1, 2. 1) ¿Tuku xlakata lu xlakaskinka kaʼakxilhaw amigos tiku ni makgxtakgnankgo chu tapatinankgo? 2) ¿Tukuya takgalhskinin nakakgalhtiyaw?

¿LA XWANTI wix pi likatsi xaxlikana amigo? Chatum kstalanina Cristo wanikan Ashley wa: «Akit klakpuwan pi chatum xaxlikana amigo, wa tiku putum kilhtamaku makgtayayan chu tapatiyan akxni tlawaya tuku nitlan». Kimputumkan lu xlakaskinka kaʼakxilhaw amigos tiku ni makgxtakgnankgo chu tapatinankgo. Kinkamatliwakglhan chu tlawakgo namakgkatsiyaw pi kinkapaxkikgoyan (Prov. 17:17).

² Jehová wa Amigo nema kgalhiyaw tiku nikxni makgxtakgnan chu tapatinan. Salmista chuna wa: «Porque wix tlan katsiya y matsankgenana, snun kalakgalhamana [o kgalhiniya “tapaxkit nema ni makgxtakgnan”] wakg ti takilhaniyan» (Sal. 86:5). ¿Tuku kilhchani ni makgxtakgnankan chu lakgalhamanankan? ¿La limasiya Jehová uma laktlan tayat? ¿Chu la nachuna natlawayaw xliʼakxilhtit? Xtakgalhtin umakgolh takgalhskinin natlawa pi tlakg napaxkiyaw kiʼAmigokan, Jehová, chu tlakg tlan nakatalalinaw kinatalankan (1 Juan 4:7, 8).

3. ¿Tuku kilhchani ni makgxtakgnankan?

³ Ni makgxtakgnankan wa lu xatlan tayat nema kilhchani paxkinankan chu nikxni makgatsankganankan. Tiku ni makgxtakga achatum, ni kaj min kilhtamaku chuna tlawa, wata ni makgxtakga xlakata paxki chu ni tamakgatlini maski tuwa tuku natitaxtu. Ni anan atanu la Jehová «tiku ni Makgxtakgnan» (Apoc. 16:5, TNM).

4, 5. 1) ¿La limasiya Jehová pi ni makgxtakgnan? 2) ¿La kinkamatliwakglhan nalilakapastakaw pi Dios ni makgxtakgnan?

⁴ ¿La limasiya Jehová pi ni makgxtakgnan? Xlikana, nikxni kamakgxtakga xlakskujnin tiku ni  makgatsankgananikgo. Mapakgsina David, chuna akxilhli pi Jehová ni makgxtakgnan (kalikgalhtawakga 2 Samuel 22:26). Xla akxilhli pi uma ni kaj tachuwin, xlakata Dios pulalilh, kuentajtlawalh chu lakgmaxtulh akxni tuwa tuku titaxtulh (2 Sam. 22:1). ¿Tuku xlakata Jehová ni xmakgxtakga? Xlakata David «na ni [x]makgxtakgnan». Dios lu xlakaskinka kaʼakxilha xlakskujnin tiku ni makgxtakgnankgo chu xla na ni kamakgxtakga (Prov. 2:6-8).

⁵ Nalilakpuwanaw la Jehová ni makgxtakgnan kinkamatliwakglhan. Chatum tala tiku ni makgxtakgnan wanikan Reed wan: «Lu kimatliwakglha akxni klikgalhtawakga la Jehová makgtayalh David akxni xtitaxtuma tuku tuwa. Putum kilhtamaku makgtayalh, asta akxni xtsalama chu xtatsekga klhuku. ¡Uma lu kimatliwakglha! Kimalakapastaka pi maski lu tuwa tuku naktitaxtu, Jehová nakimakgtaya komo ni nakmakgatsankganani». Putum nachuna makgkatsiyaw (Rom. 8:38, 39).

6. 1)¿La atanu limasiya Jehová pi ni makgxtakgnan? 2)¿Chu la kinkamakgtayayan xlakskujnin?

⁶ ¿La atanu limasiya Jehová pi ni makgxtakgnan? Pulaktum, chuntiya makgantaxti xlimapakgsin. Xla kinkawaniyan: «Asta akxni [tiku] kgolon akit Watiya» (Is. 46:4). Tuku lakpuwan natlawa putum kilhtamaku takilhti kxlimapakgsin nema ni talakgpali xlakata tuku tlan chu tuku nitlan (Mal. 3:6). Nachuna, makgantaxti xtachuwin (Is. 55:11). Xlakata ni makgxtakgnan litamakgtayayaw xlakskujnin, akxni lu liskujaw nakgalhakgaxmataw xlimapakgsin, liwana katsiyaw pi xla nakinkasikulunatlawayan chuna la wanit (Is. 48:17, 18).

7. Kawanti la xtachuna Dios ni namakgxtakgnanaw.

 ⁷ ¿La ni namakgxtakgnanaw la  Jehová? Pulaktum, nakamakgtayayaw tiku tuwa titaxtumakgolh (Prov. 3:27). Max lakgapasaw chatum tala tiku xlajwanama xlakata tatatla, xfamilia sitsinikgo o xlakata wi tuku nitlan tlawalh. ¿Tlan xtalakatsuwiniw chu xwaniw «laktlan tachuwin, tachuwin nema matliwakglhnan»? (Zac. 1:13.) * Chuna nalimasiyayaw pi xaxlikana amigos chu ni makgxtakgnanaw, “tiku tlakg tlan talalinkan nixawa xtala” (Prov. 18:24).

8. ¿La xtachuna Jehová ni namakgxtakgnanaw kkintamakgaxtokgatkan chu kʼatanu tuku tlawayaw?

⁸ Na natlawayaw la Jehová akxni ni nakamakgxtakgaw tiku kapaxkiyaw. Komo tamakgaxtokgnitawa, liwana katsiyaw pi ni namakgxtakgaw tiku tamakgaxtokgaw (Prov. 5:15-18). Wa xlakata, nipara tsinu tlawayaw tuku max nakinkamatlawiyan talakgxtumit nema ni xlitatlawat (Mat. 5:28). Nachuna, ni kamakgxtakgaw kinatalankan akxni ni akgskgawinanaw o nitlan kalichuwinanaw chu ni malakgatumiyaw nixatlan tachuwin chu asta nipara kgaxmatputunaw (Prov. 12:18).

9, 10. 1) ¿Tiku ni makgxtakgputunaw maski tuwa tuku natitaxtuyaw? 2) ¿Tuku xlakata max tuwa namakgkatsiyaw nakgalhakgaxmataw xlimapakgsin Jehová?

⁹ Pero tlakg ni makgxtakgputunaw wa Jehová. Wa xlakata lu naliskujaw nalakapastakaw la xla lakapastaka, uma wamputun napaxkiyaw tuku xla paxki chu naxkajniyaw tuku xla xkajni, chu nalilatamayaw (kalikgalhtawakga Salmo 97:10). Akxni tlakg chuna lakapastakaw chu makgkatsiyaw la Jehová, tlakg nakgalhakgaxmatputunaw xlimapakgsin (Sal. 119:104).

¹⁰ Namin kilhtamaku tuwa namakgkatsiyaw  nakgalhakgaxmataw xlimapakgsin Dios. Max natalakaskin lu naliskujaw xlakata ni namakgatsankgananiyaw. Chuna titaxtukgo makgapitsi kstalaninanin Cristo tiku tamakgaxtokgputunkgo pero nina tekgskgo kxkachikin Jehová tiku xlilat (1 Cor. 7:39). Chatum tala tsumat max lu nawanikgo tiku ni xtatayana Jehová kxtaskujut wi tiku katatamakgaxtokgli. Max min kilhtamaku akstu wi makgkatsi, pero liwana lakapastaknit ni namakgatsankganani Dios. ¿Ni xlikana pi lu xatlan liʼakxilhtit akxilhaw tiku ni makgxtakgnankgo? Xlikana, Jehová nakasikulunatlawa tiku ni makgatsankgananinkgo maski tuwa tuku titaxtukgo (Heb. 11:6).

11. ¿Tuku wamputun pi Jehová tapatinamputun?

¹¹ Atanu lu xalilakgatit xtayat Jehová wa pi tapatinamputun. ¿Tuku kilhchanima uma tayat? Kilhchanima pi tlan tapatikan tiku tlawanit tuku nitlan akxni tlan chuna tlawakan. Ni kajwatiya kilhchanima natapatiyaw o nawanaw pi nitu tlawalh, wata nialh nalisitsiniyaw. Tatsokgni kinkawaniyan pi Jehová “kamatsankgenani” tiku xlikana makgxtakgkgo tuku nitlan xtlawamakgolh (Sal. 86:5).

12. 1) ¿La limasiya Jehová pi tapatinamputun? 2) ¿Tuku wamputun pi tiku lakgalhinan “xapanikan” xtalakgalhin?

¹² ¿La limasiya Jehová pi lu tapatinamputun? Akxni chuna tlawa putum tapatinan, chu nialh lakapastaka (Is. 55:7). ¿Tuku limasiya pi Jehová nialh lakapastaka talakgalhin? Kalakapastakwi tuku wan Hechos 3:19 (kalikgalhtawakga). Apóstol Pedro kawanilh: «Chi wampi katalakgaspittayatit nchu, na katalakgpalitit kmintapuwankan». Akxni tiku lakgalhinalh chu xlikana nitlan limakgkatsi tuku tlawalh, liwana lakkaxwili nialh chuna natlawapara (2 Cor. 7:10, 11). Nachuna, makgxtakga tuku nitlan  xtlawama chu wata tsuku tlawa tuku lakgati Dios. Komo tiku xkgaxmatnimakgolh Pedro nitlan xlimakgkatsikgo tuku xtlawakgonit, ¿tuku tlan xmakgamakglhtinankgo? Chuna la apóstol kawanilh pi «nataxapay» xtalakgalhinkan. Uma tachuwin minacha xagriego chu wamputun pi «xapakan xlakata namapanukan». Wa xlakata akxni Jehová tapatinan, xapa chu nialh lakapastaka talakgalhin (Heb. 10:22; 1 Juan 1:7).

13. ¿Tuku wamputun tachuwin «nialh naklakapastaka xtalakgalhinkan»?

¹³ ¿Tuku limasiya pi akxni Jehová tapatinan nialh lakapastaka? Kaʼakxilhwi tuku wa palakachuwina Jeremías xlakata xasasti talakkaxlan nema katatlawaka tiku naʼankgo kʼakgapun, chu tlawa pi nakatapatikan xtalakgalhinkan tiku kanajlanikgo talakgmaxtut (kalikgalhtawakga Jeremías 31:34). Jehová wa: «Nakkatapati tuku nitlan tlawakgolh, chu nialh naklakapastaka xtalakgalhinkan». Chuna la akxilhaw, xla liwana kinkawaniyan pi akxni kinkatapatiyan nialh lakapastaka nakinkamalakgaxokgeyan. Ni kinkamalakapastakniyan xlakata nitlan nalimakgkatsiyaw, wata nialh lakapastaka kintalakgalhinkan (Rom. 4:7, 8).

14. ¿La kinkamatliwakglhan nalilakapastakaw la tapatinan Jehová? Kamasta akgtum liʼakxilhtit.

¹⁴ Lu tlan limakgkatsiyaw lilakapastakaw la Jehová tapatinan. Makgasa, chatum tala tiku namapakuwiyaw Elena tamakxtuka kcongregación, chu akglhuwa kata titaxtulh makgamakglhtinamparaka. Xla lakapastaka: «Xaklakpuwan chu xakkawani amakgapitsin pi Jehová xkintapatinit, pero makgat xwi xakmakgkatsi chu xaklakpuwan pi amakgapitsin tlakg xtalakatsuwinikgo chu tlakg tlan xtalalinkgo». Pero Elena tlan limakgkatsilh akxni likgalhtawakgalh chu lakputsananilh tuku wan Biblia akxni lichuwinan la Jehová tapatinan. Xla wan: «Kmakgkatsilh xtapaxkit chu xtalakgkatsan chuna la nikxni xakmakgkatsinit». Chu uma lu tlan mamakgkatsinilh: «Ni nalakpuwanaw pi putum kilatamatkan nalinaw tuku nitlan tlawaw nema Jehová kinkatapatinitana». * Elena wan: «Kʼakgatekgsli pi ni xlikana liwana xakkanajlanit pi xla tlan xkintapatilh putum tuku xaktlawanit; xaklakpuwan pi xakama lin uma takuka putum kilatamat. Kkatsi pi natalakaskin kilhtamaku, pero uku kmakgkatsi pi tlan ktalakatsuwini Jehová, chu kitaxtu la kimapanunika tsinka takuka». ¡Lu paxkinan chu lakgalhamanan Dios tiku skujniyaw! (Sal. 103:9.)

15. ¿La tlan natapatinanaw la tlawa Jehová?

¹⁵ Na tlan chuna natlawayaw la Jehová akxni lakpuwanaw pi nalatapatiyaw akxni chuna kilitlawatkan (kalikgalhtawakga Lucas 17:3, 4). Kalakapastakwi pi akxni Jehová tapatinan nialh lakapastaka kintalakgalhinkan chu ni kinkalimalakgaxokgeyan. Nialh nalakapastakaw tuku nitlan kinkatlawanikan komo nikxni nalichuwinanaw.

16. 1) Kawanti tuku xlakata akxni tapatinanaw ni wamputun pi tlan akxilhaw tuku tlawalh o mastayaw talakaskin pi chuntiya kakinkatlawanin. 2) ¿Tuku natlawayaw komo lakaskinaw pi Dios kakinkatapatin?

 ¹⁶ Akxni tapatinanaw ni wamputun pi tlan akxilhaw tuku tlawalh o mastayaw talakaskin pi chuntiya kakinkatlawanin. Wata wamputun pi ni putum kilhtamaku nasitsiniyaw. Lu xlakaskinka nakatsiyaw pi xlakata Dios nakinkatapatiyan, talakaskin na natapatinanaw (Mat. 6:14, 15). Jehová tlan likatsi chu lakapastaka  pi «akin pokgxni» (Sal. 103:14). ¿Ni xlikana pi nachuna nalikatsiyaw akxni wi tiku nitlan kinkatlawaniyanan chu xlikana natapatinanaw? (Efes. 4:32; Col. 3:13.)

17. Komo chatum tala nakinkatlawaniyan tuku nitlan, ¿tuku nakinkamakgtayayan ni putum kilhtamaku nasitsiniyaw?

 ¹⁷ Min kilhtamaku tuwa makgkatsiyaw natapatinanaw. Asta makgapitsi xatalaksakni kxapulana siglo tuwa makgkatsikgolh nalatapati (Filip. 4:2). Komo chatum tala nakinkatlawaniyan tuku nitlan, ¿tuku nakinkamakgtayayan ni putum kilhtamaku nasitsiniyaw? Kaʼakxilhwi tuku titaxtulh Job. Xla lu nitlan limakgkatsilh akxni Elifaz, Bildad chu Zofar limawakakgolh tuku nitlan (Job 10:1; 19:2). Alistalh, Jehová kastakyawalh umakgolh nixaxlikana amigos, kawanilh pi xlakgankgolh Job chu xmastakgolh tamakamastan xlakata xtalakgalhinkan (Job 42:7-9). Pero na skinilh Job pi wi tuku xtlawalh: xkapalakaskilh kxoración. Akxni Job chuna tlawalh, Jehová sikulunatlawalh xlakata tapatinalh (kalikgalhtawakga Job 42:10, 12, 16, 17). ¿Tuku kinkamasiyaniyan uma? Akxni tlawayaw oración xpalakata tiku kinkatlawanin tuku nitlan nakinkamakgtayayan ni putum kilhtamaku nasitsiniyaw.

18, 19. ¿La natlawayaw chuntiya lu xlakaskinka nakxilhaw la likatsi Jehová?

¹⁸ Xlikana pi lu kinkamakgtayan lakputsananiw makgapitsi xalaktlan xtayat nema litasiya pi Jehová paxkinan. Akxilhwi pi tlan talalinkan, ni laksakpaxkinan, lhuwa maskiwinan, tlan lakapastaknan, ni makgxtakgnan chu tapatinan. Chu uma kaj ni lhuwa tuku akxilhwi. Nakgalhiyaw putum kilhtamaku xlakata tlakg nalakgapasaw Jehová (Ecl. 3:11). Nachuna wanaw la apóstol Pablo tiku tsokgli: «¡Dios kgalhi lhuwa tasikulunalin nema mastay chu xliskgalala chu xtakatsin[!]». Chu nachuna tlan wanaw xlakata xtapaxkit chu akgchaxan xtayat nema akxilhwi (Rom. 11:33, TNM).

¹⁹ Chuntiya kastakli la lu xlakaskinka akxilhaw la likatsi Jehová. Chuna nala komo nalakputsananiyaw xtayat, nalilakpuwanaw chu nalilatamayaw (Efes. 5:1). Nachuna namakgkatsiyaw la salmista tiku kilhtlilh: «Tlakg naktalakatsuwini Dios, wa kimaxki lipaxaw latamat» (Sal. 73:28).