AGOSTO xla kata 1936. Robert chu George Nisbet xwilakgo anta kSuazilandia kxpumapakgsin mapakgsina Sobhuza II. Aku xwilikgonit kʼakgtum putlaw nema xkgalhi equipo xla sonido grabaciones xla tatlakgni chu xtaʼakgchuwin tala Joseph F. Rutherford kʼakgtum gramófono. Mapakgsina lu lakgatilh. George wa: «Ni xakkatsiyaw tuku natlawayaw xlakata xtamawaputun gramófono, discos chu tuku xtlawa pi pixlanka xtakgaxmatli tuku xakliʼakgchuwinanaw xTamapakgsin Dios».

Robert wanilh pi xtapatilh chu pi uma ni xtastama. ¿Tuku xlakata? Xlakata atanu tiku xmalana. Mapakgsina xkatsiputun tiku xmalana xwanit.

Robert kgalhtinalh: «Putum uma xla achatum mapakgsina». Akxni mapakgsina Sobhuza kgalhskininalh tiku uma mapakgsina, xla wa: «Xla Jesucristo, xMapakgsina xTamapakgsin Dios».

Sobhuza lu tlan likgalhtinalh: «¡Oh uma xalanka Mapakgsina! Ni kkgalhiputun tuku tapakgsini».

Robert tsokgli: «Lu kaks klilakawa xlakata la xlikatsi mapakgsina Sobhuza. Xla liwana xchuwinan inglés pero ni lanka xmakgkatsikan, liwana xwan tuku xlakaskin chu tlan xtachuwinankan. Ktawilalh kxʼoficina max tipuxamakitsis minuto, chu George wililh tatlakgni kilhtin.

»Watiya uma kilhtamaku, kakgotanun kkilakgapaxialhnaw Escuela Nacional Suazi, chu lu tlan tuku ktitaxtuw. Ktachuwinaw director chu xla liwana kinkakgaxmatnin. Kwaniw pi xakmatlakgniputunaw grabaciones xlakata putum xkgaxmatkgolh, lu lakgatilh tuku kwaniw chu kamamakxtumilh liwaka akgtum ciento kgalhtawakgananin tiku tawilakgolh kkasakgatni chu kgaxmatkgolh. Kinkawanikan pi kʼuma escuela lakgkgawasan xkamasiyanikan la nachananankgo, nachankgo xanat, naxwaknankgo, natlawakgo chiki, inglés chu aritmética; chu laktsuman tsinu xkamasiyanikan enfermería, la nakuentajtlawakgo chiki chu atanu taskujut.» Xnana, o xtsiyuna mapakgsina xtlawanit uma escuela. *

Kkata 1933, mapakgsina Sobhuza xatapaxuwan kakgaxmatnilh precursores tiku lakgapaxialhnankgolh kxpumapakgsin. Makgtum, kamamakxtumilh 100 soldados tiku xkuentajtlawakgo xlakata xkgaxmatkgolh tamakatsin xla xTamapakgsin Dios. Nachuna skilh kamalakgachanika kirevistaskan chu makgamakglhtinalh makgapitsi likgalhtawakga. Ni makgas  titaxtulh mapakgsina xkgalhi atsinu ni putum likgalhtawakga xla xtatayananin Jehová, nachuna, kuentajtlawalh umakgolh likgalhtawakga maski mapakgsinanin xalak Gran Bretaña ni xlakaskin xmaʼakgpitsika kilikgalhtawakgakan akxni lalh xliʼAkgtiy Guerra nema Tatlawalh xLikalanka Katiyatni.

Mapakgsina Sobhuza II chuntiyaku kamakgamakglhtinalh xTatayananin Jehová kxpumapakgsin anta kLobamba, asta kawanilh sacerdotes xlakata na xminkgolh chu xkgaxmatkgolh taʼakgchuwin xalak Biblia. Akxni chatum xtatayana Jehová xalak uma kachikin wanikan Helvie Mashazi xlichuwinama Mateo capítulo 23, makgapitsi sacerdotes tiku lu ksitsikgonit lakapala tayakgolh chu xafuerza xtlawaputunkgo katawilalh. Pero mapakgsina makgtayalh chu skinilh tala Helvie pi chuntiya xchuwinalh. Nachuna mapakgsina kawanilh tiku anta xwilakgolh pi xtsokgwilikgolh putum textos xalak Biblia nema xtalichuwinama.

Atanu kilhtamaku akxni xkgaxmatkgonita taʼakgchuwin nema mastalh tala precursor, kgalhtati sacerdotes wankgolh: «Akinin nialh sacerdotes, la uku akinin xtatayananin Jehová». Alistalh kgalhskinkgolh precursor komo xkgalhi makgapitsi libros nema xkgalhi mapakgsina.

Kkata 1930 asta kata 1982 akxni nilh, mapakgsina putum kilhtamaku tlan kalikatsinilh xTatayananin Jehová, chu ni mastalh talakaskin nakaputsastalanikan kaj xlakata ni xtlawakgolh xtalismaninkan xalak Suazilandia. Wa xlakata xTatayananin Jehová lu lhuwa tuku xlipaxtikatsinikgo chu lu nitlan limakgkatsikgolh akxni nilh.

Akxni tsukulh kata 2013 kSuazilandia xwilakgolh akgtutu mil tiku xlichuwinankgo Dios. Xlakata kʼuma kachikin lamakgolh liwaka 1,000,000 latamanin, 1 xtatayana Jehová lakgchan nalitachuwinan Dios 384 latamanin. Xwi 90 congregaciones niku liwaka akgtiy ciento tutupuxam precursores xwilakgo, chu 7,496 kilakgolh akxni lakapastakka akxni tinilh Jesús kkata 2012. Liwana tasiya pi tlan nastaka xkachikin Jehová anta. Lu makgtayanalh xlakata lakgapaxialhnanka Suazilandia kkata 1930. (Tuku xala makgasa kʼSudáfrica.)