Akxni niy chatum tiku paxkiyaw kaj xalan tsukuyaw tasayaw xlakata lhuwa nalakapastakaw. Maski Jesús xpaxki Lázaro, ni tasalh xlakata nilh, wata tasalh xlakata xkalakgalhaman xfamilia chu xʼamigos tiku xninit, chuna la wan tuku xlichuwinamaka (Juan 11:36).

Akxni katsilh pi Lázaro xtatatla, Jesús ni tunkun alh kxchik xlakata xmakuchilh. Biblia wan: «Akxni, [Jesús] ntikgaxmatli mpi [Lázaro] tatatlaj, tamakgaxtakliku akgtuy kilhtamaku lakatum ntani xwi» (Juan 11:6). ¿Tuku xlakata ni tunkun alh akxilha? Wi tuku xlakata chuna tlawalh. Jesús chuna wa: «Wa yuma ntajatat, ni xla linin, wampi kaj xliukxilhkan xlitlanka Dios, lakimpi wa xKam Dios naliukxilhkan xlakatsukut xpalakata» (Juan 11:4). Xtajatat Lázaro ni kaj xʼama litaxtu linit. Jesús xʼama limaklakaskin uma linit xlakata «xlimalankilh Dios». ¿La chuna xʼama tlawa? Jesús xʼama tlawa tuku nila xkanajlakan akxni xmalakastakwanilh xʼamigo.

Ama kilhtamaku, akxni Jesús katachuwinalh kstalaninanin xlakata linin tamalakxtumilh la akxni lhtatakan. Wa xlakata kawanilh nakan «mastakniy» (Juan 11:11). Xpalakata Jesús, namastakniy Lázaro klinin xtachuna la akxni chatum tlat malakastakwani xkgawasa akxni lhtata. Wa xlakata ni xʼanan tuku xmalakgaputsilh akxni nilh Lázaro.

¿Tuku tlawalh pi Jesús xtasalh? Tuku talichuwinan alistalh kinkawaniyan takgalhtin. Akxni Jesús lakgapaxialhnalh María, xtala Lázaro, chu akxilhli la xla chu atanu latamanin xtasamakgo, xla nitlan «makgkatsilh kxnaku». Akxni akxilhli xtalakgaputsit xʼamigos, Jesús na nitlan makgkatsilh wa xlakata «tsukulh tasay» (Juan 11:33, 35).

Uma masiya pi Jesús tlan nakamalakastakwani chu nakamakuchi tiku nikgonit kxasasti kakilhtamaku. Na kinkamasiyaniyan pi Jesús kalakgalhaman tiku ninit xfamilia. Atanu tuku kinkamasiyaniyan wa pi nakalakgalhamanaw tiku lilakgaputsamakgo xlakata nikgonit tiku paxkikgo.

Jesús xkatsi pi xʼama malakastakwani Lázaro. Pero xlakata tapaxkit chu talakgalhaman nema xkgalhini xʼamigos tasalh. Akxni nachuna makgkatsiyaw natlawa «nkakatatasakgo[w] wanti ntasakgoy» (Rom. 12:15). Akxni chatum masiya pi lu lilakgaputsa ni wamputun pi ni kanajla talakastakwanat. Akxni tasalh maski xkatsi pi xʼama malakastakwani Lázaro, Jesús kinkamasiyanin pi nakalakgalhamanaw xfamilia tiku nilh.