1. ¿Tuku ni xtachuna skujni nema lakgapaskgo latamanin chu nema lichuwinan Romanos 12:11?

KSKUJNIN Dios nalitaxtukan ni wamputun pi fuerza kamaskujukan chuna la tlawakgo latamanin. Lhuwa lakpuwankgo pi skujni xtachuna tiku katlawanikan tuku nitlan chu lu nitlan kalikatsinikan. Pero, skujnin tiku kalichuwinan Biblia xakstu chuna laksakkgo, kgalhikgo Malana tiku lu tlan likatsi. Asta apóstol Pablo kawanilh kstalaninanin Cristo kxapulana siglo pi “kaskujnikgolh” Jehová la skujnin, xkawanima pi kskujnikgolh xlakata xpaxkikgo (Rom. 12:11). ¿Tuku wamputun chuna skujkan? ¿La kilitlawatkan xlakata ni naskujniyaw Satanás chu xkakilhtamaku? ¿Tuku nakamaxki Jehová xlakskujnin tiku ni makgxtakgkgo?

2. 1) ¿Tuku max tlawa pi chuntiya kskujniputulh chatum skujni xmalana? 2) ¿Tuku xwamputun akxni xlakglhukinikan xtakgen skujni?

² Limapakgsin nema Jehová kamaxkilh Israel kinkamakgtayayan nakatsiyaw la naskujniyaw. Akxni xtitaxtunita akgchaxan kata hebreo tiku skujni xlitaxtu xmakgxtakgkan chu nialh skujni xlitaxtu (Éx. 21:2). Pero komo skujni lu xpaxki xmalana chu chuntiya kskujniputun, Limapakgsin xwan tuku tlan xtlawakgolh. Malana xlakachipawaka xtakgen kmalakcha o xkilhpan malakcha, o kpuwilhta, chu xlakglhukini (Éx. 21:5, 6). ¿Tuku lu xlakaskinka xmasiya uma takgen? Ktachuwin hebreo, uma xkilhchani pi kgalhakgaxmatnan. Wa xlakata akxni xlakglhukinikan xtakgen xlimasiya pi lu kskujniputun xmalana chu xkgalhakgaxmatputun. Uma kinkamakgtayayan nakatsiyaw tuku kilhchani akxni tamakamastaniyaw Jehová: pi nakgalhakgaxmataw xlakata paxkiyaw.

3. ¿Tuku xlakata tamakamastaniw Dios?

³ Akxni nina xtamunuyaw xlakpuwanitawa pi xtamakamastaniputunaw Jehová, kskujnin xlitaxtuputunaw. Akxni tamakamastaniw, waniw pi xʼama tlawayaw xtalakaskin. Niti fuerza kinkamatlawin. Asta tiku laktsujku na tamakamastanikgo  Dios xlakata lakaskinkgo ni kaj xlakata makgapaxuwaputunkgo xtlatkan. Chuna, kstalaninanin Cristo tamakamastaniyaw kiMalanakan xalak akgapun, Jehová, xlakata paxkiyaw. Apóstol Juan tsokgli: «Xampi wa yuma liwi lantla napaxkiyaw Dios, mpi natlawayaw ntu wan xlimapakgsin, na wa xlimapakgsin, ni tuwa» (1 Juan 5:3).

4. ¿La litaxtuyaw «wa ntu akgstitum» skujni?

⁴ Lu paxtikatsiniyaw Jehová xlakata kinkamaxkiyan talakaskin kskujnin nawanaw. Xlakata kanajlaniyaw xtamakamastan Jesús kinkalakgmaxtuyan ktalakgalhin. Xlikana pi chuntiya lakgalhina litaxtuyaw, maski chuna, liwana lakpuwanitaw nakgalhakgaxmataw nakaliʼakxilhaw la kimalanakan Jehová chu Jesús. Pablo chuna wa kmaktum kxcarta: «Na chuna wixin, lakatanks kakatsitit mpi lu[...] xlikanaj nininitantit ntalakgalhin, wampi wa Dios lapanitit nchu xpalakata nCristo Jesús». Alistalh wa: «¿Tu katsiyatit mpi wa nti wixin natastaniyatit nalakgachixkuwiyatit, pus lu[...] tastaninitantit lantla nkamapakgsiyan wa nti lakgachixkuwiyatit; lapi wa ntalakgalhin ntu ntastaninitantit, pus wa linin wa ntu nakakitaxtuniyan, chi wa lapi wa xtalakgachixkuwin Dios ntu ntastaninitantit, pus wa ntamalulokgni nakakitaxtuniyan[?] Wampi paxkatsinilh Dios mpi maski xtastaninitantit ntalakgalhin, wa nchu lu[...] minakukan lilakgachixkuwinitantit yama ntipatu ntamasiyun wa ntu ntamakamastaninitantit. Cha nchu mpi lakgtaxtuninitantit ktalakgalhin, wa ntamakamastaninitantit natlawayatit wa ntu akgstitum» (Rom. 6:11, 16-18). Akxilhaw pi Pablo maklakaskilh tachuwin «minakukan lilakgachixkuwinitantit». Akxni tamakamastaniyaw Jehová masiyaniyaw pi kgalhakgaxmatputunaw xaliputum kinakakujkan. Chu xlakata Dios xaʼakgstitum skujni litaxtuyaw «wa ntu akgstitum».

5. ¿Tuku tuwa titaxtuyaw kimputumkan, chu tuku xlakata?

⁵ Pero akxni skujniyaw Dios na titaxtuyaw tuku tuwa. Chuna, pulaktiy tuku talachipayaw. Pulana wa tuku Pablo na xtalachipa. Xla tsokgli: «Kkintapuwan klimakgapaxuwakan xlimapakgsin Dios; wampi kukxilha yuma atipatu ntu lakgapaxtoka ntu malanan kkinchatuminika, wa ntu ntalalakgapaxtokga xtalakaskin nkintapuwan, na xtachuna mpala xatachin nkiliyan kxlimapakgsin ntalakgalhin wa ntu malanan xlipaks kkilakni» (Rom. 7:22, 23). Xlakata na lakgalhinanin chali chali talachipayaw nixatlan tuku tlawaputunaw,. Wa xlakata apóstol Pedro kinkastakyawayan: «Nkalilatapatit xtachuna nti xakstu nkuintajkan ntu ntlawaputunkgoy, wampi ni wa mpala nalikgalhiyatit ntiji nalitlawayatit wa ntu nitlan, chi wampi xtachuna nalilatapayatit nchu wa nti kskujnin Dios» (1 Ped. 2:16).

6, 7. ¿Tuku tlawa Satanás xlakata xkakilhtamaku lu stlan natasiya?

⁶ Xlipulaktiy, lamaw kakilhtamaku nema mapakgsinankgo demonios. Satanás xmapakgsina uma kakilhtamaku, kinkamatlawiputunan tuku nitlan xlakata namakgxtakgaw Jehová chu Jesús. Tlawaputun pi xatachin kalitaxtuw, wa xlakata wili tuku kinkaliʼakgskgawiputunan (kalikgalhtawakga Efesios 6:11, 12). Pulaktum tuku limaklakaskin wa pi lu tlan natasiya xkakilhtamaku. Apóstol Juan wa: «Lapi wi nti lakpaxkiy nkatuxawat, wa xtapaxkit xaTlat, ni kgalhiniy. Xlakata putum tuku wi kkakilhtamaku, tuku tlawaputun kimaknikan chu tuku akxilhputun kilakgastapukan, lhuwa masiyakan tuku kgalhikan klatamat, ni wa xaTlat masta, wata wa tuku malaknu kakilhtamaku» (1 Juan 2:15; 2:16, TNM).

⁷ La uku, latamanin tlakg lhuwa tuku kgalhiputunkgo. Satanás tlawa pi kalakpuwanka pi kgalhikan lhuwa tumin limin tapaxuwan. Kaniwa niku naʼakxilha katlawamaka laklanka pustan. Tiku stanankgo kinkamalakpuwaniputunkgoyan pi tlakg tlan lhuwa tuku nakgalhiyaw chu napaxuwayaw. Tiku lakaxwilkgo niku lu kastlan tasiyakgo xlakata naʼankan paxialhnankan, chu tiku anta nakatatawilaya ni xtatayananin Jehová. Kaniwa niku  naʼakxilhaw watiya tuku wankgo: kgalhi tuku tlakg xatlan. Pero uma tuku tlakg xatlan xtalakapastakni kakilhtamaku.

8, 9. ¿Tuku max nakinkaʼakgskgawiputunan chu tuku xlakata lu nitlan kitaxtu?

⁸ Akxni xkalichuwinama tiku xwilakgo pero xlakpuwankgo la kakilhtamaku, Pedro wa: «Yama ni lakawan makgalhtawakgananin lakgatikgoy lipaxuwakgoy wantu ni mininikgoy maski stalanka katsikgoy pi ni makgas nalipatinankgoy. Maski yuma akgskgawinananin kalakganachan anta ni wixin wanti lipawanatit Jesús tamakgstokgatit lakxtum wayanatit». Chu wa: «Xampi wa lantla tlanka lichuwinankgoy ntachuwin wa ntu ni kgalhiy xlakgasi, liakgskgawiliyankgoy lixkajnit tatlawaputu xla xtiyatliwakan, natlawakgoy ntu ni tlan, wa yama nti lu[...] xlikana nkajku lakgtaxtunikgonit ni tlan ntu xlilamakgo. Wanikgoy mpi namalakgtaxtikgoy, na chi na chunaku xlakan ni la ntamakgtayakgo mpi naku ntastanikgonit ntalakgalhin, xampi wa nti ntakgtlajaminit, ni la ntamakgtayay, xampi wa nti makgawinit, ankgalhin wa mapakgsiy» (2 Ped. 2:13, Hua Xasasti Talaccaxlan, 1999; 2:18, 19).

⁹ Akxni tlawayaw «tuku akxilhputun kilakgastapukan» ni kinkalakgmaxtuyan. La xatachin kinkalimaxtuyan xlakata natapakgsiniyaw tiku mapakgsi kakilhtamaku, Akgskgawini (1 Juan 5:19). Akgtum taʼakgsiyat: max lhuwa tuku nakgalhiputunaw, nema kinkaʼakgchipayan chu lu tuwa taxtukan.

10, 11. ¿Tiku tlakg kamatlawiputun tuku nitlan Satanás, chu tuku xlakata takgalhtawakga max nakalimini taʼakglhuwit?

¹⁰ Chuna la tlawalh kjardín xaʼEdén, Satanás wa tlakg kamatlawi tuku nitlan tiku nina lhuwa tuku katsikgo, chu tiku lakgkgawasanku. Satanás nipara tsinu lakgati pi chatum kgawasa, o atanu, kskujni Jehová nawan. Tlawaputun pi tiku tamakamastaninita Jehová, namakgatsankganani chu nialh nakakninani.

¹¹ Kalichuwinamparaw skujni tiku masta talakaskin xlakglhukinika xtakgen. Akxni lakglhukinimaka lu katsani, pero alistalh nialh katikatsani, chu tasiya pi skujni litaxtu. Chatum kgawasa na tuwa makgkatsi, asta katsani akxni laksaka tanu la nalin xlatamat nixawa la amakgapitsi xcompañeros. Satanás malakpuwaninan pi napaxuwakan kajwatiya komo nakgalhtawakgakan asta kʼuniversidad, pero kstalaninanin Cristo kililakapastakatkan pi atanu tuku kinkamaxkiyan tapaxuwan. Jesús wa: «Xatapaxuwan latamakgo tiku katsikgo pi lakaskinkgo tuku xla Dios» (Mat. 5:3, TNM). Kstalaninanin Cristo tiku tamakamastaninitaw Dios skujniyaw, chu ni wa Satanás.  Paxkiyaw xlimapakgsin Jehová chu putum lilakapastakaw (kalikgalhtawakga Salmo 1:1-3). Pero, tiku kgalhtawakgaputunkgo kʼuniversidad nialh kgalhi kilhtamaku xlakata nalilakapastaka chu naputsa tuku xla xtakanajla.

12. ¿Tuku tlan nalaksakkgo lhuwa lakgkgawasan?

¹² Xapulana carta nema kamalakgachanilh natalan corintios, Pablo kgalhskininalh: «¿Pa akxni xatastan skujni xwanita ntitasanika? Pus ni wa nkuintaj katlawa». Chu wa uma tastakyaw: «Wampi lapi na tlan nalakgtaxtuya, makgkatsi katanuni» (1 Cor. 7:21). Kxapulana siglo xwilakgo makgapitsi malana nema xtlawakgo pi lu tuwa xwa xlatamat kskujni tiku kstalanina Cristo. Akxni chuna xla, tlakg tlan xmakgxtakgli nialh kskujnanilh. La uku, klakalhuwa países fuerza wankan asta tukuya kata xlikgalhtawakgatkan kamanan. Chu alistalh xlakan nalaksakkgo, chu xlakan tlan laksakkgo putum kilhtamaku naskujnikgo Dios. Pero komo nakgalhtawakgaputun asta kʼuniversidad kʼuma kakilhtamaku, nialh katikgalhilh kilhtamaku xlakata naskujni Dios (kalikgalhtawakga 1 Corintios 7:23).

13. ¿Tukuya takgalhtawakga tlakg kamakgtaya kskujnin Jehová?

¹³ Pablo kawanilh kstalaninanin Cristo xalak Colosas: «Kuintaj kakatlawakantit mpi ti ni nakaliakgskgawiyan wa ntu ni kgalhiy xlakgasi ntachuwin maski xla tastakat, xampi wa yuma nkaj xtapalaksaknikan nchixkuwin mintilhanitancha, kaj wa xtachuna wa lantla nkaj xachunata ntalakapastakna xala katuxawat, wampi ni wa lantla xtamasiyun nCristo» (Col. 2:8). La uku, lhuwa lakgskgalalan masiyakgo tuku «xtapalaksaknikan nchixkuwin mintilhanitancha, kaj wa xtachuna wa lantla nkaj xachunata ntalakapastakna». Laklanka takgalhtawakgat, masiyakgo uma talakpuwan, tiku chuna kgalhtawakgakgo ni kamasiyanikan tuku tlan natlawakgo nema talakaskin chali chali, chu ni katsikgo la nalakkaxtlawakgo taʼakglhuwit xla latamat. Pero, xtatayananin Jehová laksakkgo takgalhtawakga nema kamasiyani la natlawakgo xlakata tlan nalatamakgo maski ni lhuwa tuku nakgalhikgo chu tlan naskujnikgo Dios. Nachuna lu xlakaskinka akxilhkgo xtastakyaw Pablo nema maxkilh Timoteo: «Xlikana lhuwa ntu ntlan nakitaxtuniyan lantla nakanajlaya, lapi na napaxuwanalipiniya ntu nkgalhiya. Chuna mpi lapi kgalhiyawa wa ntu listakwananaw, chu wa ntu lhakgayaw, kapaxuwanaliyaw yuma» (1 Tim. 6:6, 8). Kstalanina Cristo ni mastokga diplomas chu títulos, tlakg lhuwa kilhtamaku lichuwinan Dios xlakata nakamasiyani amakgapitsin xlakata Dios (kalikgalhtawakga 2 Corintios 3:1-3).

14. Chuna la wan Filipenses 3:8, ¿la xlilakaskinka xakxilha Pablo naskujnani Dios chu Cristo?

 ¹⁴ Kalilakapastakti Pablo. Gamaliel makgalhtawakgelh, tiku xmasiya kxLimapakgsin judíos. Xtakgalhtawakga tlan tamalakxtumiyaw la ankan kʼuniversidad uku. ¿La xliʼakxilha akxni xtamalakxtumi xlitaxtulh skujni Dios chu Cristo? Xla kinkawaniyan: «Lu[...] xlikanaj, lu[...] chuna kpuwan mpi xalimakgatsankgan xlipaks nkatuwaj, xpalakata wa ntu lu[...] kgalhi xlakgasi lakatanks xlilakgapaskan nCristo Jesús nkimPuchinakan». Chu wampa: «Xpalakata xtapaxkit nti klimakgatsankganit xlipaks, na kaj xtachuna palhma [o basura] nchu kliukxilha, lakimpi naktlajay naklikgalhi nCristo» (Filip. 3:8). Komo chuna nalakpuwankgo lakgkgawasan kstalaninanin Cristo chu natlatni nakamakgtayakgo liwana nalaksakkgo tuku nakgalhtawakgakgo xkamanankan (kaʼakxilhti dibujos).

15, 16. ¿Tuku kinkamasiyaniyan xkachikin Dios chu tuku xlakata tlawa?

¹⁵ ¿Tuku tasiya klhuwa universidades kʼuma kakilhtamaku? ¿Ni xlikana pi lhuwa ni paxuwakan xlakata la lamakgo latamanin chu xlakata política, lhuwa tuku nitlan anan chu talakgxtumit xalimaxana? (Efes. 2:2.) Pero kxkachikin Jehová ni chuna, uma kachikin kinkamaxkiyan tlakg xatlan takgalhtawakga chu ni anan taʼakglhuwit. Akgatunu semana ktamakxtumit Niku Masiyakan xlakata la Lichuwinankan Dios wi tuku katsiniyaw. Nachuna lakkaxwilikanit escuela xlakata lakchixkuwin tiku precursores (Escuela niku kamasiyanikan xalak Biblia Lakchixkuwin tiku Ni tamakgaxtokgkgonit) chu xlakata tamakgaxtokgat tiku precursores (Escuela niku kamasiyanikan xalak Biblia tiku Tamakgaxtokgnit). Uma takgalhtawakga kinkamasiyaniyan nakgalhakgaxmataw Dios, kiMalanakan xalak akgapun.

¹⁶ Nachuna tlan «lakputsananaw» tuku lu xlakaskinka kÍndice de las publicaciones Watch Tower chu programa informático Watchtower Library. Uma takgalhtawakga lakkaxwilikanit xlakata nakatsiyaw la nakakninaniyaw Jehová. Xlakata uma tlan kamakgtayayaw latamanin natalakatsuwinikgo Dios (2 Cor. 5:20). Chu uma latamanin tlan kamasiyanikgo atanu (2 Tim. 2:2).

17. ¿Tuku makglhtinankgo tiku laksakkgo tlakg xatlan takgalhtawakga nema anan?

¹⁷ Parábola nema lichuwinalh Jesús xlakata talentos, chatiy skujnin tiku ni xmakgxtakgkgo xmalanakan kawanika pi lu tlan tuku xtlawakgonit, tiku tlakg kalakgayawalh chu katapaxuwalh (kalikgalhtawakga Mateo 25:21, 23). La uku, akxni laksakaw tlakg xatlan takgalhtawakga kinkamakgapaxuwayan chu lhuwa tuku tlan makgamakglhtinanaw. Kaʼakxilhwi tuku titaxtulh Michael. Xla lu tlan calificaciones maxtulh chu xmakgalhtawakgenanin wanikgolh pi xʼalh akgtum tamakxtumit niku xʼamaka lichuwinankan pi tlan xʼalh kʼuniversidad. Pero Michael laksakli nakgalhtawakga tuku ni lhuwa kilhtamaku xlilh. Ni xlimakgas kskujmaja chu precursor regular xwanit. ¿Xmakgkatsi pi wi tuku makgatsankgalh? Xla wan: «Takgalhtawakga nema kimaxkika la precursor, chu uku la kgolotsin klitaxtu kcongregación, ni anan tuku xtachuna. Tasikulunalin chu talakgalhaman nema kmakglhtinanit tlakg tlan nixawa tumin nema max xaktitlajalh. ¡Lu klipaxuwa xlakata ni kkalh kʼuniversidad!».

18. ¿Tuku xlakata tlan wanaw pi takgalhtawakga nema masta Dios tlakg tlan?

¹⁸ Takgalhtawakga nema masta Jehová wa tlakg xatlan, xlakata kinkamakgtayayan naskujniyaw chu kinkawaniyan tuku xtalakaskin. Na kinkamaxkiyan takgalhkgalhin xlakata “nalakgtaxtuniyaw yuma ntu ntliwakglh kgalhiyaw lantla ankgalhin sputtilhay” chu «makxtum natalipaxuwakgoy[aw] xlakgskgatan Dios wa yuma lilakgatit ntalakgtaxtun ntu namin» (Rom. 8:21). Pero tuku tlakg tlan kinkamasiyaniyan wa la napaxkiyaw kiMalanakan xalak akgapun, Jehová (Éx. 21:5).