1, 2. ¿Tiku maklakaskin Jesús xlakata namasta taway xlakata takanajla la uku, chu tuku xlakata lu xlakaskinka nalakgapasaw?

«NATALAN, nialh la klakapastaka la xlilhuwa kmakgamakglhtinanit likgalhtawakga nema maklakaskinit chu akxni kmaklakaskinit.» Chuna wa chatum tala tiku lu paxtikatsinilh kmaktum carta nema malakgachalh niku pulalinkan taskujut xliputum katiyatni xla xtatayananin Jehová. ¿Na chuna makgkatsinita wix? Lhuwa akinin chuna makgkatsinitaw. Chu uma ni kaks kinkamalakawaniyan.

² Taway xlakata takanajla nema makglhtinanaw kxkilhtamaku masiya pi Jesús, xAkgxakga congregación, makgantaxtima tuku wanit xlakata la nakinkamaxkiyan tuku maklakaskinaw. ¿Tiku maklakaskima xlakata chuna natlawa? Akxni lichuwinalh tuku xʼama litasiya pi kinkatawilan nawan, Jesús lichuwinalh pi xʼama maklakaskin «skujni xalipaw chu xaskgalala» xlakata «nakamaxki xtaway kxkilhtamaku» amakgapitsi skujnin (kalikgalhtawakga Mateo 24:45-47, TNM). * Kskujni xalipaw chu xaskgalala wa tiku maklakaskin Jesús xlakata nakamaxkikgo taway xlakata takanajla tiku stalanikgo kʼuma xaʼawatiya kilhtamaku. Wa xlakata, lu xlakaskinka nakatsiyaw xlakata uma wa tuku maklakaskinaw xlakata kintakanajlakan chu la talalinaw Dios tlan natawilakgo (Mat. 4:4; Juan 17:3).

3. ¿Tuku lichuwinankgonit kkilikgalhtawakgakan xlakata liʼakxilhtit xla skujni xalipaw chu xaskgalala?

³ ¿La naʼakgatekgsaw kxliʼakxilhtit Jesús xlakata skujni xalipaw chu xaskgalala? Makgasa kilikgalhtawakgakan lichuwinankgonit pi Jesús lakgayawalh skujni xalipaw amakgapitsi skujnin kPentecostés xla kata 33; skujni litaxtu putum tiku kalaksakkanit kKatiyatni chu pi lata ama kata lamakgolh kKatiyatni chu lata tukuya kilhtamaku; amakgapitsi skujnin watiya xlakan xkilhchanima, pero akxni chatunu chatunu kalichuwinankan, chu pi kata 1919 Jesús kalakgayawalh skujni xalipaw «putum tuku kgalhi», uma wamputun  tuku kgalhi kxTamapakgsin unu kkatiyatni. Pero akxni liwana lakputsananiparaw chu tlawaw oración akgatekgswi pi uma xtachuwin Jesús xlakata skujni xalipaw chu xaskgalala talakaskin nalakgpaliyaw la xʼakgatekgsnitaw (Prov. 4:18). Kaʼakxilhwi uma parábola chu kaʼakxilhwi tuku kilhchani kimpalakatakan, maski kgalhkgalhimaw naʼanaw kʼakgapun o nalatamayaw kKatiyatni.

4-6. ¿Tuku xlakata tlan wanaw pi xliʼakxilhtit Jesús xla skujni xalipaw tsukulh kgantaxtu alistalh kkata 1914?

⁴ Tuku pulana lichuwinan liʼakxilhtit xla skujni xalipaw chu xaskgalala masiya pi ni tsukulh kgantaxtu, Pentecostés xla kata 33, wata tsukulh kgantaxtu uma xaʼawatiya kilhtamaku. Kaʼakxilhwi la Biblia kinkamasiyaniyan pi chuna.

⁵ Liʼakxilhtit xla skujni xalipaw chu xaskgalala namakgantaxti tuku wa Jesús xlakata tuku «xaliʼukxilhtit naʼanan akxni kinkatawilan nawan chu akxni talakatsuwinita xlisputni kakilhtamaku» (Mat. 24:3, TNM). Xapulana tuku xlichuwinankanit, nema tatsokgtawilanit kMateo 24:4-22, pulaktiy la kgantaxtu. Xapulana, kgantaxtulh kkata 33 asta kkata 70, chu xliʼakgtiy, tlakg xalanka, akxilhmaw uma xaʼawatiya kilhtamaku. ¿Wamputun uma pi tuku wa Jesús xlakata skujni xalipaw na pulaktiy la kgantaxtu? Ni.

⁶ Tuku likgalhtawakgayaw kMateo 24:29, Jesús xlichuwinama tuku xʼama la kkinkilhtamakujkan (kalikgalhtawakga Mateo 24:30, 42, 44). Akxni xlichuwinama xlakata lanka takatsanajwat, xla wa pi latamanin «naʼukxilhkgoy Xkam nchixku, napumin mpuklhni anta nkʼakgapun». Alistalh kawanilh tiku xʼama latamakgo kxaʼawatiya kilhtamaku pi skgalalh xtawilakgolh uma tachuwin: «Ni katsiyatit ntu hora, akxni namin mimPuchinakan [...] sampi wa xKam nchixku, namin akxni yama hora ni kgalhkgalhipatit». * Akxni Jesús xlichuwinama tuku nala kxaʼawatiya kilhtamaku, nalichuwinan liʼakxilhtit xla skujni xalipaw. Wa xlakata, tlan wanaw pi tuku wa xlakata skujni xalipaw tsukulh kgantaxtu alistalh akxni xtsukunita xaʼawatiya kilhtamaku kkata 1914. Uma chuna xlilat naʼakgatekgsaw. ¿Tuku xlakata?

7. Akxni tsukulh kilhtamaku makgalanankan, ¿tuku lu xlakaskinka takgalhskinin taxtucha chu tuku xlakata?

⁷ Kalilakpuwanti takgalhskinin nema tlawalh Jesús: «¿Tiku uma, xaxlikana, skujni xalipaw chu xaskgalala[?]». Kxapulana siglo, ni xʼanan tuku xlakata natlawakan uma takgalhskinin. Chuna la akxilhwi artículo nema titaxtulha, apóstoles xtlawakgo milagros chu xtlawakgo pi atanu na tlan xtlawakgolh, uma xmasiya pi Dios xkamakgtayama (Hech. 5:12). ¿Tuku xlakata wi tiku xʼama kgalhskin tiku xlikana xlaksaknit Cristo xlakata xpulalinalh? Pero kkata 1914 tlakg tanu xwanit. Kilhtamaku xlakata namakgalanankan xtsukunit uma kata. Xchanit kilhtamaku xlakata xmapitsika ni xatlan tuwan chu trigo (Mat. 13:36-43). Pero akxni tsukulh kilhtamaku xla tamakgalanat, xʼanan lhuwa nixaxlikana kstalaninanin nema xwankgo pi xlakan xwankgonit xaxlikana kstalaninanin Jesús. Wa xlakata taxtucha uma lu xlakaskinka takgalhskinin: ¿La tlan xkatsikan tiku litaxtukgo trigo, kstalaninanin Cristo tiku kalaksakkanit? Liʼakxilhtit Jesús mastalh tuku xlikatsika. Kstalaninanin Cristo tiku kalaksakkanit wa tiku tliwakga xkgalhikgolh xtakanajlakan.

8. ¿Tuku xlakata xlilat pi skujni xalipaw wa kstalaninanin Cristo tiku kalaksakkanit?

⁸ Skujni xalipaw chu xaskgalala taxtuyacha kstalaninanin Cristo tiku kalaksakkanit nema lamakgo kKatiyatni. Xlakan kalimapakuwikan «lu xlakaskinka sacerdotes», chu kawanikanit: «Nalichuwinanatit kxlakatin amakgapitsin wantu xatlan tlawanit tiku kamaxtun kkapukswa chu kalin kxastlan xkgakganat» (1 Ped. 2:9, TNM). Wa xlakata lu tlan pi tiku litaxtukgo «lu xlakaskinka sacerdotes» kalakgchan  nakamasiyanikgo xnatalan tuku xaxlikana (Mal. 2:7; Apoc. 12:17).

9. ¿Putum kstalaninanin Cristo kkatiyatni tiku kalaksakkanit litaxtukgo skujni xalipaw? Kawanti tuku xlakata chuna wana.

⁹ ¿Putum kstalaninanin Cristo tiku kalaksakkanit kKatiyatni litaxtukgo skujni xalipaw? Nichuna. Ni putum tiku kalaksakkanit liskujkgo nakamaxkikgo xnatalan xlikalanka kkatiyatni taway xlakata takanajla. Xlikana pi makgapitsi tiku litaxtukgo trigo liskujkgo la siervo ministeriales o la lakgkgolotsin. Xlakan masiyanankgo kʼakgatunu chiki chu kxcongregacionkan, chu makgtayakgo tuku wankgo pi xlitatlawat tiku pulalinkgo taskujut xliputum katiyatni xla xtatayananin Jehová, pero xlakan ni kamaxkikgo taway xlakata takanajla natalan kxlikalanka katiyatni. Nachuna kxlakgstipankan tiku kalaksakkanit wilakgolh natalan lakpuskatin tiku taktujukgo chu nikxni putsakgo namasiyanankgo kcongregación (1 Cor. 11:3; 14:34).

10. ¿Tiku skujni xalipaw chu xaskgalala?

¹⁰ ¿Tiku uma skujni xalipaw chu xaskgalala? Chuna la tlawalh Jesús akxni kaj makgapitsi kamaklakaskilh xlakata lhuwa xkamawilh, kʼuma skujni makgtapakgsikgo kaj ni lhuwa natalanin tiku kalaksakkanit xlakata namastakgo taway xlakata takanajla kʼuma kilhtamaku akxni Cristo kinkatawilan nawan. Kʼuma xaʼawatiya kilhtamaku, natalan tiku kalaksakkanit chu litaxtukgo skujni xalipaw akxtum skujkgo niku pulalinkan taskujut xliputum katiyatni xla xtatayananin Jehová. La uku, uma skujni xalipaw wa tiku kalaksaknit naʼankgo kʼakgapun, chu wa Lakgkgolotsin tiku Pulalinkgo xTatayananin Jehová. Pero, kaʼakxilhti maski uma skujni chalhuwa litakgatsi, tachuwin skujni kaj chatum tiku kilhchani. Xlakata uma, Lakgkgolotsin tiku Pulalinkgo xTatayananin Jehová skujkgo la kaj chatum, uma wamputun akxtum laksakkgo tuku natlawakgo.

11, 12. 1) ¿Tuku pulaktiy lakgayawaka skujni xalipaw chu xaskgalala? 2) ¿Tukuya kilhtamaku Jesús lakgayawa skujni xalipaw amakgapitsin skujnin, chu tiku kalaksakli?

¹¹ Kiliʼakxilhatkan pi kxliʼakxilhtit Jesús, skujni xalipaw chu xaskgalala pulaktiy tuku lakgayawakan. Xapulana, lakgayawa amakgapitsin skujnin, chu xlipulaktiy, lakgayawa putum tuku kgalhi. Kxliʼakxilhtit Jesús kaj kgantaxtu kxaʼawatiya kilhtamaku, pulaktiy tuku lakgayawakan kaj tsukulh kgantaxtu kkata 1914, akxni Cristo tsukulh litaxtu Mapakgsina.

¹² ¿Tukuya kilhtamaku Jesús lakgayawalh skujni xalipaw amakgapitsin skujnin? Xlakata nakatsiyaw xtakgalhtin uma takgalhskinin,  kalakapastakwi pi kkata 1914, akxni tsukulh kilhtamaku namakgalanankan. La katsinitawa, kʼuma kilhtamaku xʼanan lhuwa grupos nema xwankgo pi xlitaxtukgo kstalaninanin Cristo. Xla umakgolh grupos, ¿nema xʼama laksaka Jesús xlakata xlitaxtulh skujni xalipaw? Uma takgalhskinin takgalhtilh akxni xla chu xTlat lakputsananikgolh templo, tuku Dios xlakkaxwilinit xlakata xkakninanika, nema tsukuka tlawakan kkata 1914 chu asta akxni xtsukuma kata 1919 (Mal. 3:1). * ¡Lu lipaxuwakgolh akxni akxilhkgolh uma ni lhuwa xLikgalhtawakgananin Biblia tiku xmasiyakgo pi xpaxkikgo Jehová chu xTachuwin! Xlikana, xmaklakaskinkgo pi wi tuku xlakgpalikgolh, taktujukgolh chu lakgpalikgolh tuku xtalakaskin kʼuma ni lhuwa kilhtamaku akxni xkaliʼakxilhmaka chu xkamaskulunkimaka (Mal. 3:2-4). Umakgolh xLikgalhtawakgananin Biblia tiku ni xmakgxtakgnankgo litaxtukgolh xaxlikana trigo. Kkata 1919, akxni lakastakwanamparakgolh xtakanajlakan, Jesús kalaksakli kxlakgstipankan umakgolh xatalaksakni, natalan tiku kalakgayawalh amakgapitsin skujnin chu xlitaxtukgolh skujni xalipaw chu xaskgalala.

13. ¿Tiku na tapakgsinikgo amakgapitsi skujni, chu tuku xlakata?

¹³ ¿Tiku litaxtukgo amakgapitsin skujnin? Wa tiku kamawikan. Akxni xtsukuma xaʼawatiya kilhtamaku, putum amakgapitsin skujnin kstalaninanin Cristo tiku xatalaksakni xwankgonit. Alistalh, lhuwa latamanin xla atanu borregos nachuna litaxtukgolh amakgapitsin skujnin. La uku umakgolh litaxtukgo tlakg lhuwa tiku “nkgamputum wankgonit” chu stalanikgo Cristo (Juan 10:16). Tiku kalaksakkanit chu amakgapitsi borregos litamakgtayakgo watiya taway xlakata takanajla nema mastakgo skujni xalipaw «kxkilhtamaku». ¿Chu tuku tlan nawanaw xlakata Lakgkgolotsin tiku Pulalinkgo xTatayananin Jehová nema litaxtu skujni xalipaw chu xaskgalala? Xlakan na maklakaskinkgo taway xlakata takanajla, wa xlakata taktujukgo chu wankgo pi akxni xakstu wilakgo na litaxtukgo amakgapitsi skujnin xtachuna amakgapitsi xaxlikana kstalaninanin Cristo.

14. 1) ¿Tuku lu xlakaskinka taskujut lakgayawakanit skujni xalipaw chu tuku makgtanu anta? 2) ¿Tuku wanilh Jesús skujni xalipaw chu xaskgalala? (Kaʼakxilhti recuadro «Lapi wa yama skujni, ni tlan skujni xwaj, [...] kxnaku...».)

¹⁴ Jesús maxkilh lu tuwa taskujut uma skujni xalipaw chu xaskgalala. Kilhtamaku nema lichuwinan Biblia, skujni tiku xlipawankan o mayordomo wa tiku xpulalin putum skujnin nema xwilakgo kchiki (Luc. 12:42). Nachuna, skujni xalipaw chu xaskgalala lakgayawakanit  napulalin putum skujnin Jehová. Tuku lakgaya na kilhchani nakuentajtlawa tuku anan xla malana, la lichuwinankan Dios, nalakkaxwilikan laklanka tamakxtumit, chu la tlawakan likgalhtawakga nema takilhti kBiblia nema tamaklakaskin akxni lichuwinanaw Dios, ktamakxtumit chu akxni kiʼakstukan kgalhtawakgayaw. Amakgapitsi skujnin lu litamakgtayakgo taway xlakata takanajla nema masta tiku litaxtukgo skujni xalipaw chu xaskgalala.

15, 16. ¿Tukuya kilhtamaku Jesús namakamaxki putum tuku kgalhi skujni xalipaw?

¹⁵ ¿Tukuya kilhtamaku Jesús lakgayawa skujni «putum tuku kgalhi»? Jesús wa: «¡Xatapaxuwan nawan uma skujni akxni namin xmalana chu naʼakxilha pi tlawama xtaskujut! Xlikana kkawaniyan: Nalakgayawa putum tuku kgalhi» (Mat. 24:46, 47, TNM). Kaʼakxilhwi pi Jesús lakgayawa tuku kgalhi akxni min chu akxilha pi skujni «tlawama xtaskujut» uma wamputun pi mastama taway xlakata takanajla. Uma wamputun pi xʼama titaxtu kilhtamaku xlakata xkgantaxtukgolh uma pulaktiy tuku xʼama lakgayawa. Wa xlakata, ¿tukuya kilhtamaku chu la lakgayawa Jesús skujnin putum tuku kgalhi? Xlakata nakgalhtinanaw uma takgalhskinin pulaktiy tuku kilikatsitkan: tukuya kilhtamaku namin chu tuku litakgatsi putum tuku kgalhi.

¹⁶ ¿Tukuya kilhtamaku namin Jesús? Xtakgalhtin tekgsaw tuku lichuwinankgo atanu versículos. Kalakapastakwi pi akxni xapulana versículos lichuwinankgo pi Jesús «namin», uma tachuwin kilhchani akxni namin la Juez kxlisputni uma kakilhtamaku (Mat. 24:30, 42, 44). * Wa xlakata Jesús napumin o namin, nema lichuwinan liʼakxilhtit xla skujni xalipaw chu xaskgalala nakgantaxtu akxni lama nawan lanka takatsanajwat.

17. ¿Tuku kilhchani putum tuku kgalhi Jesús?

 ¹⁷ ¿Tuku kilhchani «putum tuku kgalhi» Jesús? Xla ni wa pi kaj tuku xkgalhi kKatiyatni. Jesús kgalhi lhuwa limapakgsin kʼakgapun. Jesús wa: «Xlipaks limapakgsin, kintamaxkinit nakkgalhiy nkakgapun, chu nkatiyatna» (Mat. 28:18; Efes. 1:20-23). La uku tuku kgalhi na kilhchani xTamapakgsin la Mesías, nema kgalhinit lata kata 1914 chu nema na namapakgsikgo xatalaksakni (Apoc. 11:15).

18. ¿Tuku xlakata Jesús napaxuwa akxni nakalakgayawa putum tuku kgalhi skujni xalipaw?

¹⁸ Xlakata tuku akxilhnitaw, ¿tuku kiliakgatekgsatkan? Akxni Jesús namin la Juez kilhtamaku akxni lama nawan lanka takatsanajwat, naʼakxilha pi skujni xalipaw chu xaskgalala kamaxkima taway xlakata takanajla amakgapitsi skujnin. Uma kilhtamaku nalipaxuwa akxni: nakalakgayawa putum tuku kgalhi. Tiku litaxtukgo skujni xalipaw nalakgatayakgo uma akxni naʼankgo kʼakgapun chu natamapakgsinankgo Cristo.

19. ¿Tlakg lhuwa tuku namakglhtinan skujni xalipaw kʼakgapun ni xawa amakgapitsi tiku kalaksakkanit?

¹⁹ ¿Tlakg lhuwa tuku namakglhtinan skujni xalipaw kʼakgapun ni xawa amakgapitsi tiku kalaksakkanit? Ni. Maski wi tuku kawanikanit namakglhtinankgo makgapitsin, uma na tlan xmakglhtinankgolh atanu. Akgtum liʼakxilhtit, kalakpuwanti tuku Jesús kawanilh 11 apóstoles katsisni akxni xʼama niy (kalikgalhtawakga Lucas 22:28-30). Jesús kawanilh uma ni chalhuwa lakchixkuwin pi wi tuku xʼamakgolh makglhtinankgo xlakata nikxni makgxtakgkgolh: akxtum xʼama katamapakgsinan. Pero makgapitsi kata alistalh, Jesús wa pi putum 144,000 natatawilakgo kxlimapakgsin la mapakgsinanin (Apoc. 1:1; 3:21). Nachuna, la wan Mateo 24:47, xla kawanilh ni chalhuwa lakchixkuwin, natalan tiku kalaksakkanit chu litaxtukgo skujni xalipaw, pi xʼama kalakgayawa putum tuku kgalhi. Pero, xliputum 144,000 natamapakgsinankgo Cristo kʼakgapun (Apoc. 20:4, 6).

20. ¿Tuku xlakata Jesús lakgayawanit skujni xalipaw, chu tuku liwana lakapastaknitaw natlawayaw?

²⁰ Xlakata skujni xalipaw chu xaskgalala, Jesús tlawama chuna la tlawalh kxapulana siglo, kamaklakaskima kaj ni lhuwa xlakata lhuwa nakamawi. Jesús laksakli uma skujni xalipaw xlakata kxaʼawatiya kilhtamaku xaxlikana kstalaninanin, tiku naʼankgo kʼakgapun chu atanu borregos, xkgalhikgolh taway xlakata takanajla «kxkilhtamaku». ¡Lu paxtikatsiniyaw! Kamasiyaw pi paxtikatsiniyaw chu kamakgtayaw umakgolh natalanin xatalaksakni tiku litaxtukgo skujni xalipaw chu xaskgalala (Heb. 13:7, 17).