GREGORIO chu Marilou xlamakgolh kManila max liwakaya akgkaw kata, akxni xkgalhikgo liwaka puxamakaw kata. Precursores regulares xwankgonit chu tantaku kskujkgo. Tuwa xwanit pero xputsakgo la xlakkaxtlawakgo. Gerente xla banco lakgayawaka Marilou niku kskuja. Xla wan: «Lhuwa tuku tlan xakkgalhiyaw». Lu tlan xkakitaxtunima, chu lakpuwankgolh pi tlan xtlawakgolh chiki nema xlakaskinkgo niku lu kastlan chu tapalaxla xwanit nema wi 19 kilómetros xlimakgat kManila pakgan niku taxtu chichini. Firmarlikgolh contrato chu talakkaxlakgolh akgtum empresa pi akgatunu papaʼ xʼamakgolh xokgokgo chiki nema xlakaskinkgo xlakata akgkaw kata xlixokgokgolh.

Marilou wan: «Xasasti kintaskujut lhuwa kilhtamaku xkimakglhti chu kilitliwakga, wa xlakata nialh lu xaktlawaputun tuku xla Dios. Xakmakgkatsi pi xakmakgkgalhama Jehová». Chu wan: «Nialhla xakskujni Jehová la xtalakaskin». Xlakata nialh xlipaxuwakgo tuku xtitaxtumakgo, Marilou chu  Gregorio lalitachuwinalh tuku xʼama kitaxtu kxlatamatkan. Gregorio wan: «Xaktalakgpaliputunaw, pero ni xakkatsiyaw la naktlawayaw. Klichuwinaw la tlakg xakskujniw Jehová, xlakata ni kkgalhiyaw kamanan chu skiniw pi xkinkapulalin».

Ama kata kgaxmatkgolh lhuwa taʼakgchuwin nema xlichuwinankgo xlakata skujkan niku tlakg talakaskin tiku nalichuwinankgo Dios. Gregorio wan: «Kmakgkatsiw pi chuna kgalhtilh kioracionkan Jehová». Xchatiykan skinkgolh tlakg xkamaxkika takanajla chu xlaksakkgolh tuku tlan, pero wi tuku ni xkamaxki talakaskin: xchikkan. Akgtututa kata xokgomakgolh xchikkan. ¿Tuku xʼama tlawakgo? Marilou wan: «Komo xaklaktlawaw contrato, xakmakgatsankgaw putum tuku kxokgonitawa, chu lhuwata tumin xwanit. Pero klakpuwaw komo xaktlawaputunaw xtalakaskin Jehová o tuku xaklakgatiyaw». Lakapastakkgolh xliʼakxilhtit Pablo, tiku wi tuku limakgatsankgalh xpalakata Tamapakgsin, lakxtlawakgolh contrato, makgxtakgkgolh xtaskujutkan, stakgolh makgapitsi tuku xkgalhikgo chu ankgolh kʼisla xla Palawan, nema wi 480 kilómetros xlimakgat ksur kʼManila (Filip. 3:8).

Akxni nina xʼankgo, Gregorio chu Marilou xlakkaxwilimakgo la ni lhuwa tuku namaklakaskinkgo kxlatamatkan, pero ni tsinu xkatsikgo pi ni lhuwa tuku xʼanan niku xʼamakgolh. Marilou wan: «Lu nitlan klimakgkatsiw akxni kchaw. Ni xʼanan luz chu tuku ni tuwa maklakaskinkan. Chu ni kaj xakamaw makilhtiyaw kluz niku tlawakan arroz, xtalakaskin xputsaw kiwi chu xtlawaw kiliwatkan klhkuyat. Xakamputun tamawanan, wayan niku stanankan chu atanu tuku anan klaklanka kachikinin». Pero xchatiykan xlamalakapastaka tuku xlakata xʼankgonit anta chu tsukukgolh lipaxuwakgo tuku xʼanan. Marilou wan: «La uku lu klakgati kakxilha tuku lakstlan anan, la skgo staku... Pero lu klipaxuwa kakxilha xlakan tiku kalitachuwinanaw Dios. Unu kkatsiniw “tuku makgtayanan” tlan naklipaxuwayaw tuku kkgalhiyaw» (Filip. 4:12).

Gregorio wan: «Akxni kchaw, kaj kgalhtati xtatayananin Jehová xʼanan. Lu paxuwakgolh akxni ktsukulh masta taʼakgchuwin akgatunu semana chu na xaktlakga kiguitarra akxni xkilhtliniyaw Jehová ktamakxtumit». Kaj akgtum kata, xlakan akxilhkgolh pi tsukulh staka congregación chu analh 24 tiku xlichuwinankgo Dios. Gregorio wan: «Tapaxkit nema natalan kinkamasiyanikgoyan lu tlan mamakgkatsini kinakujkan». Akgchaxan kata lata skujmakgolh anta, xlakan wankgo: «Ni anan tuku tamalakxtumikan tapaxuwan nema anan akxni akxilhkan pi lhuwa latamanin talakatsuwimakgo  kxkachikin Dios. La uku kmakgkatsiyaw pi lu tlan tuku ktlawamaw kilatamatkan».

Anta kʼFilipinas atsinu ni akgtutu mil, ankgonit niku tlakg talakaskima tiku lichuwinankgo Dios. Itat mil natalan laktsuman. Chatum wanikan Karen.

Karen max kgalhi 25 kata chu stakli kBaggao (Cagayán). Akxni kajku kstakma tlakg lhuwa kilhtamaku xlichuwinamputun Dios. Xla wan: «Xakkatsi pi nialh lhuwa kilhtamaku xʼanan chu pi xʼanan lhuwa tiku xlikgaxmatat xlakata xTamapakgsin Dios, wa xlakata xakskujputun niku tlakg xtalakaskin». Makgapitsi xfamilia wanikgolh pi xalh kʼuniversidad nixawa niku makgat xlakata xlichuwinalh Dios, pero Karen skinilh tamakgtay Jehová chu katachuwinalh natalan tiku skujkgo niku lu makgat. Akxni xkgalhi 18 kata alh niku xtalakaskin tamakgtay, 64 kilómetros xlimakgat niku wi xchik.

Aktsu congregación niku chalh Karen, lichuwinankgo Dios kkasipijni kPacífico. Karen wan: «Lata kBaggao asta kxasasti kincongregación ktlawaw akgtutu kilhtamaku. Ktawakaw, ktaktaw ksipi chu kpatakutwi liwaka puxamakaw kgalhtuchokgo». Alistalh wan: «Makgapitsi tiku kalimakgalhtawakge Biblia akgchaxan hora lichankan niku wilakgolh, wa xlakata anta klhtatayacha kxchikan chu lichali akgchaxan hora klitaspita». ¿Tlan tuku tlawama? Karen lakalitsin chu wan: «Min kilhtamaku katsan kiʼakglhtantun, pero asta 18 tiku kalimakgalhtawakgenit Biblia. Xlikana kmakgkatsinit chu kakxilhnit pi Jehová tlan likatsi» (Sal. 34:8).

Sukhi tala tiku nina tamakgaxtokgnit xalak Estados Unidos, kgalhi liwaka 40 kata alh makgtayanan kʼFilipinas. ¿Tuku makgtayalh naʼan anta? Kkata 2011, alh ktamakxtumit xaʼakgtiy kilhtamaku niku katlawanika takgalhskinin akgtum tamakgaxtokgat. Xlakan wankgolh pi stakgolh atsinu ni putum tuku xkgalhikgo xlakata xʼankgolh makgtayanankgo nalichuwinankan Dios kʼMéxico. Xla lakapastaka: «Tuku kakgalhskinka kimalakapastaknilh tuku ni xaklakpuwanit naktlawa». Akxni katsilh pi xtalakaskima tiku nalichuwinankgo Dios niku chuwinankan panjabí kʼFilipinas, lakkaxwililh naʼan anta xlakata xfamilia xalak India. ¿Titaxtulh tuku tuwa?

Sukhi kgalhtinan: «Chuna. Lu tuwa kmakgkatsilh naklaksaka tuku naksta chu tuku xakama maklakaskin. Nachuna akgkututu kata ktawi kkidepartamento, kkalh klatama niku wi kifamilia, pero xlakan makglhuwa xtalakgpalikgo chu ni xakmakutu putum tuku xakmaklakaskin. Uma na tuwa wa, pero kimakgtayalh tlan naklatama maski  ni lhuwa tuku nakkgalhi». ¿Tuku taʼakglhuwit kgalhilh akxni chalh kʼFilipinas? Xla wan: «Lu xkimakgapekuankgo laktsu animales chu lu xakkalakapastaka kifamilia. Pero kkatsinilh tlakg naklipawan Jehová». ¿Tlan tuku tlawalh? Sukhi lakalitsin chu wan: «Jehová kinkawaniyan: “Kakilaliʼakxilhwi chu kaʼakxilhtit la lhuwa nakkamaxkiyan tasikulunalin”. ¡Umakgolh tachuwin lu xlikana! Kakxilha akxni wi tiku kiwani pi kaktaspitpa xlakata kgalhi lhuwa takgalhskinin akxni lichuwinanaw Dios. Lu kimakgapaxuwa pi tlan kkamakgtaya latamanin nalakgapaskgo Jehová» (Mal. 3:10). Wa xlakata wan: «Pero tuku tlakg tuwa kmakgkatsilh, naklaksaka nakmin kʼFilipinas. Chu akxni xakchinita, kaks klilakawa la Jehová xlakkaxtlawatilhama tuku xtalakaskin».

Sime, atsinu ni 40 kata kgalhi, tala tiku tamakgaxtokgnita, nialh kʼFilipinas tawi chu alh Oriente Medio xlakata tekgsli taskujut niku tlakg xokgokan. Akxni anta xwi, tuku wanilh superintendente de circuito maʼakgpuwantinilh chu xtaʼakgchuwin Kgolotsin tiku Pulalinkgo xTatayananin Jehová. Makgtayakgolh xlakata pulana xwililh Jehová kxlatamat. Xla wan: «Pero akxni xaklakpuwan nakmakgxtakga kintaskujut lu nitlan xaklimakgkatsi». Maski chuna xla makgxtakgli xtaskujut chu taspitli kʼFilipinas. La uku Sime chu xpuskat Haidee, makgtayanamakgolh kDavao del Sur, kpaís niku tlakg talakaskima tiku nalichuwinankgo Dios. Sime wan: «Akxni klakapastaka, lu klipaxuwa xlakata tlan kmakgxtakgli kintaskujut chu pulana kwililh Jehová. ¡Akxni tlakg skujniyaw Jehová ni anan tuku tlakg tlan!».

Ramilo chu Juliet, akgtum tamakgaxtokgat xla precursores tiku max liwaka 30 kata kgalhikgo, katsikgolh pi akgtum congregación nema wi max 30 kilómetros xlimakgat xchikkan, xmaklakaskima tamakgtay, ankgolh makgtayanankgo. Akgatunu semana ankgo maski mima sen o jilima, kxmoto liʼankgo ktamakxtumit chu nalichuwinankgo Dios. Maski titaxtukgo kpuente nema kaj tachitawakanit chu carretera nema nitlan wilakgolh, xlakan wankgo pi lipaxuwakgo tuku laksakkgolh. Ramilo wan: «¡Kilichatiykan 11 tiku kalimakgalhtawakgeyaw Biblia! Talakaskin wi tuku nalimakgxtakga, skujkan niku tlakg talakaskin, pero lu kinkamakgapaxuwayan» (1 Cor. 15:58).

¿Katsiputuna tuku militlawat xlakata tlan kskujti niku talakaskima tiku nalichuwinankgo Dios kmimpaís o atanu país? Katachuwinanti misuperintendente de circuito chu kalikgalhtawakga artículo «¿Tlan xtitaxtu kMacedonia?», nema min klikgalhtawakga La Natlawayaw xTaskujut Dios xla agosto kata 2011.