BIBLIA aktanks wan: chixku «kapaxkilh xpuskat, xtachuna mpala wa akstupaxkikan». Nachuna, «mpuskat, kamaxkilh nkakni xchixku». Xchatiykan xlimakgantaxtitkan tuku kalakgchan ktamakgaxtokgat la «kaj akgtum makni» (Efes. 5:33; Gén. 2:23, 24). Akxni titaxtu kilhtamaku tlakg tlan latalalinkgo chu tlakg lapaxkikgo. Tlan tamalakxtumiyaw la xtankgaxekg kgantiy kiwi nema akxtum stakgkgo, xtapaxkitkan tiku tamakgaxtokgkgonit tlakg ni lamakgxtakgkgo.

Pero komo nani xachixku o xapuskat ¿tuku nala? Uma tuku nila xlakxtlawakan, lakla. Atsinu ni putum tiku xakstu tamakgaxtakgnit lu nitlan makgkatsikgo, makgkatsi pi xakstu lama chu asta lu sitsi o lakpuwan pi lin kuenta. Tipuxamakutsayan kata nema makgapalalh xtamakgaxtokgat Daniela lakgapasli lhuwa tiku xnikgonit tiku xtatamakgaxtokgkgonit. * Pero, akxni nilh xchixku wa: «Uku kkatsilh pi ni xakakgatekgsa tuku tamakgkatsi. Katsiyaw uma akxni chuna titaxtuyaw».

Makgapitsi tiku katsikgo xlakata uma, wankgo pi ni anan tuku tlakg tuwa makgkatsikan kkintalakapastaknikan la akxni niy tiku tatamakgaxtokgnitaw. Lhuwa tiku nikgonit xchixku o xpuskat nachuna lakpuwankgo. Akgtum liʼakxilhtit, xtamakgaxtokgat Mili puxamakitsis kata makgapalalh. Maski xchixku makgasa nilh Mili wan: «Kmakgkatsi pi ni kgatsi kimakni».

 Susan xlakpuwan pi lakpuskatin tiku lhuwa kata xlakgtasakgo xchixkukan lu xmaliwakamakgolh. Alistalh nilh xchixku tiku xtalatamanit puxamakutsayan kata. Maski titaxtunita liwaka puxam kata, wan: «Chali chali klakapastaka». Xla na tasa xlakata lu lakapastaka xchixku.

Biblia na wan pi tasipan nema min xlakata niy tiku tatamakgaxtokgnitaw lu nitlan chu lhuwa kilhtamaku makgapala. Akxni nilh Sara, Abrahán «tanulh niku xwi [...] chu lhuwa tsukulh lakgtasa» (Gén. 23:1, 2). Maski xkanajla pi xʼanan talakastakwanat, lu lipuwa akxni nilh tiku lu xpaxki (Heb. 11:17-19). Maski lhuwa kilhtamaku xtitaxtunit Jacob lu xlakapastakaku Raquel. Lu tlan xlichuwinan akxni xkalitachuwinan xkamanan (Gén. 44:27; 48:7).

¿Tuku kinkamasiyanikgoyan uma liʼakxilhtit xalak Biblia? Xtasipanitkan tiku ninit xchixku o xpuskat lhuwa kata makgapala. Wa xlakata ni nalakpuwanaw pi ni lakgtliwakgan tiku tasakgo chu lilipuwankgo, wata kalakpuwaw pi chuna makgkatsikgo xlakata lhuwa tuku makgatsankgakgolh. Natalakaskin nakaʼakgatekgsniyaw chu nakamakgtayayaw lhuwa kilhtamaku.

Komo wi tiku niy xchixku o xpuskat ni wamputun pi chuna nawampara la akxni nina xtamakgaxtokga. Chuna la titaxtu kata xachixku katsini la tlan namamakgkatsini chu namatliwakglha xpuskat akxni lilipuwama o nitlan makgkatsi. Akxni niy, xpuskat nialh makgkatsi tapaxkit nema xmaxki chu la tlan xmamakgkatsini. Puskat na katsini la natlawa pi xchixku kapaxuwalh chu tlan kamakgkatsilh. Ni anan tuku natamalakxtumikan xtapaxkit, xtachuwin nema tlan mamakgkatsinan chu la xlakaskinka akxilha tuku xla lakgati chu maklakaskin. Komo nani xpuskat makgkatsi pi lhuwa tuku makgatsankgalh. Wa xlakata makgapitsi tiku nikgonit xchixku o xpuskat ni katsikgo tuku nala kkilhtamaku nema aku mima chu pekuankgo. ¿Tuku tastakyaw xalak Biblia nakamakgtaya tlan namakgkatsikgo chu ni napekuankgo?

«Chuna mpi ni tilakapastakatit wa ntu xala lichali; xampi wa nchali, tanuja kilhtamaku. Antiya katamaktalh nchu nkilhtamaku ntu nkinkamakglitwaniyan.» (Mat. 6:34.) Maski uma xtachuwin Jesús tlakg makgtayanan xlakata tuku maklakaskinaw kkilatamatkan, pero na kamakgtayanit lhuwa latamanin natayanikgo akxni nikgolh tiku lu xpaxkikgo. Charles tiku nilh xpuskat tsokgli akxni xtitaxtunita makgapitsi papaʼ: «Chuntiya lhuwa klakapastaka Monique, chu min kilhtamaku tlakg nitlan kmakgkatsi. Pero kkatsi pi uma chuna la, chuna la natitaxtu kilhtamaku, kintakatsan nialh lu nakmakgkatsi».

Charles tayanilh «la titaxtulh kilhtamaku». ¿La tlawalh? Xla wan: «Xlakata xtamakgtay Jehová chuna la titaxtu kilhtamaku ktayani takatsan». Xtalipuwan ni lakapala lakgsputli, pero na ni lu maxlajwanilh. Komo ninit minchixku o mimpuskat, kaliskujti xlakata natayaniya chuna la natitaxtu kilhtamaku. Ni katsiyaw komo chali naʼanan tuku tlan.

 Jehová ni xlakaskin pi latamanin nanikgo. Uma na litaxtu «xtatlaw Akgskgawini» (1 Juan 3:8; Rom. 6:23). Satanás maklakaskin linin chu tapekua nema kgalhinikan xlakata nakaʼakgchipakgo latamanin chu ni nakgalhikgo takgalhkgalhin (Heb. 2:14, 15). Satanás lu lakgati akxilha akxni latamanin ni katsikgo tuku natlawakgo, chu kalakpuwankgolh pi nikxni nipara kxasasti xkakilhtamaku Dios nakgalhikgo xaxlikana tapaxuwan chu tlan namakgkatsikgo. Takatsan makgkatsiya xlakata xtalakgalhin Adán chu xlakata tuku nitlan tlawa Akgskgawini (Rom. 5:12). Jehová nalakkaxtlawa tuku nitlan tlawanit Satanás chu namalakgsputu linin, tuku maklakaskin xlakata nakinkatlawaniyan tuku tlakg nitlan. Lhuwa tiku nikgonit xchixku o xpuskat xtachuna la wix na nialh makgkatsikgo uma tapekua.

Talakastakwanat unu kKatiyatni natlawa pi la latalalinaw latamanin la uku natalakgpali. Kalakapastakti pi nalakastakwanantilhakgo natlatni, tata, nana, o tsiyuna, chu atanu. Putum xlakan la xkamanan chu xnatanatni nialh lakgalhinanin nawankgo watiya kilhtamaku. Nialh katitasiyalh la nakgolonaw. Ama kilhtamaku tiku lakgkgawasanku max tanu la nakaʼakxilhkgo tiku linkgoya kata ni xtachuna la uku. Uma tuku natalakgpali natlawa pi tlakg tlan katawilakgolh latamanin.

Anan lhuwa takgalhskinin xlakata tiku nalakastakwanankgo, akgtum liʼakxilhtit, tuku natlawakgo tiku makgtiy o liwaka tamakgaxtokgkgolh chu  nikgolh tiku xtatamakgaxtokgkgonit. Saduceos lichuwinankgolh chatum puskat tiku xninit xapulana xchixku, xlichatiy chu kgalhkitsis (Luc. 20:27-33). ¿La nalatalalinkgo akxni nalakastakwanankgo? Ni katsiyaw chu ni xlakaskinka nalitakglhuwiyaw. Talakaskin nalipawanaw Dios. Wi tuku liwana katsiyaw: tuku Jehová natlawa kkilhtamaku nema aku mima lu tlan nawan, ni tuku kilipekuanitkan.

Tuku aktanks masiya xTachuwin Dios wa pi tiku kapaxkiyaw chu nikgonita nalakastakwanankgo. Tuku wan Biblia xlakata tiku makgasa lakastakwanankgolh kinkamakanajliyan pi «namin nkilhtamaku akxni xlipaks nti aknukgoy [o nikgonita], nakgaxmatkgoy xtachuwin [Jesús], natakxtupalakgoy» (Juan 5:28). Tiku nakamakgamakglhtinankgo lu napaxuwakgo. Pero nila lakpuwanaw la lu napaxuwakgo tiku nakamalakastakwanikan.

Ama kilhtamaku xtapaxuwankan latamanin ni katikgalhilh xtachuna. Lhuwa millón latamanin tiku nikgonit nalakastakwanankgo (Mar. 5:39-42; Apoc. 20:13). Nalakpuwankgo tuku nala kkilhtamaku nema aku mima kamatliwakglha tiku makgatsankgakgonit tiku lu xpaxkikgo.

¿Wi tiku nalakgaputsa ama kilhtamaku akxni lhuwa latamanin nalakastakawanankgo? Biblia wan pi ni chuna. Anta kʼIsaías 25:8 wan pi Jehová «xliputum kilhtamaku namalakgsputu linin». Uma kilhchanima pi namalakgsputukan putum tuku nitlan tlawa, Biblia chuntiya wan: «Tiku Lakgchan Namapakgsinan Jehová xlikana nalakxaka putum lakgpixtajat». Komo la uku lu nitlan makgkatsiya xlakata nilh minchixku o minpuskat, talakastakwanat natlawa pi lu napaxuwaya.

Niti akgatekgsa putum tuku Jehová natlawa kxasasti kakilhtamaku. Xla kinkawaniyan: «Chuna la akgapun tlakg talhman nixawa tiyat, nachuna kintiji tlakg talhman ni xtachuna la mintijikan, chu kintalakapastakni nixtachuna la mintalakapastaknikan» (Is. 55:9). Tuku wa Jesús xlakata talakastakwanat nema aku namin kinkamaxkiyan talakaskin nalipawanaw Jehová, chuna la tlawalh Abrahán. Putum kstalaninanin Cristo kilikgalhakgaxmatatkan  Dios la uku; chuna nalitaxtuyaw «wanti Dios laksakkgonit lakimpi nakgalhikgoy ama xasasti latamat wantu niukxni nasputa» la tiku nalakastakwanankgo (Luc. 20:35).

Ni kalilipuwaw, wata kakgalhiw takgalhkgalhin. Chuna la lakpuwankgo latamanin, kilhtamaku nema aku mima lu nitlan. Pero Jehová kinkawaniyan pi naʼanan tuku tlakg tlan. Maski ni katsiyaw la nakinkamaxkiyan putum tuku lakaskinaw chu tuku maklakaskinaw, liwana katsiyaw pi natlawa. Apóstol Pablo tsokgnalh: «Wa ntakgalhkgalhitin wa ntu lu[...] man xukxilhwi, pus ni alh takgalhkgalhitin xtiwaj; xampi wa ntu lu[...] ukxilhata nchatum, ¿tuwan natikgalhkgalhitiy? Wampi lapi wa yama wa ntu ni ukxilhaw, kgalhkgalhitiya, kaj lakatsuku napaxuwanaliyanaw nakgalhkgalhitiyaw» (Rom. 8:24, 25). Komo xliputum minaku lipawana tuku Dios wanit, namakgtayayan natayaniya. Chu komo natayaniya Jehová «namaxkiyan wakg tu lakaskin minakuj». Xla “nakasikwanatlawa wakg ti staknan talamanaj” (Sal. 37:4; 145:16; Luc. 21:19).

Akxni nialh lhuwa kilhtamaku xtsankga xlakata xnilh Jesús, xʼapóstoles lu xlilipuwamakgo. Xla kalimatliwakglhli uma tachuwin: «Ni kakglitwanalh minakukan, kakanajlanitit Dios, chu nkit, na kakinkanajlanitit». Chu xla kawanilh: «Ni limaxkganya kkamakgaxtakgan, nakkalakgmimpalayan» (Juan 14:1-4, 18, 27). Akglhuwa ciento kata, xtachuwin kamatliwakglhli xatalaksakni kstalaninanin chu xkatsikgo wi tuku xʼama makglhtinankgo. Nachuna, tiku akxilhputunparakgo xfamilia tiku ninit anan lhuwa tuku xlakata xlipaxuwatkan. Jehová chu xKgawasa nakamatliwakglhkgo. ¡Tlan lipawanaw uma!