaskiwinanaw? Wilakgolh kstalaninanin Cristo tiku chuna tlawakgo: akxni wi tuku kamaskiwikan, xlakan putsakgo atanu tiku na tlan xmaskiwikgolh. Kcongregación anankgo natalan tiku lhuwa maskiwinankgo.

10. ¿La tlan namaskiwinanaw?

¹⁰ Kintachuwinkan, tuku tlawayaw,  akxni mastayaw kinkilhtamakujkan, kilitliwakgakan na wa tuku kamaskiwiyaw nema kamakgtaya chu kamatliwakglha amakgapitsin (Gál. 6:10). Xlakata nakatsiyaw komo chuna tlawamaw kakinkakgalhskinkan: «¿Akxilhkgo amakgapitsin pi klimaxtu kilhtamaku xlakata nakkakgaxmatni tuku lilakgaputsakgo? Komo wi tiku kiskini naktatlawa akgtum taskujut o wi niku kimalakgacha, ¿kwani pi nakan komo kmatlani? ¿Tuku kilhtamaku kwanilh chatum tala o tiku xalak kifamilia nema na watiya takanajla kgalhi pi lu tlan tuku tlawalh?». Xlikana, akxni lismaniyaw maskiwinanaw tlawa pi tlakg natalakatsuwiniyaw Jehová chu tiku kapaxkiyaw (Luc. 6:38; Prov. 19:17).

11. ¿La tlan lhuwa wi tuku namaskiwiyaw Jehová?

 ¹¹ Nachuna tlan lhuwa tuku namaskiwiyaw Jehová. Biblia kinkawaniyan: «Kalikakni Jehová wantuku laklanka xtapalh kgalhiya» (Prov. 3:9). Uma «wantuku laklanka» wa kinkilhtamakujkan, kilitliwakgakan,  chu tuku kgalhiyaw nema tlan namastayaw xlakata xtaskujut. Asta tiku laktsujku na tlan nakatsinikgo lhuwa namaskiwikgo Jehová. Chatum tlat wanikan Jason wan: «Akxni kmastayaw kintuminkan kPukgalhtawakga xla xTatayananin Jehová, kmastayaw talakaskin pi laktsu kinkamankan kamujukgolh xtuminkan kcaja xalak congregación. Lu lakgatikgo, chu xlakan wankgo, kitaxtu la wi tuku maxkimakgolh Jehová». Komo kamanan nakatsinikgo tapaxuwan nema tamakgkatsi akxni wi tuku maxkiyaw Jehová, akxni nastakkgo chuntiya lhuwa tuku namaskiwikgo (Prov. 22:6).

12. ¿Tuku kilhchani tlan lakapastaknankan?

¹² Atanu xatlan xtayat Jehová wa tlan lakapastaknan. ¿Tuku kilhchani uma tayat? «Xatlan talakapastakni.» (Tito 3:1, 2, TXS, 1999.) Tiku tlan lakapastaknan ni putum kilhtamaku xafuerza wan pi natatlawa chuna la tatsokgnit klimapakgsin chu nipara tsinu lakgpaliputun komo natalakaskin. Wata, tlan kalikatsini amakgapitsin chu akxilha tuku titaxtumakgolh. Kakgaxmatni chu akxni matlani lakgpali chu tlawa tuku xlakan wankgo.

13, 14. 1) ¿La limasiya Jehová pi liwana lakapastaknan? 2) Xlakata uma tayat, ¿tuku kinkamasiyaniyan tuku tlawalh Jehová xpalakata Lot?

¹³ ¿La limasiya Jehová uma tayat? Akxilha tuku makgkatsikgo xlakskujnin chu min kilhtamaku masta talakaskin katlawakgolh tuku xlakan skinkgo. Kaʼakxilhwi akgtum liʼakxilhtit. Akxni lakpuwa namasputu Sodoma chu Gomorra, liwana wanilh Lot pi xʼalh kasipijni. Pero, max wi tuku xlakata Lot tasaskinilh pi xmaxkilh talakaskin alakatanu xʼalh. Kalilakpuwaw uma: ¡Lot skinilh pi xlakgpalilh tuku wanilh Jehová! (Kalikgalhtawakga Génesis 19:17-20.)

¹⁴ Max tlan xwaw pi Lot ni lu tliwakga xwi xtakanajla o ni xkgalhakgaxmatnan. Xlakata Jehová tlan xlakgmaxtulh lata niku xtawilalh, wa xlakata xtapekua Lot ni xlilat xwanit. Pero, xla xpekuama. Lot chuna xmakgkatsima chu Jehová maxkilh talakaskin xʼalh niku kskinima maski xlakapastaknit namasputu uma kachikin (kalikgalhtawakga Génesis 19:21, 22). Akxilhaw pi Jehová lakgpali tuku talakaskin chu liwana lakapastaknan.

15, 16. ¿La limasiyalh Limapakgsin nema maxkika Moisés pi Jehová lu tlan lakapastaknan? (Kaʼakxilhti dibujo nema wi kpágina 12.)

¹⁵ Kaʼakxilhwi atanu liʼakxilhtit, uma wi kLimapakgsin nema maxkika Moisés, chu masiya pi Jehová liwana lakapastaknan. Komo chatum israelita ni xkgalhi lhuwa tumin chu ni la xmakamasta tantum borrego o cabrito, Jehová xmakglhtinan tantiy palomas o pichones. Pero ¿komo xlikana ni xkgalhi tumin chu nipara uma tlan xmasta? Akxni chuna xla, xkamaxki talakaskin xmastakgolh tsinu harina. Kaʼakxilhwi uma tuku lu xlakaskinka: ni kaj katuwa harina, wata «xasmatanka harina», nema tlakg xatlan, xtachuna la nema xkamaxkikan tiku tlakg xlakaskinka xminkgo kalakgapaxialhnan (Gén. 18:6). ¿Tuku xlakata uma lu xlakaskinka? (Kalikgalhtawakga Levítico 5:7, 11.)

¹⁶ Kalakpuwaw pi akinin xtachuna israelitas nema ni kgalhiyaw tumin. Akxni chanaw ktabernáculo kaj linaw tsinu harina xlakata namakamastayaw, chu akxilhaw pi amakgapitsi israelitas tiku kgalhikgo tumin liminkgo wakax. Max xlimaxanaw xlakata kaj linaw tsinu harina kkintamakamastankan. Pero lakapastakaw pi Jehová xlakaskinka akxilha kintamakamastankan. ¿Tuku xlakata? Xlakata Jehová kinkaskiniyan pi harina tlakg xatlan nawan. Xtachuna la xkawanilh israelitas tiku ni lu xkgalhikgo tumin: «Kkatsi pi ni la mastayatit xtachuna la amakgapitsi, pero kkatsi pi kimaxkipatit tuku tlakg xatlan kgalhiyatit». Xlikana, Jehová limasiya pi lu tlan lakapastaknan akxni  akxilha tuku tlan tlawakgo xlakskujnin (Sal. 103:14).

17. ¿Tukuya taskujut liwana katsiyaw pi Jehová makgamakglhtinan?

 ¹⁷ Lu tlan limakgkatsiyaw xlakata  Jehová lu tlan lakapastaknan chu makgamakglhtinan putum tuku tlawayaw xliputum kinakujkan (Col. 3:23). Constance tala xalak Italia nema lina kata wa: «Tuku tlakg klakgatinit kkilatamat wa nakkalitachuwinan amakgapitsin xlakata kiMalakatsukina. Wa xlakata chuntiya klichuwinan Dios chu kkamakgalhtawakge latamanin. Min kilhtamaku klilipuwan xlakata kintajatat ni kimaxki talakaskin tlakg naktlawa, pero kkatsi pi Jehová kimpaxki chu katsi tuku tlan ktlawa chu lu xlakaskinka akxilha».

18. Kalichuwinanti pulaktum niku natlatni tlan natlawakgo la Jehová.

¹⁸ ¿La tlan nalakapastaknanaw la  Jehová? Kalakapastakwi amakgtum tuku tlawalh xpalakata Lot. Jehová tlan ni xtilakgpalilh tuku xlimapakgsinit; maski chuna, kgaxmatli tuku wanilh chu maxkilh talakaskin xtlawalh tuku skinilh. Komo natlatni akinin, ¿tlan natlawayaw la xliʼakxilhtit, akxni kgaxmataw tuku kinkaskinikgoyan kinkamanankan chu akxni xlilat, tlan kamaxkiyaw talakaskin natlawakgo tuku lakaskinkgo? La Atalaya 1 xla septiembre kata 2007 lichuwinalh pi makgapitsi natlatni mastakgo talakaskin pi xkamanankan kawankgolh la makgkatsikgo xlakata limapakgsin nema anan kchiki. Akgtum liʼakxilhtit, natlatni laksakkgo tuku hora nataspitkgo kchiki, xlakata wa kgalhikgo limapakgsin. Pero natlatni kstalaninanin Cristo max nakgaxmatkgo tuku xkamanan lakpuwankgo xlakata uma. Max namin kilhtamaku nalakgpalikan hora nema nachinkgo, komo ni lakatsala tastakyaw xalak Biblia. Max natlatni naʼakxilhkgo pi akxni kuenta tlawakgo tuku lakapastakkgo kamanan xlakata tuku hora nachinkgo kchiki, xlakan katsikgo tuku xlakata chuna kawanimaka chu tlakg kgalhakgaxmatkgo.

19. ¿La tlan nachuna nalakapastaknankgo lakgkgolotsin la Jehová?

¹⁹ Lakgkgolotsin xalak congregación lu liskujkgo xlakata nalakapastaknankgo la Jehová akxni akxilhkgo tuku titaxtumakgolh natalan. Kalakapastakwi pi xla lhuwa xtapalh akxilhli xtamakamastan israelitas tiku lu nitu xkgalhikgo. Kkinkilhtamakujkan, makgapitsi natalan nila lhuwa horas ankgo lichuwinankgo Dios, max xlakata tatatlakgo o linkgoya kata. Komo lilipuwankgo xlakata uma, tlan namamakgkatsikgo komo lakgkgolotsin nakawanikgo pi Jehová kapaxki xlakata maxkikgo putum tuku tlan matlanikgo (Mar. 12:41-44).

20. ¿Kilhchanima pi tlan lakapastaknanaw komo nialh lu naskujnaniyaw Dios? Kawanti tuku xlakata chuna kgalhtinana.

²⁰ Xlikana ni nalitaʼakgskgawiyaw, tlan lakapastaknankan ni wamputun nalakpuwanaw pi maski nialh lu naskujniyaw Dios xlakata kiakstukan nakinkamakgapaxuwakanan (Mat. 16:22). Ni lhkititnamputunaw chu alistalh nawanaw pi kaj tlan lakapastaknanaw. Wata kimputumkan lu naliskujaw xlakata namakgtayananaw xlakata xTamapakgsin Dios (Luc. 13:24). Talakaskin pi uma akgtiy tastakyaw akxtum xlakaskinka nakaʼakxilhaw. Pero nachuna chuntiya naskujniyaw Dios. Na kalakapastakwi pi Jehová nikxni kinkaskiniyan tuku akinin nila maxkiyaw. Liwana kakatsiw: xla lu lipaxuwa akxni maxkiyaw tuku tlakg xatlan kgalhiyaw. ¿Ni xlikana pi lu paxuwayaw xlakata skujnimaw chatum Malana tiku lu xlakaskinka akxilha tuku tlawayaw chu tlan lakapastaknan? Kʼartículo nema aku mima naʼakxilhaw apulaktiy tuku kinkamasiyaniyan lu xatlan xtayat Jehová (Sal. 73:28).