Klakachilh kkata 1956. Xlakata nitlan xwanit tubo neural xalak kistipulukut, ktalakachilh espina bífida. Uma tlawalh pi kinervio xtalakgalhilh chu ni liwana ktlawan chu nachuna uma tlawa pi atanu tajatat nakkgalhi.

Kinatlatni tsukukgolh katalikgalhtawakgakgo Biblia akgtum tamakgaxtokgat tiku misioneros xwankgonit akxni nina xaklakachin. Akxni aktsinajku xakwanit, kaj makgapitsin tiku xlichuwinankgo Dios kkinkachikin Usakos (Namibia), kachikin niku klakachilh, wa xlakata xaklikgalhtawakgayaw kfamilia tuku xla tamakxtumit. Akxni xakkgalhi 7 kata, kintlawanika akgtum operación nema wanikan urostomía, uma kilhchani tsinu kinchukuka xlakata tlan xtaxtulh tsulut chu akxni xakkgalhi 14 kata kinchipalh epilepsia. Komo secundaria lu makgat xwi chu xtalakaskilh pi kinatlatni xkinkuentajtlawakgolh, nila kmasputulh kintakgalhtawakga.

Maski chuna klakkaxwililh nakmatliwakglha kintakanajla. Xlakata lhuwa kilikgalhtawakgakan nina xmatitaxtikan afrikáans, tachuwin nema kchuwinan, kkatsinilh inglés xlakata tlan xaklikgalhtawakgalh makgapitsi libros. Ktsukulh klichuwinan Dios chu ktamunulh akxni xakkgalhi 19 kata. Akgtati kata alistalh, lu ksnunalh chu lhuwa talipuwan kkgalhilh. Nachuna niku xaklamaw putum xlalakgapasaw, wa xlakata xakkapekuani latamanin nila lu xaklichuwinan Dios.

Xakkgalhi liwaka 20 kata akxni kilatamaw kSudáfrica, niku xapulana ktsukulh kan kcongregación. ¡Lu klakgatilh! Pero ni xlimakgas kilhtamaku kinchukuparaka, chu uma wanikan colostomía.

Alistalh kkgaxmatli akgtum taʼakgchuwin nema mastalh superintendente de circuito nema xlichuwinama precursores. Tuku wa chalh kkinaku. Akit xakkatsi pi tlakg ni tlan xakwi, pero xakakxilhnit la Jehová xkimakgtaya akxni xaktitaxtu tuku tuwa; wa xlakata kmatsamalh solicitud xlakata precursor regular xakwa. Pero xlakata lakgkgolotsin xkatsikgo pi xaktatatla, ni matlanikgolh.

Pero klakkaxwililh tlakg naklichuwinan Dios. Xlakata kintse chu amakgapitsin natalan kimakgtayakgolh, akgchaxan papaʼ tlan kmakgatsilh horas nema xtlawakgo precursores, uma limasiyalh pi xlikana precursora xakwamputun chu na klimasiyalh pi maski xaktatatla tlan xakmakgantaxtilh. Amakgtum kmatsamapa solicitud, chu matlanika. Precursora regular klitaxtulh 1 xla septiembre kata 1988.

Lata uma kilhtamaku kakxilhnit la Jehová kimakgtaya. Akxni kkamasiyani tuku xaxlikana atanu kimakgtaya ni naklilakgaputsa chu matliwakglhnit la ktalalin Jehová. ¡Lu klipaxuwa xlakata lhuwa tiku kkamakgtayanit xlakata naskujnikgo Jehová!

Chuntiyaku ktatatla, pero Jehová chali chali lin kintakuka (Sal. 68:19). Jehová ni kaj kimakgtayanit naktayani kintajatat, na tlawanit pi naklipaxuwa kilatamat.