1, 2. ¿Tuku tlawalh Jesús xpalakata xʼapóstoles tiku ni xmakgxtakgkgo akxni xtlawakgonita Pascua xla kata 33?

TSISWANITA; tsuku 14 xla nisán xla kata 33. Jesús chu kstalaninanin aku xtlawakgonit Pascua, nema xlilakapastakkgo akxni kalakgmaxtuka kʼEgipto xnatlatnikan. Pero kstalaninanin tiku ni makgxtakgkgo naʼakxilhkgo tlakg xalanka talakgmaxtut, «xlipan ntamalakgtaxtin». Lichali (pero watiya ama kilhtamaku judío 14 xla nisán), Makgalhtawakgena namakgnikgo xtalamakgasitsinkan. Pero uma tuku lu nitlan natlawakan tasikulunalin nakitaxtu: xkgalhni Jesús nema ni kgalhi talakgalhin chu na stajtamakgan nakalakgmaxtu latamanin ktalakgalhin chu klinin (Heb. 9:12-14).

² Xlakata putum kstalaninanin nalakapastakaw uma tamakamastan, Jesús wi tuku xasasti lakkaxwililh nema xʼama tawila xlakgxokgo Pascua. Lakgchakgelh kaxtalanchu nema ni kgalhi limaxkutin, chu kamatitaxtinilh 11 xʼapóstoles tiku ni makgxtakgkgo chu kawanilh: «Yuma nkintiyatliwa, wa ntu wixin mimpalakatakan natamastay. [...] Ankgalhin natlawayatit nakililakapastakatit». Na kamatitaxtinilh copa xla vino tinto chu wa: «Yuma [...] mpukgotnu, wa yuma xasasti talakkaxlan wa ntu lilakkaxlay nkinkgalhni, wa ntu wixin mimpalakatakan nalistajtamakgan» (Luc. 22:19, 20).

3. 1) ¿Tuku talakgpalilh akxni xninita Jesús? 2) ¿Tuku takgalhskinin nakinkatlawanikanan xlakata oración xla capítulo 17 xla Juan?

³ Talakatsuwima xlisputni talakkaxlan xla Limapakgsin nema Dios tatlawanit kachikin Israel. Nialh makgas xlakgxokgo natawila xasasti talakkaxlan nema katatlawa Jehová kstalaninanin Jesús tiku naʼankgo kʼakgapun. Makgalhtawakgena ni lakaskin pi uma xasasti kachikin xaʼespiritual nachuna nalikatsi la  xamakgan Israel. Israelitas tapitsikgonit xlakata tiku katalalinkgo chu xtakanajlakan, nema limaxkajwanikgo xasanto xtukuwani Dios (Juan 7:45-49; Hech. 23:6-9). Jesús lakaskin pi makxtum katawilakgolh xlakata tlan namalankikgo xtukuwani Dios. Wa xlakata tlawalh tlakg xatlan oración nema chatum lataman tlan likgalhtawakga (Juan 17:1-26; kaʼakxilhti dibujo xla página 26). Akxni likgalhtawakgamaw, kakinkakgalhskinkan: «¿Kgalhtilh Dios xʼoración xKgawasa? ¿Chuna ktlawama tuku skilh kxʼoración Jesús?».

4, 5. 1) ¿Tuku kinkamasiyaniyan tuku limatsuki xʼoración Jesús? 2) ¿La kgalhtilh Jehová tuku skilh Jesús xpalakata?

⁴ Jesús katachuwinan kstalaninanin asta lu katsisnita, chu kawani tuku lu xlakaskinka xlakata Dios. Talakayawa kʼakgapun chu tlawa oración: «Tataj, wa nkilhtamaku, chinitta. Kamatlanki minKam, lakimpi na chuna nalimatlankiyan minKam; xampi maxkinita litliwakga kxokgspun xlipaks ntachixkuwitat, lakimpi xlipaks nti ntimaxki, tlan xla namaxkiy latamat wa ntu xaliankgalhin. [...] Kmatlankinitan yunu nkatuxawat, na kmasputunit ntaskujut ntu nkintimaxki naktlaway. Wa nchuj Tataj, kakimatlanki wixa kmimpaxtun, watiya litlanka ntu xakkgalhiy kmimpaxtun akxni ni naj xanan nkatuxawat» (Juan 17:1-5).

⁵ ¿Akxilha kʼuma xapulana tachuwin xla oración tuku tlakg xlakaskinka xʼakxilhka Jesús? Xla xlakaskin pi xmaxkika xTlat xalak akgapun lilanka nema lakgchan. Uma tuku skilh na xtachuna tasiya la xapulana oración xla padrenuestro: «KinTlatikan [...], katamasantujlilh mintukuwini» (Luc. 11:2). Alistalh, Jesús lakapastakli kstalaninanin; xkamaxkiputun «latamat wa ntu xaliʼankgalhin». Skinilh xTlat: «Kakimatlanki wixa kmimpaxtun, watiya litlanka ntu xakkgalhiy kmimpaxtun akxni ni naj xanan nkatuxawat». ¿La kgalhtinalh Jehová? Tlakg maxkilh xKgawasa nixawa tuku kskinini «[...]tukuwini wa ntu ntlakg kgalhiy xkakni, ni xawa» ángeles (Heb. 1:4).

6. ¿Tuku xlitlawatkan xwanit apóstoles xlakata xmakglhtinankgolh latamat nema ni kgalhi xlisputni, chu la katsiyaw pi makgantaxtikgolh?

⁶ Kxʼoración, Jesús na wan tuku kilitlawatkan xlakata tlan namakglhtinanaw latamat nema ni kgalhi xlisputni nema ni kinkalakgchanan (kalikgalhtawakga Juan 17:3). Wa pi chuntiya “nalakgapasaw” Dios chu Cristo. Pulaktum wa lhuwa tuku nakatsiniyaw xlakatakan. Pero ni kajwatiya uma: na talakaskin nalinaw kilatamatkan tuku nakatsiniyaw. Apóstoles chuntiya xtlawamakgolha, xlakata Jesús wanilh xTlat: «Ntachuwin ntu nkimaxki, na kmaxkikgonit. Cha nchu xlakan makgamakglhtinankgolh» (Juan 17:8). Komo xmakglhtinamputunkgo latamat nema ni kgalhi xlisputni, xtalakaskin pi umakgolh lakchixkuwin chuntiya xlilakapastakkgolh xtachuwin chu xtastakyaw Dios chu xlilatamakgolh chali chali asta akxni xnikgolh. ¿Makgantaxtikgolh? Chuna. Katsiyaw pi chuna xlakata tatsokgtawilanit xtukuwanikan putum kilhtamaku 12 kchiwix nema tliwekglh liwi xaSasti Jerusalén kʼakgapun (Apoc. 21:14).

7. ¿Tuku wamputun nalakgapasaw Dios, chu tuku xlakata lu xlakaskinka?

⁷ Komo latamaputunaw putum kilhtamaku, talakaskin “nalakgapasaw” Dios. ¿Tuku wamputun? Pi chuntiya talakaskin tlakg nalakgapasaw. Pero ni kaj kilhchani nalakgapasaw xtayat chu tuku natlawa.  Lu kilipaxkitkan chu tlan natalalinaw. Chu nakapaxkiyaw kinatalankan. Biblia wan: «Wa nti ni paxkinan, ni lakgapasa Dios» (1 Juan 4:8). Lakgapaskan Dios talakaskin nakgalhakgaxmataw (kalikgalhtawakga 1 Juan 2:3-5). ¡Lanka tamaskiwin akxtum nakatatawilayaw tiku lakgapaskgo Jehová! Pero kuentajkilitlawatkan ni namakgatsankgayaw la tlan talalinaw Jehová, la tlawalh Judas Iscariote. Lu kaliskujwi xlakata natatliwakglha la talalinaw Jehová. Chuna, akxni nachin kilhtamaku, nakinkamaxkikanan latamat nema ni sputa (Mat. 24:13).

8, 9. ¿Tuku tlakg liskujli Jesús akxni xlichuwinan Dios, chu tuku taslimanin lakgmakgalh?

⁸ Akxni likgalhtawakgakgoyaw capítulo 17 xla Juan, akxilhaw pi Jesús ni kajwatiya lu kapaxki xʼapóstoles, nachuna lu kapaxki putum tiku aku kstalaninanin xʼama wankgo (Juan 17:20). Kilikatsitkan pi ni kajwatiya milh kKatiyatni nakinkalakgmaxtuyan. Lata akxni tsukulh lichuwinan Dios chu asta akxni masputulh, tuku tlakg liskujli wa pi xtasantujlilh chu xtamalankilh xtukuwani Dios. Akgtum liʼakxilhtit, akxni lichuwinalh xlakatin latamanin tuku xlimalakgachakanit sinagoga xalak Nazaret, likgalhtawakgalh tuku wan xrollo Isaías: «Wa kspiritu kimPuchinakan [Jehová] nkintalama, wa cha nkililaksakwililh naklimaxkikgoy [...] xatlan tamakatsinin» wanti nitu kgalhikgo. Xlikana pi akxni likgalhtawakgalh ama tachuwin, liwana takgaxmatli akxni Jesús wa xtukuwani xTlat (Luc. 4:16-21).

⁹ Akxni Jesús nina xmin kKatiyatni, tiku xmasiyakgo xtakanajlakan judíos tlawakgolh pi latamanin nialh xmaklakaskinkgolh xtukuwani Dios. Liwana katsiyaw pi Jesús lakgmakgalh uma talismanin xlakata ni xmin kBiblia. Kawanilh xtalamakgasitsin: «Kxtukuwini kinTlat nkit kliminit, na ni kimakgamakglhtinanatit; lapi atanu nti xmilh nti nkaj kxtukuwini xakstulimilh, wa yama ntlan xmakamaklhtinantit» (Juan 5:43). Chu akxni atsinu xtsankga namakgnikan, lichuwinalh tuku tlakg xlakaskinka xʼakxilhka akxni skinilh xTlat: «Kamatlanki mintukuwini» (Juan 12:28). Akxilhaw pi wa uma tuku makglhuwa lichuwinalh  Jesús oración nema likgalhtawakgamaw.

10, 11. 1) ¿Tuku tlawalh Jesús xlakata xkamasiyanilh xtukuwani xTlat kstalaninanin? 2) ¿Tuku nachuna lu natlawaputunaw la uku?

¹⁰ Jesús wa xʼoración: «Kmasiyunikgonit mintukuwini nchixkuwin wa ntu xala katuxawat nkintimaxki. Mila xwanit na kintimaxki, na kgalhakgaxmatkgonit mintachuwin». Alistalh wa: «Na nialh katuxawat kwi, wampi wa xlakan, katuxawat wilakgo, cha nchu nkit naklakgaʼanan. Tataj xasantujlani, tliwakglh kaliwilikgo kmintukuwini wa ntu nkimaxkinita, lakimpi mana watiya ntipatu nawankgoy, lantla chu nkin» (Juan 17:6, 11).

¹¹ Akxni Jesús kamasiyanilh kstalaninanin xtukuwani xTlat ni kajwatiya kawanilh. Na kamakgtayalh naʼakgatekgskgo, o natamakgachakgxi tuku xkilhchani xtukuwani: laktlan xtayat Dios chu la kalikatsini latamanin (Éx. 34:5-7). Chu la uku, niku wilacha kʼakgapun, Jesús kinkamakgtayayan nalichuwinanaw xtukuwani Jehová lakgatum kKatiyatni. ¿Tuku xlakata? Xlakata tlakg lhuwa namamakxtumikan kstalaninanin xlakata nina min xlisputni uma lixkajni kakilhtamaku. Akxni nachin uma kilhtamaku, Jehová nakalakgmaxtu xTatayananin tiku ni makgxtakgkgo chu xtukuwani namalankikan (Ezeq. 36:23).

12. ¿Tuku pulaktutu talakaskin xlakata tlan nataxtuyacha taskujut nema lakgmaxtu latamat?

¹² Jesús kamasiyanilh kstalaninanin la tlan xmakgxtakgkgolh tuku xkamaxlajwani, nema xtalakaskin xlakata tlan xtlawakgolh taskujut nema xmatsukinit. Jesús wan kxʼoración: «Lantla wix nkintimalakgacha kxlakgstipan nti xala katuxawat, na chuna nkit, kmalakgachakgolh kxlakgstipan nti xala katuxawat». Kxʼoración wan pulaktutu tuku lu xlakaskinka nema nakamakgtaya natlawakgo uma lanka taskujut. Pulana skin pi kstalaninanin ni namakgtapakgsikgo xalixkajni xkakilhtamaku Satanás. Nachuna, kakgalhakgaxmatkgolh xTachuwin Dios chu ni naxkajwanankgo. Alistalh makglhuwa skini xTlat pi tapaxkit nema makxtum katlawanit xlakan nachuna makxtum katlawalh kstalaninanin. Xlakata tuku akxilhwi, kinchatunukan kakinkakgalhskinkan: «¿Kmakgantaxtima uma pulaktutu nema skilh Jesús?». Jesús xlipawan pi kstalaninanin lu xliskujkgolh xtlawakgolh umakgolh pulaktutu, latamanin xkakanajlanikgolh pi Dios xmalakgachanit (kalikgalhtawakga Juan 17:15-21).

13. ¿La kgalhtika xʼoración Jesús kxapulana siglo?

¹³ ¿Kgalhtika xʼoración Jesús? Chuna, libro Los Hechos de los Apóstoles, nema wi alistalh niku wilakgolh maktati Evangelios. Komo nalakpuwanaw congregación xla kstalaninanin Cristo kxapulana siglo tlakg ni tuwa xtitapitsikgolh, xlakata makgapitsi judíos chu ni judíos xwankgonit, tiku xkgalhikgo tumin chu tiku nitu xkgalhikgo, skujnin chu malana. Pero, putum makxtum xwilakgolh chu asta katamalakxtumika la akgtum makni tiku xakgxakga wa Jesús (Efes. 4:15, 16). Akgtum milagro xlakata makxtum xwilakgolh, xkakilhtamaku Satanás nema tapitsinit. Pero wa tiku chuna tlawalh wa Jehová, kalimakgtayalh espíritu santo (1 Cor. 3:5-7).

14. ¿La kgalhtinit Dios xʼoración Jesús uma kilhtamaku?

¹⁴ Nitlan tuku lalh, la tlan xlatalalin lakgsputli akxni nikgolh apóstoles. Wata analh apóstatas nema xlichuwinankanita, chu anta taxtukgolh lhuwa nixaxlikana takanajla (Hech. 20:29, 30). Pero, kkata 1919 Jesús kalakgmaxtulh tiku xkalaksakkanit  naʼankgo kʼakgapun kxmakan nixaxlikana takanajla chu kamastokgli xlakata xlipaxuwakgolh «ntu lakatanks makxtum tlawanan» (Col. 3:14). Xlakata lichuwinankgo Dios, uma aktsu grupo tlawakgonit pi liwaka akgtujun millón xla «atanu borregos» xalak «kxlipaks ntiyat ntu anan, chu lantla ni ntipalit kilhtsukut anan, chu nti xalanin xlikatlanka nkatuxawat, chu ni ntipalit xtachuwinkan nkgalhikoy» makxtum nalakgo (Juan 10:16, TNM; Apoc. 7:9). Xlikana, Dios lu tlan la kgalhtinit xʼoración Jesús: «Nalikatsiy nti xala katuxawat mpi wix nkintimalakgacha, chu mpi na paxkikgonita lantla nkit nkimpaxkinita» (Juan 17:23).

15. ¿Tuku lu xlakaskinka skilh Jesús xpalakata kstalaninanin xatalaksakni?

¹⁵ Ama lu xlakaskinka katsisni 14 xla nisán akxni nina xtlawa xʼoración, Jesús kamaxkilh kakni xʼapóstoles. ¿La tlawalh? Katatlawalh talakkaxlan xlakata natamapakgsinankgo kxTamapakgsin (Luc. 22:28-30; Juan 17:22). Chu skilh xpalakata putum kstalaninanin tiku naʼankgo kʼakgapun: «Tataj, wa yama nti nkimaxkinita, klakaskin mpi anta ntani nkit kwij nawan, na anta nakintatawilakgoy; lakimpi naʼukxilhkgoy nkilikakni ntu nkimaxkinita; xpalakata mpi kimpaxkinita, asta akxni ni xakilhtsuku nkatuxawat» (Juan 17:24). Atanu borregos ni sitsikgo wata lu paxuwakgo xpalakata xatalaksakni. Uma litasiya la makxtum wilakgolh xaxlikana kstalaninanin Cristo la uku.

16, 17. 1) Akxni xmasputumaja xʼoración, ¿tuku wa Jesús pi chuntiya xʼama tlawa? 2) ¿Tuku lu naliskujaw xlakata chuna natlawayaw?

¹⁶ Xlakata lhuwa takanajla anan kʼuma kakilhtamaku, latamanin ni akxilhputunkgo pi Jehová kgalhi xkachikin nema xlikana lakgapasa chu makxtum wilakgolh. Nachuna lalh kxapulana siglo, wa xlakata Jesús chuna makgalhsputulh xʼoración: «Tataj, wa nti xala katuxawat, ni lakgapaskgonitan, wampi klakgapasnitan nkit, chu yuma nchixkuwin, na katsikgolh mpi wix nkintimalakgacha. Kmasiyunikgolh mintukuwini, na chunaku naktimasiyunikgoy; lakimpi wa ntapaxkit ntu nkilipaxki, kaʼananikgolh; chuj chi nkit kaktawilanikgolh» (Juan 17:25, 26).

¹⁷ ¿Tiku tlan nawan pi Jesús nichuna tlawalh la skilh kxʼoración? Xla xakgxakga congregación chu chuntiya kinkamakgtayaman nalakgapasaw xtukuwani chu tuku lakpuwanit natlawa xTlat. Putum kilhtamaku kastalaniw la kinkapulaniman chu kakgalhakgaxmatwi xlakata nalichuwinanaw Dios chu kakamasiyaniyaw amakgapitsin (Mat. 28:19, 20; Hech. 10:42). Nachuna lu xlakaskinka kaʼakxilhwi la makxtum wilaw. Chuna natlawayaw la skilh kxʼoración Jesús, namalankiyaw xtukuwani Dios chu putum kilhtamaku napaxuwayaw.