Lhuwa wankgo pi Jesús wa tlakg xatlan Makgalhtawakgena tiku latamanin. ¿Nachuna lakpuwana wix? Komo chuna, max na chuna tlawaputunita, max la limaklakaskilh liʼakxilhtit chu takgalhskinin. Pero ¿xkatsiya pi Jesús na atanu tuku limaklakaskilh? Lichuwinamaw tuku ni akxtum.

Makglhuwa maklakaskinaw tuku ni akxtum chu ni kuenta tlawayaw. Min kilhtamaku wanaw: «Wankgoka pi putum tawakat xchanita, pero uma xaxtakni» o «Xwanit chatum tsumat tiku ni lu xchuwinan, pero la uku lhuwa chuwinan».

Akxni chuna wankan pulana wankan akgtum tuku lanit o makgapitsi tachuwin nema wi tuku wankgo, chu xlipulaktiy tlawa pi ni akxtum nawankgo chu limaklakaskinkan tachuwin pero, wata, o tlakg tlan. Kʼatanu, xlipulaktiy tuku wankan masiya pi xlikana tuku pulana wanka o tlawa pi tlakg tlan natakgaxmata. Putum kilhtamaku chuna chuwinanaw chu tlakg tlan laʼakgatekgsniyaw.

Maski tuku ni akxtum kmakgapitsi tachuwin chu kachikinin ni lu kalimaklakaskinkan, lu tlan katsikan la tamaklakaskinkgo, xlakata kBiblia makglhuwa kamaklakaskinkan. Jesús makglhuwa kalimaklakaskilh. Kaʼakxilhti umakgolh liʼakxilhtit: «Ni mpala mapasikan makgskgot mpala kxtampin pakgxu nawilikan, [wata] anta wilikan ntani kxputawilh»; «Ni kaj kminit laktlaway [Limapakgsin], [wata] kaj kminit makgantaxtiy»; «Tikgaxpattit mpi titawaj: “Ni timakwanana”. [Pero] nchu nkit kkawaniyan mpi kaxati kawa nti lakaniy nchatum mpuskat ni tlan ntu nalakapastakniy [...]», chu «Tikgaxpattit wa [...] nti xmaxtulh lakgastapu, na wa nalimakgapuxokgokan namaxtunikan xlakgastapu, chu wa nti xtamakaktilh ntatsan, na wa nalimakgapuxokgokan natamakaktinikan xtatsan. [Pero] wa nchu nkit kkawaniyan: Ni kalakgapaxtokgtit nti ni tlan nkapuwaniyan, chi [wata] wa nkaxati kawa nti xmasipanin kmilakgxtipakgstakat, kalakgxtipini alakgxtitu» (Mat. 5:15, 17, 27, 28, 38, 39).

Na akxilhaw uma liʼakxilhtit kʼatanu libros xalak Biblia. Uma tlan kinkamakgtayayan wi tuku liwana naʼakgatekgsaw o masiya la tlakg tlan wi tuku natatlawa. Komo wix tlat, kalakpuwanti uma tuku ni akxtum: «Cha nchu wixin xanatlatna, ni tiʼakgslokgokgoyatit mpala makgasitsiyatit milakgskgatankan, chi [wata] kaj [...] namasiyunikgoyatit ntu xatlan xtachuna lantla xtalakaskin [Jehová]» (Efes. 6:4). Apóstol Pablo tlan kajwatiya xtikawanilh natlatni kamakgastaktit minkamanankan chuna la wan xlimapakgsin Jehová, chu uma tastakyaw lu tlan xtiwa. Pero ¿la tlakg tlan masiyalh uma? Wa tuku ni akxtum: ni namakgasitsiyatit minkamanankan, wata kamasiyanitit chuna la lakapastaka Jehová.

Watiya kʼuma capítulo Pablo wa: «Ni wa ntalatlawayaw mpala xman wa nkinkasokgaliyan nchixku  nti nkgalhi xkgalhni, chu xliwa; [wata] wa nti ni [...] lakwan spiritu ntu lamakgo nkaunin» (Efes. 6:12). Uma tuku ni akxtum kinkamasiyaniyan pi lu tuwa talachipat: ni katalachipamaw latamanin, wata ni xatlan espíritus.

Carta nema katsokgnilh Pablo kstalaninanin Cristo xalak Éfeso limaklakaskilh lhuwa tuku ni akxtum. Akxni kalikgalhtawakgayaw kinkamakgtayayan nakatsiyaw tuku apóstol xmasiyaputun chu tlakg tlan nakatsiyaw tuku kilitlawatkan.

Lu namakgtayayan chu nalakgatiya akxni nalikgalhtawakgaya tuku ni akxtum nema lichuwinankgo capítulos 4 chu 5 xla Efesios nema wi kpágina 4 chu 5. Chuna la nalikgalhtawakgatilhaya, kakgalhskinkanti: «¿La klakpuwan xlakata uma? ¿Tuku ktlawa akxni chuna ktitaxtu? ¿Tuku ni akxtum kililakgapaskgo amakgapitsin?». Chu komo uma tuku ni akxtum makgtayayan nakatsiya pi talakaskin wi tuku nalakgpaliya, chuna katlawa.

Na tlan limaklakaskina uma recuadro akxni nakakninaniya Dios kfamilia. Pulana tlan akxtum xlikgalhtawakgatit putum lista chu, alistalh, chatum tlan xlikgalhtawakgalh xapulana tuku tatsokgtawilanit nema ni akxtum chu namasta talakaskin pi amakgapitsin kalakapastakkgolh xlipulaktiy. Komo chuna natlawakan tlan nalichuwinankan la tuku ni akxtum makgtaya natakatsi tuku talakaskin natlawakan. Xlakata uma putum tiku lakgkgawasanku chu tiku laklankata tlan nakamakgtaya nalimasiyakgo xatlan tayat, kfamilia o atanu tuku tlawakan klatamat.

Chuna la naʼakxilhtilhaya la maklakaskinkan tuku ni akxtum, tlakg ni tuwa nakaʼakxilha kBiblia chu naʼakxilha la tlan kitaxtu akxni lichuwinana Dios. Akgtum liʼakxilhtit, tlan nawaniya tiku natachuwinana: «Lhuwa latamanin lakpuwankgo pi wi tuku kgalhiyaw nema ni niy, pero kaʼakxilhti tuku wan xTachuwin Dios». Chu tiku limakgalhtawakgepat Biblia, tlan xkgalhskinti: «Lhuwa kanajlakgo pi Dios chu Jesús watiya litaxtukgo; pero ¿tuku kinkamasiyaniyan Biblia? ¿Chu wix la akxilha?».

Chuna, Biblia limin lhuwa tuku ni akxtum nema kinkamakgtayakgoyan chuntiya naskujniyaw Jehová chu nakamasiyaniyaw amakgapitsin xaxlikana xlakata Biblia.