1, 2. 1) ¿Tuku talakaskin xlakata chuntiya tlan natalalinaw Jehová? 2) ¿La nakinkamakgtayayan tuku wan Biblia xlakata tiku tanu tanu la makglhtinankgolh xtastakyaw Jehová?

«TLAKG naktalakatsuwini Dios, wa kimaxki lipaxaw latamat, porque xla nakimakgtakgalha [o kinkuentajtlawa].» (Sal. 73:28.) Kʼumakgolh tachuwin, salmista limasiyalh pi xlipawan Dios. ¿Tuku xtitaxtuma xlakata chuna xwa? Xakxilhnit pi tiku nitlan likatsikgo ni xkgalhikgo taʼakglhuwit, chu lu xlilipuwanit: “¿Nitu litaxtu la tanks klatamanit y la nikxni ktlawanit talakgalhin?” (Sal. 73:2, 3, 13, 21). Pero akxni «tanulh kxtemplo Dios» makgtayalh nalakgpali la xlakapastaknan chu chuntiya tlan xtalalilh Malakatsukina (Sal. 73:16, TNM; 17, 18). Uma tuku titaxtulh salmista tiku ni xmakgxtakga Dios masiyanilh pi: xlakata tlan natalalinaw Jehová, talakaskin wa nakatalalinaw tiku skujnikgo chu nakgaxmataw xtastakyaw (Sal. 73:24).

² Akinin na lu tlan talalimputunaw Dios xastakna chu xaxlikana. Xlakata chuna nala, kamastaw talakaskin nakinkastakyawayan chu nakinkamasiyaniyan, uma natlawa pi tlan nakinkaʼakxilhan. Anta kBiblia tsokgwilikanit xlakata latamanin chu kachikinin, tiku xla kalakgalhamalh, kamaxkilh talakaskin pi xlakgpalikgolh xtayatkan akxni kastakyawalh. Chuna litsokgkanit xlakata «nalikatsiniyaw wa ntu ntlan», chu «nalistaktayayaw, kin wanti awatiya nalatamayaw yunu nkakilhtamaku» (Rom. 15:4; 1 Cor. 10:11). Akxni liwana lakputsananiyaw kinkamakgtayayan tlakg nalakgapasaw Jehová chu kinkamasiyaniyan la litamakgtayayaw akxni kinkamasiyaniyan.

3. ¿Tuku xtalakxtum tekgsaw kʼIsaías 64:8 chu kʼJeremías 18:1-6, xlakata la Jehová kamapakgsi latamanin? (Kaʼakxilhti dibujo xla página 24.)

³ Akxni lichuwinan xlimapakgsin Jehová xpalakata latamanin chu kachikinin, Biblia chuna tamalakxtumi: «Jehová, wix kinTlatkan. Akinin tiyat, chu wix xTlawana tlamank; putum akinin mimakan kinkatlawan» (Is. 64:8). Chatum tiku xtlawana tlamank, o tlamink tlawa pi tiyat nala la lakaskin, chu tiyat nila tuku tlawa. Nachuna litaxtu xlakata la latalalin chixku chu Dios. Xtachuna la tiyat nitu wani xtlawana tlamank, nachuna ni kiliwanitkan Dios la nakinkamasiyaniyan (kalikgalhtawakga Jeremías 18:1-6).

4. ¿Katlawa Dios lakchixkuwin chu kachikinin chuna la lakaskin? Kawanti tuku xlakata chuna kgalhtinana.

⁴ Kxamakgan Israel Jehová limasiyalh pi xtachuna la xtlawana tlamank maklakaskin tiyat, xla na tlan chuna tlawa. Pero wi tuku ni xtachuna. Xtlawana tlamank tlan natiya aktsu tiyat chu natlawa lata tukuya xalu natlawaputun. Pero Jehová, ¿tlawa lata tuku tlawaputun xlakata lakchixkuwin o kachikinin, makgapitsi tlan nalikatsikgo chu atanu nitlan nalikatsikgo? Biblia wan pi ni. Jehová kamaskiwinit latamanin tuku lu xlakaskinka: nalaksakkgo tuku natlawakgo. Chu xla ni maklakaskin xlimapakgsin xlakata nalaktlawami uma tamaskiwin. Xlakata nakamasiyani latamanin chuna la xla lakaskin, latamanin xlilaksakatkan (kalikgalhtawakga Jeremías 18:7-10).

5. Akxni latamanin ni mastakgo talakaskin nakamasiyani Jehová, ¿la xla maklakaskin xlimapakgsin?

⁵ Wa xlakata, ¿la maklakaskin xaLanka xTlawana tlamank xlimapakgsin akxni latamanin ni mastakgo talakaskin kakamasiyanilh? Akxni aktsu tiyat ni litaxtu la lakaskinkan, max nalitlawakan atanu xalu o nalakgmakgankan. Chuna la xlakata xtlawana tlamank nitlan la tlawalh. Pero Jehová xTlawana tlamank nikxni chuna akgspula (Deut. 32:4). Putum kilhtamaku wa xkuenta tiku ni masta talakaskin kamasiyanilh. Jehová kamapakgsi latamanin chu chuna kalikatsini chuna la xlakan mastakgo talakaskin. Litamakgtayakgo wa tiku mastakgo talakaskin nakamapakgsikan. Akgtum liʼakxilhtit, xlakata tiku naʼankgo kʼakgapun; litaxtukgo «tlamank xla talakgalhaman» chu katlawakanit «tlamank nema lu tlan tuku nalimaklakaskinkan». Pero tiku lakatayakgo Dios litaxtukgo «tlamank xla tasitsi nema katlawaka xlakata nakamasputukan» (Rom. 9:19-23, TNM).

6, 7. ¿La ni lakxtum makglhtinankgolh xtastakyaw Dios David chu Saúl?

 ⁶ Pulaktum la Jehová kamasiyani latamanin wa akxni kastakyawa. Tlan akxilhaw la limaklakaskin xlimapakgsin akxni wi tiku kamasiyani, naʼakxilhaw xlakata xliʼakxilhtit chatiy mapakgsina xalak Israel: Saúl chu David. Akxni David tatlawalh Bat-seba talakgxtumit nema ni xlitatlawat, uma nitlan kitaxtulh chu na katlawanilh tuku nitlan atanu. Maski mapakgsina xwanit, Jehová stakyawalh chu malakgachanilh palakachuwina Natán tiku tliwakga stakyawalh (2 Sam. 12:1-12). ¿La makgkatsilh David? Lu nitlan limakgkatsilh kxnaku chu xlikana nialh tlawalh tuku nitlan, wa xlakata Dios lakgalhamalh (kalikgalhtawakga 2 Samuel 12:13).

 ⁷ Pero Saúl, ni xatapaxuwan makglhtinalh tastakyaw. Jehová limaklakaskilh palakachuwina Samuel xlakata xwanilh Saúl pi xkamalakgsputulh putum amalequitas chu xʼanimales. Saúl  ni kgalhakgaxmatnalh, ni makgnilh mapakgsina Agag chu tlakg xalaktlan animales. ¿Tuku xlakata? Xlakata xlakaskin pi lhuwa xlakgapaska (1 Sam. 15:1-3, 7-9, 12). Akxni Samuel stakyawalh, Saúl ni matsatatilh xnaku xlakata xaLanka xTlawana tlamank xmasiyanilh. Wata ni xlakaskinka akxilhli tuku wanika chu wa pi animales tlan xmakamastanika Dios. Wa xlakata, xaxlikana Dios nialh tlan xakxilha xtamapakgsin chu nikxni tlan talalimpa (kalikgalhtawakga 1 Samuel 15:13-15, 20-23).

8. ¿Tuku kinkamasiyaniyan la makglhtinankgolh israelitas xtastakyaw Jehová?

⁸ Jehová ni kaj makgapitsi tiku kamasiyani, nachuna kamasiyani kachikinin. Kkata 1513 akxni nina xmin Jesús, chu aku xkalakgmaxtukanit israelitas kʼEgipto, Dios katatlawalh talakkaxlan. Israel xkachikin xatalaksakni litaxtulh chu kgalhilh talakgalhaman pi xaLanka xTlawana tlamank xkamasiyanilh. Pero, uma kachikin wata tlawalh tuku nitlan kxlakatin Jehová, asta kakninanilh xdioseskan kachikinin nema lakatsu xwilakgolh. Makglhuwa, Jehová kamalakgachanilh palakachuwinanin xlakata xlakgpalikgolh xtayatkan, pero xlakan ni kgaxmatkgolh (Jer. 35:12-15). Xlakata ni lakgpalikgo xtayatkan, kalimalakgaxokgeka tuku lu nitlan. La tlamank nema katlawakanit xlakata nakamalakgsputukan, tamapakgsin xaʼakgkaw tribu xla Israel, asirios kamalakgsputukgolh, chu tamapakgsin xaʼakgtiy tribu xla Judá babilonios kaʼakgchipakgolh. ¡Uma kinkamasiyaniyan tuku lu xlakaskinka! Xtastakyaw Jehová kajwatiya  kinkamakgtayayan komo nakgalhakgaxmataw.

9, 10. ¿Tuku tlawakgolh ninivitas akxni kastakyawalh Jehová?

⁹ Jehová na kamaxkilh talakaskin ninivitas xkgalhakgaxmatnikgolh  xlakata ni xkaʼakgspulalh tuku nitlan. Wanilh Jonás: «Katakaxti, kapit kNínive xalanka kachikin chu kawani pi kkatsinit pi tlawamakgolh tuku nitlan». Nínive xʼamaka malakgsputukan (Jon. 1:1, 2; 3:1-4).

¹⁰ Akxni Jonás mastalh uma tamakatsinin, «lakchixkuwin xalak Nínive tsukukgolh kanajlanikgo Dios, chu nialh wayankgolh chu lhakgakgolh tuku xlitasiya pi xlipuwankgo, asta tiku lina kata chu asta tiku aktsinajku». Xmapakgsinakan «nialh tawilalh kxpumapakgsin chu lakgpalilh xlhakgat xlimapakgsina chu wililh lhakgat tuku xlitasiya talipuwan chu laktawilalh lhkaka». Xlakata ninivitas mastakgolh talakaskin pi xkastakyawaka chu nialh tlawakgolh tuku nitlan, Jehová katapatilh (Jon. 3:5-10).

11. ¿Tukuya xtayat Jehová litasiya la kalikatsinilh israelitas chu ninivitas?

¹¹ Maski israelitas xtapakgsinikgo, Jehová na kastakyawalh. Pero, ninivitas, tiku ni xtatlawakgonit talakkaxlan, kalakgalhamalh akxni litaxtukgolh la tiyat nema litlawakan tlamank. Uma akgtiy tuku nitlan liwana kinkamasiyaniyan pi kiDioskan «ni tiku laksakpaxki» (Deut. 10:17).

12, 13. 1) ¿Tuku xlakata Dios lakgpali tuku tlawaputun akxni wi tiku masta talakaskin namasiyani? 2) ¿Tuku masiya pi Jehová nitlan limakgkatsilh xlakata Saúl? ¿Chu xlakata Nínive?

¹² Chuna la kinkamasiyaniyan Dios, litasiya pi tlan lakapastaknan chu lakgpali tuku wanit komo talakaskin. Min kilhtamaku, akxni wanita tuku nakatlawani, lakgpali komo xlakan lakgpalikgo xtayatkan. Akgtum liʼakxilhtit, Biblia wan pi lu nitlan limakgkatsilh «xlakata [...]mastalh talakaskin Saúl mapakgsina xwa» (1 Sam. 15:11). Nachuna limasiya pi akxni ninivitas lakgpalikgolh xtayatkan «ni tlan limakgkatsilh chu nialh tlawalh tuku xlakapastaknit pi xʼama katlawani chu nitu katlawanilh» (Jon. 3:10).

¹³ Tachuwin xahebreo nema tamatitaxti «ni tlan limakgkatsilh» tatalakxtumi akxni lakgpalikan tuku tlawaputunkan o lakapastakkanit. Jehová lakgpalilh la xakxilha Saúl, xlakata pulana laksakli la mapakgsina chu alistalh lakgmakgalh. Ni kaj xlakata ni liwana xlaksaknit, wata Saúl kitsankganilh takanajla chu nialh kgalhakgaxmatli. Xaxlikana Dios nitlan limakgkatsilh xlakata ninivitas, uma kilhchani, pi lakgpalilh tuku xlakpuwanit. Lu tlan limakgkatsiyaw pi Jehová, xTlawana tlamank, tlan lakapastaknan, chu lakgalhamanan chu lakgpali tuku tlawaputun komo lakgalhina makgxtakga tuku nitlan xtlawama.

14. 1) ¿La kinkamasiyaniyan Jehová la uku? 2) ¿Tuku kilitlawatkan akxni kinkamasiyaniyan Jehová?

¹⁴ Jehová limaklakaskin xTachuwin chu xkachikin xlakata nakinkamasiyaniyan (2 Tim. 3:16, 17). Wa xlakata namakglhtinanaw tastakyaw nema  kinkalimaxkiyan. Maski akglhuwata kata la tamununitaw o lhuwa tuku kinkalakgayawakanitan kcongregación, chuntiya kilimakglhtinatkan xtastakyaw Jehová chu namastayaw talakaskin nakinkamasiyaniyan la nalakaskin.

15, 16. 1) ¿Tuku max namakgkatsi tiku stakyawakan chu makgatsankga tuku lakgaya kcongregación? Kamasta akgtum liʼakxilhtit. 2) ¿Tuku nakinkamakgtayayan ni nalakpuwanaw tuku nitlan xlakata akxni kinkastakyawakanan?

 ¹⁵ ¿La kinkastakyawayan Jehová? Min kilhtamaku kinkamasiyaniyan tuku lakaskin kimpalakatakan chu kinkamakgtayayan nalakgpaliyaw kintalakapastaknikan. Max min kilhtamaku, natalakaskin pi tlakg tliwakga nakinkastakyawakanan xlakata tlawaw tuku nitlan. Akxni chuna kinkastakyawakanan max namakgatsankgayaw tuku xkinkalakgayawakanitan. Kaʼakxilhwi xliʼakxilhtit Dennis, * tiku kgolotsin xwanit. Tlawalh lanka talakgalhin xlakata ni tlan limaklakaskilh tumin chu ni makatsininanka kcongregación akxni sensurarlika. ¿La makgkatsilh akxni wanka kcongregación pi nialh kgolotsin xwanit? Xla lakapastaka: «Kmakgkatsilh pi nitu xaklitaxtu. Puxamakaw kata lhuwa tuku xaklakgatayanit kxkachikin Dios. Precursor regular xakwanit, xakskujnit kBetel, siervo ministerial klitaxtulh chu alistalh kgolotsin. Nachuna aku xakmastanit xapulana kintaʼakgchuwin kxalanka tamakxtumit xaʼakgtutu kilhtamaku. Chu kaj lakapala putum kkamakgatsankgalh. Ni kajwatiya xaklimaxanan, na xaklakpuwan pi kxkachikin Jehová nialhla xakmakgtapakgsi».

¹⁶ Dennis, makgxtakgli tuku nitlan xtlawama nema listakyawaka. Pero ¿tuku makgtayalh nialh chuna nalakapastaka la pulana? Xla wan: «Liwana klakkaxwililh la nakkgalhtawakga. Nachuna lu kimatliwakglhkgolh natalan chu tuku ktekgsli klikgalhtawakga. Kʼartículo “¿Le gustaría recuperar su privilegio de servicio?”, xla La Atalaya 15 xla agosto kata 2009, kitaxtulh la akgtum carta nema kimalakgachanika xlakata oraciones nema ktlawalh. Tastakyaw nema tlakg klakgatilh wa: “La uku xlakata ni lhuwa tuku lakgayat kcongregación, kamaklakaskinti uma kilhtamaku xlakata namatliwakglha mintakanajla”». ¿La makgtayalh tastakyaw? Titaxtulh kata xla wan: «Jehová kisikulunatlawapa chu siervo ministerial klitaxtupa».

17. ¿La kamakgtaya katamakxtukan kcongregación tiku lakgalhinankgo xlakata nataspitparakgo? Kamasta akgtum liʼakxilhtit.

¹⁷ Akxni wi tiku tamakxtukan kcongregación, na wa tuku listakyawanan Jehová. Kuentajtlawa congregación xlakata ni nataxkajwani chu tlan makgtaya tiku lakgalhinalh xlakata nataspitpara (1 Cor. 5:6, 7, 11). Robert xtamakxtukanit kcongregación max atsinu ni xchan akgkuchaxan kata, xfamilia liwana makgantaxtikgolh xtastakyaw Biblia xlakata ni natalalinkgo tiku lakgalhinankgo chu nipara nakawaniyaw kgalhen. La uku lhuwata kata lata makglhtinamparaka chu tatliwakglhmapa xtakanajla. Akxni kgalhskinka tuku xmakgtayanit xtaspitpa kxkachikin Jehová maski lhuwa kata xtitaxtunit, xla wa pi xlakata xfamilia liwana makgantaxtikgolh xtastakyaw Biblia. Chu wampa: «Komo kifamilia maski kaj tsinu xkintitachuwinankgolh, xtikatsiputunkgolh la xakwi, uma tlan xaktilimakgkatsilh, chu nialh xaktikalakgtaspitputulh, nipara xkachikin Dios».

18. ¿Tukuya tiyat nalitaxtuyaw kxmakan xaLanka xTlawana tlamank?

¹⁸ Max akinin ni maklakaskinaw uma tastakyaw, pero ¿tukuya tiyat nalitaxtuyaw kxmakan xaLanka xTlawana tlamank? ¿Tuku natlawayaw akxni  nakinkastakyawakanan? ¿Natlawayaw la David o la Saúl? KinTlatkan wa xaLanka xTlawana tlamank. Kalakapastakwi pi «Jehová stakyawa tiku paxki, chuna la tlawa chatum tlat xlakata paxki xkgawasa». Wa xlakata, ni kalakgmakgaw xtastakyaw Jehová (Prov. 3:11, 12).