1. ¿Tuku lu nitlan tekgsa Nehemías akxni taspita kJerusalén? (Kaʼakxilhti dibujo nema wi kʼuma página.)

TIKU lamakgolh kJerusalén lichuwinamakgolh tuku lama kkachikin. Chatum chixku xala atanu kachikin maxkikanit talakaskin nawayan ktemplo. Levitas makgxtakgmakgo taskujut nema kalakgayawakanit. Lakgkgolotsin xla kachikin, ni pulalinankgo xaxlikana takanajla la xlitlawatkan, wata stanamakgo sábado. Chu lhuwa israelitas tatamakgaxtokgmakgo tiku ni judíos. Wa uma makgapitsi tuku lu nitlan tekgsa Nehemías akxni taspita kJerusalén kkata 443 akxni nina xmin Jesús (Neh. 13:6).

2. ¿La xlitaxtunit Israel xasanto kachikin?

² Israel xwanit akgtum kachikin nema xtamakamastaninit Dios. Kkata 1513 akxni nina xmin Jesús, israelitas wankgolh pi xtlawaputunkgo xtalakaskin Jehová. Xwankgonit: «Putum tuku Jehová lichuwinanit namakgantaxtiyaw» (Éx. 24:3). Wa xlakata Dios kamasantujlilh, o kalaksakli la xkachikin. ¡Lu lanka talakgalhaman xwanit! Tipuxum kata alistalh, Moisés kamalakapastakalh kachikin: «Xlakata wix akgtum xasanto kachikin kxlakatin Jehová miDios. Wix tiku Jehová miDios laksaknitan xlakata xkachikin nawana, tuku xatalaksakni, xla xliputum kachikinin nema wilakgo xlikalanka katiyatni» (Deut. 7:6).

3. ¿La xwi xtakanajlakan judíos akxni Nehemías xlimakgtiy alh kJerusalén?

³ Lu nitlan, pero xtapaxuwan Israel ni lhuwa makgapalalh. Maski putum kilhtamaku latamakgolh tiku skujnikgolh Dios, atsinu ni putum judíos tlakg xlakaskinka xʼakxilhkgo kaj namasiyakgo pi xasanto xwankgonit chu pi xmastakgo kakni, chu ni xtlawakgo xtalakaskin Dios. Akxni Nehemías xlimakgtiy alh kJerusalén, xtitaxtunita max akgtum ciento kata akxni makgapitsi judíos tiku ni xmakgxtakgnankgo taspitkgocha kBabilonia xlakata namatsukiparakgo xaxlikana takanajla. Amakgtum, xtakanajlakan xlajwananit.

4. ¿Tuku pulaktati naʼakxilhaw nema nakinkamakgtayayan chuntiya xasanto nawanaw?

⁴ Xtachuna la israelitas, xkachikin Dios xala uku  kamasantujlikanit. Jehová kalaksaknit xlakata naskujnikgo kstalaninanin Cristo tiku naʼankgo kʼakgapun chu «lhuwa tachixkuwitat» (Apoc. 7:9, 14, 15; 1 Cor. 6:11). Ni lakaskinaw pi nakinkakitaxtuniyan chuna la israelitas, tiku Jehová nialh xasanto kaʼakxilhli. ¿Tuku nakinkamakgtayayan ni chuna nakinkaʼakgspulayan? ¿Tuku nakinkamakgtayayan chuntiya xasanto nawanaw chu tlanku naskujnaniyaw Jehová? Kʼuma artículo, nalichuwinanaw pulaktati tuku tlakg talichuwinan kcapítulo 13 xla Nehemías: 1) ni kakatalaliw tiku ni xlilat, 2) kamakgtayaw tuku lakkaxwilikan kxkachikin Dios, 3) pulana kawiliw tuku xla takanajla chu 4) kakinkalilakgapaskan la kstalaninanin Cristo putum kilhtamaku. Kaʼakxilhwi akgatunu umakgolh.

5, 6. ¿Tiku xwankgonit Eliasib chu Tobías, chu tuku xlakata max tlan xlatalalinkgo?

⁵ (Kalikgalhtawakga Nehemías 13:4-9.) Niku anan lhuwa tuku nitlan, lu tuwa kinkakitaxtuniyan chuntiya xasanto nawanaw. Kalakpuwaw tuku titaxtukgolh Eliasib chu Tobías. Eliasib xwanit xapuxku sacerdote. Tobías max xwanit chatum ammonita chu chatum xapuxku soldado kJudea, kxtamapakgsin Persia. Nina makgas, Tobías chu tiku xtalalinkgo xlakatayakgonit Nehemías akxni xkaxtlawaputun xpatsaps Jerusalén (Neh. 2:10). Nachuna, ammonitas ni xkamaxkikan talakaskin natanukgo kxkilhtin templo (Deut. 23:3). Xlakata uma, ¿tuku xlakata xapuxku sacerdote xmaxkinit talakaskin chatum chixku la Tobías nawayan ktemplo?

⁶ Tobías lu tlan xtalalin Eliasib. Tobías xtachuna la xkgawasa Jehohanán xtatamakgaxtokgkgonit chatum judía, chu lhuwa judíos lu tlan xlichuwinankgo (Neh. 6:17-19). Nachuna, chatum xtanat Eliasib xtatamakgaxtokgnit xtsumat Sanbalat, mapakgsina xalak Samaria, tiku tlan xtalalin Tobías (Neh. 13:28). Uma max kinkamaʼakgatekgsniyan tuku xlakata xapuxku sacerdote Eliasib mastalh talakaskin pi tiku ni xkakninani Dios xmatlawilh tuku nitlan. Pero Nehemías masiyalh pi ni xmakgxtakga Dios akxni tamakxtulh putum tuku xkgalhi Tobías niku xwayankan.

7. ¿La tlan xasanto natawilakgo xlakatin Jehová lakgkgolotsin chu amakgapitsin kstalaninanin Cristo?

⁷ La kachikin nema tamakamastaninit Dios, talakaskin ni namakgatsankgananiyaw Jehová. Xlakata xasanto natawilayaw kxlakatin talakaskin, nakakgaxmataw xatankswa xlimapakgsin. Ni kamastaw talakaskin pi la katalalinaw kifamiliajkan natlawa pi nialh nakgaxmataw xtastakyaw Biblia. Xtalakpuwan Jehová wa tuku kapulalin lakgkgolotsin tiku kstalaninanin Cristo, chu ni wa tuku lakpuwankgo o makgkatsikgo (1 Tim. 5:21). Xlakan skgalalh xlitawilatkan xlakata ni natlawakgo tuku natlawa natamakgatlinikgo Dios (1 Tim. 2:8).

8. ¿Tuku kililakapastakatkan tiku tamakamastaninitaw Jehová akxni laksakaw tiku nakatalalinaw?

⁸ Kalakapastakwi pi «tiku nitlan katalalinkan tlawakgo pi namakgxtakgaw xatlan talismanin» (1 Cor. 15:33, TNM). Makgapitsi tiku xalak kifamiliajkan max nakinkamatlawiputunkgoyan tuku nitlan. Eliasib lu tlan liʼakxilhtit xkawilininit kachikin xlakata xmaxkinit putum xtamakgtay Nehemías akxni xkaxtlawama xpatsaps Jerusalén (Neh. 3:1). Pero titaxtulh kilhtamaku, Tobías chu atanu latamanin matlawikgolh Eliasib tuku nitlan chu Jehová nialh tlan akxilhli. Xatlan amigos kinkamatlawikgoyan tuku tlan, nalikgalhtawakgayaw Biblia, naʼanaw ktamakxtumit, chu nalichuwinanaw Dios. Kkifamiliajkan tiku kinkamatlawikgoyan tuku tlan, lu kapaxkiyaw chu kalakgkatsanaw.

9. ¿Tuku lalh akxni xkaxtlawamaka templo, chu tiku wa Nehemías pi xlinkgo kuenta?

⁹ (Kalikgalhtawakga Nehemías 13:10-13.) Chuna la tasiya, akxni Nehemías taspitpa  kJerusalén, nialh xmastamaka tumin templo. Xlakata nialh xkgalhikgo uma tamakgtay, levitas makgxtakgkgolh taskujut nema xkamaxkikanit chu ankgolh skujkgo kxpukuxtukan. Nehemías kawanilh mapakgsinanin pi xkuentajkan xwanit tuku lalh, max xlakan ni kaskinikgolh kachikin xmastakgolh diezmo o ni xmalakgachakgo ktemplo chuna la xkawanikanit (Neh. 12:44). Wa xlakata Nehemías tlawalh tuku xtalakaskin xlakata kskimparakgoka diezmo: kalaksakli laktalipaw lakchixkuwin xlakata xkuentajtlawakgolh tuku xchan ktemplo chu alistalh xmakgpitsikgoka.

10, 11. ¿La tlan makgtayayaw xaxlikana takanajla?

¹⁰ ¿Wi tuku kinkamasiyaniyan uma? Chuna, xlakata kinkamalakapastakayan pi kgalhiyawa lanka talakgalhaman nalimalankiyaw Jehová tuku xtapalh kgalhiyaw (Prov. 3:9). Akxni xatapaxuwan mastayaw tumin xlakata namakgtayananaw kxtaskujut, kajwatiya maxkimaw Jehová tuku xla (1 Crón. 29:14-16). Max nalakpuwanaw pi ni lhuwa tuku kgalhiyaw xlakata namastayaw, pero komo liwana lakapastakaw, putum tlan wi tuku namastayaw (2 Cor. 8:12).

¹¹ Akglhuwa kata, akgtum familia nema xkgalhi kgalhkgtsayan kamanan xkawanikgo akgtum tamakgaxtokgat xla precursores especiales tiku xlinkgoya kata pi xʼankgolh katawayankgo makgtum akgatunu semana. Tse xlismani xwan: «¡Niku wayankgo 10, tlan wayankgo 12!». Akgtum taway akgatunu semana max ni lhuwa tasiya, ¡precursores lu xpaxtikatsinikgo! Chu xlakan lu xmakgtayakgo familia. Laktlan tachuwin chu akxni xwankgo tuku xtitaxtukgonit umakgolh tamakgaxtokgat, kamakgtayakgolh kamanan xlakata stakkgolh xtakanajlakan chu alistalh putum tsukukgolh skujnikgo Dios putum kilhtamaku.

12. ¿Tuku lu tlan liʼakxilhtit wilinikgo lakchixkuwin tiku kalaksakkanit kcongregación?

¹² Atanu tuku katsiniyaw wa uma: chuna Nehemías, la uku lakchixkuwin tiku pulalinkgo congregación mastakgo tlan liʼakxilhtit akxni makgtayakgo tuku lakkaxwili xkachikin Dios, chu lhuwa makgtayakgo amakgapitsi. Lakgkgolotsin tlawakgo la apóstol Pablo, tiku makgtayalh xaxlikana takanajla chu mastalh lu tlan tastakyaw xlakata la tlan namakgtayanankan (1 Cor. 16:1-3; 2 Cor. 9:5-7).

13. ¿La ni xlakgachixkuwikgo sábado makgapitsi judíos?

¹³ (Kalikgalhtawakga Nehemías 13:15-21.) Komo lu lilipuwanaw xlakata tuku kgalhiputunaw, namakgatsankgayaw kintakanajlakan  tsinu tsinu. Chuna la wan Éxodo 31:13, sábado xla akgatunu semana xkamalakapastaka israelitas pi kachikin xasantujlani xwankgonit. Wa xlakata xliʼakgtujun kilhtamaku xkaknkinanikgo Dios kfamilia, xtlawakgo oración, chu xlilakpuwankgo xLimapakgsin Dios. Pero makgapitsi tiku xlamakgolh kxkilhtamaku Nehemías, xlakpuwankgo pi sábado xtachuna atanu kilhtamaku. Takaknin nialh lu xlakaskinka xʼakxilhkgo. Akxni akxilhli tuku xlama, Nehemías mapakgsinalh pi xmalakchawaka niku xlaktanukan kachikin viernes katsisni chu katlakgaxtulh stananin xala atanu kachikinin.

14, 15. 1) ¿Tuku nakinkaʼakgspulayan komo lu lilipuwanaw kintaskujutkan? 2) ¿La tlan natanuyaw kxtajaxni Dios?

¹⁴ ¿Tuku kinkamasiyaniyan xliʼakxilhtit Nehemías? Pulaktum kinkamasiyaniyan pi ni lu nalilipuwanaw kintaskujutkan. Komo lu xlilipuwaw, ni tuwa tlakg xlakaskinka xʼakxilhwi, tlakg chuna nala komo lakgatiyaw taskujut nema tlawayaw. Kalakapastakwi xtastakyaw Jesús xlakata skujni tiku skujnaniputun chatiy malana (kalikgalhtawakga Mateo 6:24). Nehemías xkgalhi tumin, pero ¿la limaklakaskilh xkilhtamaku kJerusalén? (Neh. 5:14-18.) Nehemías ni katatlawalh negocio tiku xalak Tiro o atanu, wata limaxtulh kilhtamaku nakamakgtaya xnatalan chu tlawalh tuku xlimasantujlika xtukuwani Jehová. Nachuna la uku, lakgkgolotsin chu siervos ministeriales tlakg liskujkgo natlawakgo tuku nalimakgtayakgo congregación, chu xlakata uma xnatalan kapaxkikgo. Xlakata uma, anan tapaxkit, takaksni, chu tlan wilakgolh xkachikin Dios (Ezeq. 34:25, 28).

¹⁵ Maski kstalaninanin Cristo ni kinkaskinikanan najaxkgoyaw akgatunu sábado, Pablo tsokgli «ananku akgtum mpujaxni, wantu xlakan lakgchankgoy [xkachikin] Dios». Nachuna wampa: «Wanti ntanunitta kxpujaxni, lijaxnitta xla xtatlaw, xtachuna lantla Dios lijaxli wantu xla» (Heb. 4:9, 10). La kstalaninanin Cristo, tlan natanuyaw kxtajaxni Dios komo kgaxmataw chu tlawayaw xtalakaskin. ¿Pulana wiliyatit kmilatamatkan wix chu mifamilia nakakninaniyatit Dios, nalichuwinanatit chu napinatit ktamakxtumit? Max talakaskin nakatachuwinanaw tiku skujniyaw chu tiku kataskujaw komo ni lu xlakaskinka akxilhkgo pi pulana nawiliyaw la skujnaniyaw Dios. Max natalakaskin pi xtachuna la Nehemías «namalakchawayaw niku laktanukan kkachikin, chu tiku stanankgo xalak Tiro kkilhtin natamakgxtakgkgo» xlakata lu kuenta natlawayaw tuku xasanto. Xlakata kinkamasantujlikanitan, lu tlan kiʼakstukan nakinkakgalhskinkanan: «¿Masiya chuna la klima kilatamat pi Jehová kilaksaknit xlakata nakskujnani?» (Mat. 6:33).

16. ¿Tuku xtlawama pi nialh israelitas xasanto kachikin xlitaxtukgolh?

¹⁶ (Kalikgalhtawakga Nehemías 13:23-27.) Kxkilhtamaku Nehemías, lakchixkuwin israelitas xtatamakgaxtokgkgonit lakpuskatin tiku xala atanu kachikin. Akxni pulana alh kJerusalén, Nehemías kamafirmarlilh putum lakchixkuwin pi ni xʼamakgo tatamakgaxtokgkgo tiku xala atanu kachikin (Neh. 9:38; 10:30). Pero ni lhuwa kata alistalh, akxilhli pi israelitas ni kajwatiya xtatamakgaxtokgkgonit lakpuskatin xala atanu kachikin, nachuna xmakgatsankgamakgolh tuku xtlawa pi xlitaxtukgolh xasanto xkachikin Dios. Xkamanan umakgolh lakpuskatin max nila xlikgalhtawakgakgo chu xchuwinankgo hebreo. Akxni xkgolonkgolh, ¿tlan xwankgolh pi israelitas xlitaxtukgo? O ¿xlakpuwankgolh pi xwankgonit asdoditas, ammonitas, o moabitas? Xlakata ni xkatsikgo hebreo, ¿tlan xʼakgatekgskgolh xlimapakgsin Dios? ¿La tlan xtalakatsuwinikgolh Jehová chu xlaksakkgolh naskujnanikgo chu nixaxlikana dioses nema xtsekan xkakninanikgo? Xtalakaskin pi  wi tuku tunkun xtalakgpalilh, chu Nehemías chuna tlawalh (Neh. 13:28).

17. ¿La tlan natlatni namakgtayakgo xkamanan natalakatsuwinikgo Jehová?

¹⁷ La uku talakaskin pi liwana nakamakgtayayaw kinkamanankan nakgalhikgo tayat nema nalilakgapaskan pi kstalanina Cristo. Natlatni miʼakstukan kakakgalhskinkantit: «¿La tlan nakkamasiyani kinkamanan nachuwinankgo xatlan tachuwin xla xaxlikana? Chuna la chuwinankgo kinkamanan, ¿masiyakgo pi kgalhikgo xtalakapastakni Dios o xtalakapastakni kakilhtamaku?» (Sof. 3:9). Ni kataxlajwani komo tasiya pi ni lakgpalikgo xtalakpuwankan. Lin kilhtamaku nakatsinikan akgtum tachuwin, liwaka akxni anan tuku tlawa atanu tuku nalakpuwanaw. Minkamanan tuwa tuku titaxtukgo. Wa xlakata, kalimaklakaskinti kilhtamaku akxni kakninaniyatit Dios kfamilia chu atanu xlakata nakamakgtayaya minkamanan tlakg natalakatsuwinikgo Jehová (Deut. 6:6-9). Kakamasiyani pi lu tlan kitaxtu akxni ni likatsiyaw la xkakilhtamaku Satanás (Juan 17:15-17). Chu kaliskujti xlakata nachan kxnakujkan.

18. ¿Tuku xlakata natlatni tiku kstalaninanin Cristo tlakg tlan nakamakgtayakgo xkamanankan natamakamastanikgo Jehová?

¹⁸ Xlikana, chatunu chatunu kamanan nalaksakkgo komo naskujnikgo Jehová. Pero, natlatni lhuwa tuku tlan tlawakgo xlakata nakamakgtayakgo. Nakawilinikgo xatlan liʼakxilhtit, nakawanikgo tuku tlan tlawakgo chu tuku nila tlawakgo, chu nalitachuwinankgo tuku nakitaxtu xlakata tuku nalaksakkgo natlawakgo. Natlatni, ni anan atanu tiku tlakg tlan nakamakgtaya minkamanan xlakata natamakamastanikgo Jehová. Xlakan maklakaskinkgo mintamakgtaykan xlakata nalitaxtukgo kstalaninanin Cristo chu nikxni namakgxtakgkgo. Xlikana, kimputumkan maklakaskinaw skgalalh natawilayaw xlakata ni namakgatsankgayaw “lhakgat”, uma kilhchanima, tayat chu limapakgsin nema kinkalilakgapaskanan kstalaninanin Cristo (Apoc. 3:4, 5; 16:15).

19, 20. ¿Tuku tlan natlawayaw xlakata Jehová nakinkalakapastakan?

¹⁹ Chatum tiku latamalh kxkilhtamaku Nehemías, wa palakachuwina Malaquías, tiku lichuwinalh pi «maktum libro xla talakapastakni tsukuka tsokgkan [...] xpalakata tiku xpekuanikgo Jehová chu tiku xlilakpuwankgo xtukuwani» (Mal. 3:16, 17). Chuna, Dios putum kilhtamaku nakalakapastaka tiku pekuanikgo chu tiku paxkikgo xtukuwani (Heb. 6:10).

²⁰ Nehemías wa: «Kakilakapastakti, chuna, oh kiDios, xlakata tlan nakinkitaxtuni» (Neh. 13:31). Xtachuna la Nehemías, kintukuwanikan natsokgkan klibro xla talakapastakni komo ni katalalinaw tiku ni xlilat, kamakgtayayaw tuku lakkaxwili kxkachikin Dios, pulana wiliyaw kkilatamatkan tuku xla takanajla chu kuentajtlawayaw tuku kinkalilakgapaskanan la kstalaninanin Cristo. Pablo kinkawanin “kiakstukan nakinkaputsananikanan lapi aktanks nkgalhiyaw kintakanajlakan” (2 Cor. 13:5). Komo liskujaw xlakata ni nataxtuyaw xkachikin Jehová, xla nakinkalakapastakan.