1, 2. 1) ¿Tuku kitaxtu akxni lu tlan kakuentajtlawakan borregos? 2) Kxkilhtamaku Jesús, ¿tuku xlakata lhuwa latamanin xlitaxtukgo la borregos tiku ni xkgalhikgo xmapuchwayanina?

BORREGOS lu tlan stakkgo akxni mapuchwayanina kuentajkatlawa. Maktum libro nema lichuwinan la nakamakgastakkan borregos wan pi «komo mapuchwayanina kajwatiya kalin chu ni kamaxki atanu tuku maklakaskinkgo, max ni xlimakgas naʼakxilha pi makgapitsi tatatlakgo chu ni katikalitlajalh». Pero nichuna komo mapuchwayanina lu tlan kakuentajtlawa borregos.

² Xlakata putum tiku wilakgolh kcongregación tlan natawilakgo xtakanajlakan, talakaskin pi xmapuchwayananin xborregos Dios nakamaxkikgo tuku maklakaskinkgo. Kalakapastakti, Jesús xkalilakgaputsa latamanin xlakata «kaj lhtuj xtamakgaxtakgkgonit xtakgawanikgonit xtachuna nkalhnilu ntu ni kgalhikgoy xmapuchwanina» (Mat. 9:36). ¿Tuku xlakata nitlan xwilakgolh? Xlakata tiku xkalakgayawakanit nakamasiyanikgo Limapakgsin lhuwa tuku xkaskinikgo, nitlan xkalikatsinikgo chu xkaʼakgskgawikgo. Uma xpulalinanin takanajla kʼIsrael, ni xkamakgtayakgo chu ni xkamawikgo borregos, wata «laktsinka takuka» xkawilinikgo (Mat. 23:4).

3. ¿Tuku xlilakapastakatkan lakgkgolotsin xalak congregación?

³ La uku, lakgkgolotsin kalakgayawakanit lanka taskujut. Borregos nema kuentajtlawamakgo tapakgsinikgo Jesús, tiku xakstu limapakuwika «xatlan mapuchwanina» chu Jehová (Juan 10:11). Jesús mastalh tuku lu tapalaxla: stajmakgalh «xalilakgatit xkgalhni» (1 Cor. 6:20; 1 Ped. 1:18, 19). Xla lu kapaxki wa xlakata tamakamastalh xpalakatakan. Lakgkgolotsin putum kilhtamaku xlilakapastakatkan pi wa xapaxkina xKgawasa Dios «ntlanka xmaputxwanina kalhniluj» akxilhma la tlawamakgo xtaskujutkan (Heb. 13:20).

4. ¿Tuku naʼakxilhaw kʼuma artículo?

 ⁴ Wa xlakata, ¿la nakalikatsinikgo borregos lakgkgolotsin? Tiku wilakgo kcongregación kaskinikan “kakakgalhakgaxmatkgolh tiku kapulalin”. Nachuna, lakgkgolotsin kawanikan pi «ni kaj xaʼaklan timapakgsikgoyatit wa nti ntamakuintajlinitantit [...] xpalakatan nkgamputum xkalhnilu Dios», ni kaj akglakgwa nakamapakgsi (Heb. 13:17, TNM; kalikgalhtawakga  1 Pedro 5:2, 3). Pero ¿la tlan lakgkgolotsin nakapulalinkgo borregos chu ni kaj nakamapakgsikgo? ¿O la tlan nakamaxkikgo tuku maklakaskinkgo pero ni namalakatsalikgo limapakgsin nema Dios kamaxkinit?

5. ¿Tuku kinkamasiyaniyan xlakata Jehová tuku wan Isaías 40:11?

⁵ Akxni xlichuwinama Jehová, palakachuwina Isaías wa: «La chatum mapuchwayanina nakamapuchwani xborregos. Xmakxpan nakalimastokga borregos; chu nakachaxlin. Chu ni lakapala nakalin nema matsikinamakgolh» (Is. 40:11). Tuku lichuwinalh kinkamalakpuwaniyan pi kcongregación Jehová kamaxki tuku maklakaskinkgo tiku xlajwanamakgolh. La mapuchwayanina katsi tuku maklakaskinkgo tanatunu borrego chu kamaxkikgo tuku maklakaskinkgo xputumkan, Jehová na kuentajtlawama tuku maklakaskinkgo tiku wilakgo kcongregación chu xatapaxuwan kamaxki tuku maklakaskinkgo. Chu la mapuchwayanina chaxlin tantum aktsu borrego nema aku lakachilh akxni chuna talakaskin, Jehová «kintlatikan wanti lipekua kinkalakgalhamanan», nakinkalinan akxni natitaxtuyaw tuku tuwa. Tlan nakinkamamakgkatsiniyan chu nakinkamatliwakglhan akxni lu tuwa tuku natitaxtuyaw o wi tuku namaklakaskinaw (2 Cor. 1:3, 4, Hua Xasasti Talaccaxlan, TXS, 1999).

6. ¿La tlan natlawa la Jehová chatum kgolotsin ktaskujut nema lakgaya?

⁶ ¡Lu xatlan liʼakxilhtit kinTlatkan xalak akgapun xlakata lakgkgolotsin kcongregación! Xtachuna la Jehová, kuenta xlitlawatkan tuku titaxtumakgo borregos. ¿Tuku xlakata? Komo katsikgo tuku tuwa titaxtumakgo chu tuku maklakaskinkgo, tlan nakamatliwakglhkgo chu nakamakgtayakgo (Prov. 27:23). Xlakata uma talakaskin pi lakgkgolotsin liwana nakatachuwinankgo natalan. Maski katsikgo pi ni lu namakgtanukgo kxlatamatkan, kuentajtlawakgo tuku akxilhkgo chu kgaxmatkgo kcongregación chu limaxtukgo kilhtamaku “namakgtayalinkgo wanti [...] maklakaskimakgo tamakgtay” (Hech. 20:35, TXS, 1999; 1 Tes. 4:11).

7. 1) ¿La xkalikatsinikan xborregos Dios kxkilhtamaku Ezequiel chu Jeremías? 2) ¿Tuku kamasiyani lakgkgolotsin tastakyaw nema Jehová kamaxkilh nixatlan mapuchwayaninanin?

⁷ Kalilakpuwaw la xlakapastaknankgo lakgkgolotsin kxkilhtamaku Ezequiel chu Jeremías, tiku Dios kastakyawalh xlakata ni kuentajtlawakgolh xborregos. Xlakata niti xkamakgskgala, laklanka animales xkawakgo o xʼakgtsankgakgo. Amakgolh mapuchwayaninanin ni xkamawikgo, wata «putsakgolh tuku xpalakatakan» (Ezeq. 34:7-10; Jer. 23:1). Wa xlakata Jehová kalakgmakganit tiku pulalinkgo ni xaxlikana takanajla. Xlakata uma lu xlakaskinka pi lakgkgolotsin nakuentajtlawakgo borregos.

8. ¿Tuku lu tlan liʼakxilhtit wililh Jesús akxni kastakyawalh tiku nitlan tuku xlakapastakkgo?

⁸ Xlakata makglakgalhinanin, makgapitsi xborrego Dios max ni liwana akgatekgskgo tuku xlitlawatkan. Max ni kgalhakgaxmatkgo akgtum tastakyaw xalak Biblia o wi tuku tlawakgo nema limasiya pi ni tliwakga wi xtakanajlakan. Akxni chuna nala,  ¿tuku natlawakgo lakgkgolotsin? Nakatapatikgo la Jesús katapatilh kstalaninanin akxni lu xkatsiputunkgo tiku tlakg xapuxku xʼama wan kxTamapakgsin: ni kasitsinilh, wata kastakyawalh chu kamasiyanilh pi xtataktujukgolh (Luc. 9:46-48; 22:24-27). Akxni katantuchakgelh, kamasiyanilh tuku wamputun nataktujukgo, uma tayat xlimasiyat putum tiku pulalin taskujut kcongregación (kalikgalhtawakga Juan 13:12-15; 1 Ped. 2:21).

9. ¿La kastakyawalh Jesús kstalaninanin?

⁹ Jesús ni xlakapastaka la apóstoles Santiago chu Juan xlakata tuku xlitlawat xkuentajtlawana takanajla. Xchatiykan lu xlakaskinka xlitaxtuputunkgo kxTamapakgsin. Pero Jesús kastakyawalh: «Katsiyatit mpi wa laktlanka mapakgsinanin kxlakgstipankan xakgmakgat chixkuwin, wa malananikgoy, chu wa nti laktlanka napuxkun, wa ntlanka katsinikgoy kxlimapakgsin. Wampi wa wixin ni chuna nkatilalh; wampi wa nti ntlanka xwamputulh kmilakgstipankan, wa yama milakskujnikan nawan» (Mat. 20:25, 26). Xtalakaskin pi apóstoles nialh xkamapakgsiputunkgolh xnatalan.

10. 1) ¿La lakaskin Jesús pi lakgkgolotsin kakalikatsinikgolh borregos? 2) ¿Tuku lu tlan liʼakxilhtit wililh Pablo?

¹⁰ Jesús lakaskin pi lakgkgolotsin xalak congregación kakalikatsinikgolh borregos xtachuna la kalikatsinilh. Xlakskujnin xnatalan xliwanatkan, ni xmalanakan. Pablo limasiyalh tataktujut, la masiya tuku katsokgnilh lakgkgolotsin xalak Éfeso: «Wixin stalanka katsiyatit lantla xakkatalaman akxni pulana ktikilachi unu kxatiyat Asia. Wixin katsiyatit pi niukxni xaktlankakatsiy, xaliʼankgalhin xataktujun xakliskujnanima Kimpuchinakan». Apóstol xlakaskin pi lakgkgolotsin ni lanka xkamakgkatsika chu xatapaxuwan xkamakgtayakgolh amakgapitsin. Alistalh kawanilh: «Kit tanks kkamasiyunin pi xlakaskinka naskujatit lakimpi tlan namakgtayalipinkgoyatit wanti [...] maklakaskimakgo tamakgtay» (Hech. 20:18, 19, 35, TXS, 1999). Alistalh katsokgnilh kstalaninanin Cristo xalak Corinto pi ni xmalana xtakanajlakan xwanit, wata xkamakgtayaputun xatapaxuwan skujnikgolh Jehová (2 Cor. 1:24). Chuna, Pablo lu tlan liʼakxilhtit kawilinilh lakgkgolotsin xala uku xlakata ni lanka makgkatsika chu skulujwa xwanit.

11, 12. ¿La tlan kgolotsin namakgtaya chatum tala nalakapastaka tuku natlawa?

¹¹ Lu xlakaskinka pi kgolotsin kcongregación «tliwakglh nakgalhitawilay xatlan tachuwin mpi talulokgtat, xtachuna lantla aktanks ntamasiyuninit» (Tito 1:9). Pero “katapaxuwan nakamakgtayakgo” (Gál. 6:1, TXS, 1999). Xatlan mapuchwayanina ni fuerza kamatlawi natalan kcongregación tuku lakaskin, wata kawani tuku nalakgchan kxnakujkan. Tlan nawani tuku tastakyaw xalak Biblia xlilakapastakat xlakata tuku nalaksaka, nachuna tlan akxtum nalikgalhtawakgakgo tuku tsokgkanit kkilikgalhtawakgakan xlakata uma. Tlan nawani kalakpuwa la natawila xtakanajla komo wi tuku nalaksaka natlawa. Na tlan liwana nawani pi katlawanilh oración Dios niku naskini kapulalilh xlakata nalaksaka tuku natlawa (Prov. 3:5, 6). Pero akxni litakgalhchuwinankgonita, namakgxtakga pi tala xakstu kalaksakli tuku natlawa (Rom. 14:1-4).

¹² Tastakyaw nema kgolotsin namastakgo kajwatiya nakilhtikgo kBiblia. Wa xlakata, lu xlakaskinka nakatsikgo namaklakaskinkgo chu namasiyakgo tuku anta wan. Komo chuna natlawakgo ni namalakatsalikgo xlimapakgsinkan. Kalakapastakwi pi kaj makgtayananin tiku kgalhikgo  xmalanakan, chu chatunu kcongregación namaxkikgo kuenta Jehová chu Jesús (Gál. 6:5, 7, 8).

13, 14. ¿La nakawilinikgo lakgkgolotsin liʼakxilhtit borregos?

¹³ Akxni xkawaninita lakgkgolotsin xalak congregación pi “ni kaj [...] namapakgsikgo wa nti ntamakuintajlikgonit”, apóstol Pedro kawanilh: «Xaliʼukxilhtit nawanatit xpalakatakan nkgamputum xkalhnilu Dios» (1 Ped. 5:3). ¿La nakgalhakgaxmata kgolotsin uma tastakyaw? Kaʼakxilhwi akgtiy tuku xlikgalhit tiku «mpuxkunaniputun xtaskujut Dios»: xlimasiyat pi «katsiy lantla namakgtakgalhliyan xlatamat» chu «ntlan namapakgsinan kxchik». Xlakata tlan kgolotsin nalitaxtu, “xlikatsit lantla namakgtakgalhliyan xlatamat”, uma kilhchanima aktanks naʼakgatekgsa xtastakyaw Dios chu nalilatama. Tlan nalakapastaknan chu ni akglakgwa nalaksaka tuku natlawa. Nachuna, komo kgalhi familia, talakaskin lu tlan nakapulalin, xlakata «wanti ni tlan namapakgsinan kxchik, ¿lantla nkuintaj natlaway, napuxkunan kxlakgstipankan xkanajlanin Dios?» (1 Tim. 3:1, 2, 4, 5). Akxni lakgkgolotsin limasiyakgo umakgolh tlan tayat, natalan lipawankgo.

¹⁴ Tiku pulalinkgo congregación na xliwilinitkan liʼakxilhtit xnatalan akxni lichuwinankgo Dios. Jesús kawilinilh liʼakxilhtit, akxni milh kKatiyatni tlakg xlakaskinka xʼakxilha nalichuwinan Dios. Nachuna, kamasiyanilh kstalaninanin la natlawakgo uma taskujut (Mar. 1:38; Luc. 8:1). La uku, tiku lichuwinankgo Dios tlakg kamatliwakglhkgo nakataʼan lichuwinan Dios lakgkgolotsin, naʼakxilhkgo la xatapaxuwan tlawakgo uma taskujut chu nakatsinikgo namasiyakgo la xlakan tlawakgo. Akxni lakgkgolotsin limaxtukgo kilhtamaku chu xlitliwakgakan xlakata nalichuwinankgo Dios maski lhuwa taskujut kgalhikgo, putum congregación nachuna tlawaputunkgo. Lakgkgolotsin nachuna wilikgo xatlan liʼakxilhtit akxni lakkaxwilikgo tuku nataʼakxilha ktamakxtumit, mastakgo xtakgalhtinkan chu na makgtayanankgo nakapalhnankan chu natlawakan kPukgalhtawakga tuku talakaskin (Efes. 5:15, 16; kalikgalhtawakga Hebreos 13:7).

15. Kawanti makgapitsi tuku xlakata lakgkgolotsin kalakgapaxialhnankgo natalan.

¹⁵ Xatlan mapuchwayanina lakapala an makgtaya borrego nema tatatla o nitlan tuku lanilh. Nachuna, lakgkgolotsin lakapala naʼankgo makgtayakgo tiku kcongregación nitlan tuku titaxtuma chu maklakaskin kamatliwakglhnika xtakanajla. Tiku linkgoya kata chu tiku tatatlakgo max namaklakaskinkgo tamakgtay, pero tuku tlakg maklakaskinkgo wa nakamatliwakglhnikan xtakanajlakan (1 Tes. 5:14).  Lakgkgawasan max natitaxtukgo atanu tuku tuwa, la ni natlawakgo tuku «ni tlan xtatlawaputukan nkaman» (2 Tim. 2:22). Wa xlakata, nakamapuchwayanikan tiku xalak congregación kilhchani pi lakgkgolotsin nakalakgapaxialhnankgo natalan xlakata nakatsikgo tuku titaxtumakgo chu limaklakaskinkgo textos xalak Biblia xlakata nakamatliwakglhkgo. Akxni lakapala lakkaxtlawakan tuku nitlan wi, makglhuwa uma ni kitaxtu akgtum lanka taʼakglhuwit.

16. Akxni chatum tala xalak congregación maklakaskima tamakgtay kxtakanajla, ¿tuku xlitlawatkan lakgkgolotsin?

¹⁶ Pero ¿komo staka xtaʼakglhuwit chatum tala chu tlawani tuku nitlan xtakanajla? Santiago tsokgli: «¿Pa wi nti wixin ntatatlay? Pus katasanilh lakgkgolun nti mpuxkunankgoy [congregación] wa napalakaskinkgo kxoraciónkan kxtukuwini nkimPuchinakan [Jehová] naʼakmawakay aceite. Chu oración xla takanajla namatliwakglha tiku nitlan makgkatsikan, chu Jehová namakipara. Nachuna komo xtlawanit talakgalhin, natapatikan» (Sant. 5:14; 5:15, TNM). Maski tiku xlajwananit kxtakanajla ni nakatasani lakgkgolotsin, xlakan xliʼanatkan xlakata nakamakgtayakgo akxni katsikgo tuku titaxtuma. Akxni lakgkgolotsin akxtum katatlawakgo oración xnatalan chu tlawakgo oración xpalakatakan, chu kamakgtayakgo akxni maklakaskinkgo limasiyakgo pi xatlan mapuchwayaninanin tiku tlan kamamakgkatsinikgo borregos nema kamakuentajlikanit (kalikgalhtawakga Isaías 32:1, 2).

17. ¿Tuku lu tlan kitaxtu akxni lakgkgolotsin tlawakgo la «ntlanka xmaputxwanina borregos»?

¹⁷ Lakgkgolotsin liskujkgo natlawakgo putum tuku kalakgayawakanit kcongregación la «ntlanka xmaputxwanina borregos», Jesucristo. Xtamakgtaykan tlakg kamakgtaya borregos chu tlawa pi tlakg natatliwakglha xtakanajlakan. Uma tlawa pi napaxtikatsiniyaw chu namalankiyaw Jehová, kiMapuchwayaninakan tiku ni kgalhi xtachuna.