BIBLIA wan: «Ti kakgalhi ixkamanan, nama Dios kamaskiwinit; minini nakalakgalhaman ixkamanan porque snun tamakwan», o mintatlaja (Sal. 127:3). ¡Wa xlakata natlatni lu paxuwakgo akxni lakachin kskgatakan!

Pero, maski anan tapaxuwan, na talakaskin wi tuku naliskujkgo. Xlakata kskgata tliwakga nastaka chu nitu nalani, talakaskin liwana namawikan chu chali chali. Nachuna xlakata tliwakga natawila xtakanajla, talakaskin tuku nalimatliwakglha chu wa napulalinkgo xnatlatni. Lu xlakaskinka pi natlatni lu naliskujkgo xlakata namasiyanikgo tastakyaw xalak Biblia (Prov. 1:8). ¿Tukuya kilhtamaku natsuku masiyanikgo, chu la tlan natlawakgo?

Kaʼakxilhwi tuku titaxtulh Manóah, xalak xfamilia Dan tiku xlama kʼZorá, kachikin xala makgan Israel. Akgtum kilhtamaku, xʼángel Jehová makatsinilh xpuskat, tiku nila xkgalhinit skgata, xʼama kgalhi skgata (Juec. 13:2, 3). Max lu lipaxuwakgolh uma tuku kamakatsinika, pero na lilipuwankgolh. Wa xlakata, Manóah tiku ni xmakgxtakga Dios tasaskinilh: «Kintapati, Jehová. Miskujni nema aku malakgacha, kakinkalakgmimparan amakgtum, katlawa litlan, chu kakinkawanin tuku naktlawayaw xlakata kgawasa nema nalakachin» (Juec. 13:8). Manóah chu xpuskat lu xlakaskinka akxilhkgolh la namakgastakkgo uma kgawasa. Xlikana, xlakan lu liskujkgolh xlakata xmasiyanikgolh xkgawasa, Sansón, xLimapakgsin Jehová. Chu tuku tlawakgolh kasikulunalika, xlakata Biblia wan: «Chalh kilhtamaku, xʼespíritu Jehová tsukulh malakpuwani». Xlakata xlitliwakga Dios, Sansón juez litaxtulh kIsrael, chu na tlawalh lhuwa tuku nila takanajla (Juec. 13:25; 14:5, 6; 15:14, 15).

¿Tukuya kilhtamaku natlatni natsukukgo masiyanikgo xkamankan? Biblia wan pi Timoteo lata «aktsu kgawasa xwanit[...]», Eunice chu xnana, o xtsiyuna, Loida masiyanikgolh «xtatsokgnun Dios» (2 Tim. 1:5; 2 Tim. 3:15, Xasasti Talaccaxlan, [Coyutla]). Chuna, Timoteo tsukuka masiyanikan xlakata Dios akxni lu skgataku xwanit.

Kstalaninanin Cristo tiku natlatni lu tlan skinikgo pi kakapulalilh Jehová chu liwana lakkaxwilikgo la namasiyanikgo xkamankan lata aktsujku. Proverbios 21:5 wan: «Akxni liwana lakkaxwili tuku natlawa tiku skgalala lu tlan kitaxtuni». Akxni nina lakachin skgata, natlatni liwana lakkaxwilikgo tuku natlawakgo. Max natlawakgo akgtum lista xlakata tuku namaklakaskin skgata. Pero na lu xlakaskinka namasiyanikgo xlakata Dios. Talakaskin nalakaxwilikgo namasiyanikgo xlakata Jehová lata aktsujku.

Akgtum informe nema tlawalh Unesco wa pi «chuna la xlilhuwa tatastuktilhakgo células nema anan kxakskitit chatum skgata tlakg talhuwi xapulana papaʼ» uma tlawa pi «liwana nakatlan kxakskitit» chu wa xlakata tlan katsini (El desarrollo del niño en la primera infancia: echar los cimientos del aprendizaje). ¡Lu xlakaskinka pi natlatni kamaklakaskinkgolh uma kilhtamaku xlakata namasiyanikgo xkamankan, la nalinkgo xlatamatkan xlakata nalakgati Dios!

Chatum precursora wa xlakata xtsumat: «Ktaʼan lichuwinan Dios lata akxni xkgalhi akgtum papaʼ. Xlikana pi xla ni xkatsi tuku xlama, pero uma lu makgtayalh. Akxni xkgalhi akgtiy kata xakstu xkamaxki tratados latamanin».

Akxni aktsujku kamasiyaniyaw kamanan tlakg tlan kitaxtu. Pero lhuwa natlatni wankgo pi kamasiyanikan kamanan xlakata Dios akxni aktsujku lu tuwa.

Kamanan lhuwa tuku tlawaputunkgo chu ni lu kuentatlawakgo. Uma lhuwa taskujut xlakata natlatni. Max kaj lakapala nialh kuentajnatlawa tuku pulana xakxilhma. Chu uma lu tlan xlakata lakgapasma tuku anan kakilhtamaku. ¿Tuku tlan natlawayatit xlakata namakgtayayatit minkaman kuenta natlawa tuku masiyanimaka?

Kaʼakxilhtit, tuku wa Moisés. Deuteronomio 6:6, 7 likgalhtawakgayaw: «Umakgolh tachuwin nema klimapakgsiman la uku natamakgxtakga kminaku; chu namasiyaniya minkamanan chu nalitachuwinana akxni natawilaya kminchik chu akxni lapat ktiji chu akxni pimpata lhtataya chu akxni natakiya». Tachuwin namasiyaniya wamputun pi makglhuwa nawaniya. Chatum aktsu kgawasa xtachuna la aktsu kiwi nema lakaskin pi makglhuwa namunuwilikan. Chu komo tiku laklankata kamakgtaya akxni makglhuwa kawanikan, ¡tiku aktsujku tlakg namakgtaya!

Xlakata nakamasiyaniyatit minkamanankan tuku xalak Biblia, talakaskin akxtum nakatatawilayatit. Uma kakilhtamaku niku lhuwa skujkan, lu tuwa kitaxtu. Pero apóstol Pablo kinkastakyawayan pi “kamalakgtaxtiw nkilhtamaku” xpalakata tuku xla Dios (Efes. 5:15, 16). ¿La natlawayaw? Chatum kgolotsin lu tuwa xmakgkatsi namakgantaxti namasiyani xtsumat chu nachuna xtlawalh  tuku xlakgaya kcongregación chu na xʼalh skuja. Xpuskat, tiku precursora regular, na lhuwa taskujut xkgalhi. ¿La limaxtukgolh kilhtamaku xlakata xmasiyanikgolh xtsumat? Tala wan: «Chali chali akxni nina xakan skuja, kimpuskat chu akit klikgalhtawakganiyaw maski kaj ni lhuwa Ki libro xla takgalhtawakga xalak Biblia o folleto Texto nema Nalikgalhtawakgayaw chali chali. Nachuna, akxni kmalhtatiyaw, klikgalhtawakganiparayaw maski kaj aktsu. Chu akxni kanaw lichuwinanaw Dios, na klinaw. Ni kmakgatsankgaputunaw uma kilhtamaku xlakata aku stakma».

Xlikana, putum lakaskinaw pi kinkamankan akxni nastakkgo lu tlan nalikatsikgo. Pero, kamasiyaniyaw xlakata lakaskinaw pi kapaxkikgolh Jehová xliputum xnaku (Mar. 12:28-30).

Salmo 127:4 wan: «Jee kamanan talitaxtu la lhuwa litipni [o flechas] nima chatum soldado kalilapula». Xlikana kamanan la litipni kxmakan tiku makan. Xla liwana nakaxwili xmakan xlakata namalakgchani niku lakaskin, xlakata akxni makanita flecha nialhla maspitara. Kamanan ni putum kilhtamaku anta nakatatawilakgo xnatlatnikan. Wa xlakata, natlatni liwana kamaklakaskinkgolh kilhtamaku nakamasiyanikgo tuku wan Biblia xlakata natawila kxtalakapastakni chu kxnaku.

Akxni xkalichuwinama xkamanan xaʼespiritual, apóstol Juan tsokgli: «Ni tu ntu ntlakg klimakgapaxuwakan, lapi ni wa yuma: lantla kkgaxmata mpi wa nkilakgskgatan stalanimakgo ntalulokgtat», o xaxlikana (3 Juan 4). Natlatni nachuna lipaxuwakgo akxni akxilhkgo pi xkamanankan «stalanimakgo ntalulokgtat».