Mapakgsina xalak Siria xputsastalanima Eliseo. Akxni katsilh pi xpalakachuwina Dios, xwi kDotán, akgtum kachikin nema listiliwilikanit patsaps chu kkasipijni wi, katsisni «malakgachalh anta kawayu, chu putlaw nema litlawakan guerra chu lhuwa soldados». Chu tsisa putum xsoldados stiliwilikgonita kachikin (2 Rey. 6:13, 14).

Akxni kskujni Eliseo taki chu taxtu, akxilha putum tiku chipaputunkgo palakachuwina, chu pixlanka wan: «¡Ay kimalana! ¿Tuku natlawayaw?». Chu Eliseo wani: «Ni kapekuanti, xlakata tlakg lhuwa tiku kinkatawilan akinin nixawa tiku katawi xlakan». Alistalh palakachuwina tlawa oración: «Oh Jehová, kamalakini xlakgastapu, katlawa litlan, xlakata tlan naʼakxilha». Biblia wan: «Lakapala Jehová malakinilh xlakgastapu xlakskujni, chu xla akxilhli; chu ¡kaʼakxilhti!, kasipijni lhuwa kawayu xlitatsamanit chu putlaw nema xlinkan kʼguerra xalhkuyat xlitastilinit Eliseo» (2 Rey. 6:15-17). ¿Tuku kinkamasiyaniyan uma tuku titaxtulh Eliseo?

Eliseo ni pekualh akxni akxilhli pi sirios stiliwilikgolh xlakata lipawa Jehová chu akxilhli xlitliwakga. La uku, ni kgalhkgalhimaw pi Jehová katlawalh milagro, pero akxilhaw la Jehová makxtum kuentajtlawama xkachikin. Uma litaxtu chuna la xkinkalistiliwilikgon «kawayu chu putlaw nema xlinkan kʼguerra xalhkuyat. Chuna kakxilhaw xlakata kanajlaniyaw Dios, tlan limakgkatsiyaw chu nakgalhiyaw xtasikulunalin (Sal. 4:8). Kaʼakxilhwi tuku kinkamasiyaniyan atanu tuku titaxtulh Eliseo.

Akgtum kilhtamaku akxni Eliseo skujma kxpukuxtu, palakachuwina Elías talakatsuwinilh chu lakgmakalh klhakgat nema xlilakgapaskan pi palakachuwina xwanit. Eliseo xkatsi tuku xwamputun uma wa xlakata tlawalh akgtum paskua, kawanilh xtlat chu xtse pi xʼamaja chu alh skujnani Elías (1 Rey. 19:16, 19-21). Xlakata Eliseo tlawalh putum tuku xmatlani chu lhuwa skujnanilh, Jehová  tlakg maklakaskilh chu alistalh skujli xlakgxokgo palakachuwina Elías.

Max Eliseo skujnanilh Elías akgchaxan kata. Uma kilhtamaku Eliseo wa «tiku xmakamawaka chuchut Elías» (2 Rey. 3:11). ¿Tuku wamputun uma tachuwin? Ama kilhtamaku latamanin xmakankan xliwayankgo, ni xmaklakaskinkgo cuchara. Wa xlakata akxni xwayankgo xmalana, skujni xmakamawaka chuchut xlakata xmakgachakgalh. Chuna la akxilhaw, makgapitsi taskujut xtasiya pi ni lu tuwa xwanit chu chali chali xtlawakan; maski chuna Eliseo lanka talakgalhaman xliʼakxilha naskujni Elías.

La uku, lhuwa kstalaninanin Cristo putum kilhtamaku skujnikgo Dios chu tipalhuwa la tlawakgo, xlakata xtakanajlakan chu maxkiputunkgo Jehová tuku tlakg tlan kgalhikgo. Makgapitsi makgxtakgkgo xchikkan xlakata naʼankgo, kBetel o niku tlawakan chiki nema limaklakaskinkan xlakata xtaskujut Dios nema atanu lakpuwankgo pi nitu litaxtu uma taskujut. Pero putum uma taskujut nema tlawakgo xlakaskinka, chu tiku tlawa nitu kamaktukjumaka. Chu tuku tlakg tlan Jehová lhuwa xtapalh akxilha. ¿Ni xlikana pi nachuna naliʼakxilhaw? (Heb. 6:10.)

Akxni Dios nina xlin «Elías kʼakgapun klanka un», lata kʼGuilgal malakgachalh kBetel. Elías wanilh Eliseo pi ni xtaʼalh, pero xla kgalhtilh: «Ni ktimakgxtakgni». Ktiji, Elías makgtiy wanilh Eliseo pi xtamakgxtakgli (2 Rey. 2:1-6). Pero Eliseo ni makgxtakgli. Xtachuna la Rut ni makgxtakgli Noemí (Rut 1:8, 16, 17). Xlikana pi lu xlakaskinka xakxilha taskujut nema Dios xmaxkinit xlakata naskujnani Elías.

¿La nachuna natlawayaw la Eliseo? Xlakaskinka akxilhaw taskujut nema kinkalakgayawakanan kxkachikin Dios, kalakapastakwi pi skujnimaw Jehová. ¡Ni anan atanu lanka talakgalhaman! (Sal. 65:4; 84:10.)

Ktiji Elías wanilh Eliseo: «Kaskinti tuku tlan naktlawa mimpalakata xlakata unu kwijku». Xtachuna la tuku skilh Salomón makgasa, Eliseo na skilh tuku xaʼespiritual. Xla skilh palakachuwina: «Katlawa litlan, pi pulaktiy miʼespíritu kakilakgmilh» (1 Rey. 3:5, 9; 2 Rey. 2:9). ¿Tuku kskima Eliseo? Akxni chatum tlat israelita xmapitsi tuku xkgalhi xkamanan, xapuxku kgawasa pulaktiy tuku xlakgchan namakglhtinan (Deut. 21:15-17). Chuna, Eliseo kskima pi xla xlitaxtulh xlakgxokgo Elías. Chu xlimasiyaputun pi xtachuna la Elías ni xpekuan, tiku «lu [x]tatayanit Jehová» (1 Rey. 19:13, 14).

Elías kgalhtilh: «Lu tuwa tuku skinti. Komo nakiʼakxilha akxni nakilinkan, chuna naʼakgspulayan; pero komo ni nakiʼakxilha, ni chuna katilalh» (2 Rey. 2:10). Tuku likgalhtilh Elías pulaktiy tuku xkilhchani: pulana, pi kajwatiya Jehová tlan xmaxki Eliseo tuku kskinit, chu xliʼakgtiy, pi komo xmakglhtinamputun uma, xtalakaskin pi Eliseo ni xmakgxtakgli Elías.

¿Maxkilh Dios tuku skilh Eliseo? Biblia wan tuku lalh: «Kitaxtulh pi chuna la xtlawantilhamakgo chu xlatachuwinamakgo, ¡kaʼakxilhti!, akgtum putlaw nema xlinkan kʼguerra xla lhkuyat chu kawayu xla lhkuyat, chu umakgolh kamapitsilh; chu Elías tsukulh takxtu kʼakgapun anta kkaunin. Putum uma kilhtamaku Eliseo xakxilhma uma». * Uma wa xtakgalhtin Jehová kgalhtilh. Eliseo akxilhli akxni Elías linka, makglhtinalh pulaktiy xʼespíritu chu palakachuwina wa xlakgxokgo (2 Rey. 2:11-14).

Eliseo sakli kxlhakgat Elías nema xlilakgapaskan pi palakachuwina xwanit chu lhakgalh. Akxni xʼakxilhnika xʼamaka katsikan pi wa xpalakachuwina Dios xwanit. Chu uma liwana tasiyalha akxni Eliseo mapapitsilh kgalhtuchokgo Jordán.

Tuku Eliseo akxilhli akxni Elías linka kʼakgapun klanka un max lu matliwakglhli. ¡Xlakata ni chali chali tasiya putlaw xla guerra chu kawayu xla lhkuyat! Liwana xtasiya pi Jehová xkgalhtinit tuku xla skilh. La uku, Jehová ni tlawa pi wi tuku naʼakxilhaw akxni kgalhti kiʼoracioneskan, pero tlan akgatekgsaw pi limaklakaskin xlitliwakga xlakata natlawa xtalakaskin. Akxni akxilhaw la sikulunatlawa xkachikin kKatiyatni  kinkamakgtayayan «naʼakxilhaw» la skujma xputlaw xalak akgapun (Ezeq. 10:9-13).

Eliseo lhuwa akxilhli nema xlitasiya xlitliwakga Jehová. Eliseo, tlawalh 16 milagro, tlakg lhuwa tlawalh nixawa Elías, chuna tlawalh xlakata xʼespíritu santo Dios. * Xlimakgtiy akxni Eliseo akxilhli putlaw nema xlinkan kʼguerra xla lhkuyat chu kawayu xla lhkuyat, wa akxni sirios talachipakgolh kachikin Dotán, nema lichuwinawa niku tsuku uma artículo.

Eliseo ni lilakgaputsalh akxni akxilhli pi xkastiliwilinit tiku xkasitsinikgo kDotán. ¿Tuku makgtayalh? Tliwakga takanajla nema xkgalhi. Na chuna talakaskin nakanajlaniyaw. Wa xlakata, kaskiniw Jehová espíritu santo xlakata nalimasiyayaw uma takanajla chu atanu xtatlaw espíritu (Luc. 11:13; Gál. 5:22, 23).

Tuku titaxtulh Eliseo kDotán na makgtayalh xlakata nalipawan Jehová chu xʼángeles. Palakachuwina akxilhli pi Dios kgalhi ángeles nema xkastiliwilinit kachikin chu tiku na xkastiliwilinit. Eliseo chu kskujni lakgtaxtukgolh akxni Jehová kamalakgatsilh tiku xkatalatlawama (2 Rey. 6:17-23). Ama lu tuwa kilhtamaku, Eliseo limasiyalh pi xkanajlani chu lu xlipawan Jehová, chuna la xtlawanita makgasa.

Xtachuna la Eliseo kalipawaw Jehová (Prov. 3:5, 6). Komo chuna natlawayaw “Dios, [...], nakinkasikulunatlawayan” (Sal. 67:1). Xlikana, ni naʼakxilhaw pi kinkastiliwilinitan putlaw chu kawayu xla lhkuyat, Jehová kakuentajtlawa xkachikin la uku chu nakakuentajtlawa kilhtamaku nema aku mima akxni namin «ntlanka takatsanajwat» (Mat. 24:21; Apoc. 7:9, 14). Xlakata nina chin uma kilhtamaku, kalakapastakwi pi putum kilhtamaku Jehová “nakinkamakgtayayan” (Sal. 62:8).