KʼAKGTUM campaña xlakata natalichuwinan Dios nema kaj akgnajatsa kilhtamaku makgapalalh chu tatlawalh ksputat agosto chu akxni xtsukuma septiembre xla kata 1929, liwaka akgkaw mil tiku lichuwinankgo Dios makgpitsikgolh 250,000 libros chu folletos kʼEstados Unidos. Tiku na makgtlawakgolh uma taskujut max akgtum mil colportores (chuna xkawanikan precursores). ¡Lu xlhuwankgonit! Bulletin * wa pi «nila xkanajlakan» la makgtutu talhuwikgolh kkata 1927 asta 1929.

Xkgalhsputni kata 1929 wi tuku tlawalh pi nialh xʼanalh tumin. Martes negro, 29 xla octubre xla uma kata, akxni Bolsa de Valores xalak Nueva York nialh kgalhilh tumin tlawalh pi bancos xalak kachikinin xpatikgolh tuku limapakuwika Gran Depresión. Lhuwa mil bancos makgatsankgakgolh xtuminkan. Tiku xchananankgo nialhla skujkgolh. Kamalakchuwaka laklanka fábricas. Lhuwa millón latamanin nialh kgalhikgolh taskujut. Kkata 1933, kʼEstados Unidos akgtum mil chali chali xkamakglhtikan xchikkan xlakata xlixokgokgolh tuku xlaklinkgo.

¿Tuku tlawakgolh tiku xlichuwinankgo Dios putum kilhtamaku akxni xʼanama uma tuku tuwa? Lhuwa latamakgolh kchiki nema xkgalhi llantas. Xpalakata chiki nema kgalhi llantas ni xlixokgokgo renta chu impuestos xkamaxki talakaskin pi chuntiya xlichuwinankgolh Dios chu ni lhuwa tumin xlaktlawakgolh. * Chu akxni xʼankgo klaklanka tamakxtumit xkamaxkikan niku tlan klhtatakgolh chu ni kxokgokgolh kʼakgtum hotel. Kkata 1934, Bulletin xlimin niku xtsokgkanit la xlitatlawat xwanit akgtum chiki nema ni lu lanka pero niku tlan makgkatsikan xʼama kgalhi chuchut, niku xtlawaka tuku nawakan, akgtum putama nema xmalakgastokgkan chu ni xlonkgnalh.

Klakgatum katiyatni precursores lakputsakgolh la tlan xkaxtlawakgolh xchikkan nema xkgalhi xllanta. Victor Blackwell wan: «Noé ni xkatsininit la natlawa barco, chu akit na ni xakkatsininit la tlawakan chiki nema tlan malakxijkan». Pero tlan tlawalh.

Avery chu Lovenia Bristow xkgalhikgo xchikkan nema xkgalhi llantas. Avery wa: «Xtachuna la kgayin lin xmakgkgoxkga, akit xaklin kinchik». Familia Bristow xkatalitaskujkgo precursores Harvey chu Anne Conrow, tiku xkgalhikgo chiki nema tlan xmalakxijkan chu xlitapatlapakgonit cartón nema xlitamaktlawanit alquitrán. Akxni alakatanu niku xʼankgo xtaktani laktsu laktsu cartón. Avery wan: «Nikxni xakkakxilhnit akgtum chiki nema tlan malakxijkan xtachuna la ama chu nikxni kakxilhparanit atanu». Pero wa pi Harvey, Anne chu chatiy xkamanan xwankgonit «familia nema tlakg xpaxuwa». Nachuna, Harvey tsokgli: «Nikxni wi tuku kinkatsankganin chu lu tlan xmakgkatsiyaw lata kskujnimaw Jehová, tiku putum kilhtamaku xapaxkina kinkakuentajtlawan». Alistalh kgalhtati xalak familia ankgolh kʼEscuela de Galaad chu liskujkgolh la misioneros kʼPerú.

Familia Battaino nachuna akxtum liskujkgolh la precursores. Akxni Giusto chu Vincenza katsikgolh pi xʼama kgalhikgo kskgata tlawakgolh pi xputlawkan Ford A xla kata 1929 xlitaxtulh chiki nema «xtasiya la  lu xastlan hotel» nixawa laktsu chiki xla lhakgat niku pulana xlatamakgonit. Akxni lakachilh aktsu xtsumatkan chuntiya liskujkgolh tuku lu xlakgatikgo: natalichuwinankgo Dios tiku xalak Italia chu xlamakgo kʼEstados Unidos.

Lhuwa xkgaxmatputunkgo xalakwan xalaksasti, pero tiku ni xkgalhikgo tumin chu ni xkgalhikgo taskujut nila xmastakgo tumin xlakata kxokgokgolh likgalhtawakga xalak Biblia. Ni xmastakgo tumin wata tipakgatsi tuku xmastakgo xlakata xlilakgpalinikgolh. Chatiy precursoras tlawakgolh akgtum lista niku tsokgkgolh 64 tanu tanu tuku xmastakgo tiku lakgatikgo tuku xalak Biblia. Uma xtasiya la «lista niku tsokgkan tuku tamaklakaskin kpustan kʼaktsu kachikin».

Fred Anderson tatanokglhli chanana tiku xlakaskin makgapitsi libros chu lilakgpalinilh lentes nema xla xtse, o xnana, xwanit. Kʼatanu chiki chatum chixku likgalhtawakgaputulh kilikgalhtawakgakan, pero wa: «Ni kkgalhi lentes xlakata nakkgalhtawakga». Pero, akxni wililh xlentes xtalakatsu tlan kgalhtawakgalh wa xlakata xatapaxuwan mastalh tumin xlakata likgalhtawakga chu xlakata lentes.

Herbert Abbott xlin kxputlaw niku tlan xkamaki xtilan nema xmaxkikan. Akxni xkgalhi tantutu o tantati xtilan, xkalin kpustan, xkasta chu xlimatsama gasolina xtanque. Xla wan: «¿Xmin kilhtamaku nitu xkgalhiyaw tumin? Chuna, pero ni xmastayaw talakaskin pi uma xkinkamachokgon. Komo putlaw ni xkgalhi gasolina, chuntiya xtlawayaw kintaskujutkan chu xlipawanaw Jehová».

Kstalaninanin Cristo ama kilhtamaku tayanikgolh tuku tuwa xlakata lipawankgolh Jehová chu liwana lakapastakkgolh tuku natlawakgo. Akgtum kilhtamaku akxni lu xsenama, Maxwell chu Emmy taxtukgolh kxchikkan nema xkgalhi llantas akxni kgantum kiwi nina xʼaktama chu pulaktiy xtlawalh xchikkan. Maxwell tsokgli: «Uma ni xlitaxtu tuku xkinkamachokgon, wata tuku kaj xalan xla, nikxni klakpuwaw pi nialh precursores nakwanaw. Lhuwa tuku kilitlawatkan xwanit chu xaklakapastaknitaw naktlawayaw». Maxwell chu Emmy ni taxlajwanikgolh, wata kaxtlawaparakgolh xchikkan xlakata natalanin kamakgtayakgolh chu lu tlan kalikatsinikgolh.

Kʼuma lu xakatuwa kilhtamaku niku lamaw, lhuwa millón xtatayananin Jehová, na kalilakgapaskan pi lhuwa tuku makgxtakgkgo xlakata nalichuwinankgo Dios. Xtachuna la amakgolh xapulana precursores, liwana lakapastaknitaw chuntiya nalichuwinanaw Dios asta akxni Jehová nawan pi lakgolha uma taskujut.