1, 2. ¿Tuku kinkamasiyaniyan Jehová akxni tatalakxtumi chatum mapuchwayanina?

JEHOVÁ tamalakxtumi mapuchwayanina (Ezeq. 34:11-14). Uma liʼakxilhtit kinkamaʼakgatekgsniyan la likatsi. Xalakgalhamana mapuchwayanina kuentajtlawa pi borregos nitu nalanikgo chu nakgalhikgo tuku maklakaskinkgo. Kapulalin niku wi xatlan sakgat chu niku nawakgo chuchut (Sal. 23:1, 2); tantaku chu tantaskaka kamakgskgala (Luc. 2:8); kakuentajtlawa nitu nakatlawani atanu animales (1 Sam. 17:34, 35); kachaxlin nema aku lakachinkgonit (Is. 40:11); kaputsa nema akgtsankgakgonit chu kamakuchi nema wi tuku lanikgolh (Ezeq. 34:16).

² Xlakata atsinu ni putum israelitas xalamakgasa xskujkgo kpukuxtu chu xkuentajtlawakgo animales, akgatekgskgolh tuku xkilhchanima liʼakxilhtit. Borregos maklakaskinkgo nakakuentajtlawakan chu nakamakgskgalakan nachuna kakitaxtuni kxtakanajlakan latamanin (Mar. 6:34). Komo Jehová ni kapulalin chu ni kakuentajtlawa latamanin patinankgo. Kaj ni tuwa wi tuku nakatlawanikan chu akgtsankgatayakgo kxlatamatkan, xtachuna la «borregos tiku ni kgalhikgo xmapuchwayaninakan» kamalakgatumikan (1 Rey. 22:17). Pero Jehová kamaxki putum tuku kskujnin maklakaskinkgo.

3. ¿Tuku naʼakxilhaw kʼuma artículo?

³ Xlakata Jehová tatalakxtumi mapuchwayanina lu xlakaskinka la uku. Xla kakuentajtlawa kskujnin, tiku litaxtukgo la borregos. Kaʼakxilhwi la kapulalin kamaxki tuku maklakaskinkgo, chu nachuna tuku xlitlawatkan xlakan xlakata tapaxkit nema kamasiyani.

4. ¿Tuku lakgaya Jesús xlakata nakakuentajtlawa xborregos Jehová?

⁴ Jehová lakgayawanit Jesús xAkgxakga congregación (Efes. 1:22, 23). Jesús «wa xatlan mapuchwanina»  chu watiya tuku lakaskin, tuku tlawaputun chu kgalhi tayat xtachuna la xTlat. Chu asta «palakamasta[lh] xlistakna xkalhniluj» (Juan 10:11, 15). Xtamakamastan Cristo nema lakgmaxtunan lanka tasikulunalin xpalakata putum latamanin (Mat. 20:28). Jehová lakaskin pi «xlipaks wa nti nkanajlaniy [Jesús], ni katitsankgalh, wampi wata nakgalhiy xlatamat wa ntu xaliankgalhin» (Juan 3:16).

5, 6. 1) ¿Tiku kalakgayawanit Jesús xlakata nakakuentajtlawa xborregos? 2) ¿Tuku xlitlawatkan borregos xlakata nalitamakgtayakgo mapuchwayaninanin tiku Jesús kalakgayawanit? 3) ¿Tuku xlakata nakakgalhakgaxmataw lakgkgolotsin?

⁵ ¿La limasiyakgo borregos pi akxilhkgo Jesucristo la xMapuchwayaninakan? Xla wa: «Wa nkinkalhniluj, kinkgalhlakgapaskgoy, chu nkit, na klakgapaskgoy na kistalanikgoy» (Juan 10:27). Nakgalhlakgapasaw xaTlan Mapuchwayanina kilhchani natlawayaw putum tuku kinkawaniyan, uma na lakgchan nakamakgtayayaw lakgkgolotsin tiku kalakgayawanit nakuentajtlawakgo kintakanajlakan. Jesús wa pi xʼapóstoles chu kstalaninanin xʼama tlawakgo taskujut nema xla xmatsukinit. Xtalakaskin xkamasiyanikgolh chu xkakuentajtlawakgolh “xkalhnilu” (Mat. 28:20; kalikgalhtawakga Juan 21:15-17). Akxni xalakwan xalaksasti talakgatumikgolh chu talhuwikgolh kstalaninanin, Jesús kalakgayawalh tiku tliwakga xwi xtakanajlakan xlakata xkuentajtlawakgolh congregaciones (Efes. 4:11, 12).

⁶ Apóstol Pablo kawanilh lakgkgolotsin xalak Éfeso kxapulana siglo, espíritu santo xkalakgayawanit «napuxkunanikgo[...] xtamakgstokgnin», o xcongregación Dios (Hech. 20:28). Nachuna tlan wankan xpalakata lakgkgolotsin xala uku, xlakata tlan nakalakgayawakan uma taskujut talakaskin namakgatsikgo tuku taskin kBiblia. Wa xlakata, akxni kakgalhakgaxmataw limasiyayaw pi maxkiyaw kakni Jehová chu Jesús, chatiy tiku xanapuxkun Mapuchwayaninanin (Luc. 10:16). Xlakata uma kakgaxmatniyaw lakgkgolotsin. Pero ni kajwatiya uma chuna litlawayaw.

7. ¿La makgtayakgoyan lakgkgolotsin tlan natalalipina Jehová?

⁷ Akxni kapulalinkgo xnatalankan, lakgkgolotsin kalimatliwakglhkgo chu kalistakyawakgo Biblia o tastakyaw nema anta kilhtikgonit. Akxni kamaxkikgo uma tastakyaw ni tlawakgo xlakata nakawanikgo la nalinkgo xlatamatkan (2 Cor. 1:24). Kajwatiya kamaxkikgo tastakyaw xalak Biblia xlakata nakamakgtayakgo nalaksakkgo tuku tlan chu ni naʼanan taʼakglhuwit chu tlan natawila kcongregación (1 Cor. 14:33, 40). Lakgkgolotsin «kuentajtlawamakgolh [x]latamatkan» natalanin. Uma masiya pi lakaskinkgo lu tlan katalalinkgolh Jehová. Lakapala namastakgo tamakgtay komo akxilhkgo pi chatum tala naliʼakgchakgxtaya o «[...]liʼakgchakgxtayalh mpala tu ni tlan» (Gál. 6:1, 2; Jud. 22). ¿Ni xlikana pi uma tlawa “nakakgalhakgaxmataw tiku kinkapulaliman”? (Kalikgalhtawakga Hebreos 13:17, TNM.)

8. ¿La kamakgskgalakgo lakgkgolotsin xborregos Dios?

⁸ Apóstol Pablo, tiku na kuentajxtlawa xtakanajlakan xnatalanin, katsokgnanilh colosenses: «Kuintaj kakatlawakantit mpi ti ni nakaliʼakgskgawiyan wantu ni kgalhiy xlakgasi ntachuwin maski xla tastakat, sampi wa yuma nkaj xtapalaksaknikan nchixkuwin mintilhanitancha, kaj wa xtachuna wa lantla nkaj xachunata ntalakapastakna xala katuxawat, wampi ni wa lantla xtamasiyun nCristo» (Col. 2:8). Uma tuku kawanilh kinkamasiyaniyan atanu tuku xlakata kilikgalhakgaxmatatkan tastakyaw nema lakgkgolotsin kinkamaxkikgoyan chu kilhtikgo kBiblia. Xlakan kuentajtlawakgo borregos xlakata ni nakaʼakgskgawikan. Pedro kamakatsinilh pi xʼama tawila «wanti wankgo pi na  profetas wampi kaj takgsanin» chu «makgalhtawakgananin, wampi kaj akgskgawinamakgo» tiku «laktlawayawakgoy yama wanti ni [...] tliwakga kgalhikgoy xtakanajlakan» xlakata nakamatlawiputun talakgalhin (2 Ped. 2:1, 14, Hua Xasasti Talaccaxlan,  1999). Lakgkgolotsin xala uku nachuna xliwanitkan natalanin akxni talakaskin. Lakgkgolotsin lakchixkuwin tiku tliwakga wi xtakanajla chu katsikgo xlakata latamat. Nachuna, akxni nina kgolotsin xlitaxtukgo limasiyakgolh pi liwana xʼakgatekgskgo tuku wan Biblia chu pi tlan xmasiyakgo xaxlikana (1 Tim. 3:2; Tito 1:9). Tlan nawanaw pi xlakata tliwakga wilakgo xtakanajlakan, tlan lakapastaknankgo chu liskgalala nema kamaxki Biblia kamakgtaya tlan napulalinkgo borregos.

9. ¿La pulalin Jesús chu maxki taway xlakata takanajla xcongregación xala uku?

⁹ Jehová maklakaskin xkachikin xlakata nakamaxki lhuwa taway xlakata takanajla natalan xliputum katiyatni. Kkilikgalhtawakgakan kinkamaxkikanan lhuwa tastakyaw nema kilhtikgo kBiblia. Nachuna, min kilhtamaku xkachikin Dios maklakaskin cartas o superintendentes viajantes xlakata nakawanikgo lakgkgolotsin tuku xlitlawatkan. Putum uma Jesús limaklakaskin xlakata nakamaxki tastakyaw xborregos.

10. ¿Tuku kalakgayawakanit lakgkgolotsin akxni chatum tala tamakgatlini congregación?

¹⁰ Lakgkgolotsin kalakgayawakanit nakakuentajtlawakgo congregación chu  xtakanajlakan, liwaka tiku xlajwanamakgo xtakanajlakan o tlawakgolh tuku nitlan (kalikgalhtawakga Santiago 5:14, 15). Makgapitsi borregos tamakgatlikgonit chu nialh skujnanikgo Dios. ¿Ni xlikana pi chuna xtlawalh chatum xapaxkina kgolotsin xlakata xkatekgsli chu xkawanilh pi xtaspitkgolh kcongregación? ¡Xlikana pi chuna xtlawalh! Jesús wa: «Pus na chuna ni xtalakaskin minTlatkan nti wi nkkgapun natsankgay na yuma nchatum laktsu kaman» (Mat. 18:12-14).

11. ¿Tuku xlakata makgapitsi natalan tuwa makgkatsikgo nakgaxmatkgo xtastakyaw lakgkgolotsin?

¹¹ Jehová chu Jesús mapuchwayananin tiku lakgalhinanin, pero lakgkgolotsin tiku kalakgayawakanit nakuentajtlawakgo congregaciones lakgalhinankgo. Wa xlakata, makgapitsi natalanin tuwa makgkatsikgo namakglhtinankgo xtastakyawkan. Max nalakpuwankgo: «Xlakan na lakgalhinankgo la akit. ¿Tuku xlakata nakiwanikgo tuku kilitlawat?». Chu xlikana lakgkgolotsin, na lakgalhinanin. Pero, ni kajwatiya naʼakxilhaw xtalakgalhinkan chu tuku nitlan tlawakgo.

12, 13. 1) ¿Tuku tlan wanaw xlakata xtalakgalhinkan makgapitsin tiku Jehová wi tuku kalakgayawanit? 2) ¿Tuku xlakata tsokgka kBiblia xtalakgalhinkan makgapitsi tiku Jehová kamaklakaskilh?

¹² Anta kBiblia tatsokgnit tuku nitlan tlawakgolh tiku Jehová kamaklakaskilh makgasa xlakata napulalin xkachikin. Akgtum liʼakxilhtit, David lilaksakka mapakgsina chu xpulalina Israel. Pero tlawalh tuku nitlan, tatalakgxtumilh xpuskat atanu chixku chu makgninalh (2 Sam. 12:7-9). Na kalakapastakwi apóstol Pedro. Maski lhuwa taskujut maxkika kcongregación Cristo kxapulana siglo, tlawalh laklanka talakgalhin (Mat. 16:18, 19; Juan 13:38; 18:27; Gál. 2:11-14). Lata Adán chu Eva asta la uku putum latamanin lakgalhinanaw, kajwatiya Jesús ni lakgalhinalh.

¹³ ¿Tuku xlakata tlawalh Jehová pi kBiblia xkalichuwinanka xtalakgalhinkan tiku xla xkalakgayawanit taskujut? Pulaktum wa xlakata nalimasiya pi tlan maklakaskin lakgalhinanin lakchixkuwin xlakata napulalin xkachikin. Putum kilhtamaku chuna tlawanit. Wa xlakata, ni nawanaw tuku nitlan xpalakatakan chu ni kalakgmakgaw xlimapakgsinkan tiku kinkapulaliman kaj xlakata akxilhaw pi na lakgalhinankgo. Jehová lakaskin kakamaxkiw kakni chu kakgaxmatniw (kalikgalhtawakga Éxodo 16:2, 8).

14, 15. ¿Tiku kinkamasiyaniyan tuku maklakaskilh Jehová xlakata xkatachuwinalh xkachikin?

¹⁴ Lu xlakaskinka nakakgalhakgaxmataw tiku kinkapulalinan uku. Kalakapasktakwi tiku maklakaskilh Jehová akxni kawanilh tuku lu xlakaskinka xkachikin. Akxni israelitas taxtukgolh kʼEgipto, Jehová maklakaskilh Moisés chu Aarón xlakata xkawanilh tuku xlitlawatkan xwanit. Xlakata xlakgtaxtukgolh akxni milh xliʼakgkaw tuku nitlan, xlitlawatkan xwanit akgtum lu xlakaskinka taway chu xmawakanikgolh xkilhpan malakcha, o puwilhta, xkgalhni borrego nema makgnikgolh. Ni mincha tachuwin kʼakgapun xlakata xkawanilh tuku xtlawakgolh. Wata kgaxmatkgolh tuku kawanilh lakgkgolotsin xalak Israel, nema Moisés kawanilh la nawankgo (Éx. 12:1-7, 21-23, 29). Ama kilhtamaku, Moisés chu lakgkgolotsin wankgolh tuku xkalimapakgsima Dios. La uku nachuna lu xlakaskinka tuku tlawakgo lakgkgolotsin.

¹⁵ Xlikana, max makglhuwa lakapastakaw niku wan Biblia pi Jehová maklakaskilh ángeles o latamanin xlakata xlakgtaxtukgolh kskujnin. Akxni chuna lalh, Dios akxilhli pi tlan xkamaxkilh atanu xlimapakgsin. Makatsininanin palakachuwinankgolh kxtukuwani chu kawanikgolh  kachikin tuku xlitlawatkan xwanit xlakata xlakgtaxtukgolh. ¿Ni xlikana pi Jehová na tlan chuna natlawa akxni namin Armagedón? Xlikana pi putum lakgkgolotsin o tiku lakgayawakanit napulalinkgo xkachikin Jehová kuenta xlitlawatkan ni namalakatsalikgo limapakgsin nema kamaxkikanit.

16. ¿Tuku «tachuwin» kilikgaxmatatkan?

¹⁶ Xkachikin Jehová «nkgamputum» litaxtu chu pulalin «nchatum xmapuchwanina», Jesucristo (Juan 10:16). Jesús kawanilh kstalaninanin pi xʼama katatawila «nchali chali, asta nasputa» kakilhtamaku (Mat. 28:20). ¿La kgantaxtuma tuku wa? La Mapakgsina kʼakgapun, tlan tlawa kakgantaxtulh putum tuku xlilat xlakata namalakgsputukan xkakilhtamaku Satanás. Komo katatawilaputunaw xborregos Dios chu lakaskinaw kakinkakuentajtlawakan, talakaskin nakgaxmataw “tachuwin kinchakgenkan” nema kinkawaniyaw tuku tiji kiliʼanatkan. Uma «tachuwin» na kilhchanima tuku wan espíritu santo kBiblia chu tuku wan Jehová chu Jesús akxni kamaklakaskin lakgkgolotsin nema kalakgayawanit taskujut (kalikgalhtawakga Isaías 30:21 chu Apocalipsis 3:22).

17, 18. 1) ¿Tuku tlawaniputun tuku nitlan borregos? 2) ¿Tuku kililakapastakatkan? 3) ¿Tuku naʼakxilhaw kʼartículo nema aku mima?

¹⁷ Apóstol Pedro wa: Satanás «xtachuna xatsinksni lapanit, lama kmintuntamaknikan, putsama wa nti nachipay, naway» (1 Ped. 5:8). La xatsinksni lapanit, skgalalh kaʼakxilhma borregos, kgalhkgalhima kilhtamaku nakaʼakgchipa tiku ni skgalalh wilakgolh o akgtsankgatayakgonit. Uma atanu tuku lu xlakaskinka nema tlawa pi ni natamakgatliniyaw xborregos chu Jehová tiku «kuintaj xtlawana [k]ilistaknakan» (1 Ped. 2:25). Apocalipsis 7:17 kinkawaniyan pi tiku nalakgtaxtukgo klanka takatsanajwat: Jesús «nkalhnilu [...] namakgtakgalhkgoy, na wa napulaliyankgo ntani anan ntaxtunu nchuchut xla latamat; chu na wa Dios nalakpixaka xlipaks xlakgpixtajatkan». ¿Wi atanu tlakg tlan tamalaknun?

¹⁸ Xlakata akxilhnitawa xlakaskinka taskujut nema makgantaxtikgo lakgkgolotsin la mapuchwayananin, tlan tlawayaw uma takgalhskinin: «¿La nalikatsikgo umakgolh lakchixkuwin tiku kalakgayawakanit xborregos Jesús pi tlan kakuentajtlawamakgolh?». Kaʼakxilhti takgalhtin kʼatanu artículo.