1, 2. 1) ¿Tuku xlakata xlakaskinka “skgalalh natawilayaw xpalakata kioraciónkan”? 2) ¿Tuku takgalhskinin xpalakata oración tlan nakinkatlawanikanan?

CHATUM chixku tiku katsisni xaskuja wan: «Akxni nina tsuku xkgakga hora nema tlakg kapukswa tuwa makgkatsiya ni nalhtataya». Max lhuwa tiku ni lhtatakgo katsisni nachuna lakpuwankgo. Kstalaninanin Cristo nachuna titaxtumaw, xlakata xalhman katsisni xla lixkajni xkakilhtamaku Satanás tlakg kapukswa wi, nialh makgas nasputa (Rom. 13:12). ¡Lu nitlan xkitaxtulh komo nalhtatayaw uma hora! Tlakg xlakaskinka pi “lakatitum ntu nalakapastakaw”, natlawayaw xtastakyaw Biblia chu “skgalalh natawilayaw xpalakata kioraciónkan” (1 Ped. 4:7).

² Xlakata xlakaskinka kilhtamaku nema wilaw tlan kiʼakstukan nakinkakgalhskinkanan: «¿La xlilakaskinka kkaʼakxilha kiʼoraciones? ¿Tipakgatsi oración ktlawa? ¿Ni klimakgxtakga ktlawa kiʼoración? ¿Klismani ktlawa oración xpalakata amakgapitsin, o kaj ktlawa oración xpalakata tuku kmaklakaskin chu klakaskin? Nachuna, ¿la xlilakaskinka oración xlakata naklakgtaxtu?».

3. Kawanti tipakgatsi oración nema tlan tlawakan.

³ Kcarta nema katsokgnilh efesios, apóstol Pablo maklakaskilh tachuwin «nkaxatu kawa mioraciónkan» (Efes. 6:18). ¿Ni xlikana pi lismaniyaw skiniyaw Jehová tuku maklakaskinaw chu tlan natitaxtuyaw tuku tuwa? Tiku “kgaxmata oración” xatapaxuwan kgaxmata tuku skiniyaw (Sal. 65:2). Pero, na kilitlawatkan atanu oración, la akxni malankiyaw, paxtikatsiniyaw chu tasaskiniyaw.

4. ¿Tuku xlakata makglhuwa kilimalankitkan Jehová kkiʼoracioneskan?

⁴ Wi lhuwa tuku xlakata nawaniyaw tachuwin nema namalanki Jehová kioracioneskan. Akgtum liʼakxilhtit,  malankiputunaw akxni lilakpuwanaw tuku «laklikwanit katlawanit» chu «lhuwa ixlikaknit» (kalikgalhtawakga Salmo 150:1-6). Akgchaxan versículos xla Salmo 150 makgkututu kinkawaniyan pi kamalankiw Jehová. Tiku tsokgli atanu salmo chuna kilhtlilh: «Akit makgtujun kpaxkatlikatsiniyan lata nak akgtum chichini, porque laktankswa milimapakgsin nima kilamaxkinitaw» (Sal. 119:164). Xlikana pi Jehová lakgchan namalankikan. Wa xlakata, «makgtujun [...] lata akgtum» kilhtamaku kamalankiw, uma kilhchanima ni nalimakgxtakgaw la tlawamaw oración.

5. ¿La kinkamakgtayayan napaxtikatsininanaw kkiʼoracioneskan?

⁵ Oración xla tapaxtikatsinit atanu nema na lu xlakaskinka. Pablo kawanilh kstalaninanin Cristo xalak Filipos: «Nitu xatu ntu ntililakgaputsayatit; chi wampi wata paks kamasiyutit kxlakatin Dios wa ntu lakaskinatit kmiʼoracionkan, chu lantla mpala tu nalixakgatlilakapinatit, su naskinatit, na natamastayatit mpaxkatsinit» (Filip. 4:6). Akxni tlawayaw oración chu liwana mastayaw tapaxtikatsini uma kinkamakgtayayan. ¿La kinkamakgtayayan? La uku, lamaw «xaʼawatiya kilhtamaku», wa xlakata katalamaw tiku «ni [...]paxtikatsininankgo» (2 Tim. 3:1, 2, TNM). Komo ni kuenta tlawayaw, max nakinkapasayan uma tayat. Komo paxtikatsiniyaw Dios akxni tlawaniyaw oración nakinkamakgtayayan nalipaxuwayaw tuku kgalhiyaw chu ni nawanaw pi “ni tlan tuku kinkaʼakgspulaman kkilatamatkan” (Jud. 16, TNM). Tiku pulalin familia tlan kamakgtaya xpuskat chu xkamanan namastakgo tapaxtikatsinit akxni nakatatlawakgo oración chu namaklakaskin tachuwin xla tapaxtikatsini.

6, 7. ¿Tuku kilhchanima tasaskinkan, chu tuku tlan tasaskiniyaw Jehová?

⁶ Oración akxni tasaskinkan limasiyakan pi wi tuku lu makgkatsikan. ¿Tuku kilhtamaku tlan natasaskiniyaw Jehová? Tlan chuna natlawayaw akxni kinkaputsastalanimakan o akxni lu tatlayaw. Akxni chuna titaxtuyaw, kioracionkan litaxtu tuku tasaskiniyaw Dios. Pero ¿kajwatiya uma nalitasaskiniyaw Jehová?

⁷ Kaʼakxilhwi oración nema Jesús wililh la liʼakxilhtit chu kaʼakxilhwi tuku wa xlakata xtukuwani, xTamapakgsin chu xtalakaskin Dios (kalikgalhtawakga Mateo 6:9, 10). Uma kakilhtamaku litsama tuku nitlan chu mapakgsinanin nila kamaxkikgo latamanin tuku maklakaskinkgo. Kilitasaskinitkan kinTlatkan xalak akgapun katamasantujlilh xtukuwani chu pi xTamapakgsin kamasputulh tuku tlawama Satanás. Nachuna tlan naskiniyaw pi katatlawalh xtalakaskin kKatiyatni xtachuna la tatlawama kʼakgapun. Xlakata uma, talakaskin skgalalh natawilayaw chu namaklakaskinaw tipakgatsi oración.

8, 9. ¿Tuku xlakata ni nawanaw tuku nitlan xlakata Pedro chu amakgapitsin apóstoles tiku lhtatakgolh kjardín xla Getsemaní?

⁸ Maski apóstol Pedro kawanilh kstalaninanin Cristo pi «skgalalh xtawilakgolh xpalakata xoraciónkan», tlan nawanaw pi makgtum kilhtamaku ni chuna xtlawanit. Pedro chatum kstalanina Cristo tiku na lhtatalh akxni Jesús xtlawama xʼoración kjardín xla Getsemaní. Xmakgalhtawakgenakan xkawaninit: «Skgalalh katawilatit, chu na katlawatit mioraciónkan»; pero xlakan ni kuenta tlawakgolh (kalikgalhtawakga Mateo 26:40-45).

⁹ ¿Kaj nitlan nalichuwinanaw Pedro chu amakgapitsin apóstoles xlakata lhtatakgolh? Kalakapastakwi pi ama kilhtamaku lu litlakgwa xwanit xpalakatakan. Xlakkaxtlawakgonit tuku xtalakaskin xlakata Pascua chu xtlawakgonit. Chu Jesús xlakkaxwilinit xTaway kiMalanakan xlakata alistalh chuna  xtalakapastakli akxni tinilh (1 Cor. 11:23-25). Chu «alistalh chu akxni xlakan litlikgolh akgtum tatlin xla tapaxkatkatsin ankgolh kxakgastin wanikan Monte de los Olivos» uma tlawalh pi makgat xtlawankgolh klaktitsu xtiji Jerusalén (Mat. 26:30, 36, Hua Xasasti Talaccaxlan, 1999). Max liwaka itat tsisni xwanit. Komo uma katsisni na anta xtitawilaw kjardín xla Getsemaní, max na xtilhtataw. Pero Jesús ni kakilhnilh xʼapóstoles tiku lu xtlakgwankgonit, o xʼakgxuninikgonit ni xatasitsin kawanilh «tliwakga kgalhiyatit mintalakapastaknikan, wa mintiyatliwakan xlikana xaxlajwani».

10, 11. 1) ¿Tuku katsinilh Pedro akxni aklhtatatawi kjardín xla Getsemaní? 2) ¿Tuku masiyaniyan tuku titaxtulh Pedro?

¹⁰ Pedro katsinilh tuku lu xlakaskinka ama katsisni akxni aklhtatatawi kjardín xla Getsemaní. Nina makgas, Jesús xwanit: «Xlipaks wixin, lhtuj nakimakgaxtakgatit yuma nkatsisni». Chu Pedro xwaninit: «Maski mpala paks lhtuj namakgaxtakgkgoyan, ni ukxni lhtuj kaktimakgaxtakgni nkit». Maski Jesús wanilh pi makgtutu xʼama wan pi ni xlakgapasa, Pedro chuntiya wanilh: «Maski lapi xlilat naktaniyan, wampi ni kaktikgalhtatsekgninku» (Mat. 26:31-35). Chuna la Jesús xwanit, Pedro wa pi ni xlakgapasa. Akxni akxilhli tuku xtlawanit, «chalipuwana tsukulh tasay» (Luc. 22:60-62).

¹¹ Pedro katsinilh ni xakstu nalipawankan, chu oración makgtayalh tlan xmatlanilh. Xla kinkamaxkiyan tastakyaw «skgalalh natawilayatit xpalakata mioraciónkan». ¿Kuentajtlawayaw uma xtastakyaw Dios? ¿Ni limakgxtakgaw la “tlawayaw kioraciónkan» chu limasiyayaw pi wata Jehová litamakgtayayaw? (Sal. 85:8.) Nachuna, kalakapastakwi xtastakyaw Pablo: «Nti mpuwan akgstitum lama, kuintaj katlawakaj, ni naʼakgtsankgatayay» (1 Cor. 10:12).

12. ¿Tuku xlakata Nehemías lu tlan liʼakxilhtit kimpalakatakan?

¹² Kalilakpuwaw Nehemías tiku xmaxki xvino mapakgsina Artajerjes xalak Persia ksiglo V akxni nina xmin Jesús. Uma kskujni Dios tlakg xatlan liʼakxilhtit xlakata liwana tlawalh oración. Lhuwa kilhtamaku “nitu walh chu tlawalh oración kxlakatin Dios xalak akgapun” xlakata nitlan xwilakgolh judíos kJerusalén (Neh. 1:4). Akxni Artajerjes kgalhskilh tuku xlakata xlipuwama chu tuku xskiniputun, Nehemías «lakapala [...]tlawanilh oración Dios xalak akgapun» (Neh. 2:2-4). ¿Tuku lalh? Jehová kgalhtilh xʼoraciones chu tlawalh pi tlan  xkitaxtunilh xkachikin (Neh. 2:5, 6). ¡Uma lu matliwakglhnilh xtakanajla Nehemías!

13, 14. ¿Tuku kilitlawatkan xlakata tliwakga natawila kintakanajlakan akxni Satanás nakinkamaxlajwaniputunan?

¹³ Komo natlawayaw oración, xtachuna la Nehemías, natlawa pi tliwakga natawila kintakanajlakan. Satanás lu nitlan likatsi, chu tlakg kinkatlawaniyan tuku nitlan akxni xlajwananaw. Komo titaxtumaw tuku nitlan xlakata tajatat nema kgalhiyaw o xlakata lu lilipuwanaw, max xlakpuwaw pi nitu litaxtu kilhtamaku nema limaxtuyaw akgatunu papaʼ xlakata nalichuwinanaw Dios. O max nakgalhiyaw nitlan talakapastakni nema nitlan nakinkamamakgkatsiniyan xlakata tuku nitlan titaxtuw makgasa. Satanás lakaskin kalakpuwaw pi nitu litaxtuyaw chu uma limaklakaskin xlakata namaxlajwani kintakanajlakan. Pero komo “skgalalh tawilayaw xpalakata kioraciónkan”, tlan tliwakga natawila kintakanajlakan. Chu kalakapastakwi pi “kintakanajlakan la lipaxtokgnu” nakinkamaxkiyan talakaskin “nalimamixiyaw xlipaks xapasan xputipni akgskgawini” (Efes. 6:16).

¹⁴ Komo “skgalalh tawilayaw xpalakata kioraciónkan”, ni kaj kalakapala nakinkaʼakgchipayan tuku namaxlajwaniputun kintakanajlakan. ¿Tuku tlan tlawayaw akxni wi tuku maxlajwaniputun kintakanajlakan? Kalakapastakwi Nehemías chu tunkun katlawaniw oración Dios, xlakata kajwatiya tlan natayaniyaw komo nakgalhiyaw xtamakgtay.

15. ¿Tuku takgalhskinin nakinkatlawanikanan akxni natlawayaw oración xpalakata amakgapitsin?

¹⁵ Jesús skinilh Dios pi xtakanajla Pedro ni xtaxlajwanilh (Luc. 22:32). Kxapulana siglo Epafras, kstalanina Cristo, tlawalh  la Jesús chu tlawalh oración xpalakata xnatalanin xalak Colosas, tiku Pablo katsokgnilh: «Xaliankgalhin ni makgaxtakga lantla nkapalakaskinan kxoración mpi tliwakglh natawilayatit, chu wa ntu lu[...] xaʼakchan nakatsiyatit xlipaks wa lantla lakaskin Dios» (Col. 4:12). Lu tlan kiakstukan nakinkakgalhskinkanan: «¿Liwana ktlawa oración xpalakata kinatalan kputum Katiyatni? ¿La makglit ktlawa oración xpalakata tiku nitlan titaxtumakgo xlakata tuku nitlan la? ¿Tuku kilhtamaku ktlawalh oración xpalakata tiku lhuwa tuku lakgayakgo kxkachikin Dios? ¿Ktlawanit oración xpalakata natalan xalak congregación tiku titaxtumakgolh tuku tuwa?».

16. ¿Makgtayanan natlawayaw oración xpalakata amakgapitsin?

¹⁶ Komo natlawayaw oración xpalakata amakgapitsin uma lu nakamakgtaya (kalikgalhtawakga 2 Corintios 1:11). Xlakata Jehová nakamakgtaya amakgapitsin ni talakaskin makglhuwa naskinikgo kskujnin, xla akxilha la xlilakaskinka akxilhkgo chatunu chatunu chu kuentajtlawa tuku makgkatsikgo akxni kgalhtikgo xʼoraciones. Wa xlakata, kalakapastakwi pi lanka talakgalhaman tuku lakgayaw xlakata natlawayaw oración xpalakata amakgapitsin. Xtachuna la Epafras, talakaskin nalimasiyayaw pi kapaxkiyaw kinatalankan akxni tlawayaw oración xpalakatakan. Komo chuna natlawayaw tlakg napaxuwayaw, xlakata «xaliwaka ntlan [...] nalilatapaya ntu natakinana, ni xawa ntu namakgamakglhtinana» (Hech. 20:35).

17, 18. ¿La kinkamakgtayayan “skgalalh tawilayaw xpalakata kioraciónkan”?

¹⁷ Akxni nina xwan pi «nkatsisni, ya titaxtuma, na ya naxkgakgay», Pablo tsokgli: «Katsiyaw mpi skalajwa kilhtamaku nchu lamaw, na xlimakgwata nchu natakiyaw ktalhtata; xampi tlakg lakatsuwa wi nkiliʼakgaputaxtutkan, ni xawa lantla akxni xakgasiya ntikanajlaw» (Rom. 13:11, 12). Xasasti kakilhtamaku nema Dios kinkawaninitan lakatsuwa wi, chu max kilakgtaxtutkan tlakg lakatsu wi nixawa la lakpuwanaw. Ni kataxlajwanilh kintakanajlakan chu ni kamastaw talakaskin pi tuku anan kkakilhtamaku nakinkamakglhtiyan kilhtamaku chu nialh kiakstukan natatawilayaw Jehová chu natlawaniyaw oración. Wata “skgalalh katawilaw xpalakata kioraciónkan”, uma nakinkamakgtayayan “xasantujlani kililatamatkan nakgalhiyaw, chu xkakninanin Dios nawanaw” akxni kgalhkgalhimawku xkilhtamaku Jehová (2 Ped. 3:11, 12). Chuna, putum tuku natlawayaw kilatamatkan namasiya pi tliwakga wi kintakanajlakan chu xlikana kanajlayaw pi nialh makgas kilhtamaku tsankga xlakata namasputukan uma kakilhtamaku. Wa xlakata “ni anan tajaxni nkatlawaw kioraciónkan” (1 Tes. 5:17). Xtachuna la Jesús, kaputsaw kilhtamaku xlakata kiakstukan natawilayaw chu natlawaniyaw oración Jehová. Ni kaj lakapala katachuwinaw. Uma natlawa tlakg natalakatsuwiniyaw (Sant. 4:7, 8). ¡Ni anan tasikulunalin xtachuna la uma!

¹⁸ Biblia wan: «Wa nCristo, akxni nkilatamachi yunu nkatuxawat, titlawalh xoración, tiskilh litlan, [...] xtasama lilakgpixtajli, kilhchanilh wa yuma nti ntlan xmalakgtaxtilh klinin, na titakgaxmatnicha xpalakata mpi xmakpuwaniy Dios» (Heb. 5:7). Jesús tasaskinilh Jehová chu nikxni makgatsankgananilh kxlatamat. Wa xlakata, Jehová lakgmaxtulh klinin chu maxkilh latamat nema nikxni nasputa anta kʼakgapun. Komo “skgalalh tawilayaw xpalakata kioraciónkan”, na nikxni namakgatsankgananiyaw kinTlatkan xalak akgapun akxni nakinkaliʼakxilhkanan o nakinkamatlawiputunkanan tuku nitlan chu nakinkamaxkikanan latamat nema ni katisputli.