Película nema ni takgaxmata chu wanikan A Trip Down Market Street (Paxialhnankan ktiji Market) masiya la xlamaka kSan Francisco (Estados Unidos) akxni aku xtsukuma siglo XX. Xlakata tlan xgrabarlika, wilika cámara akgtum tren nema xtitaxtu niku lhuwa lamakgolh latamanin ktiji Market. Kpelícula tasiya carruajes, putlaw, tiku maʼakgpitsikgo períodicos chu atanu latamanin tiku xankgo tamawanankgo o atanu tuku xtlawakgo.

Tuku tlawa pi kaks nalilakawankan wa pi max grabarlika abril kkata 1906, akxni atsinu xtsankga xtachikilh tiyat chu nalhkunanan 18 xla abril niku lhuwa nikgolh latamanin, nachuna atsinu nialhtu analh kʼama kachikin. Max latamanin kʼama película nialh makgas xʼamakgolh latamakgo. Xfamilia tiku na tlawalh ama película, Scott Miles wan: «Akxni kaʼakxilhkan, nema nipara tsinu katsikgo tuku nakaʼakgspula, lu lilakgalhamanat».

Nachuna kalakgalhamanaw latamanin. Xlakan tlawamakgolh tuku xala chali chali, ni kuenta tlawakgo tuku nitlan aku namin: xlisputni uma kakilhtamaku chu la lamaka uku. Akxni tachiki tiyat, ni takatsi pi chuna nala, pero tlan kamakatsiniyaw latamanin xalanka xkilhtamaku Jehová namin malakgaxokgenan. Max kinchatunukan lakkaxwilinitaw naʼanaw lichuwinanaw Dios akgatunu semana, pero ¿tlan tlakg xliskujwi xlakata nakamakatsiniyaw latamanin?

Tlan wanaw pi Jesús xkatachuwinan putum tiku xkatatanokglha, xpukina tumin nema akxilhli akxni xtitaxtuma kxlakatin chu chatum puskat tiku lakgapasli kpozo akxni tsinu kxjaxma (Luc. 19:1-5; Juan 4:5-10, 21-24). Chu asta akxni xjaxma, Jesús xatapaxuwan xlakgpali tuku xlakpuwanit natlawa xlakata xkamasiyanilh latamanin. Ni kaj tsinu xlichuwinan Dios chu xlakpuwan pi tlana xwanit, xtalakgalhaman xtlawa pi tlakg xliskujli (Mar. 6:30-34). ¿La tlawakgo lhuwa tiku nachuna lakpuwankgo la Jesús?

Melika wi kʼakgtum edificio niku lhuwa kuentajtlawanankan. Lhuwa tiku xtalakatsu kgalhtawakgananin xala atanu país chu xtukuwanikan ni katsokgkanit kdirectorio nema wi niku chinkgokan chu maklakaskinkgo celular nema kgalhi número privado. Xla maklakaskin nakalitachuwinan Dios akxni wilakgolh niku chinkgokan o kʼelevador.  Xla wan: «Kliʼakxilha la niku kilakgchan klichuwinan Dios». Xlakata lin likgalhtawakga klhuwa tachuwin, tlan kamakgxtakgninit lhuwa tratados chu revistas. Nachuna kamasiyani kisitiojkan kInternet jw.org. Melika lhuwa tiku tsukunit kalimakgalhtawakge Biblia.

Sonia, tiku skuja kʼakgtum clínica, na lu liskuja xlakata lhuwa tiku nakalitachuwinan Dios. Xla lakkaxwililh nakalitachuwinan Dios putum tiku kataskuja. Pulana limaxtulh kilhtamaku xlakata naʼakxilha tuku maklakaskinkgo chatunu. Alistalh kaputsa akxni wayankgo xlakata nakalitachuwinan Dios. Xlakata uma, chatiy kalimakgalhtawakgema Biblia. La uku lakpuwanit akxni tsinu kgalhi kilhtamaku nakalitachuwinan Dios tiku wilakgolh niku kgalhkgalhikan.

Chatum tiku lakgtaxtulh akxni tachikilh tiyat kkata 1906 wa pi «wa tlakg xalanka tuku nitlan lalh nema xakgspulalh akgtum estado o lanka kachikin». Pero nialh makgas putum uma tuku nitlan la, nitu nalitaxtukgo akxni natamalakxtumiyaw kilhtamaku akxni nakamalakgaxokge Dios «nti ni lakgapaskgo[...]» (2 Tes. 1:8). Jehová lu lakaskin pi latamanin kalakgpalikgolh xlatamatkan chu katlawakgolh tuku kamakatsinimakgolh xTatayananin (2 Ped. 3:9; Apoc. 14:6, 7).

Kgalhiyaw lanka talakgalhaman xlakata nakamakgtayayaw latamanin nakatsikgo pi lamaw xakatuwa kilhtamaku, kamakgxtakgkgolh kaj tuku xlakan lakaskinkgo chu kaputsakgolh Jehová (Sof. 2:2, 3). ¿Tlan namaklakaskinaw putum kilhtamaku xlakata nakalitachuwinanaw Dios tiku kataskujaw, tiku kintalakatsukan chu tiku katatanokglhaw akxni tlawayaw tuku xala chali chali? ¿Naliskujaw xlakata tlakg nakamakatsiniyaw latamanin?