1. 1) ¿Tukuya xtayat Jehová tlan nalakputsananiyaw? 2) ¿La nalitamakgtayayaw nalakputsananiyaw xtayat Jehová?

AKXNI lilakapastaka la likatsi Jehová, ¿tukuya xtayat lakapastaka? Max tapaxkit, xaʼakgstitum, liskgalala chu litliwakga. Pero katsiyaw pi Jehová kgalhi tlakg lhuwa laktlan tayat. Asta tlan xtlawaw lista niku xwiliw liwaka tipuxum tayat, chu umakgolh talichuwinanita kkilikgalhtawakgakan. Kaj kalakpuwanti, la xlilhuwa tuku nakatsiniyaw xlakata xtayat Dios akxni kiakstukan o kfamilia nakgalhtawakgayaw. ¿La nalitamakgtayayaw uma takgalhtawakga? Natlawa pi tlakg napaxkiyaw kinTlatkan xalak akgapun. Chu akxni tlakg napaxkiyaw, tlakg natalakatsuwiniputunaw chu nachuna nalikatsiputunaw (Jos. 23:8; Sal. 73:28).

2. 1) Kawili liʼakxilhtit nema limasiya la tlan tlakg xlakaskinka naʼakxilhaw xtayat Jehová. 2) ¿Tuku naʼakxilhaw?

² Pero ¿tuku wamputun wi tuku xlakaskinka naʼakxilhaw? Naʼakxilhaw xtapalh. Chu uma tsinu tsinu taliwaka. Kawiliw akgtum liʼakxilhtit: xasasti taway nema nikxni kgalhwananitaw, nalakgatiyaw, komo pulana kgankgawananaw la muksun, kgalhwananaw chu alistalh akinin kaxtlawayaw. Nachuna, tlakg xlakaskinka naʼakxilhaw akgtum xtayat Dios komo tlakg nalakgapasputunaw, nalilakapastakaw chu alistalh nachuna nalikatsiputunaw (Efes. 5:1). Uma artículo chu apulaktiy nakinkamakgtayayan tlakg xlakaskinka naʼakxilhaw xtayat Dios nema max ni lu kalakapastakaw. Kʼakgatunu tayat naʼakxilhaw akgtutu takgalhskinin: 1) ¿Tuku kilhchani? 2) ¿La limasiya Jehová? 3) ¿La tlan nalimasiyayaw kkilatamatkan?

3, 4. 1) ¿La likatsi tiku tlan talalinkan? 2) ¿La kinkalimasiyaniyan Jehová pi tlan talalinkan?

³ Pulana kaʼakxilhwi uma tayat. ¿La likatsi tiku tlan  talalinkan? Wa tiku tlan likatsi, chu limaxtu kilhtamaku xlakata tlan natachuwinankan. Akxilhaw pi tlan talalinkan akxni kgaxmataw la chuwinan, la lakawan akxni chuwinan chu atanu.

⁴ ¿La limasiya Jehová uma tayat? Maski xMalakatsukina putum tuku anan, liwana kinkawaniyan pi ni kajwatiya kinkakgaxmatniyan chu kgalhti kiʼoracionkan wata chuna tlawaputun (kalikgalhtawakga Salmo 145:18 chu Isaías 30:18, 19). Tlan natachuwinanaw akxni lakaskinaw, lata niku chu nalakgtalakatsuwiyaw xlakata ni kintikaliwanin (Sal. 65:2; Sant. 1:5). Anta kxTachuwin maklakaskin tachuwin nema tlan akgatekgsaw, niku wan pi lakaskin kalakgtalakatsuwiw. Akgtum liʼakxilhtit, David tsokgli «xlakgastapu Jehová [kin]kaʼakxilhma[n]» chu “xlitliwekge kanikxniwa kinkamakgtayayan” (Sal. 34:15, TNM; 63:8). Palakachuwina Isaías tamalakxtumilh chatum mapuchwayanina akxni wa: «Xmakxpan nakalimastokga borregos; chu nakachaxlin» (Is. 40:11). Kalilakpuwanti uma. Jehová lakaskin pi kalakgtalakatsuwiw la tantum aktsu borrego nema chaxnit xapaxkina xmapuchwayanina. ¡Lu tlan talalinkan uma Tlat! ¿La tlan na nakgalhiyaw uma xtayat?

5. ¿Tuku xlakata xlakaskinka pi lakgkgolotsin namastakgo talakaskin tlan nakatalalinkan?

⁵ Nina makgas kakgalhskinka xtatayananin Jehová xala lakalhuwa continentes: «¿Tukuya tayat tlakg xlakaskinka akxilha nakgalhi chatum kgolotsin xalak congregación?». Lhuwa kgalhtinankgolh: «Pi tlan natalalinkan». Xlikana, putum kstalaninanin Cristo kilikgalhitkan uma tayat, pero lakgkgolotsin tlakg xlakaskinka xlikgalhitkan (Is. 32:1, 2). Chatum tala puskat wa tuku xlakata xlakpuwan pi lu xlakaskinka chatum kgolotsin nakgalhi uma tayat  wa: «Xlakata tlan naklitamakgtaya xatlan tayat, talakaskin tlan naklimakgkatsi akxni naktachuwinan». ¿Akxilhaw tuku xlakata chuna wa? Pero ¿tuku tlawa pi tlan natalalinkan?

6. ¿Tuku talakaskin xlakata tlan nakinkatalalinkanan?

⁶ Pulaktum tuku talakaskin xlakata tlan nakinkatalalinkgoyan wa nakamakgtayaputunaw amakgapitsin. Akxni kgolotsin lilakgaputsa xnatalan chu wi tuku limakgxtakga xpalakatakan, putum akxilhkgo chu asta tiku lakgkgawasanku (Mar. 10:13-16). Carlos, tiku kgalhi 12 kata wan: «Kkaʼakxilha lakgkgolotsin kPukgalhtawakga putum kamakgachipakgo chu wa uma tuku klakgati xpalakatakan». Xlikana, ni kaj talakaskin chatum kgolotsin nawan pi tlan talalinkan; wata talakaskin nalimasiya (1 Juan 3:18). ¿La nalimasiya?

7. ¿Tuku xlakata lu makgtayanan tlan natachuwinankana nawiliya migafete, chu tuku kinkamasiyaniyan uma?

⁷ Kalilakpuwaw uma. Akxni chatum tala xkitaspitma klanka tamakxtumit xaʼalakatanu kachikin xwilinitku xgafete. Tiku kskujma kʼavión akxilhli pi xtatsokgnit «Kamilh mintamapakgsin» chu wanilh: «Chuna, kamilh. Kilichuwinatkan xlakata uma». Alistalh kgalhchuwinankgolh, chu chixku xatapaxuwan makgamakglhtinalh kirevistakan. Chalhuwa akinin chuna kinkaʼakgspulanitan. ¿Tuku xlakata lu makgtayanan tlan natachuwinankana nawiliya migafete? Xlakata kitaxtu la xwaniw latamanin: «Kakintachuwinanti. Kakinkgalhskinti niku kama». Limasiyakgo pi katachuwinamputunaw latamanin xlakata kintakanajlakan. Nachuna, lakgkgolotsin xlimasiyatkan pi kawanimakgolh natalan: «Kakintachuwinanti». ¿La nalimasiyakgo?

8. ¿Tuku nalitasiya pi lakgkgolotsin kinkatachuwinamputunkgoyan, chu la makgkatsikgo natalan?

⁸ Talismanin talakgpali ktanu tanu país, pero nalakalitsinaw, nakamakgachipayaw o nakatachuwinanaw, natalan nakatsikgo pi xlikana kapaxkiyaw. Pero ¿tiku pulana chuna xlitlawat? Kʼakgtum tamakxtumit “Jesús kalakgtalakatsuwilh kaxakgatlilh” xtamakgalhtawakgen (Mat. 28:18, Hua Xasasti Talaccaxlan, TXS, 1999). Nachuna, lakgkgolotsin xala uku wa kalakgtalakatsuwikgo natalan chu katachuwinankgo. ¿La limakgkatsikgo natalan? Chatum precursora tiku kgalhi 88 kata wa: «Akxni lakgkgolotsin xatapaxuwan kimakgamakglhtinankgo kPukgalhtawakga xla xTatayananin Jehová chu tuku kiwanikgo kimatliwakglha, uma tlawa pi tlakg nakkapaxki». Atanu tala puskat tiku ni makgxtakga Dios wa: «Max ni lu xlakaskinka tasiya, pero akit lu xlakaskinka kaʼakxilha pi chatum kgolotsin nakintalitsiyan akxni kchan ktamakxtumit».

9, 10. 1) ¿Tuku lu tlan liʼakxilhtit kinkamaxkiyan Jehová? 2) ¿La tlan nalimaxtukgo kilhtamaku lakgkgolotsin xlakata natachuwinankgo natalan?

 ⁹ Xlikana, niti nakinkatachuwinanan komo ni nalimaxtuyaw kilhtamaku. Jehová kinkawiliniyan lu tlan liʼakxilhtit, xlakata «ni makgat kinkawilanin» (Hech. 17:27). Pulaktum, la tlan nakatachuwinankgo natalan tiku lakgkgawasanku chu tiku laklankata, lakgkgolotsin nalimaxtukgo kilhtamaku akxni nina tsuku chu akxni sputnita tamakxtumit. Chatum precursor wa: «Akxni chatum kgolotsin kinkgalhskin la kwi chu kgaxmata kintakgalhtin, kmakgkatsi pi kimpaxki». Chu chatum tala tiku atsinu ni tipuxamakaw kata skujnanima Jehová wa:  «Lakgkgolotsin tiku limaxtukgo kilhtamaku nakintachuwinankgo akxni sputnita tamakxtumit tlawa pi nakmakgkatsi pi kimpaxkikgo».

¹⁰ Xlikana lakgkgolotsin kgalhikgo atanu taskujut. Maski chuna, xlakaskinka natachuwinankgo natalan ktamakxtumit.

11, 12. 1) ¿Tuku kilhchani ni laksakpaxkinankan? 2) ¿La limasiya Biblia pi Jehová ni laksakpaxkinan?

¹¹ Ni laksakpaxkinan lu xatlan xtayat Jehová. ¿Tuku kilhchani? Wa akxni «niti lakgmakgankan o laksakpaxkikan; akxni akxtum kaʼakxilhaw amakgapitsin». Akxni xlikana ni laksakpaxkinankan pulaktiy tuku tlawakan: la lakpuwankan chu la likatsikan. ¿Tuku xlakata lu xlakaskinka umakgolh? Xlakata tiku ni lakpuwani tuku nitlan achatum, uma natlawa tlan nakalikatsini putum. Anta kTatsokgni xaGriego, tachuwin ni laksakpaxkinan kilhchani «ni makgamakglhtinankan xlakata la tasiya», uma wamputun pi ni kaj nakalaksakpaxkiyaw (Hech. 10:34, Kingdom Interlinear). Tiku ni laksakpaxkinan ni kaj akxilha la tasiya chu tuku kgalhi, wata la likatsi.

¹² Jehová tlakg xatlan liʼakxilhtit xlakata ni laksakpaxkinan. Anta kxTachuwin wan pi «ni [...] laksakpaxkinan» chu «ni tiku laksakpaxki» (kalikgalhtawakga Hechos 10:34, 35, TXS, 1999, chu Deuteronomio 10:17). Uma chuna litasiyalh akxni wi tuku lalh kxkilhtamaku Moisés.

13, 14. 1) ¿Tukuya taʼakglhuwit titaxtukgolh kgalhkitsis xlaktsuman Zelofehad? 2) ¿La limasiyalh Jehová pi ni laksakpaxkinan?

 ¹³ Akxni israelitas xʼamakgolha tanukgo kTiyat nema xKawanikanit Nakamaxkikan, kgalhkitsis laktsuman tiku nina xtamakgaxtokgkgo kgalhikgolh akgtum taʼakglhuwit. Xkatsikgo pi xfamilia chuna la amakgapitsi familias israelitas, na xʼama makgamakglhtinankgo tiyat nema xlakgchan xtlat (Núm. 26:52-55). Chuna la xlismanikan, lakgkgawasan wa xkalakgchan namakglhtinankgo tiyat. Pero Zelofehad xtlatkan, tiku xalak xtribu Manasés, xninita chu ni kgalhilh xlakgkgawasan (Núm. 26:33). Xlakata uma, ¿xʼamaka kamaxkikan uma tiyat atanu xalak familia, chu ni xkamaxkika laktsuman?

¹⁴ Kgalhkitsis laktsuman lakgankgolh Moisés chu kgalhskinkgolh: «¿Tuku xlakata nalakgsputa xtukuwani kintlatkan kxfamilia xlakata ni kgalhilh chatum kgawasa?». Wa xlakata tasaskinikgolh: «Oh, kakilamaxkiw tiyat kxlakgstipankan xnatalan kintlatkan». ¿Tuku tlawalh Moisés? ¿Kawanilh pi nila xlakgpalikan limapakgsin? Nichuna, wata «linilh kxlakatin Jehová tuku xlakan xwanimakgolh» (Núm. 27:2-5). ¿Chu tuku wa Jehová? Xla wanilh: «Xlaktsuman Zelofehad  lu tlan chuwinamakgolh. Milimaxkit tuku kalakgchan kxlakgstipankan xnatalan xtlatkan, chu militlawat pi tuku xkgalhi xtlat wa nakamaxkikan». Chu asta wi tuku tlakg xlakaskinka tlawalh. Xlakata uma, tlawalh akgtum limapakgsin chu wanilh Moisés: «Komo nani chatum chixku chu ni kgalhilh ni chatum xkgawasa, militlawatkan pi tuku xkgalhi namaxkikan xtsumat» (Núm. 27:6-8; Jos. 17:1-6). Ama kilhtamaku chu alistalh uma xlimapakgsin Dios xʼama kamakgtaya laktsuman israelitas tiku nachuna xtitaxtukgolh.

15. 1) ¿La kalikatsini Jehová putum xlakskujnin, chu asta tiku nitu kgalhikgo? 2) ¿Tuku atanu nema lichuwinan Biblia limasiya pi Jehová ni laksakpaxkinan?

¹⁵ ¡Lu tlan likatsilh chu ni laksakpaxkinalh! Jehová tlan kalikatsinilh amakgolh lakpuskatin tiku nitu xkgalhikgo chuna la xkalikatsini amakgapitsi israelitas tiku lhuwa tuku xkgalhikgo (Sal. 68:5). Uma kaj pulaktum nema lhuwa lichuwinan Biblia, chu masiya pi Jehová xlikana ni kalaksakpaxki xlakskujnin (1 Sam. 16:1-13; Hech. 10:30-35, 44-48).

16. ¿Tuku tlan natlawayaw xlakata xtachuna la Jehová ni nalaksakpaxkinanaw?

¹⁶ ¿Xtachuna la Jehová ni nalaksakpaxkinanaw? Kalakapastakwi pi uma tayat pulaktiy tuku kilhchanima natlawayaw. Kajwatiya komo ni lakpuwanaw tuku nitlan xlakata atanu, natlawa pi putum tlan nakalikatsiniyaw chu ni nakalaksakpaxkiyaw. Xlikana, putum lakpuwanaw pi ni laksakpaxkinanaw chu niti lakgmakganaw. Pero min kilhtamaku tuwa makgkatsiyaw liwana nakinkalakputsananikanan. Wa xlakata, ¿la tlan nakatsiyaw komo kinkalilakgapaskanan pi akxtum kalikatsiniyaw amakgapitsin? Akxni Jesús xkatsiputun la xlilakgapaskgo latamanin, kakgalhskilh xʼamigos tiku lu xkalipawan: «¿Xati likilhankgo nchixkuwin Xkam nchixku?» (Mat. 16:13, 14). ¿Tuku xlakata ni chuna tlawayaw chu kgalhskinaw chatum amigo tiku katsiyaw pi nakinkawaniyan tuku xaxlikana komo ni laksakpaxkinanaw? Chu komo kiʼamigokan nakinkawaniyan pi chunaku tsinu akxilha pi laksakpaxkinanaw o lakgmakgananaw xlakata tanu la tasiya, xlakata tiku katalalin o lhuwa tuku kgalhi, ¿tuku kilitlawatkan? Naskiniyaw Jehová pi kakinkamakgtayan nalakgpaliyaw la lakpuwanaw xlakata nalimasiyayaw xtachuna la xla pi ni laksakpaxkinanaw (Mat. 7:7; Col. 3:10, 11).

17. ¿La litasiya pi ni kalaksakpaxkiyaw amakgapitsin?

 ¹⁷ Kcongregación limasiyayaw xtachuna la Jehová pi ni laksakpaxkinanaw akxni putum kamaxkiyaw kakni, tlan kalikatsiniyaw chu kapaxkiyaw. Akgtum liʼakxilhtit, akxni kawaniyaw kaʼankgolh kkinchikkan, kawaniyaw tiku tanu xlakatsukutkan, chu tiku nitu kgalhikgo, tiku ni kgalhikgo xtlatkan o nilh tiku xtamakgaxtokgkgo (kalikgalhtawakga Gálatas 2:10 chu Santiago 1:27). Nachuna, kalitachuwinanaw xalakwan xalaksasti putum latamanin asta tiku xala atanu kachikin. Wa xlakata, lipaxuwayaw pi kilikgalhtawakgakan anan akgchaxan ciento tachuwin. ¡Lu litasiya pi ni laksakpaxkinanaw!

18. ¿La nalimasiyaya pi lu xlakaskinka akxilha pi Jehová tlan talalinkan chu ni laksakpaxkinan?

¹⁸ Xlikana, akxni lilakapastakaw la tlan talalinkan Jehová chu ni laksakpaxkinan, tlakg paxkiyaw. Chu uma tlawa pi nachuna nalimasiyaputunaw xtayat akxni katalalinaw kinatalankan ktakanajla chu tiku kalitachuwinanaw Dios.