1, 2. ¿Tuku tayat kilikgalhitkan xlakata Dios tlan nakinkaʼakxilhan?

MAKGLHUWA lilipuwanaw xlakata la amakgapitsi kinkaʼakxilhkgoyan. Pero la kstalaninanin Cristo, tuku tlakg xlakaskinka kiliʼakxilhatkan wa la Jehová kinkaʼakxilhan. Xlakata wa tiku tlakg xaLanka xlikalanka kakilhtamaku chu «makilhtsuki[...] latamat» (Sal. 36:9).

² Akxni apóstol Pedro xlichuwinama “ti nchixkuwin kiliwanatkan” kxlakatin Jehová, kinkawanin pi “xasantujlani kilatamatkan nakgalhiyaw, chu xkakninanin Dios nawanaw” (kalikgalhtawakga 2 Pedro 3:11). Xlakata Dios tlan nakinkaʼakxilhan talakaskin xasantujlanin nawanaw, uma wamputun, pi xaskulunku natawilayaw kimaknikan, kintalakpuwankan chu kintakanajlakan. Nachuna, talakaskin pi akinin «xkakninanin Dios nawana[w]» nalimasiyayaw pi paxkiyaw chu maxkiyaw kakni. Xlakata Dios tlan nakinkaʼakxilhan ni kajwatiya talakaskin tuku tlawayaw, na kilhchani tuku tayat kgalhiyaw. Xlakata Jehová tiku «putsanani[...] naku», katsi komo kgalhiyaw tlan tayat chu kajwatiya xla kakninaniyaw o ni (1 Crón. 29:17).

3. ¿Tukuya takgalhskinin lu xlakaskinka akstu nakinkatlawanikanan?

³ Akgskgawini, ni lakaskin pi naliskujaw xlakata Dios tlan nakinkaʼakxilhan. Xla lhuwa tuku tlawa xlakata nialh tlan natalalinaw Dios. Xla limaklakaskin taʼakgsanin xlakata nakinkaʼakgskgawiyan chu natamakgatliniyaw Dios (Juan 8:44; 2 Cor. 11:13-15). Wa xlakata, talakaskin pi akstu nakinkakgalhskinkanan: «¿La kiʼakgskgawiputun Satanás? ¿La tlan kuenta naktlawa la ktalalin Dios?».

4. ¿Tuku limaklakaskin Satanás xlakata nakinkaʼakgskgawiyan chu tuku xlakata?

⁴ Santiago tsokgli: «Chatunu litatokglhnit wa ntu watiya xtaxkgonalakankan, [tuku lakaskinkgo]». Chu na  wa: «Wa ntaxkgonalakan; akxni wi ntu likilhtsukunit, talakgalhin nkitaxtuniy, cha nchu ntalakgalhin, mpi kgantaxtunitta, linin nkitaxtuniy» (Sant. 1:14, 15). Xlakata Satanás lakaskin pi ni natalalinaw Dios, xla limaklakaskin tuku akinin lakaskinaw: kkinakujkan.

5, 6. 1) ¿Tuku liʼakgskgawiputun Satanás kinakujkan? 2) ¿Tuku taʼakgsiyat limaklakaskin Satanás xlakata naliʼakgskgawi kinakujkan, chu la xlilhuwa kilhtamaku limaklakaskinit?

⁵ ¿La tlawaniputun Satanás tuku nitlan kinakujkan? Biblia wan: «Na paks kxlitliwakga akgskgawini wilakgo, xlipaks ntachixkuwitat» (1 Juan 5:19). Tuku limaklakaskin kilhchani «putum tuku anan kkakilhtamaku» (kalikgalhtawakga 1 Juan 2:15; 2:16, TNM). Lhuwa mil kata, Akgskgawini lakkaxwilima tuku nitlan kakilhtamaku niku lamaw. Xlakata lamaw kʼuma kakilhtamaku, talakaskin skgalalh natawilayaw xlakata ni nakinkaʼakgskgawiyan (Juan 17:15).

⁶ Satanás limaklakaskin tuku naliʼakgskgawi kinakujkan. Apóstol Juan lichuwinalh pulaktutu: 1) «tuku tlawaputun kimaknikan», 2) «tuku akxilhputun kilakgastapukan» chu 3) «tuku kgalhikan klatamat». Satanás limaklakaskilh uma pulaktutu akxni liʼakxilhli Jesús kdesierto. Chu lhuwa kata limaklakaskinit uma taʼakgsiyat, la uku lu tlan kitaxtunikgo chu katsi niku naxlajwanan chatunu chatunu. Pero, xlakata ni nakinkaʼakgskgawiyan, pulana kaʼakxilhwi la Satanás liʼakgskgawilh Eva uma taʼakgsiyat chu pi nila liʼakgskgawilh xKgawasa Dios, chu tuku tlawakgolh chatunu.

7. ¿La limaklakaskilh Satanás «tuku tlawaputun kimaknikan» xlakata xʼakgskgawilh Eva?

⁷ Putum latamanin wi tuku maklakaskinaw xlakata kimaknikan: taway. Malakatsukina tlawalh pi Katiyatni xmastalh lhuwa taway. Pero Satanás limaklakaskin taway xlakata nakinkaliʼakgskgawiyan chu nialh natlawayaw xtalakaskin Dios. Kaʼakxilhwi tuku matlawilh Eva (kalikgalhtawakga Génesis 3:1-6). Wanilh Eva pi tlan xwalh xtawakat «kiwi nema xlilakgapaskan tuku tlan chu tuku nitlan» chu ni xʼama niy (Gén. 2:9). Chu wanilh pi kilhtamaku akxni xwalh la Dios xʼama wan. Chuna la wanilh Eva, Satanás limasiyaputulh pi ni xtalakaskin xkgalhakgaxmatnilh Jehová xlakata tlan xlatamalh. ¡Lu lanka taʼakgsanin! ¿Tuku xʼama tlawa Eva? Eva pulaktiy tuku tlan xtlawa: tlan xlakgmakgalh uma tuku wanika o tlan xtlawa. Pero lu nitlan tuku tlawalh, laksakli nawa tawakat, maski xʼanan lhuwa kiwi nema tlan xwa, Eva kgalhakgaxmatli tuku Satanás wanilh xlakata kiwi nema xwi kxitat Jardín. ¿Tuku lalh? «Tiyalh tawakat chu tsukulh way.» Satanás tlawalh pi kstakli kxnaku tuku xMalakatsukina xwaninit ni xtlawalh.

8. ¿La liʼakgskgawiputulh Satanás Jesús «tuku tlawaputun kimaknikan», chu tuku xlakata nila liʼakgskgawilh?

 ⁸ Satanás watiya uma taʼakgsiyat limaklakaskilh akxni akgskgawiputulh Jesús kdesierto. Akxni Jesús ni xwayanit tipuxam kilhtamaku chu tipuxam katsisni, Satanás limaklakaskimputulh xtatsinksni. Xla wanilh: «Wa lapi xKam Dios wix, kawani yuma nchiwix mpi kaxtalanchuj nawan» (Luc. 4:1-3). Jesús pulaktiy tuku tlan xtlawa: namaklakaskin xlitliwakga chu natlaway milagro xlakata nawayan o ni. Jesús xkatsi pi ni xlimaklakaskinat xlitliwakga kaj xlakata xkgalhilh tuku xla xlakaskimputulh. Maski xtsinksma, tlakg xlakaskinka xakxilha chuntiya lu tlan natalalin Jehová. Wa xlakata kgalhtilh: «Ntatsokgnit pi ni xman wa nkaxtalanchu ntlan nkatililatamalh nchixku, wampi wa nalilatamay xlipaks ntu xtachuwin Dios» (Luc. 4:4).

9. ¿Tuku kilhchanima tachuwin «tuku akxilhputun kilakgastapukan», chu la limaklakaskilh Satanás akxni akgskgawilh Eva?

⁹ Juan na wa pi «tuku akxilhputun kilakgastapukan» akgtum taʼakgsiyat. Uma tachuwin kilhchanima pi tlan xtsukuw wi tuku lakaskinaw kaj xlakata akxilhaw. Akxni Satanás tachuwinalh Eva limaklakaskilh uma chu wanilh: «Natalakki milakgastapukan». Akxni Eva tlakg tsukulh akxilha uma tawakat tlakg xlakaskin. Eva akxilhli pi xtawakat kiwi «liwaputu xtasiya».

10. ¿La limaklakaskilh Satanás «tuku akxilhputun kilakgastapukan» xlakata Jesús, pero la kgalhtinalh xla?

¹⁰ ¿Chu la maklakaskilh Satanás «tuku akxilhputun kilakgastapukan» xlakata Jesús? «Ntimasiyunilh [Jesús] xlipaks xtamapakgsin nkatiyatna. Cha nchu wanilh [...]: “Paks wix nakmaxkiyan yuma limapakgsin, chu xlikaknikan”.» (Luc. 4:5, 6.)  Uma ni wamputun pi Jesús ni akxilhli umakgolh tamapakgsin. Satanás maʼakxilhnilh umakgolh tamapakgsin xlakata lakpuwa pi xʼama lakgati. Chu wanilh: «Mpala pi xkilakgatakilhputa, paks mila nawan yuma» (Luc. 4:7). Jesús ni xlikatsiputun chuna la Satanás xlakaskin pi xlikatsilh. Wa xlakata wa: «Ntatsokgnit: “Wa mimPuchina Dios nalakgatakilhputaya, chu na xman wa nti nalakgachixkuwiya”» (Luc. 4:8).

11. ¿La akgskgawi Satanás Eva?

¹¹ Akxni xlichuwinama tuku wi kkakilhtamaku, Juan lichuwinalh «lhuwa masiyakan tuku kgalhikan klatamat». Akxni kaj Adán chu Eva xwilakgo kkatiyatni, nila xmasiyakgo tuku xkgalhikgo  kxlatamatkan kxlakatin amakgapitsin. Pero xlakan masiyakgolh pi lanka xkamakgkatsikan. ¿La tlawakgolh? Akxni Satanás akgskgawilh Eva, wanilh pi Dios ni xmaxkima tuku lu xatlan. Wanilh pi kilhtamaku pi akxni xwalh xtawakat «kiwi nema lilakgapaskan tuku xatlan chu nixatlan» xʼama litaxtu “la Dios [...], nalakgapasatit tuku tlan chu tuku nixatlan” (Gén. 2:17; 3:5). Satanás xwanima pi komo chuna xtlawalh Jehová nialh xʼama mapakgsi. Xlakata lanka xmakgkatsikan tlawalh pi xkanajlalh uma taʼakgsanin. Xla tiyalh tawakat nema xwanikanit pi ni xwalh xlakata lakpuwa pi ni xʼama niy. ¡Lu nitlan chuna la xlakpuwan!

12. ¿Tuku atanu liʼakgsiyat limaklakaskilh Satanás xlakata xliʼakgskgawiputun Jesús, chu tuku likgalhtilh?

¹² ¡Lu tlan liʼakxilhtit kinkawilinin Jesús!, xlakata ni lanka makgkatsika la Eva. Satanás amakgtum liʼakgsiyaputulh, xmatlawiputun tuku kaks xkamalakawanilh atanu chu xliʼakxilhli Jehová, pero Jesús xkatsi pi uma xlitasiyalh pi lanka xmakgkatsikan. Wa xlakata Jesús liwana likgalhtilh: «Chuna ntatsokgnit, wanit: “Ni tislakga ntiliʼukxilha Dios mimPuchina”» (kalikgalhtawakga Lucas 4:9-12).

13, 14. ¿La maklakaskin Satanás xtaʼakgsiyat la uku?

¹³ La uku Satanás limaklakaskin taʼakgsiyat la nema kamaklakaskilh xpalakata Eva chu Jesús. Limaklakaskin «tuku tlawaputun kimaknikan» akxni tlawa pi lu nalichuwinankan talakgxtumit nema ni xlilat chu namalakatsalikan la kgotnankan chu la wayankan. Xlakata naʼakgsiya tiku ni skgalalh lama limaklakaskin tiku ni lhakganankgonit nema tasiya kʼInternet xlakata namatlawi «tuku akxilhputun kilakgastapukan». Chu lu lanka taʼakgsiyat litaxtu tlakg lanka namakgkatsikana nixawa amakgapitsin, limapakgsin chu lhuwa tuku nakgalhikan xlakata latamanin nalitlankajwanankgo chu «lhuwa masiyakgo tuku kgalhikgo klatamat».

¹⁴ «Tuku wi kkakilhtamaku» xtachuna la liwat nema maklakaskin tiku chipa skiti. Lu tlan tasiyakgo, pero makgankganukanit kʼakgtum anzuelo. Satanás maklakaskin tuku latamanin maklakaskinkgo xlakata namatlawikgo tuku xlimapakgsin Dios wa pi ni xlitlawat. Xtaʼakgsiyat katlawakanit xlakata nakinkamalakpuwaniyan tuku nitlan chu tlawani tuku nitlan kinakujkan.  Akgskgawini kinkamalakpuwaniputunan pi tuku maklakaskinaw tlakg xlakaskinka nixawa nakgaxmatniyaw Jehová. ¿Nakinkaliʼakgskgawiyan?

15. ¿La kinkamakgtayayan xliʼakxilhtit Jesús xlakata Satanás ni nakinkaliʼakgskgawiyan xtaʼakgsiyat?

¹⁵ Maski Satanás akgskgawilh Eva, Jesús tayanilh chu ni akgskgawika. Makgatunu xlikgalhtinan tuku wan xTachuwin Dios, xwan «ntatsokgnit» o «wanit». Komo liwana likgalhtawakgayaw Biblia chu katsiyaw tuku wan, akxni nakinkawilinikanan taʼakgsiyat ni tuwa nalakapastakaw makgapitsi textos nema nakinkamakgtayayan ni nakinkaʼakgskgawikanan (Sal. 1:1, 2). Nachuna akxni lakapastakaw lu xatlan xliʼakxilhtitkan tiku ni makgxtakgkgolh Dios xala makgasa kinkamakgtayayan nachuna natlawayaw (Rom. 15:4). Lu tlan nakinkakitaxtuniyan komo xlikana paxkiyaw Dios, paxkiyaw tuku xla paxki chu xkajniyaw tuku xla xkajni (Sal. 97:10).

16, 17. ¿La makgtanu «[k]intalakapastaknakan» la likatsiyaw?

¹⁶ Apóstol Pablo kinkawaniyan pi kamaklakaskiw «[k]intalakapastaknakan» xlakata xtalakapastakni Dios nakinkamasiyaniyan chu ni wa xla kakilhtamaku (Rom. 12:1, 2). Xlakata xlimasiyalh pi lu xlakaskinka kuenta natlawayaw tuku nalakpuwanaw Pablo tsokgli: “Kilitlajatkan nkatuwaj takgslokgon, chu mpala tu ntasokgalin lakgapaxtokga ni nalakgapaskan Dios, chu kamamustsuwiw xlipaks ntapuwan [xlakata] nalakgachixkuwikgoy nCristo” (2 Cor. 10:5). Tuku lakpuwanaw litasiya la likatsiyaw; wa xlakata talakaskin chuntiya “nkalakapastakwi” tuku kinkamakgtayayan (Filip. 4:8).

¹⁷ Komo xasanto wamputunaw, talakaskin nalakgmakganaw nitlan talakapastakni. Jehová lakaskin pi nalipaxkiyaw “xachakgani naku” (1 Tim. 1:15). Pero kalakapastakwi pi kinakujkan kinkaʼakgskgawiyan chu max ni naʼakxilhaw pi kinkalaktlawayan «wa ntu anan nkatuxawat» (Jer. 17:9). Wa xlakata, lu talakaskin pi kuenta natlawayaw uma xtastakyaw Pablo: «Chuntiya kakaliʼakxilhkantit komo xlikana kgalhiyatit takanajla, chuntiya kalimasiyatit tiku wixin» (2 Cor. 13:5, TNM). Akxni likgalhtawakgamaw Biblia kakinkakgalhskinkan: «¿Makgapaxuwa kintapuwan chu tuku klakaskin Dios?».

18, 19. ¿Tuku xlakata liwana nalakapastakaw nalitaxtuyaw la tiku Jehová lakaskin kalitaxtuw?

¹⁸ Atanu tuku kinkamakgtayayan nalakgmakganaw «ntu anan nkatuxawat» wa nakuentajtlawayaw tuku wa apóstol Juan: «Nachuna, kakilhtamaku titaxtuma, chu nachuna tuku lakgati, pero tiku tlawa xtalakaskin Dios putum kilhtamaku latama» (1 Juan 2:17, TNM). Xkakilhtamaku Satanás tasiya pi putum kilhtamaku namakgapala tuku anan, pero nachan kilhtamaku akxni nasputa. Ni kamastaw talakaskin nakinkaʼakgskgawiyan: tuku anan xkakilhtamaku Satanás nalakgsputa.

¹⁹ Apóstol Pedro kinkawaniyan pi kaliskujwi nalitaxtuyaw la tiku Dios tlan kaʼakxilha xlakata «nkgalhkgalhi[maw] namin xkilhtamaku Dios, mpi kachilha mpuwana[w], akxni nalhkuy akgapun, paks nalakgsputa, chu ntu litustuka akgapun lantla jalanat nawankgoy, paks nastalanka» (2 Ped. 3:12). Nialh makgas, Jehová namalakgsputu uma lixkajni kakilhtamaku. Pero Satanás chuntiya namaklakaskin «wa ntu anan nkatuxawat» xlakata nakinkaliʼakgskgawiputunan chuna la tlawa xlakata Eva chu Jesús. Ni chuna nalikatsiyaw la Eva chu nakgalhiputuna kaj tuku lakgatiyaw. Uma xtachuna xliʼakxilhwi Satanás la kidioskan. Wata katlawaw la Jesús chu ni katlawaw tuku kinkamatlawiputunan Satanás, maski lu lilakgatit la tasiya. Chatunu akinin liwana kalakapastakwi nalitaxtuyaw la tiku Jehová lakaskin kalitaxtuw.