Chatiy precursores kpaís wanikan Kenia tiku kawanika pi xtanukgolh kʼakgtum chiki lu kaks lilakawankgolh akxni akxilhkgolh aktsu xmakni chatum chixku kputama. Lu aktsu xwanit xmakni chu nachuna xmakxpan. Akxni wanika pi Dios xʼama tlawa pi «tiku nila tlawan natlawan la tlawan juki», xla lu lipaxuwalh (Is. 35:6).

Precursores katsikgolh pi Onesmus, tiku la uku max kgalhi 40 kata, talakachilh osteogénesis imperfecta, uma na wanikan tajatat xla huesos de cristal. Xlukut ni tliwakga, wa xlakata maski tsinu namakgachipaya tlan tatukxkgo. Xlakata ni anan tuku nalimapaksakan o xatlan likuchun xlakata uma tajatat, Onesmus xlakpuwan pi putum kxlatamat xʼama katsanajwanan chu kaj ksilla xla ruedas xʼama tawila.

Onesmus matlanilh nalimakgalhtawakgekan Biblia. Pero xtse, o xnana, ni xlakaskin pi xʼalh tamakxtumit xla kstalaninanin Cristo, xlakata xlakpuwan pi xʼama lani tuku nitlan o tlakg xkatsanajwanalh. Wa xlakata natalan xgrabarlinikgo tuku xtamatitaxti ktamakxtumit chu xla xkgaxmata kxchik. Pero akxni xkgalhiya akgkitsis papaʼ lata xlikgalhtawakgama Biblia, wa pi xʼamputun ktamakxtumit maski xlanilh tuku nitlan.

¿Tlakg katsanajwanalh xlakata alh ktamakxtumit? Ni chuna. Xla wan: «Ktamakxtumit xakmakgkatsi pi ni lu xakkatsanajwanan». Lakpuwa pi xasasti xtakgalhkgalhin wa tuku xtlawa tlakg tlan xmakgkatsilh. Xtse lu paxuwalh akxni akxilhli pi xkgawasa tlan xmakgkatsi, chu na tsukulh kgalhtawakga Biblia. Xla xwan: «Naskujnani Dios wa xlikuchun».

Ni xlimakgas, Onesmus xlichuwinan Dios maski nina xtamunu. Titaxtulh kilhtamaku tamunulh chu la uku liskuja la siervo ministerial. Maski nila maklakaskin xchaxpan chu nipara xmakxpan, xtlawaputun putum tuku xmatlani kxtaskujut Jehová. Xliskujputun precursor auxiliar, pero ni xmasta solicitud xlakata xpekuan. ¿Tuku xlakata? Xlakata xkatsi pi xʼama maklakaskin tiku xmatlawanilh xsilla xla ruedas. Akxni kawanilh natalan uma tuku xlilipuwan, xlakan wanikgolh pi xʼamakgo makgtayakgo. Xlakata, natalan makgtayakgolh, Onesmus tlan litaxtulh precursor auxiliar.

Akxni xliskujputun precursor regular, watiya tuku lipekualh. Pero akgtum kilhtamaku texto xla chali chali maxkilh litliwakga nema xmaklakaskin. Xmaxtukanit kSalmo 34:8, niku wan: «Kalikxilhtit xlakata nakatsiyatit la ixlitlan katsi [Jehová]». Akxni xlilakpuwanita uma texto liwana lakapastakli naliskuja la precursor regular. La uku kʼakgtum semana lichuwinan Dios akgtati kilhtamaku chu kalimakgalhtawakge Biblia makgapitsi latamanin tiku lu tatliwakglhma xtakanajlakan. Kkata 2010 alh kʼEscuela xla Precursores. Lu paxuwalh xlakata chatum xmakgalhtawakgena xwanit tiku pulana xlakgapaxialhnanit.

Xnatlatni nikgonita, pero natalan makgtayakgo nakgalhi tuku maklakaskin chali chali. Xla lu paxtikatsini Jehová xlakata putum tasikulunalin nema kgalhi uku chu xatapaxuwan kgalhkgalhima kilhtamaku akxni «ni chatum lataman nawan: “Ktatatlay”» (Is. 33:24).