1, 2. ¿Tuku xlakata tlakg anan taʼakgsanin la uku, chu la tasiyakgo? (Kaʼakxilhti xapulana dibujo.)

TAʼAKGSKGAWIN, chu taʼakgsanin wa tuku tlakg wi kʼuma kakilhtamaku. Ni kaks nalilakawanaw xlakata Biblia liwana kinkawaniyan pi Satanás xmapakgsina uma kakilhtamaku lu xaʼakgskgawini (1 Tim. 2:14; 1 Juan 5:19). Chuna la talakatsuwitilhama kilhtamaku akxni namasputukan uma lixkajni kakilhtamaku, Satanás tlakg sitsima xlakata: katsi pi «kaj tsinu kilhtamaku nkgalhiy» (Apoc. 12:12). Wa xlakata tlan lakpuwanaw pi tiku kamapakgsi tlakg naʼakgskgawinankgo chu tlakg nakaʼakgskgawiputun xlakskujnin xaxlikana Dios.

² Min kilhtamaku televisión, periódicos chu páginas xla Internet wankgo tuku nixlikana chu nitlan kalichuwinankgo xtatayananin Jehová chu xtakanajlakan. Xlakata uma, makgapitsi kanajlakgo tuku wankan chu kalisitsinikgo.

3. ¿Tuku nakinkamakgtayayan ni nakinkaʼakgskgawikanan?

³ Xlakata ni nakinkatlawaniyan tuku nitlan tuku maklakaskin Satanás, paxtikatsiniyaw pi kgalhiyaw xTachuwin Dios, nema «tlan [...] nalimasiyukan wa ntu xakgstitum natlawakan» (2 Tim. 3:16). Xtachuwin apóstol Pablo limasiya pi makgapitsi kstalaninanin Cristo xalak Tesalónica xmastakgonit talakaskin xkalimakgtsankgeka taʼakgsanin. Katsokgnanilh: «Ni kaj lakgawan tilakgpaliyatit mintalakapastaknakan» o la wan Traducción en lenguaje actual: «Ni kamastatit talakaskin lakapala nakaʼakgskgawikanatit» (2 Tes. 2:1, 2). ¿Tuku kinkamasiyaniyan xtastakyaw Pablo chu la kinkamakgtayayan uku?

4. 1) ¿La kamakatsinika xlakata «xkilhtamaku [Jehová]» kstalaninanin Cristo xalak Tesalónica? 2) ¿La kinkamakatsinikanan uku?

⁴ Kxapulana carta nema malakgachalh kcongregación xalak Tesalónica, Pablo kawanilh xlakata «xkilhtamaku [Jehová]». Ni xlakaskin pi «kapakglhtuta», o kapukswa,  xtawilakgolh chu ni skgalalh xtawilakgolh. Wa xlakata kawanilh pi la kamanan «xala kaxkgakgana», “skgalalh xtawilakgolh, chu nkatalakatlan” (kalikgalhtawakga 1 Tesalonicenses 5:1-6). La uku, kgalhkgalhimaw namasputukan xaLanka Babilonia, nixaxlikana takanajla xliputum katiyatni. Uma nalitasiya pi tsukuma xalanka xkilhtamaku Jehová. La uku, tlakg tlan akgatekgsaw la natatlawa xtalakaskin Jehová. Nachuna, kcongregación kinkamaxkikanan tastakyaw nema kinkamakgtayayan skgalalh natawilayaw. Komo lu kuenta natlawayaw uma tastakyaw natatliwakglha “kintalakapastaknakan lantla nakatsiy ntu ni xatlan, chu ntu xatlan” (Heb. 5:14).

5, 6. 1) ¿Tuku lichuwinalh Pablo kxliʼakgtiy carta nema kamalakgachanilh Tesalonicenses? 2) ¿Tuku natlawa Jesús nialh makgas xlakata Jehová chuna lakaskin? 3) ¿Tuku takgalhskinin kiʼakstukan natlawayaw?

⁵ Ni lhuwa kilhtamaku akxni xkamalakgachaninita xapulana carta kstalaninanin Cristo xalak Tesalónica, Pablo kamalakgachanilh xlimaktiy carta. Kʼuma carta kalitachuwinan takatsanajwat nema namin akxni Malana Jesús nakalakputsanani «wa nti ni lakgapaskgolh Dios, chu na ni kgalhakgaxmatkgoy xatlan xtamakatsinin» (2 Tes. 1:6-8). Capítulo 2 xla uma carta masiya pi makgapitsi natalan “kamakgakglhaka” xlakata xkilhtamaku Jehová chu xkanajlakgo pi tunkun xʼama min (kalikgalhtawakga 2 Tesalonicenses 2:1, Hua Xasasti Talaccaxlan, TXS, 1999). Xapulana kstalaninanin Cristo ni liwana xʼakgatekgskgo la xʼama kgantaxtu xtalakaskin Jehová. Wa xlakata Pablo wa: «Ni xatakgatsin ntu lakgapasaw, chu na ni xatakgatsin ntu liakgchuwinanaw; wampi akxni nachin wa ntu lu[...] xaʼakchan, pus wa ntu nchu wa ntu ni xatakgatsin natamapanuy» (1 Cor. 13:9, 10). Tliwakga kgalhikgolh xtakanajlakan xlakata tastakyaw nema, tsokgkgolh apóstol Pablo, Pedro chu amakgapitsin kstalaninanin Cristo ama kilhtamaku.

⁶ Xlakata xkamaʼakgatekgsnilh chu xkamakgtayalh tlan talakpuwan xkgalhikgolh, Pablo lichuwinalh pi akxni nina xmin xkilhtamaku Jehová lhuwa xʼama anan apóstatas chu xʼama tasiya «nchixku xla talakgalhin». *  Alistalh, kilhtamaku akxni lakgchan, kiMalanakan Jesús «nalimalakgsputuy» putum tiku mastakgolh talakaskin nakaʼakgskgawikan. Pablo wa tuku xlakata nakamalakgsputukan: «Ni makgamakglhtinankgolh xtalakgachixkuwin talulokgtat» (2 Tes. 2:3, 8-10). Wa xlakata kiʼakstukan kakinkakgalhskinkan: «¿La xlilhuwa kpaxki tuku xaxlikana? ¿Liwana kkatsi xasasti taʼakgatekgsni tuku aku taxtulh krevistas o kʼatanu likgalhtawakga xalak Biblia nema makglhtinan xkachikin Dios xlikalanka kakilhtamaku?».

7, 8. 1) ¿Tuku taʼakglhuwit xkgalhikgo xapulana kstalaninanin Cristo? 2) ¿Tuku katuwa titaxtuyaw uku xaxlikana kstalaninanin Cristo?

⁷ Xlikana, kstalaninanin Cristo atanu tuku xʼama katlawaniputun tuku nitlan, ni kajwatiya apóstatas chu xtamasiyatkan. Pablo tsokgnilh Timoteo pi «nalakgpaxkiya ntumin, lu[...] wa xtankgaxekga xlipaks ntalakgalhin», chu wa pi xlakata uma makgapitsin, «tamakgatlinikgolh ntakanajla», chu «lhuwa likgalhikgolh ntalipuwan» (1 Tim. 6:10). «Xtatlawaputu ntiyatliwa» nachuna putum kilhtamaku katuwa kinkawiliyan (Gál. 5:19-21).

⁸ Tlan akxilhaw tuku xlakata Pablo kawanilh tesalonicenses pi xʼama anan lakchixkuwin tiku kalimapakuwilh apóstoles «kaj xaʼakgsaninanin». Kcongregación xwilakgolh lakchixkuwin tiku «tamasiyun ntu ni talulokgtat [x]lichuwinankgo[...], lakimpi namalakgaspityawakgoy limakgalhtawakgat nastalanikgoy» (2 Cor. 11:4, 13, Hua Xasasti Talaccaxlan [Coyutla]; Hech. 20:30). Alistalh Jesús lu tlan lichuwinalh congregación xalak Éfeso xlakata nila «[x]tapatikgoy nti nkalawa xtayat». Kstalaninanin Cristo xalak Éfeso kaliʼakxilhkgolh umakgolh tiku ni xaxlikana apóstoles, lakchixkuwin tiku «akgsaninanin» (Apoc. 2:2). Kxlimaktiy carta nema kamalakgachanilh Tesalonicenses, Pablo katsokgnanilh: «Wampi kkamapakgsiyan natalanin, kxtukuwini nkimPuchinakan Jesucristo, mpi natapapitsinikgoyatit xlipaks natalanin wa nti xalhkitit xlatamalh». Xla aktanks kalichuwinalh kstalaninanin Cristo «nti ni skujputun» (2 Tes. 3:6, 10). Komo ni xlilat xtalalinkgolh tiku lhkitit, ¡tlakg xlikana pi ni xtalalinkgolh tiku xtsukumakgo likatsikgo la apóstatas! Komo katatawilakan tiku chuna likatsi lu nitlan xʼama kitaxtu wa xlakata xtalakaskin xkatamakgatlinika. Nachuna kilitlawatkan uku (Prov. 13:20).

9. ¿Tuku xlakata skgalalh kilitawilatkan komo wi tiku tsuku wan tuku Biblia ni masiya o wan tuku ni xlilat xlakata xkachikin Jehová?

⁹ Nialh makgas natsuku lanka takatsanajwat chu xlisputni nitlan kakilhtamaku, wa xlakata tlakg xlakaskinka kimpalakatakan uma tastakyaw nema mastaka kxapulana siglo. Xlikana pi “namakgantaxtiputunaw xtalakaskin” Jehová nema kgalhiyaw xlakata tapaxkit nema ni kinkamininiyan xlakata chuna tlan nakgalhiyaw talakgalhaman xla latamat nema ni kgalhi xlisputni, kʼakgapun o kKatiyatni (2 Cor. 6:1). Komo min kilhtamaku tiku an kintamakxtumitkan tsuku wan tuku Biblia ni masiya o wan tuku ni xlilat xlakata xkachikin Jehová, lu skgalalh kilitawilatkan (2 Tes. 3:13-15).

10. ¿Tuku tamasiyun tliwakglh xlikgalhitkan xwanit kstalaninanin Cristo kʼTesalónica?

¹⁰ Pablo kawanilh xnatalanin pi tliwakglh xkgalhikgolh xtakanajlakan chu ni xlakgpalikgolh tuku xkatsinikgonit (kalikgalhtawakga 2 Tesalonicenses 2:15). ¿Tuku xkilhchani «ntamasiyun» nema xkatsinikgonit? Ni wa uma tuku nixaxlikana takanajla masiyakgo chu wankgo pi xaxlikana. Ama xkilhchani xtamasiyat Jesús chu tamakatsin nema Pablo chu amakgapitsin makatsininankgolh xpalakata Dios, chu Biblia litakgatsi uma. Natalan kcongregación xalak Corinto Pablo  kawanilh: «Ankgalhin kilakapastakatit, chu mpi tliwakglh kgalhiyatit ntu kkalistakyawanitan» (1 Cor. 11:2). Umakgolh tamasiyat xmastakgonit tiku tlan lipawankan.

11. ¿La tlan xtamakgatlinikgolh Jehová tiku mastakgo talakaskin nakaʼakgskgawikan?

¹¹ Kcarta nema kamalakgachanilh Hebreos, Pablo wa pulaktiy la tlan chatum kstalanina Cristo xmakgatsankgalh xtakanajla chu xʼakgtsankgatayalh (kalikgalhtawakga Hebreos 2:1; 3:12). Xla makgtiy lichuwinalh «natamakgatliniyaw». Pulaktiy la tlan tamakgatliniyaw. Pulaktum tsinu tsinu, chu atanu kaj xalakapala. Chatum kstalanina Cristo tiku tsinu tsinu tamakgatlini Jehová max ni katikatsilh. Pero wi tiku lakapala tamakgatlini kaj xlakata tuku tlawa. Uma pulaktiy tlan chuna xkaʼakgspulalh tiku mastakgo talakaskin naʼakgskgawikan chu taxlajwani xtakanajla.

12. ¿Tuku tlan xmaxlajwanilh kintakanajlakan?

¹² Max makgapitsi kstalaninanin Cristo xalak Tesalónica mastakgolh talakaskin xkaʼakgskgawika. ¿Tuku nawanaw kimpalakatakan? Anan lhuwa tuku tlawa namakgatsankgayaw kilhtamaku. Kawiliw liʼakxilhtit, kalilakpuwaw la latamanin limaxtukgo lhuwa horas nalakgastanankgo, tanumakgo kredes sociales, tsokgkgo chu kgalhtikgo correos kʼInternet o putsamakgo tuku xaʼawatiya taxtu xlakata takgaman. Putum uma tlan kinkamakglhtiyan kinkilhtamakujkan chu tlan tlawa pi nialh lu nakanajlayaw tuku xaxlikana. Uma max natlawa watiya watiya tuku nawanaw kkiʼoracioneskan chu nialh nalikgalhtawakgayaw Biblia, nialh naʼanaw ktamakxtumit chu nialh nalichuwinanaw Dios. ¿Tuku natlawayaw xlakata ni nakinkaʼakgskgawikanan?

13. 1) Chuna la xwankanit, ¿la lakpuwankgo lhuwa latamanin? 2) ¿Tuku nakinkamakgtayayan ni nataxlajwani kintakanajlakan?

¹³ Tuku nakinkamakgtayayan ni nataxlajwani kintakanajlakan wa nalakapastakaw tuku kilhtamaku lamaw chu pi nitlan nakinkatlawaniyan nakatalalimputunaw tiku ni lakpuwankgo pi lamaw «xlikgatsputni[...] nkatuxawat». Apóstol Pedro tsokgnalh xlakata kkinkilhtamakujkan: «Nalakatakinankgoy nkgalhakgamananin, nalilatamakgoy wa lantlata xtalakgxkgonalakganin, ni tlan xtalakapastaknakan. Nawankgoy: “¿Tu akgspulalh xtamalaknun lantla wanit mpi namin? Xampi asta akxni yama nkilhtamaku, akxni nkinatlatnakan ntinikgolh, xlipaks xaliankgalhin chuna nkatuwaj, ni tu ntalakgpaliy lantla asta akxni xakgasiyaj tikilhtsukulh nkatuxawat”» (2 Ped. 3:3, 4). Xlakata putum kilhtamaku nalakapastakaw pi lamaw «xlikgatsputni[...] nkatuxawat», xlakaskinka chali chali nalikgalhtawakgayaw chu nalakputsananiyaw Biblia. Uma tuku lichuwinanka xlakata apóstatas makgasa kilhtsukulh chu wijku la uku. «Nchixku xla talakgalhin» chuntiya katlawanima tuku nitlan kskujnin Dios. Wa xlakata putum kilhtamaku kalakapastakwi pi xkilhtamaku Jehová lu lakatsu wi (Sof. 1:7).

14. ¿La kinkamakgtayayan nalichuwinanaw Dios?

¹⁴ Tuku lanit masiya pi komo akgatunu semana lichuwinanaw xalakwan xalaksasti kinkamakgtayayan skgalalh natawilayaw chu ni nakinkaʼakgskgawikanan. Akxni Jesucristo, xAkgxakga congregación, kalimapakgsilh kstalaninanin kakamakgalhtawakgekgolh chu kakamasiyanikgolh xaʼakgmakgat chixkuwin putum tuku xkamasiyaninit uma xkilhchanima pi xkalakgayawama taskujut nema xmatliwakglhli xtakanajlakan (Mat. 28:19, 20). Xlakata namakgantaxtiyaw uma taskujut talakaskin xatapaxuwan natlawayaw. ¿Lakpuwanaw pi natalanin xalak Tesalónica akglakgwa xlichuwinankgo Dios, kaj xlakata namakgantaxtikgo tuku kawanika? Kalakapastakwi tuku kawanilh Pablo: «Ni tilakgapaxtokgatit  spiritu santo. Ni tilakgmakganatit xtachuwin nti mpalakachuwinan Dios» (1 Tes. 5:19, 20). Chu ¿ni xlikana pi tuku kgantaxtuma xalak Biblia tlawa pi tlakg natlawaputunaw uma taskujut?

15. ¿Tuku tlan natlawayaw akxni kakninaniyaw Dios kfamilia?

¹⁵ Xlikana pi kamakgtayaputunaw kifamiliajkan pi tlakg tlan nalichuwinankgo Dios. Wa xlakata, makgapitsi natalan limaxtukgo kilhtamaku akxni kakninanikgo Dios kfamilia xlakata nalakkaxwilikgo la nalichuwinankgo Dios. Max akxtum nalichuwinanaw la nakamakgtayayaw tlakg nakatsiputunkgo tiku kinkakgaxmatnikgon xalakwan xalaksasti: ¿Tuku nakalitachuwinanaw akxni nakalakgamparayaw? ¿Tuku temas max nalakgati? ¿Tuku hora tlan nakalakgpaxialhnanaw? Lhuwa natalan na limaxtukgo kilhtamaku akxni kakninanikgo Dios kfamilia xlakata nalikgalhtawakgakgo tuku nataʼakxilha ktamakxtumit chu lakkaxwilikgo xtakgalhtinkan. ¿Na tlan chuna xtlawaw? Komo mastayaw kintakgalhtinkan ktamakxtumit, kintakanajlakan natatliwakglha chu ni lakapala kintikaʼakgskgawikan (Sal. 35:18). Chuna, Kakninanikan Dios kFamilia kinkamakgtayayan ni nalichuwinanaw tuku Biblia ni lichuwinan chu ni nataxlajwani la lipawanaw Jehová.

16. ¿Tuku tlawa pi kstalaninanin tiku kalaksakkanit tlan nalakapastaknankgo chu ni namastakgo talakaskin kakaʼakgskgawika?

¹⁶ Lhuwa kata, Jehová makatsininit xkachikin tuku kilhchani makgapitsi tuku wankanit pi nala. Akxni lilakpuwanaw uma xalak Biblia kinkamakgtayayan tlakg lipawanaw pi namakglhtinanaw lu tlan talakgalhaman. Xatalaksakni kgalhkgalhimakgo natatawilakgo Cristo kʼakgapun. Uma kamakgtaya tlan nalakapastaknankgo chu ni namastakgo talakaskin kakaʼakgskgawika. Xlikana kalakgchan uma tachuwin nema Pablo kawanilh tesalonicenses: «Xaliʼankgalhin kilimaxkitkan nkin mpaxkatsinit Dios mimpalakatakan, natalanin, wa nti lu[...] kapaxkiyan nkimPuchinakan, mpi wa Dios nkalaksaknitan [...] xpalakata ntu nkalimasantujlinitan spiritu, chu xpalakata ntu nkanajlatit ntalulokgtat» (2 Tes. 2:13).

17. ¿La kinkamatliwakglhan tuku wan 2 Tesalonicenses 3:1-5?

¹⁷ Tiku kgalhkgalhimakgo nalatamakgo putum kilhtamaku kKatiyatni na ni xlimastatkan talakaskin kakaʼakgskgawika. Komo wix kgalhkgalhipat uma, namatliwakglhan tuku kawanilh Pablo natalan xalak Tesalónica (kalikgalhtawakga 2 Tesalonicenses 3:1-5). ¡Lu paxtikatsiniyaw uma tachuwin nema kinkamatliwakglhan! Cartas nema katsokgnanika Tesalonicenses kinkawaniyan pi ni nakakgaxmataw tuku ni talichuwinan kBiblia chu talakapastakni nema nixaxlikana. Xlakata lakatsu wi xlisputni uma kakilhtamaku, lu paxtikatsiniyaw umakgolh tastakyaw.