1-3. ¿La kamawilh Jesús lhuwa latamanin lakatsu kBetsaida? (Kaʼakxilhti dibujo xla uma página.)

KALAKPUWANTI uma (kalikgalhtawakga Mateo 14:14-21). Akxni nina xtlawakan Paskua xla kata 32, max akgkitsis mil lakchixkuwin, niku na xwilakgo lakpuskatin chu laktsukamanan, akxtum xtawilakgo Jesús chu kstalaninanin niku nitu xʼanan lakatsu kBetsaida, akgtum aktsu kachikin nema xwi knorte pupunu xla Galilea.

² Akxni akxilhli putum uma latamanin, Jesús kalakgalhaman, wa xlakata lhuwa tuku kamasiyanilh xlakata xTamapakgsin Dios chu kamakuchilh tiku xtatatlakgo. Akxni kakgotanulh, o smalankganalh, kstalaninanin wanikgo pi kamalakgachakgolh putum uma latamanin laktsu kachikinin xlakata naʼankgo tamawakgo tuku xwakgolh. Pero Jesús kawani: «Wixin nkamaxkikgotit ntu nawakgoy». Tuku xkawanima nila xʼakgatekgskgo, xlakata ni lhuwa tuku xkgalhikgo: kaj makkitsis kaxtalanchu chu tantiy skiti, o tamakgnin.

³ Xlakata xtalakgalhaman, Jesús tlawa akgtum milagro, chu kajwatiya uma tsokgkgolh chatati evangelistas (Mar. 6:35-44; Luc. 9:10-17; Juan 6:1-13). Jesús chu kstalaninanin kawanikgolh uma latamanin pi xtawilakgolh kkasakgatni grupos xla 50 chu 100 latamanin, tlawani oración Dios chu tsuku lakgchakga kaxtalanchu chu skiti. Pero ni wa tiku kamaxkilh taway putum latamanin, Jesús «xlimakgalhtawakgat maxkikgolh, cha nchu wa limakgalhtawakgat, wa nchu xlakan, maxkikgolh ntachixkuwitat». Maski nila kanajlakan analh lhuwa liwat xlakata putum tlan nawayankgo. Kaʼakxilhti uma: ni chalhuwa kstalaninanin, Jesús kalimawilh lhuwa miles. *

4. 1) ¿Tukuya taway tlakg xlakaskinka xakxilha Jesús, chu tuku xlakata? 2) ¿Tuku nalichuwinanaw kʼuma artículo chu nema aku mima?

⁴ Pero Jesús tlakg xlilipuwan nakamaxki taway xlakata takanajla kstalaninanin. Xla xkatsi pi nawakgo taway xlakata  takanajla, uma kilhchani tuku xaxlikana masiya xTachuwin Dios, masta latamat xliputum kilhtamaku (Juan 6:26, 27; 17:3). Xlakata talakgalhaman nema tlawalh pi xkamawilh kaxtalanchu chu skiti lhuwa latamanin, Jesús limaxtulh lhuwa hora nakamasiyani kstalaninanin (Mar. 6:34). Pero Jesús xkatsi pi ni lhuwa kilhtamaku xʼama tawila kKatiyatni chu pi xʼama taspitpara kʼakgapun (Mat. 16:21; Juan 14:12). Chu akxni anta xtawilacha, ¿la xʼama kamaxki kstalaninanin tuku maklakaskinkgo kxtakanajlakan? Xtachuna la akxni ni chalhuwa mawikgolh chalhuwa. ¿Tiku uma ni chalhuwa? Kaʼakxilhwi la Jesús kalimaklakaskilh makgapitsin xlakata nakamawikgo lhuwa kstalaninanin tiku kalaksakkanit naʼankgo kʼakgapun kxapulana siglo. Wa xlakata, kʼartículo nema aku mima, nalichuwinanaw uma takgalhskinin nema tlakg xlakaskinka kimpalakatakan: ¿la tlan nakatsiyaw tiku umakgolh ni chalhuwa nema maklakaskin Cristo xlakata nakinkamawiyan?

5, 6. 1) ¿Tuku lu xlakaskinka talaksakni tlawalh Jesús xlakata liwana xkamaxkika taway xlakata takanajla kstalaninanin akxni xla xnilh? 2) ¿La kamasiyanilh Jesús kstalaninanin natlawakgo lu xlakaskinka taskujut akxni xnilh?

⁵ Tiku pulalin familia chu tlan lakapastaknan lakkaxwili nitu natsankgani xfamilia komo xla nani. Xtachuna, Jesús, tiku xʼama litaxtu xAkgxakga congregación, lakkaxwililh pi kuenta xtlawaka xtakanajlakan kstalaninanin akxni xla nialh xtawilalh kKatiyatni (Efes. 1:22). Akgtum liʼakxilhtit, max akgtiy kata akxni nina xniy, tlawalh lu xlakaskinka talaksakni. Kalaksakli ni chalhuwa tiku alistalh xʼama kamaklakaskin xlakata lhuwa xkamawikgolh. Kaʼakxilhwi tuku lalh.

⁶ Akxni tantaskaka xtlawanita oración, Jesús kamamakxtumilh kstalaninanin chu kalaksakli kgalhkutiy tiku xʼapóstoles xwankgolh (Luc. 6:12-16). Akgtiy kata nema titaxtulh, tlakg lhuwa kilhtamaku katatawilalh xʼapóstoles, xkamasiyani xlakata tuku xkawani chu xkawilini xliʼakxilhtit. Jesús xkatsi pi lhuwa tuku xlikatsitkan xwanit; chuntiya xkalimapakuwikan «xlimakgalhtawakgat» (Mat. 11:1; 20:17). Xla lu xatlan tastakyaw kamaxkilh chu tlakg tlan kamasiyanilh la xlichuwinankgolh Dios (Mat. 10:1-42; 20:20-23; Luc. 8:1; 9:52-55). Liwana xtasiya pi xkamasiyanima xlakata xtlawakgolh lu xlakaskinka taskujut alistalh akxni xla xnilh chu xtaspitpa kʼakgapun.

7. ¿La limasiyalh Jesús tuku tlakg xlakaskinka xʼama akxilhkgo apóstoles?

⁷ ¿Tukuya taskujut xʼama tlawakgo apóstoles? Akxni xtalakatsuwima Pentecostés kkata 33, liwana tasiyalh pi xʼamakgo “lakgatayakgo taskujut” (Hech. 1:20). Pero ¿tuku tlakg xlakaskinka xʼama akxilhkgo? Jesús akxni xlakastakwananita masiyalh tuku xkilhchani akxni takgalhchuwinalh apóstol Pedro (kalikgalhtawakga Juan 21:1, 2, 15-17). Akxni akxtum xkatawi makgapitsi xʼapóstoles, Jesús wanilh Pedro: «Kamawikgo laktsu nkinkalhniluj». Xlakata uma, Jesús masiyalh pi xʼapóstoles xʼama makgtanukgo kmakgapitsi tiku xʼama kamaklakaskin xlakata xkamaxkikgolh taway xlakata takanajla lhuwa latamanin. ¡Lu masiya uma la kalakgalhaman Jesús “laktsu xkalhniluj”! *

8. ¿La limasiyakgolh tiku aku kanajlakgolh kPentecostés pi liwana xkatsikgo tiku xmaklakaskima Cristo?

⁸ Lata Pentecostés kkata 33, Cristo tiku xlakastakwananita tsukulh kamaklakaskin xʼapóstoles xlakata xkamaxkikgolh tuku xmaklakaskinkgo kxtakanajlakan kstalaninanin tiku xʼamakgo kʼakgapun (kalikgalhtawakga Hechos 2:41, 42). Judíos chu tiku ni judíos nema kalilaksakka espíritu santo ama kilhtamaku xkanajlakgo pi wa tuku xmaklakaskima Jesús. Xlakan liwana xkanajlakgo «ankgalhin tliwakglh xwilakgo kxtakanajlakan ntu xmasiyunikgoy» apóstoles. Chuna la wan chatum tiku lakputsanani Biblia tachuwin xagriego nema tamatitaxti «ankgalhin tliwakglh xwilakgo kxtakanajlakan»  masiya pi «putum kilhtamaku chu ni talakgpali, watiya nalakapastaknankgo natlawakgo tuku lakkaxwilika». Xasasti kanajlanin lu xlakaskimakgolh taway xlakata takanajla, chu liwana xkatsikgo niku tlan xtekgskgolh. Xlakata xlipawankgo, xkgaxmatnikgo apóstoles akxni xlakan xkawanikgo tuku wa chu tlawalh Jesús, chu liwana xmasiyakgo tuku xwamputunkgo makgapitsi textos niku xlichuwinankgo Jesús (Hech. 2:22-36). *

9. ¿La limasiyakgolh apóstoles pi lu xlakaskinka xʼakxilhkgo nakamawikgo xborrrego Jesús?

⁹ Apóstoles liwana kuenta tlawakgolh taskujut nema xkgalhikgo xlakata nakamawikgo xborrego Jesús. Akgtum liʼakxilhtit, kaʼakxilhwi la lakkaxtlawakgolh tuwa taʼakglhuwit nema max tlan xtimapapitsilh congregación nema aku xtalakkaxwilinit. Tuku xlitaʼakglhuwimaka taway xwanit, unu xlichuwinamaka taway nema wakan. Lakpuskatin tiku xninita xchixkukan chu xchuwinankgo hebreo xkamaxkimaka taway nema xmakgpitsikan chali chali, pero lakpuskatin tiku xchuwinankgo griego ni xkamaxkimaka. ¿La lakkaxtlawakgolh apóstoles uma tuwa taʼakglhuwit? «Kgalhkutuy[...]» laksakkgolh kgalhtujun tiku tlan xkuentajtlawakgolh uma lu xlakaskinka «taskujut», xlakata namakgpitsikgo taway. Apóstoles, tiku xmakgtayanankgonit nakamaxkikgo taway lhuwa latamanin akxni Jesús tlawalh milagro, akxilhkgolh pi tlakg xlakaskinka xwanit nakamaxkikan natalan taway xlakata takanajla. Wa xlakata, «liskujkgolh namastakgoy ntachuwin» (Hech. 6:1-6).

10. ¿La kamaklakaskilh Cristo apóstoles chu lakgkgolotsin xalak Jerusalén?

¹⁰ Kkata 49, atanu lakgkgolotsin tiku xkgalhikgo laktlan tayat akxtum katalakgolh apóstoles tiku xlamakgolhku (kalikgalhtawakga Hechos 15:1, 2, Hua Xasasti Talaccaxlan, TXS, 1999). Anta «kJerusalén, [...] apóstoles, chu puxkunanin lakgkgolun» xlitaxtukgo akgtum grupo, o lakgkgolotsin nema xpulalinkgo congregación xla kstalaninanin Cristo. La xAkgxakga congregación, Cristo maklakaskilh uma ni lhuwa lakchixkuwin xlakata xlakkaxtlawakgolh taʼakglhuwit xlakata tuku xkanajlakgo, chu xlakata xpulalinkgolh la natalichuwinan Dios chu la namasiyakan xalakwan xalaksasti xla Tamapakgsin (Hech. 15:6-29; 21:17-19; Col. 1:18).

11, 12. 1) ¿Tuku masiya pi Jehová sikulunatlawalh tuku limaklakaskilh xKgawasa xlakata congregaciones kxapulana siglo xkgalhikgolh taway xlakata takanajla? 2) ¿La tlan xkatsikan tiku Cristo kalimaklakaskilh xlakata nakamaxki taway xlakata takanajla kstalaninanin?

¹¹ ¿Sikulunatlawalh Jehová tuku limaklakaskilh xKgawasa xlakata congregaciones kxapulana siglo xkgalhikgolh taway xlakata takanajla? Xlikana chuna tlawalh. Libro xla Hechos wan: «Cha nchu [apóstol Pablo chu tiku xkataʼan]  akxni xtitaxtukgoy nkakgatunu chuchutsipij [o kachikinin], xwanikgo natalanin mpi natlawakgoy xtastakyaw wa ntu xlakkaxtlawakgonit ntalakgachanin [o apóstoles], chu mpuxkunanin lakgkgolun nti xwilakgo kJerusalén. Chuna nchu nama xtakgatanksakgoy kxtakanajlakan nkgamputunu nkanajlanin, na chali chali xtaliwakatilhama» (Hech. 16:4, 5). Kaʼakxilhwi pi umakgolh congregaciones stakkgolh xlakata ni makgxtakgkgolh chu akxtum kataskujkgolh lakgkgolotsin tiku xkapulalinkgo kJerusalén. ¿Ni masiya uma pi Jehová sikulunatlawalh talakkaxlan nema xKgawasa xmaklakaskima xlakata xmaxkikgolh congregaciones tuku xmaklakaskinkgo? Xlikana pi chuna, xlakata xtasikulunalin Jehová staka kintakanajlakan (Prov. 10:22; 1 Cor. 3:6, 7).

¹² Akxilhnitaw pi Jesús watiya tuku tlawa akxni kamawi kstalaninanin: kaj ni lhuwa limawikgolh chalhuwa. Tuku limaklakaskilh xlakata nakamaxki taway xlakata takanajla ni tuwa xlakgapaskan. Xlakata apóstoles, tiku litaxtukgolh xapulana lakgkgolotsin tiku xkapulalinkgo xkachikin Dios xalak Jerusalén, tlan masiyakgolh pi Dios xkamakgtayama. Hechos 5:12 wan: «Xmakankan ntalakgachanin, xlitatlaway lhuwa xaliukxilhtit, chu likakni anta kchuchutsipij». * Wa xlakata, tiku aku kstalaninanin Cristo xlitaxtukgonit ni xkakgalhskinkan: «¿Tiku umakgolh maklakaskima Cristo xlakata nakamawi xborregos?». Pero akxni sputmaja xapulana siglo, uma talakgpalilh.

13, 14. 1) ¿Tuku wa Jesús pi xʼama tlawanikan kstalaninanin, chu tukuya kilhtamaku kgantaxtulh? 2) ¿Niku xʼama min uma pulaktiy tuku nitlan? (Kaʼakxilhti nota 5.)

¹³ Jesús lichuwinalh pi xcongregación xʼamaka tlawanikan tuku nitlan. Kalakapastakwi pi kxliʼakxilhtit, Jesús lichuwinalh pi kʼakgtum pukuxtu niku aku xchankanit trigo (tiku kalaksakkanit naʼankgo kʼakgapun) xʼama akchankan ni xatlan tuwan (tiku ni xaxlikana kstalaninanin Cristo). Wa xlakata wa pi xʼamaka makgxtakgkan pi akxtum stakkgolh asta akxni xmakgalananka, nema xʼama la «xlikgatsputni katuxawat», o kakilhtamaku (Mat. 13:24-30, 36-43). Ni lhuwa kilhtamaku titaxtulh, xlakata xkgantaxtulh tuku wa Jesús. *

¹⁴ Kxapulana siglo tsukulh anan apóstatas, pero xʼapóstoles Jesús tiku ni makgxtakgkgolh xlitaxtukgo «wanti [x]talalakgapaxtokgma» chu ni mastakgolh talakaskin tuku nixaxlikana tamasiyat nakamaxkajwi tuku xaxlikana (2 Tes. 2:3, 6; 2 Tes. 2:7, TXS, 1999). Pero, akxni nilh xaʼawatiya apóstol, apóstatas tsukukgolh lhuwankgo chu akglhuwa siglo chuna stakkgolh. Kʼuma kilhtamaku, ni xatlan tuwan talhuwilh, pero trigo ni lhuwa xwanit. Ni xʼanan akgtum grupo nema xmastalh taway xlakata takanajla chuna la xtamaklakaskin. Pero xʼama min kilhtamaku uma xʼama talakgpali. ¿Tukuya kilhtamaku?

15, 16. ¿Tuku tlan kitaxtulh xlakata xLikgalhtawakgananin Biblia liwana lakputsananikgolh Biblia, chu tukuya takgalhskinin kinkatlawanikanan?

¹⁵ Chuna la xtalakatsuwima xlisputni kilhtamaku akxni stakkgo, tsukulh anan lhuwa tiku xkatsiputunkgo xaxlikana xlakata Biblia. Kkata 1870, kaj ni lhuwa latamanin tiku xputsakgo xaxlikana lakaxwilikgolh takgalhtawakga xlakata Biblia chu ni akxtum xtatawilakgolh nixatlan tuwan, uma kilhchani, tiku kaj wankgo pi kstalaninanin Cristo nema tapakgsikgo kpusikulan chu sectas nema na kaj wankgo pi stalanikgo Cristo. Umakgolh xLikgalhtawakgananin Biblia, chuna la xlakan xkalimapakuwikan, xtlawakgo oración chu xputsananikgo Biblia (Mat. 11:25).

¹⁶ Takgalhtawakga nema tlawakgolh lu tlan kitaxtulh. Umakgolh tiku xlikana xkakninanikgo Dios masiyakgolh pi nixaxlikana xwanit makgapitsi tamasiyat chu masiyakgolh tuku xaxlikana, tlawakgolh chu makgpitsikgolh lhuwa likgalhtawakga nema xtakilhti kBiblia. Xtaskujutkan chalh xnakujkan chu kamakanajlanilh lhuwa latamanin tiku xkatsiputunkgo tuku xaxlikana.  Wa xlakata taxtu lu xlakaskinka takgalhskinin: ¿Wa xLikgalhtawakgananin Biblia tiku xkalaksanit Cristo xlakata namaxkikgo tuku maklakaskinkgo xborregos akxni nina xchan kata 1914? Ni chuna. Uma chuntiya xwanit kilhtamaku akxni stakmakgolhku, chu tuku xʼamaka maklakaskinkan xlakata xmastaka taway xlakata takanajla aku xlakkaxwilimaka. Nina xchanit kilhtamaku xmapitsika ni xatlan tuwan, chu trigo.

17. ¿Tuku lu xlakaskinka tsukulh kgantaxtu kkata 1914?

¹⁷ La katsiniw kʼartículo nema titaxtulh, kilhtamaku akxni tsukuka makgalanankan tsukulh kkata 1914. Kʼuma kata tsukulh la lhuwa tuku lu xlakaskinka. Jesús Mapakgsina litaxtulh chu tsukulh xaʼawatiya kilhtamaku (Apoc. 11:15). Kkata 1914 asta akxni xtsukuma kata 1919, Jesús chu xTlat minkgolh ktemplo xaʼespiritual xlakata lu xtalakaskin nalakputsananikgo (Mal. 3:1-4). * Chuna, kkata 1919 xʼama tsuku kilhtamaku namamakxtumikan trigo. ¿Xchanit kilhtamaku xlakata Cristo xlaksakli tiku xmastalh taway xlakata takanajla? ¡Chuna!

18. ¿Tuku xʼama laksaka Jesús, chu tuku tlakg xlakaskinka takgalhskinin taxtuyacha akxni xtsukulh kxaʼawatiya kilhtamaku?

¹⁸ Tuku lichuwinalh xlakata xaʼawatiya kilhtamaku, Jesús wa pi xʼama laksaka tiku xʼama maklakaskin xlakata «nakamaxki xtaway kxkilhtamaku» (Mat. 24:45-47, TNM). ¿Tiku xʼama maklakaskin? Chuna la tlawalh kxapulana siglo, Jesús amakgtum kaj makgapitsi xʼama kamaklakaskin xlakata lhuwa nakamawi. Wa xlakata, akxni xtsukulh kxaʼawatiya kilhtamaku, tlakg xlakaskinka takgalhskinin wa tiku umakgolh kaj makgapitsi. Kʼatanu artículo naʼakxilhaw xtakgalhtin uma takgalhskinin chu atanu nema taxtukgoyacha xlakata tuku lichuwinalh Jesús pi nala.