Ángela * chatum tala tiku kgalhi 30 kata, tsinu pekuama. Xla kgalhkgalhima lakgkgolotsin chu kgalhskinkan tuku nawanikgo lakgkgolotsin. Xlikana, xla ni anit kmakgapitsi tamakxtumit, pero xla lu tlakgwanit, o akgxuninit, xlakata kxtaskujut kakuentajtlawa tiku linkgoya kata. Chu ni kajwatiya uma xla na lilipuwama xlakata xtse tatatla.

Komo wix chatum kgolotsin tiku nalakgapaxialhnana Ángela, ¿la xmatliwakglhti? (Jer. 31:25.) ¿Tuku xtlawa xlakata xlikana xmatliwakglhti «tiku tlakgwanit» la xla?

Min kilhtamaku, akinin na tlakgwanaw xlakata kintaskujutkan o xlakata tuku lakgatayamaw kcongregación. Akgtum liʼakxilhtit, palakachuwina Daniel «lu [...]tlakgwalh» akxni makxilhnika tuku nila xʼakgatekgsa (Dan. 8:27). Ni lhuwa kilhtamaku alistalh ángel Gabriel tasiyanilh makgtayalh Daniel naʼakgatekgsa, chu wanilh pi Jehová kgaxmatli xʼoraciones, chu wanilh pi xla «tiku lu lipaxkiputu» (Dan. 9:21-23). Chu kʼatanu kilhtamaku, laksakli xatlan tachuwin nema xmatliwakglhli palakachuwina nema lu xtlakgwanit (Dan. 10:19).

Nachuna, akxni nina lakgapaxialhnanaw chatum tala tiku tlakgwanit kalimaxtuw kilhtamaku xlakata nalakpuwanaw tuku titaxtuma. ¿Tuku taʼakglhuwit titaxtuma? ¿Tuku tlawama pi naxlajwanan? ¿Tuku tlan tayat masiyama? Richard chatum tala tiku 20 kata liskujma la kgolotsin wan: «Wa klakapastaka tuku tlan tlawamakgo kinatalan». Chu wampara: «Pulana kkakxilha  tuku titaxtumakgo chu alistalh kalakgapaxialhnan», chu «klakputsa tuku xlikana tlan nakamakgtaya». Chu komo natapina atanu kgolotsin ¿tlan akxtum naʼakxilhatit tuku titaxtumakgolh natalan?

Max wix katsiya, pi akxni wi tiku nawan tuku makgkatsi max nalimaxanan, chu max tuwa namakgkatsi chatum tala nakawani lakgkgolotsin tuku makgkatsi. ¿La tlan namatsukiyatit chuwinanatit? Max natalitsina chu namaklakaskina laktlan tachuwin nema tlan namamakgkatsini. Michael, chatum tiku liskujma la kgolotsin liwaka tipuxam kata, limatsuki xtachuwin: «La wix katsiya, pulaktum tlakg xatlan talakgalhaman nema kgalhiyaw lakgkgolotsin wa nakalakgapaxialhnanaw natalan. Wa xlakata kmimputulh kminchik».

Tlan xwa natlawaya akgtum oración akxni lakgapaxialhnampat. Akxni xtlawa xʼoración apóstol Pablo, xpalakata natalan xlichuwinan xtakanajlakan, xtapaxkitkan, chu la xtayanikgonit (1 Tes. 1:2, 3). Akxni wix tlawaya oración chu lichuwinana la xlakaskinka akxilha xalaktlan xtayat tala, wix lakkaxwiliya minaku chu xnaku xlakata namakgtaya tuku nawaniya. Mintachuwin lu tlan namamakgkatsini. Ray tiku lhuwata kata kgolotsin litaxtu wan: «Min kilhtamaku nialh lakapastakaw tuku tlan tlawamaw kxtaskujut Dios, wa xlakata akxni wi tiku kinkamalakapastakayan lu tlan kinkamamakgkatsiniyan».

Xtachuna la apóstol Pablo, na kamastaw «xtalakgalhaman spíritu» akxni lichuwinanaw tuku wan Biblia, maski kaj akgtum texto (Rom. 1:11). Akgtum liʼakxilhtit, max chatum tala tiku lipuwama namakgkatsi pi nitu litaxtu. Wix tlan xlitachuwinanti salmista tiku xmakgkatsi «la ti akgtsonkgswakanit, la ti yan makwan», wa: «nikxni kakgtsonkgswanit milimapakgsin!»  (Sal. 119:83, 176). Akxni tsinu lichuwinanitata uma textos, tlan nawaniya mintala pi katsiya pi xla lakapastakaku xlimapakgsin Dios.

Xlakata tlan nalakgchan xnaku chatum tala tiku nialh an lichuwinan Dios chu asta makgxtakgnit tamakxtumit, tlan xlitachuwinaw xliʼakxilhtit chatum puskat tiku makgatsankgalh akgtum tumin xla dracma (Luc. 15:8-10). Uma tumin xla plata max xla akgtum lu xastlan tapixnu nema xlitakgatsi lhuwa monedas xaplata. Akxni nawaniya uma kamakgtaya naʼakxilha pi xla lu xlakaskinka litaxtu kcongregación. Chu tlan nawaniya pi Jehová lu xlakaskinka akxilha xlakata xla tapakgsi kxkachikin.

Lhuwa natalan lipaxuwakgo lichuwinankgo textos xalak Biblia, wa xlakata ni kajwatiya wix nachuwinana. Akxni likgalhtawakganitata akgtum versículo nema lichuwinan tuku titaxtuma, tlan nalaksaka akgtum tachuwin nema tlakg xlakaskinka chu kaskini kalichuwinalh tuku lakpuwan. Akgtum liʼakxilhtit, tlan xlikgalhtawakgani 2 Corintios 4:16, chu nakgalhskiniya: «¿Makgkatsinitata wix la Jehová matliwakglhparanitan?». Uma natlawa pi «makxtum nalamakgpuwantiniyaw» (Rom. 1:12).

Na tlan nalimatliwakglhaw chatum talan xliʼakxilhtit tiku nachuna titaxtunit nema wi kBiblia. Akgtum liʼakxilhtit, komo makgkatsikan la Ana o Epafrodito, tiku milh kilhtamaku lu lipuwankgolh kalakapastakkgolh pi chuntiya lu xlakaskinka xlitaxtukgo xlakatin Dios (1 Sam. 1:9-11, 20; Filip. 2:25-30). ¿Tlan xlitachuwinanti lu xatlan liʼakxilhtit xalak Biblia tiku nachuna titaxtukgolh?

Wix tlan limasiyaya pi xlikana kalilipuwana minatalan komo chuntiya kalilipuwana akxni pinitata kalakgpaxialhnana (Hech. 15:36). ¿Tlan natalakkaxlaya akxtum napinatit lichuwinanatit Dios? Kalakpuwanti tuku tlawa Bernard, tiku lhuwata kata kgolotsin. Akxni tatanokglha chatum tala tiku aku lakgapaxialhnanit, kgalhskin xlakata tastakyaw nema maxkilh chu wani: «Kakiwani, ¿makgtayaman tuku lichuwinaw?». Akxni chuna natlawaya tlan nakatsiya komo tlakg maklakaskinkgo tamakgtay.

La uku, kinatalankan makgkatsiputunkgo pi kalilipuwankan, kaʼakgatekgsnikan chu kapaxkikan (1 Tes. 5:11). Wa xlakata, akxni nina lakgapaxialhnana chatum tala xlakata namatliwakglhparaya xtakanajla, kalimaxtu kilhtamaku nalilakpuwana tuku titaxtuma. Kaskini tamakgtay Jehová chu liwana kalaksakti textos xalak Biblia nema nalimaklakaskina. Chuna natekgsa xalaktlan tachuwin nema namatliwakglha «tiku tlakgwanit».