1, 2. 1) ¿Tuku natlawa xTamapakgsin Dios? 2) ¿Tuku xlakata liwana katsiyaw pi namin xTamapakgsin Dios?

KKATA 31 kprimavera anta ksipi lakatsu kCapernaum, Jesús kamasiyanilh kstalaninanin kskinkgolh kxʼoracionkan: «Kamilh mintamapakgsin» (Mat. 6:10, TNM). La uku lhuwa tiku wankgo pi uma Tamapakgsin nikxni katimilh. Pero akinin liwana katsiyaw pi namin.

² Jehová namaklakaskin Tamapakgsin xlakata makxtum natawilakgo xfamilia, xalak akgapun chu kKatiyatni. Uma tuku lakapastaknit natlawa nakgantaxtu (Is. 55:10, 11). Xlikana, ¡Jehová mapakgsinama kkinkilhtamakujkan! Tuku lanit akgtum ciento kata nema titaxtulh masiya uma. Dios tlawama tuku laklanka chu tuku kaks malakawaninan xpalakata millones kskujnanin tiku ni makgxtakgkgo (Zac. 14:9; Apoc. 15:3). Pero, ni nalakpuwanaw pi xlakata Jehová mapakgsinamaja watiya wamputun xTamapakgsin Dios nema Jesús masiyalh naskinkan kʼoración, xlakata uma ni watiya tuku kilhchani. ¿Tuku litalakgpali chu tuku xlakata kilikatsitkan?

3. 1) ¿Tukuya kilhtamaku chu niku tsukulh mapakgsinan Jesús? 2) ¿La xmasiya wix pi Tamapakgsin wilika kkata 1914? (Kaʼakxilhti nota.)

³ Uma tuku xwanikanit Daniel pi xʼama la, xtitaxtunita akgtiy mil akgkitsis ciento kata, tsukulh takgatekgsa akxni ksputma siglo  XIX: «Kxkilhtamaku ama mapakgsinanin wa Dios xalak akgapun nawili akgtum tamapakgsin nema nikxni katisputli» (Dan. 2:44). Tiku xLikgalhtawakgananin Biblia xwankgo pi kkata 1914 lu xlakaskinka xʼama wan. Tiku xlamakgo ama kata xlakpuwankgo pi putum kilhtamaku tlan xʼama tawila. Chatum tiku tsokgnan wa: «Kakilhtamaku kkata 1914 xtasiya pi lu tlan xʼama tawila chu lhuwa tuku tlan xlimilh». Pero uma kata, tsukulh xaPulana Guerra xLikalanka Katiyatni. ¡Tuku xwanit Biblia kgantaxtulh! Tatsinksni, tachiki tiyat chu tajatat nema alistalh minkgolh masiyalh pi kkata 1914 Jesucristo xtsukunit mapakgsinan kxTamapakgsin Dios. * Akxni wililh xTamapakgsin Mesías, tlan nawanaw pi Jehová na litaxtulh Mapakgsina.

4. 1) ¿Tuku pulana tlawalh xasasti Mapakgsina? 2) Alistalh, ¿tuku tsukulh tlawa?

⁴ Tuku pulana xlitlawat xwanit xasasti Mapakgsina, wa xtatlawalh guerra Satanás, tiku tlakg lanka xtalamakgasitsin xTlat. Jesús chu xʼángeles katamakxtukgolh kʼakgapun Akgskgawini chu xdemonios. Uma limilh lanka tapaxuwan kʼakgapun, pero kKatiyatni tsukulh anan lhuwa tuku nitlan (kalikgalhtawakga Apocalipsis 12:7-9, 12). Alistalh, mapakgsina tsukulh kamaskulunki, kamasiyani chu kalakkaxwili kskujnin kkatiyatni xlakata xtlawakgolh xtalakaskin Dios. Naʼakxilhaw pi xlakata la kgalhakgaxmatnankgolh kinkawilinikgon tlan liʼakxilhtit la uku.

5. ¿Tuku taskujut xla tamaskulunkin tsukulh kkata 1914 asta kxkilhtsukut kata 1919?

⁵ Akxni Mapakgsina xtamakxtukgonita kʼakgapun Satanás chu xdemonios, Jehová lakgayawalh nalakputsanani la xwi xtakanajlakan kstalaninanin Katiyatni chu xkamaskulunkilh. Palakachuwina Malaquías wa pi uma taskujut kilhchani maskulunkikan takanajla (Mal. 3:1-3). Tuku lanit masiya pi uma tsukulh kgantaxtu kkata 1914 asta xkilhtsukut kata 1919. * Xlakata namakgtapakgsiyaw kxfamilia Jehová, talakaskin nitu nakinkamaxkajwaniyan, xasanto nawanaw (1 Ped. 1:15, 16). Talakaskin ni nalixkajwananaw nixaxlikana takanajla chu política.

6. 1) ¿Tiku kinkamaxkiyan taway xlakata takanajla? 2) ¿Tuku xlakata lu xlakaskinka taway xlakata takanajla kimpalakatakan?

⁶ Alistalh Jesús maklakaskilh xlimapakgsin xlakata xlaksakli «skujni xalipaw chu xaskgalala». Uma skujni xʼama kamaxki taway xlakata takanajla putum tiku “nkgamputum wankgonit” chu kakuentajtlawama Jesús (Mat. 24:45-47; Juan 10:16). Lata kata 1919, ni lhuwa natalan tiku kalaksakkanit naʼankgo kʼakgapun liwana makgantaxtikgonit uma lanka taskujut chu kamaxkimakgo taway «amakgapitsi skujnin». Lhuwa taway xlakata takanajla nema kinkamaxkiyan uma skujni, matliwakglha kintakanajlakan chu tlawa pi liwana nalakapastakaw nitu nalixkajwan kintakanajlakan, la linaw kilatamatkan, kintalakapastaknikan chu kimaknikan. Nachuna kinkamasiyaniyan chu kinkamakgtayayan xlakata natlawayaw tlakg xlakaskinka taskujut nema tatlawama kKatiyatni: natalichuwinan Dios. ¿Liwana litamakgtayamaw uma taway xlakata takanajla?

7. 1) ¿Tuku xlakaskinka taskujut matsukilh Jesús akxni xlama kKatiyatni? 2) ¿Asta tukuya kilhtamaku xʼama tatlawa uma taskujut?

⁷ Akxni Jesús tsukulh lichuwinan Dios kKatiyatni, wa: «Kililichuwinat xalaksasti tamakatsin xla xtamapakgsin Dios, xlakata wa uma kilimakaminkanit» (Luc. 4:43, TNM). Akgtutu kata aitat wa tuku tlakg tlawalh kxlatamat. Kstalaninanin na kawanilh pi chuna xtlawakgolh: «Akxni napinatit lichuwinanatit, nawanatit:  “Xtamapakgsin Dios talakatsuwinit”» (Mat. 10:7, TNM). Akxni xlakastakwananita, Jesús wa pi kstalaninanin xʼama linkgo uma tamakatsin asta «kxtankgenu kakilhtamaku» (Hech. 1:8, Hua Xasasti Talaccaxlan, [Coyutla]). Chu kawanilh pi chuntiya xʼama makgtayanan natlawakan uma lu xlakaskinka taskujut asta akxni ksputli uma kakilhtamaku (Mat. 28:19, 20).

8. ¿Tuku kalimakgtayalh Mapakgsina kskujnin xlakata xlichuwinankgolh Dios?

⁸ Kkata 1919, «xalaksasti tamakatsin xla xtamapakgsin Dios» wi tuku xasasti xkilhchanima» wi tuku xasasti xkilhchanima (Mat. 24:14, TNM). Cristo xmapakgsinamaja kʼakgapun chu xmamakxtuminita kKatiyatni ni lhuwa kskujnin tiku xkamaskulunkinita. Xatapaxuwan kgalhakgaxmatkgolh tuku kawanika: nalichuwinankgo kputum Katiyatni xalakwan xalaksasti xla Tamapakgsin nema wilikanita kʼakgapun (Hech. 10:42). Chuna litasiya xlakata atsinu ni puxam mil latamanin ankgolh klanka tamakxtumit niku xtamakxtumikgonit xalak lhuwa países kCedar Point, (Ohio, Estados Unidos) septiembre kata 1922. Kalakpuwaw la lu paxuwakgolh akxni tala Rutherford, ktaʼakgchuwin wanikan «Tamapakgsin», wa: «¡Kaʼakxilhtit, Mapakgsina mapakgsinamaja! Wixin tiku namakatsininanatit. Wa xlakata, kalichuwinantit, kalichuwinantit, kalichuwinantit Mapakgsina chu xtamapakgsin». ¿Tuku tlawakgolh? Lichali akgtiy mil tiku anta xwilakgolh ankgolh lichuwinankgo Dios, chu makgapitsi asta ankgolh 70 kilómetros xlimakgat lata niku xtlawamaka tamakxtumit xlakata xkalakgankgolh latamanin. Chatum tala wa: «¡Putum kilhtamaku naklakapastaka akxni kinkawanikan nakmakatsininanaw Tamapakgsin chu xtapaxuwankan tiku anta xwilakgolh!». Lhuwa tiku nachuna makgkatsikgolh.

9, 10. 1) ¿Tuku tlawaka xlakata nakamasiyanikan tiku lichuwinankgo Dios? 2) ¿La makgtayanitan uma tamasiy?

⁹ Kkata 1922 xʼanan liwaka akgkutujun mil tiku xlichuwinankgo Dios kʼ58 países. Pero xtalakaskin xkamasiyanika la xtlawakgolh taskujut. Kxapulana siglo, tiku aku Mapakgsina xʼama wan aktanks kawanilh kstalaninanin tuku xlichuwinankgolh, niku chu la xtlawakgolh (Mat. 10:5-7; Luc. 9:1-6; 10:1-11). Nachuna la uku, Jesús tlawa pi putum tiku lichuwinankgo Dios kakamasiyanika la natlawakgo taskujut chu kakgalhikgolh tuku talakaskin xlakata liwana natlawakgo (2 Tim. 3:17). Jesús maklakaskin congregación xlakata nakamasiyani la nalichuwinankgo Dios. Pulaktum tuku maklakaskin wa Niku Masiyakan xlakata la Lichuwinankan Dios, uma litamakgtayakgo liwaka akgtum ciento akgkawitu mil congregaciones kputum katiyatni. Xlakata uma escuela, liwaka akgtujun millón xtatayananin Jehová liwana katsinikgo la nalichuwinankgo Dios chu nakamasiyanikgo «kaxati kawaj xtiwaj» latamanin (kalikgalhtawakga 1 Corintios 9:20-23).

¹⁰ Nachuna, wilakgolh escuelas xlakata  kamasiyanikan lakgkgolotsin, precursores, natalan tiku ni tamakgaxtokgkgonit, tiku tamakgaxtokgkgonit, tiku makgtapakgsikgo kComité de Sucursal chu xlakpuskatin, superintendentes viajantes chu xlakpuskatin, chu misioneros. * Makgapitsi tiku kilakgolh kʼEscuela xla tiku Tamakgaxtokgkgonit uma tuku wankgolh: «Tuku kinkamasiyanikan tlawalh pi tlakg nakpaxkiyaw Jehová chu kinkamakgtayan xlakata tlakg tlan nakkamakgtayayaw amakgapitsin».

11. ¿Tuku xlakata tayanikgo tiku lichuwinankgo xTamapakgsin Dios maski Satanás kamachokgoputun?

¹¹ Satanás akxilha xlakata lu liskujmaw nalichuwinanaw chu namasiyayaw xTamapakgsin Dios. Wa xlakata wi tuku katlawani o wi tuku maklakaskin xlakata machokgoputun uma lanka taskujut. Pero nitu litaxtu. Xlakata Jehová «mapuxkunilh [xKgawasa] ntlakg kgalhi xkakni, ni xawa amakgapitsin ntlanka napuxkun, chu mapakgsinanin, chu nti kgalhi litliwakga, chu malananin» (Efes. 1:20-22). Jesús limaklakaskin xlimapakgsin xlakata nakalikuentajtlawa chu nakalipulalin kstalaninanin. Chuna tlawa xlakata nakgantaxtu xtalakaskin xTlat. * Xalakwan xalaksasti chuntiya talichuwinama, chu millones tiku tlan xnakujkan lakgapasmakgolh Jehová. ¡Lanka talakgalhaman makgtlawakan uma taskujut!

12. ¿Tuku talakgpalitilhanit kxkachikin Dios lata wilikanit Tamapakgsin?

¹² Lata lakkaxwilika Tamapakgsin kata 1914, Mapakgsina tlakg liwana kalakaxwilima kskujnin tiku ni makgxtakgkgo xlakata natatlawa xtalakaskin xTlat (kalikgalhtawakga Isaías 60:17). Kkata 1919 lakkaxwilika pi natawila tiku napulalin la nalichuwinankan Dios. Titaxtulh kilhtamaku, kkata 1927, lakkaxwilika pi domingos natalichuwinan Dios kʼakgatunu chiki. ¡Chu max lu lipaxuwakgolh natalan pi kkata 1931 kilhtiyakgolh kBiblia, xtukuwanikan, xTatayananin Jehová! (Is. 43:10-12.) Kata 1938, nialh natalan xalak congregación kalaksakkgolh tiku xkapulalinkgolh. Xlakata xkalaksakka xlitlawatkan xwanit tuku taskin kBiblia. Kata 1972, congregación tsukukgolh kuentajtlawakgo makxtum tiku lakgkgolotsin litaxtukgo chu ni kaj chatum kgolotsin xalak congregación. Putum tiku xmakgantaxtikgo tuku taskin kBiblia xlakata lakgkgolotsin nalitaxtukgo chu siervos ministeriales, kawanika pi xmakgtayanankgolh namakgkuentajtlawakgo «nkgamputum xkalhnilu Dios» (1 Ped. 5:2). Kata 1976, Lakgkgolotsin tiku Pulalinkgo xTatayananin Jehová tapitsikgolh kpulakchaxan comités  xlakata xtlawakgolh xtaskujut Dios putum kkatiyatni. Chuna la akxilhaw, Mapakgsina tiku Jehová laksaknit lakkaxwilitilhama tiku kamapakgsi chuna la Dios lakaskin.

13. ¿La na tlan kitaxtunin xlakata tuku tlawama Tamapakgsin?

¹³ Kalakpuwanti putum tuku tlawanit Mapakgsina Mesías 100 kata nema mapakgsinanit. Tlawanit pi skulunku natawilakgo tiku lichuwinankgo Dios. Pulalinit natalichuwinan Dios kʼ239 países chu kamakgtayanit lhuwa millón nalakgapaskgo Jehová. Kamamakxtuminit liwaka akgtujun millón tiku kamapakgsi, chu xputumkan xatapaxuwan tlawakgo xtalakaskin xTlat (Sal. 110:3). ¿Ni xlikana pi tuku tlawanit xTamapakgsin Mesías lu laklanka chu kaks malakawaninan? ¡Chu lhuwaku tuku natlawa!

14. 1) ¿Tuku skiniyaw Dios akxni waniyaw: «Kamilh mintamapakgsin»? 2) ¿Tukuya texto xla kata 2014 chu tuku xlakata lu minini?

¹⁴ Maski xlikana pi kata 1914 Jehová mapakgsina tlawalh xkgawasa kxTamapakgsin nema wanikan Mesiánico, ni akxni putum kgantaxtulh xtakgalhtin akxni wanaw «Kamilh mintamapakgsin» (Mat. 6:10, TNM). Anta kBiblia xtawanit pi kxlakgstipan xtalamakgasitsin xʼama mapakgsinan (Sal. 110:2). La uku mapakgsinanin xalak kakilhtamaku, kxmakan Satanás wilakgolh chu lakatayakgo xTamapakgsin Dios. Akxni wanaw kamilh Tamapakgsin, skinimaw Dios pi Mapakgsina Mesías chu 144,000 tiku natamapakgsinankgo, kaminkgolh masputukgo xtamapakgsin latamanin chu xtalamakgasitsin xalak kkatiyatni. Ama kilhtamaku nakgantaxtu tuku tatsokgnit Daniel 2:44, niku wan pi Tamapakgsin «nakalakxpula chu nakamasputu putum tamapakgsin». Chuna, nakamasputu mapakgsinanin, tiku xtalamakgasitsin (Apoc. 6:1, 2; 13:1-18; 19:11-21). Nialh lhuwa tsankga xlakata uma nakgantaxtu. Kkata 2014 litakgatsi 100 kata akxni wilika xTamapakgsin Dios kʼakgapun. Wa xlakata ¡lu tlan pi texto xla uma kata, wa Mateo 6:10, TNM: «Kamilh mintamapakgsin»!

15, 16. 1) ¿Tuku lu kaks malakawaninan nala akxni natawila Tamapakgsin xaʼAkgtum Mil Kata? 2) ¿Tuku awatiya natlawa Jesús akxni mapakgsinama nawan? 3) ¿La nakgantaxtu xtalakaskin Jehová xpalakata putum tuku tlawanit?

¹⁵ Akxni xtamapakgsin Mesías kamasputunit nawan xtalamakgasitsin Dios katiyatni, namalakgacha Satanás chu xdemonios kxkapulhman akgtum mil kata (Apoc. 20:1-3). Akxni nialhtu wilakgolh nawan uma tiku matlawinankgo tuku nitlan, xTamapakgsin Dios natlawa pi latamanin xatakgatsin nalitamakgtayakgo xtalakgmaxtut Jesús, chu namasputu tuku nitlan kinkaliminin xtalakgalhin Adán. Uma Mapakgsina nakamalakastakwani millones tiku nikgonit chu natlawa pi kakamakgtayaka nalakgapaskgo Jehová (Apoc. 20:12, 13). Putum Katiyatni akgtum paraíso nawan, chuna la xwanit jardín xla Edén. Chu putum tiku kgalhakgaxmatnankgo nialh katikgalhikgolh talakgalhin.

¹⁶ Akxni makgatsinita nawan akgtum mil kata xTamapakgsin Cristo, makgantaxtinit nawan tuku xtalakaskin natlawa. Ama kilhtamaku namaxki Tamapakgsin xTlat (kalikgalhtawakga 1 Corintios 15:24-28, TNM). Nialh natalakaskin pi wi tiku nakinkapalakachuwinanan kxlakatin Jehová. Putum xkamanan Dios, xalak Katiyatni chu xalak akgapun, akgtum familia nalitaxtukgo.

17. ¿Tuku liwana lakapastaknitaw natlawayaw xlakata Tamapakgsin?

¹⁷ Tuku latilhanit akgtum ciento kata nema mapakgsinanit, kinkamasiyaniyan pi Jehová mapakgsinama chu xlikana nakgantaxtu xtalakaskin xpalakata Katiyatni. Wa xlakata, ni kamakgxtakgwi Mapakgsina chu chuntiya kalichuwinaw Mapakgsina chu xTamapakgsin. ¡Liwana katsiyaw pi Jehová nialh makgas nakgalhti tuku skiniyaw kkioracionkan: «Kamilh mintamapakgsin»!