1, 2. ¿Tuku aniversario xlakaskinka kiliʼakxilhatkan putum kstalaninanin Cristo, chu tuku xlakata?

¿TUKUYA paskua lakapastaka akxni kgaxpata tachuwin aniversario? Tiku tamakgaxtokgnit max nalakapastaka akxni tamakgaxtokgli, atanu latamanin max nalakpuwankgo kilhtamaku akxni wi tuku lu xlakaskinka lalh, la akxni xpaís nialh mastalh talakaskin namapakgsi atanu país. Pero ¿katsiya pi wi akgtum aniversario nema chuntiya tlawama akgtum kachikin liwakaya akgtutu mil akgkitsis ciento kata?

² Klichuwinamaw Pascua Maski uma talilakapastaka akxni xamakgan Israel nialh litaxtulh la skujnin kʼEgipto, pero uma lu xlakaskinka kimpalakatakan. Max wix nawana: «Judíos tlawakgo Pascua, pero akit kstalanina Cristo, ni judío. ¿Tuku xlakata na xlakaskinka kimpalakata?». Takgalhtin tekgsaw kʼumakgolh tachuwin: «Cristo nkinkalhnilujkan xla [pascua], aya mapatinika[nit] nkimpalakatakan» (1 Cor. 5:7). Xlakata nakatsiniyaw tuku xlakata lu xlakaskinka umakgolh tachuwin, kalichuwinaw Pascua judía chu kaʼakxilhwi la tatalakxtumi akgtum tamapakgsin nema kamaxkika putum kstalaninanin Cristo.

3, 4. ¿Tuku lalh nema makilhtsukilh xapulana Pascua?

³ Lhuwa millón latamanin xlikalanka katiyatni tiku ni judíos wi tuku katsikgo xlakata la lakatsukulh xapulana Pascua. Max likgalhtawakgakgonit tuku wan Éxodo maktum libro xalak Biblia, max wi tiku kalitachuwinanit o akxilhkgonit akgtum película xlakata uma. ¿Lakapastaka tuku lalh?

⁴ Israelitas lhuwa kata xlitaxtukgonit kskujnin egipcios akxni Jehová malakgachalh Moisés chu Aarón kskinikgolh faraón pi xkamaxkilh talakaskin xtaxtukgolh. Ama mapakgsina tiku lanka xmakgkatsikan wa pi ni xʼama masta talakaskin, wa xlakata Jehová malakgachalh kpaís 10 tuku lu nitlan. Akxni malakgachalh xaʼawatiya tuku nitlan, chu nikgolh putum xanapuxkun xkamanan egipcios, akxniku faraón maxkilh talakaskin  xkachikin Dios pi xtaxtukgolh (Éx. 1:11; 3:9, 10; 5:1, 2; 11:1, 5).

5. ¿Tuku xlitlawatkan xwanit israelitas xlakata xlakgtaxtukgolh? (Kaʼakxilhti xapulana dibujo.)

⁵ Pero ¿tuku tlawakgolh israelitas xlakata tlan xlakgtaxtukgolh? Max uma kilhtamaku xwanit akxni lakgchan equinoccio xla primavera (akxni titaxtunita o aku natitaxtu 21 xla marzo) kkata 1513 akxni nina xmin Jesús, kpapaʼ xahebreo abib, nema alistalh limapakuwika nisán. * Dios wa pi xliʼakgkaw kilhtamaku xla ama papaʼ xʼama tsukukgo lakkaxtlawakgo tuku xtlawakgolh 14 xla nisán. Ama kilhtamaku tsukulh kkakgotanun, xlakata akgtum kilhtamaku hebreo xtsuku akxni xtsankga Chichini chu sputa asta lichali akxni xtsankgapara. Ama kilhtamaku akgatunu familia xlimakgnit xwanit tantum oveja (o cabra) xakgawasa chu xlilakgtsalhmanitkan xkgalhni niku xlimawakakan xmalakcha, o xpuwilhta, chiki (Éx. 12:3-7, 22, 23). Alistalh xwakgo xataxpupu borrego, makgapitsi kakaʼ chu kaxtalanchu nema ni xkgalhi limaxkutin. Xʼángel Dios xʼama titaxtu putum Egipto chu xʼama kamakgni xanapuxkun kamanan, pero israelitas tiku xkgaxmatkgolh nitu xʼama katlawanikan. Alistalh xʼama taxtukgo (Éx. 12:8-13, 29-32).

6. ¿Tuku xlakata israelitas chuntiya xlitlawatkan xwanit Pascua akgatunu kata?

⁶ Chuna kalakgmaxtuka israelitas, chu Dios kamapakgsilh xlakapastakkgolh uma akgatunu kata. Kawanilh: «Chu uma kilhtamaku mililakapastakatkan, chu natlawayatit la akgtum paskua xpalakata Jehová putum kilhtamaku. Chuna militlawatkan putum kilhtamaku». Akxni xtlawakgonita Pascua xla 14 xla nisán xlitlawatkan xwanit akgtum paskua nema xmakgapalalh akgtujun kilhtamaku. Pascua xwanit 14 xla nisán, pero nachuna xwanikan akgtsayan kilhtamaku nema xmakgapala fiesta (Éx. 12:14-17; Luc. 22:1; Juan 18:28; 19:14). Pascua xwanit akgtum fiesta nema hebreos xlitlawatkan xwanit akgatunu kata (2 Crón. 8:13).

7. ¿Tukuya xasasti talakapastakni lakkaxwililh Jesús akxni xaʼawatiya katawayalh xʼapóstoles?

⁷ Jesús chu xʼapóstoles judíos xwankgonit chu xlikgalhakgaxmatat xwanit xlimapakgsin Moisés, wa xlakata akgatunu kata xtlawakgo Pascua (Mat. 26:17-19). Xaʼawatiya kilhtamaku akxni tlawakgolh, Jesús lakkaxwililh xasasti tuku xʼama lakapastakkgo kstalaninanin chu xlitlawatkan xwanit akgatunu kata: Taway xla kiMalanakan. Pero ¿tukuya kilhtamaku xʼama tlawakan?

8. ¿Tuku takgalhskinin anan akxni kalakputsananiyaw Pascua chu Taway xla kiMalanakan?

⁸ Xlakata Jesús lakkaxwililh Taway xla kiMalanakan akxni xtlawakgokanita Pascua, uma xasasti talakapastakni xlakgchalh kilhtamaku akxni xtlawakan Pascua. Pero judíos xala uku max ni tlawakgo Pascua watiya kilhtamaku akxni lakapastakkan akxni tinilh Cristo. ¿Tuku xlakata tanu kilhtamaku tatlawa? Takgalhtin tekgsaw klimapakgsin nema Dios kamaxkilh israelitas. Akxni xkawaninita pi «putum israelitas namakgnikgo», borrego, Moisés liwana kawanilh tuku hora xla 14 xla nisán xlimakgnitkan xwanit (kalikgalhtawakga Éxodo 12:5, 6).

9. Chuna la wan Éxodo 12:6, ¿tuku hora xlimakgnitkan xwanit borrego xla Pascua? (Kaʼakxilhti recuadro  «¿Tuku hora xla 14 xla nisán?».)

⁹ Biblia Dios habla hoy wan kÉxodo 12:6 pi xlimakgtnitkan xwanit borrego «kkakgotanun», o smalankgan. Makgapitsi Biblia la Tanaj judía matitaxti kʼatanu tachuwin «akxni tsankganita chichini». Chuna, borrego xmakgnikan akxni xtsankganita chichini pero akxni xʼananku xkgakganat, akxni xtsukuma kilhtamaku 14 xla nisán.

10. ¿Tukuya kilhtamaku wankgo makgapitsi judíos pi xmakgnikan borrego xla Pascua, pero tuku ni liwana taʼakgatekgsa?

 ¹⁰ Alistalh, makgapitsi judíos lakpuwankgolh pi lhuwa hora xlin nakamakgnikgokan putum borregos nema xkalinkan ktemplo. Wa xlakata xwankgo pi Éxodo 12:6 lichuwinama akxni sputmaja kilhtamaku 14 xla nisán, akxni xtsuku tsankga Chichini (akxni xtitaxtunita tastunut) chu akxni sputma kilhtamaku (akxni tanunita Chichini). Komo wa tuku xlikana kilhchani, ¿tuku hora tlawaka taway? Makgalhtawakgena Jonathan Klawans, tiku lhuwa kgalhtawakganit xlakata judaísmo xala makgasa wa: «Kilhtamaku tsuku akxni tanunita Chichini. Wa xlakata maski tamakamastan tatlawa kilhtamaku 14, Pascua chu taway tlawakan kilhtamaku 15. Pero umakgolh kilhtamaku ni talichuwinan kʼÉxodo». Na wa: «Libros rabínicos ni lichuwinankgo la natlawayaw Seder [taway xla Pascua] akxni nina xmalakgsputukan Templo» (cursivas kilakan).

11. 1) ¿Tuku lalh Pascua xla kata 33 akxni xminita Jesús? 2) ¿Tuku xlakata 15 xla nisán sábado? (Kaʼakxilhti nota.)

¹¹ Xlakata tuku lichuwinanitaw ¿tukuya kilhtamaku tatlawalh Pascua xla kata 33 akxni xminita Jesús? Kilhtamaku 13 xla nisán, kilhtamaku «akxni xmakgnikgokan xalaktsu borrego [xla] pascua», Cristo kawanilh Pedro chu Juan «kapimpitit, kakikaxtlawatit kiliwatkan wantu nawayaw lanchu katsisni kxapascua» (Luc. 22:7, 8, Hua Xasasti Talaccaxlan, 1999). «Cha nchu [...] ntiakchalh hora» nawakan paskua, jueves katsisni akxni xtanunita Chichini akxni tsukulh 14 xla nisán. Jesús katawayalh xʼapóstoles chu watiya uma kilhtamaku, lakkaxwililh xTaway kiMalanakan (Luc. 22:14, 15). Uma katsisni chipaka chu lakputsananika. Lakatsu tastunut mawakaka kkiwi chu uma kakgotanun nilh (Juan 19:14). Chuna «Cristo nkinkalhnilujkan xla [pascua], aya mapatinika[nit] nkimpalakatakan» watiya kilhtamaku akxni makgnika borrego (1 Cor. 5:7; 11:23; Mat. 26:2). Alistalh maknuka o mujuka akxni xkgalhsputma uma kilhtamaku judío, akxni nina xtsuku 15 xla nisán (Lev. 23:5-7; Luc. 23:54). *

12, 13. ¿Tuku xlakata kamanan lu xlakaskinka xʼakxilhkgo Pascua?

¹² Pero kalichuwinamparaw tuku xlanit kʼEgipto. Moisés wa pi xkachikin Dios xlitlawat Pascua «putum kilhtamaku». Akxni  xtlawaka uma paskua kata kata kamanan xʼama kgalhskininankgo tuku xkilhchani uma (kalikgalhtawakga Éxodo 12:24-27; Deut. 6:20-23). Wa xlakata Pascua xʼamakgo “lakapastakkgo” asta laktsukamanan (Éx. 12:14).

¹³ Tiku xʼama staktilhakgo xʼama katsinikgo tuku lu xlakaskinka chu xʼama kamasiyanikgo xkamanankan. Pulaktum wa pi Jehová putum kilhtamaku kuenta tlawa xlakskujnin. Kamanan xʼamakgo katsinikgo pi Jehová chatum Dios tiku tlan lakgapaskan chu nema ni makgat wi, tiku xastakna chu xaxlikana, nema xlakaskinka akxilha xkachikin chu kakuentajtlawa, chuna limasiyalh akxni ni kamakgnilh xanapuxkun xkamanan israelitas akxni «kamakgnilh egipcios».

14. ¿Tuku nakamasiyanikgo natlatni xkamanan akxni nakalitachuwinan tuku tatsokgnit xlakata Pascua?

¹⁴ La uku ni talakaskin pi natlatni akgatunu kata natalichuwinankgo xkamanan ama Pascua. Pero ¿kamasiyaniya minkaman tuku kilhchani pi Dios xKuentajtlawana xkachikin? ¿Akxilhkgo pi wix kanajlaya pi Jehová chuntiya kuentajtlawa xlakskujnin? (Sal. 27:11; Is. 12:2.) ¿Chu kamasiyaniya uma pero ni akgatunu akgatunu tachuwin kawaniya wata tlan kalitakgalhchuwinana? Chuna nakamakgtayaya tlakg nalipawankgo Jehová.

15, 16. ¿Tuku atanu kinkamasiyaniyan xlakata Jehová tuku tatsokgnit xlakata Pascua chu akxni israelitas taxtukgolh kʼEgipto?

¹⁵ Akxilhnitaw pi Jehová kakuentajtlawa xlakskujnin, pero ni kajwatiya uma kinkamasiyaniyan tuku tatsokgnit xlakata Pascua. Xla na kalakgmaxtu. Kalakpuwantit tuku titaxtukgolh israelitas akxni “kamaxtulh kʼEgipto”. Akgtum puklhni chu puklhni xla lhkuyat kapulalilh. Tlawankgolh kxlakitat kxaSpinini pupunu akxni tapitsilh. Akxni xwilakgolha xakilhtutu pupunu, akxilhkgolh la laklanka patsaps xla chuchut kaʼaktamakgolh ksoldados Egipto. ¡Xlakgtaxtukgonit! Chu wankgolh: «Kakkilhtlinilh Jehová [...]. Kawayu chu tiku kgewi kamujulh kpupunu. Jah, kilitliwakga chu kintakilhtlin, xlakata xla kilakgmaxtuna» (Éx. 13:14, 21, 22; 15:1, 2; Sal. 136:11-15).

¹⁶ ¿Kamakgtayaya minkamanan nalipawankgo pi Jehová kiLakgmaxtunakan? ¿Kalimasiyaniya xlakata tuku wana chu tuku laksaka pi kanajlaya uma? ¿Tuku xlakata ni likgalhtawakgayatit akxni kakninaniyatit Dios kfamilia capítulos 12 asta 15 xla Éxodo chu lichuwinana la Jehová lakgmaxtulh xkachikin? Kʼatanu kilhtamaku akxni nakakninaniyatit Dios kfamilia na tlan xlikgalhtawakgatit Hechos 7:30-36 o Daniel 3:16-18, 26-28. Komo kajku kamanan akinin o linawa kata tlan lipawanaw pi xtachuna la Jehová lakgmaxtulh xkachikin kxkilhtamaku Moisés, na nakinkalakgmaxtuyan kilhtamaku nema aku mima (kalikgalhtawakga 1 Tesalonicenses 1:9, 10).

17, 18. ¿Tuku kinkamalakapastakayan la limaklakaskinka xkgalhni borrego xla xapulana Pascua?

¹⁷ Xaxlikana kstalaninanin Cristo ni tlawayaw  Pascua judía. Ama talakapastakni na xtalichuwinan kxLimapakgsin Moisés, chu nialh tapakgsiniyaw (Rom. 10:4; Col. 2:13-16). Akinin lakapastakaw atanu: akxni nilh xKgawasa Dios. Pero, tlan lhuwa tuku katsiniyaw xlakata makgapitsi tuku tatlawalh kʼPascua nema lakkaxwilika kʼEgipto.

¹⁸ Xlilakgtsalhmanitkan xkgalhni borrego niku limawakakan malakcha, chu wa uma tuku lilakgtaxtukgolh xanapuxkun xkamanan israelitas. La uku ni makamastaniyaw animales Dios, nipara akxni lakgchan Pascua chu nipara atanu kilhtamaku. Pero wi akgtum tamakamastan nema tlakg xtapalh chu kinkamaxkiyan talakaskin nalatamayaw putum kilhtamaku. Akxni apóstol Pablo tsokgnalh xpalakata «wanti Dios lu pulh kalaksaknit xkamanan natawan [...] wanti aya tatsokgtawilinitancha xtakuwanikan nak akgapun», wa pi umakgolh kstalaninanin Cristo xatalaksakni tlan latamakgo putum kilhtamaku xlakata «xkgalhni Jesús wantu xla stajmakgalh» (Heb. 12:23, 24, Xasasti Talaccaxlan, [Coyutla]). Kstalaninanin Cristo tiku kgalhkgalhimakgo nalatamakgo putum kilhtamaku kKatiyatni na maklakaskinkgo watiya uma kgalhni xlakata nalakgtaxtukgo. Wa xlakata putum kililakapastakatkan pi «likgalhiyaw ntalakgtaxtun xpalakata xkgalhni [Jesús], chu xmatsankgananika kintakgalhinkan xampi chuna xlitlanka xlipaxkatsinit Dios» (Efes. 1:7).

19. ¿La tlakg lipawanaw tuku wan Biblia pi nala xlakata la nilh Jesús?

¹⁹ Israelitas ni xlilaktukxnitkan xwanit nipara kgantum xlukut borrego xla Pascua (Éx. 12:46; Núm. 9:11, 12). ¿Tuku kilhchani uma xpalakata Jesús, «xkalhnilu Dios», tiku mastalh xlatamat xlakata nakinkalakgmaxtuyan? (Juan 1:29.) Xla xtokgowakaka kkgantum kiwi chu xpaxtuwakakgolh chatiy lakchixkuwin tiku nitlan xlikatsikgo. Judíos skinikgolh Pilato pi xchatutukan xkalaktukxnika xchaxpankan, o xchankan, xlakata lakapala xnikgolh chu nialh xtawakakgolh asta kilhtamaku 15 xla nisán, nema sábado xwanit chu na lakgchalh kilhtamaku akxni xtlawakan paskua xla kaxtalanchu nema ni kgalhi limaxkutin. Soldados laktukxnikgolh chatiy lakchixkuwin tiku nitlan xlikatsikgo, pero «akxni ntilakgtalakatsuwikgolh wa Jesús, lantla ntiukxilhkgolh mpi xanina, ni tilaktukxnikgolh» xchaxpankan (Juan 19:31-34). Uma kilhchanilh tuku xtlawanikan borrego xla Pascua; chuna, ama borrego «alimasiyulh» tuku xʼama la 14 xla nisán kata 33 (Heb. 10:1). Ama tuku lalh makgantaxtilh tuku wan Salmo 34:20, chu uma tlawa pi tlakg nalipawanaw tuku Biblia wan pi nala.

20. ¿Tuku tatlawa kxTaway kiMalanakan nema ni tatlawalh kxapulana Pascua?

²⁰ Pero wi makgapitsi tuku ni akxtum chuna la tlawakan Pascua chu xTaway kiMalanakan. Pascua nema judíos xlitlawatkan xwanit ni xkilhchanima tuku Cristo kamapakgsilh kstalaninanin xtlawakgolh xlakata xlakapastakkgolh la nilh. Anta kʼEgipto, israelitas wakgolh xliwa borrego, pero ni wakgolh xkgalhni. Uma ni xtachuna la Jesús kawanilh kstalaninanin pi xlitlawatkan xwanit. Xla kawanilh pi tiku xʼama mapakgsinankgo «kxtapakgsin Dios» ni kajwatiya xʼama wakgo kaxtalanchu, na xʼama wakgo vino, uma xkilhchanilh xliwa chu xkgalhni. Tlakg naʼakxilhaw uma kʼartículo nema aku mima (Mar. 14:22-25).

21. ¿Tuku xlakata talakaskin nakatsiyaw xlakata Pascua?

²¹ Xlikana pi Pascua tlakg xlakaskinka xwanit xpalakata xkachikin Dios. Chu maski wa judíos tiku “xlilakapastakatkan” xwanit, kstalaninanin Cristo na kililakgapasatkan xlakata nalitamakgtayayaw tastakyaw nema limin chu litakgatsi «ntatsokgnun, paks ntimapuwanikgolh Dios» (2 Tim. 3:16).