1, 2. 1) ¿Tiku «puxku nti xaliankgalhin wij namalanan», chu tuku xlakata tlan chuna limapakuwikan? (Kaʼakxilhti xapulana dibujo.) 2) ¿Tuku lakgatiyaw xlakata xTamapakgsin Dios?

MAPAKGSINA Sobhuza II xla Suazilandia atsinu ni tutumpuxamatum kata mapakgsinalh. Xlikana pi lu lhuwa kata xpalakata chatum mapakgsina xala uku. Pero wi chatum mapakgsina tiku tlan lhuwa kata mapakgsinan nichuna la latamanin. Asta Biblia limapakuwi: «Puxku nti xaliankgalhin wij namalanan» (1 Tim. 1:17). Chu chatum salmista lichuwinalh xtukuwani Tiku Lakgchan naMapakgsinan xlikalanka kakilhtamaku: «[Jehová] Rey, [...] kanikxniwaj» (Sal. 10:16).

² Chuna la lhuwa kilhtamaku mapakgsinan Jehová tlawa pi xTamapakgsin ni xtachuna nawan la xla latamanin. Pero tuku lakgatiyaw wa la mapakgsinan. Kxamakgan Israel, chatum mapakgsina tiku mapakgsinalh tipuxum kata limalankilh Dios uma tachuwin: «[Jehová] lakgalhamaninan y snun tlan katsi Kintikukan Dios, lakgasut sitsij, y snun talipaw y lanka ixtalakgalhaman. Kintikukan Dios kgalhi lanka ixlaktawilh nak akgapun, latani mapakgsinan; ana kamapakgsima wakg lata tu anan talhman y tutsuj» (Sal. 103:8, 19). Pero Jehová ni kajwatiya kiMapakgsinakan, na wa kinTlatkan xalak akgapun. ¿La limasiyanit pi xaTlat? ¿Chu la mapakgsinanit lata akxni ni kgalhakgaxmatka kʼEdén? Xtakgalhtin uma akgtiy takgalhskinin tlawa pi tlakg natalakatsuwiniyaw chu tlawa xliputum kinakujkan naskujniyaw.

3. ¿Tiku xapulana litaxtulh xfamilia Jehová kʼakgapun, chu tiku atanu katlawaka la xkamanan Dios?

³ ¡Max lu paxuwalh Jehová akxni tlawalh xapuxku xKgawasa! Ni akxilhli xapulana xKgawasa kajwatiya la tiku namapakgsi. Wata paxkilh la chatum Kgawasa chu wanilh pi xmakgtayalh natatlawakgo atanu tiku xtapakgsinikgolh chu ni xkgalhikgo talakgalhin (Col. 1:15-17). Chu xchatiykan tlawakgolh lhuwa millón ángeles. Xlakata uma kskujnin Dios, wankan pi «tlawa[kgo] tu lakgatij», xatapaxuwan skujnikgo chu Jehová kamalanki akxni kalimapakuwi kamanan. Umakgo xfamilia litaxtukgo (Sal. 103:20-22; Job 38:7).

4. ¿La na makgtapakgsikgo latamanin xfamilia Dios?

⁴ Akxni xtlawanita akgapun chu Katiyatni, Jehová tlakg lanka tlawalh xfamilia. Akxni xtlawanit pi katiyatni lu lilakgatit xwa, limasputulh tuku xtlawama akxni tlawalh xapulana chixku, Adán, chu maxkilh tayat nema xla kgalhi (Gén. 1:26-28). Xlakata Malakatsukina xlakgchan pi Adán xkgalhakgaxmatli. Chu xlakata Tlat xapaxkina chu xalakgalhamana kamaxkilh limapakgsin. Uma limapakgsin ni lu laktuwa xwankgonit, chu xkamaxki talakaskin xtlawakgolh tuku xlakgatikgo (kalikgalhtawakga Génesis 2:15-17).

5. ¿Tuku tlawalh Jehová xlakata Katiyatni xlitatsamalh latamanin?

⁵ Jehová lakgati namakgtayakgo ktaskujut tiku tapakgsinikgo, ni chuna la tlawakgo latamanin tiku mapakgsinankgo, chuna kamasiyani putum xfamilia pi kalipawan. Akgtum liʼakxilhtit, maxkilh lu tlan taskujut Adán pi xkawilinilh xtukuwanikan putum animales (Gén. 1:26; 2:19, 20). Nachuna xlakata xmatsamalh Katiyatni, Dios tlan xtitlawalh lhuwa millón latamanin nema ni xkgalhikgolh talakgalhin, pero laksakli natlawani xtatakgatsin: chatum puskat, Eva (Gén. 2:21, 22). Chuna kamaxkilh talakaskin nalimatsamakgo Katiyatni xkamanan. Latamanin xʼama tlawakgo pi jardín xaʼEdén xtalakgatumilh chu putum katiyatni akgtum Paraíso xwa. Chuna latamanin chu ángeles akxtum xʼamakgo kakninanikgo Dios xliputum kilhtamaku la akgtum familia. ¡Lu tlan tuku xʼama min! ¡Lu xtasiya xtapaxkit kinTlatkan Jehová!

6. 1) ¿La tsukuka lakatayanikan Dios? 2) ¿Tuku limasiya pi Dios chuntiya xmapakgsinama?

⁶ Pero lu nitlan, Adán chu Eva ni kgalhakgaxmatkgolh Jehová la Tiku Lakgchan namapakgsinan wata tatayakgolh Satanás, chatum xkgawasa Dios tiku lakatayalh (Gén. 3:1-6). Pero akxni tamakgatlinikgolh kajwatiya limilh takatsanajwat, tapatin chu linin, xpalakatakan chu xpalakata xkamanan (Gén. 3:16-19; Rom. 5:12). Jehová nialh xkgalhi tiku xtapakgsinikgolh nema xkgalhakgaxmatkgolh kKatiyatni. ¿Xwamputun uma pi nialh xmapakgsinan, chu nialh wa Tiku Lakgchan namapakgsinan kKatiyatni chu tiku anta xlamakgo? ¡Ni chuna! Dios limasiyalh pi chuntiya xmapakgsinan akxni katamakxtulh jardín xaʼEdén xapulana kinatlatnikan chu kawililh querubines niku xlaktanukan jardín xlakata ni xtaspitparakgolh (Gén. 3:23, 24). Na watiya ama kilhtamaku limasiyalh pi Tlat tiku xapaxkina akxni wa pi chuntiya xʼama makgantaxti tuku xlakpuwanit natlawa, akgtum familia nema xkgalhakgaxmatli xla ángeles chu latamanin. Wa pi xʼama min kam nema xmasputulh Satanás chu tuku kitaxtu xlakata xtalakgalhin Adán (kalikgalhtawakga Génesis 3:15).

7, 8. 1) ¿La lu nitlan xwi kakilhtamaku kxkilhtamaku Noé? 2) ¿Tuku tlawalh Jehová xlakata nialh xʼanalh tuku nitlan kkatiyatni chu chuntiya xʼanankgolh latamanin?

⁷ Lhuwa ciento kata alistalh lhuwa latamanin laksakkgolh nakgalhakgaxmatkgo  Jehová. La Abel chu Enoc. Pero tlakg lhuwa lakgmakgankgolh chu ni xTlatkan chu xMapakgsinakan akxilhkgolh. Kxkilhtamaku Noé «katiyatni [x]litatsama[nit] tuku nitlan» (Gén. 6:11). ¿Wamputun uma pi Jehová nialhla xkamapakgsi latamanin? ¿Tuku masiya tuku lanit?

⁸ Kaʼakxilhwi tuku talichuwinan xlakata Noé. Jehová maxkilh limapakgsin chu liwana wanilh la xʼama tlawa lanka arca nema xʼama kalakgmaxtu xla chu xfamilia. Dios na masiyalh tapaxkit nema kakgalhini latamanin akxni wanilh Noé “xliakgchuwinalh ntalulokgtat” (2 Ped. 2:5). Xla kamakatsinilh latamanin lisputni nema xtalakatsuwima, chu katasaskinilh xmakgxtakgkgolh tuku nitlan xtlawamakgo, pero niti kuentajtlawanilh. Lhuwa kata, xla chu xfamilia xlamakgo niku latamanin lu nitlan xlikatsikgo chu xtlawakgo talakgxtumit nema Dios ni lakgati. Jehová Tlat tiku xapaxkina, kuentajtlawalh chu sikulunatlawalh uma familia xla kgalhtsayan latamanin nema ni xmakgxtakgkgo. Akxni limilh munkaklat kata 2370 akxni nina xmin Jesús (a.n.J.), masiyalh pi chuntiya xkamapakgsi latamanin chu ángeles nema ni kgalhakgaxmatkgolh. Liwana tasiya pi chuntiya xkamapakgsi (Gén. 7:17-24).

9. ¿Tuku tlan xtlawaparakgolh latamanin akxni xtitaxtunita Munkaklat?

⁹ Noé chu xfamilia taxtukgolh kʼarca, jaxanankgolh xatlan un chu tlawankgolh kKatiyatni niku nialh xʼanan tuku nitlan. Jehová kakuentajtlawalh. Lu xpaxtikatsinikgo Dios. Noé tunkun tlawalh akgtum pumakamastan. Dios sikulunatlawalh Noé chu xkamanan chu kawanilh: «Kakgalhitit minkamanan, kalhuwantit chu kamatsamatit katiyatni» (Gén. 8:20–9:1). Amakgtum latamanin tlan xkakninanikgolh Jehová chu xmatsamakgolh katiyatni.

10. 1) ¿Niku chu la tsukuparaka lakatayanikan Dios akxni xtitaxtunita Munkaklat? 2) ¿Tuku tlawalh Jehová xlakata xkgantaxtulh xtalakaskin?

¹⁰ Pero Munkaklat ni masputulh talakgalhin. Na ni tlawalh pi Satanás chu xdemonios nialh xkamatlawilh tuku nitlan latamanin. Wa xlakata ni xlimakgas kilhtamaku, tsukuparaka lakatayanikan xtamapakgsin Jehová. Nemrod, kxuyatanat, o klhtanat, Noé, lakatayalh xtamapakgsin Dios chuna la niti tlawanit. Biblia wani «chatum tliwakga talatna tiku xlakatayani Jehová». Lakkaxwililh laklanka kachikinin, la Babel, chu wa pi xmapakgsina «kxtiyat Sinar» (Gén. 10:8-12). ¿Tuku tlawalh Mapakgsina xliputum kilhtamaku xlakata Katiyatni tlan litatsamalh latamanin chu ni xlalh tuku xlakaskin Nemrod? Dios tlawalh pi latamanin xchuwinankgolh tanu tanu tachuwin. ¿La tlawalh uma? Xlakata ni xlaʼakgatekgsnikgo, tiku kstalanikgo Nemrod tsukukgolh ankgo alakatanu «xlikalanka kkatiyatni». Niku ankgolh chuntiya linkgolh xtalismaninkan xlakata takanajla chu xtamapakgsinkan latamanin (Gén. 11:1-9).

11. ¿La limasiyalh Jehová pi ni xmakgxtakga xʼamigo Abrahán?

¹¹ Maski akxni xtitaxtunita Munkaklat lhuwa latamanin xkakninanikgo nixaxlikana dioses, makgapitsi lakchixkuwin chuntiya kakninanikgolh Dios. Chatum wa Abrahán, tiku makgxtakgli tuku tlan xkgalhi kxchiki kʼUr chu lhuwa kata latamalh klaktsu chiki xla xuwa (Gén. 11:31; Heb. 11:8, 9). Xlakata ni kaj lakatum niku xlamakgo, xtitaxtukgo xtiyatkan lhuwa mapakgsinanin, lhuwa xlamakgo kachikinin nema stiliwilikgo laklanka patsaps. Pero la chatum tlat Jehová kuentajtlawalh xla chu xfamilia. Salmista chuna wa: «Dios ni lakaskilh nakatlawanikan tu nitlan, y akxni makgapitsi reyes ni takgaxmatli, y katlawanilh tu nitlan, Dios kamaxkilh tapatin» (Sal. 105:13, 14). Chu Dios wanilh xʼamigo Abrahán pi kxfamilia: «Nataxtukgo Mapakgsinanin» (Gén. 17:6; Sant. 2:23).

12. ¿La limasiyalh Jehová pi wa Tiku Lakgchan naMapakgsinan, chu la litamakgtayalh xkachikin?

 ¹² Dios kawanipa Isaac chu Jacob, xkgawasa chu xtanat Abrahán, pi xʼama kasikulunatlawa. Uma xkilhchani pi kxfamilia xʼama taxtukgo mapakgsinanin (Gén. 26:3-5; 35:11). Pero akxni nina xtaxtukgo uma mapakgsinanin, xkamanan Jacob skujnin litaxtukgolh kʼEgipto. ¿Xwamputun uma pi Jehová ni xʼama makgantaxti tuku xwanit chu pi nialh wa xwanit Tiku Lakgchan naMapakgsinan Katiyatni? Nichuna. Akxni xlilat, limasiyalh xlitliwakga chu limasiyalh pi xlimapakgsin tlakg talhman nixawa xla faraón. Chu xlakata Israelitas lipawankgolh Jehová, kalakgmaxtulh akxni mapitsilh xaSpinini pupunu. Liwana tasiyalh pi Jehová xwanit Tiku Lakgchan namapakgsinan. Chu xlakata chatum Tlat xapaxkina, limaklakaskilh xlitliwakga xlakata xkuentajtlawalh xkachikin (kalikgalhtawakga Éxodo 14:13, 14).

13, 14. 1) ¿Tuku likilhtlikgolh israelitas xlakata xtamapakgsin Jehová? 2) ¿Tuku wanilh Jehová David xlakata xtamapakgsin?

¹³ Akxni xtaxtukgonit kʼEgipto, israelitas limalankikgolh Jehová akgtum takilhtlin. Uma tatsokgwilinit kcapítulo 15 xla Éxodo, kversículo 18 wan: «Jehová namapakgsinan xliputum kilhtamaku, nikxni katisputli xtamapakgsin». Chuna, Jehová litaxtulh xMapakgsina uma xasasti kachikin (Deut. 33:5). Pero kachikin xkgalhiputun chatum mapakgsina nema xtasiyalh ni kajwatiya xkgalhiputunkgo Jehová la xMapakgsinakan. Akxni xtitaxtunita max akgtati ciento kata lata akxni taxtukgolh kʼEgipto, skinikgolh Dios xkamaxkilh chatum mapakgsina, xtachuna kachikinin nema lakatsu xwilakgo (1 Sam. 8:5). Maski kamaxkilh tuku skinikgolh, Jehová chuntiya litaxtulh xMapakgsinakan. Chuna tasiya xlakata tuku lalh akxni xmapakgsinama David, xlichatiy mapakgsina nema kgalhilh Israel.

¹⁴ David lilh xasanto caja xla talakkaxlan kʼJerusalén. Uma xatapaxuwan kilhtamaku, levitas kilhtlikgolh akgtum takilhtlin niku xmalankikan Dios chu xwan: «Kawankgolh kachikinin: “¡Jehová mapakgsinamaja!”» (1 Crón. 16:31). ¡Akgtum lu tlan tachuwin! Pero, komo Jehová wa mapakgsina putum kilhtamaku, ¿tuku xlakata wankan pi nachan kilhtamaku mapakgsina nalitaxtu? Jehová Mapakgsina litaxtu akxni limaklakaskin  xlimapakgsin xlakata wi tiku laksaka xlakata napalakachuwinan o xlakata natlawa tuku xla lakaskin. Akxni chuna maklakaskin xtamapakgsin lhuwa tuku talakgpali. Akxni nina xniy David, Jehová wanilh pi xtamapakgsin xʼama tawila putum kilhtamaku: «Akit naktlawa pi namapakgsinan minkam, nema nakgalhiya; chu tliwakglh nakwili xtamapakgsin» (2 Sam. 7:12, 13). Chu chuna lalh: liwaka akgtum mil kata alistalh tasiyalh ama xkam David. ¿Tiku xwanit chu tukuya kilhtamaku xʼama litaxtu Mapakgsina?

15, 16. 1) ¿Tukuya kilhtamaku laksakka Jesús la Mapakgsina? 2) ¿Tuku lakkaxwililh Jesús xlakata xtamapakgsin nema aku namin akxni xlamajku kKatiyatni?

¹⁵ Kata 29 akxni xminita Jesús (a.x.J.), Juan tiku xMununan tsukulh lichuwinan pi «tamapakgsin xalak akgapun talakatsuwinit» (Mat. 3:2, TNM). Akxni Juan munulh Jesús, Jehová laksakli la Mesías tiku xwankanit pi xʼama min chu la xMapakgsina xla xTamapakgsin Dios. Chu limasiyalh la paxki akxni wa: «Wa yuma nkinKam nti lu[...] kpaxkiy, wanti lu[...] klimakgapaxuwakan» (Mat. 3:17).

¹⁶ Jesús malankilh xTlat putum kilhtamaku nema latamalh kkatiyatni (Juan 17:4). Chuna tlawalh akxni lichuwinalh xTamapakgsin Dios (Luc. 4:43). Asta kamasiyanilh kstalaninanin skinkgolh xʼoracionkan xmilh uma Tamapakgsin (Mat. 6:10). La tiku Mapakgsina xʼama wan, Jesús tlan kawanilh xtalamakgasitsin: «Xtamapakgsin Dios, kmilakgstipankan wi» (Luc. 17:21, TNM). Alistalh, katsisni akxni xʼamaja niy, Jesús katatlawalh akgtum talakkaxlan kstalaninanin, akgtum talakkaxlan xlakata akgtum tamapakgsin. Chuna kawanilh makgapitsi kstalaninanin tiku nikxni makgxtakgkgolh pi tlan xtamapakgsinankgolh kxTamapakgsin Dios (kalikgalhtawakga Lucas 22:28-30).

17. ¿La tsukulh mapakgsinan Jesús kata 33 chu tuku xlakata xtalakaskin chuntiya xkgalhkgalhilh?

¹⁷ ¿Tukuya kilhtamaku xʼama litaxtu Jesús xMapakgsina kxTamapakgsin Dios? Ni akxni aku xkatatlawanit talakkaxlan kstalaninanin. Xlakata makgapitsi horas alistalh, makgnika chu kstalaninanin tanu tanu niku ankgolh (Juan 16:32). Pero chuna la atanu kilhtamaku, Jehová wa tiku chuntiya xmapakgsinama. Xliʼakgtutu kilhtamaku malakastakwanilh xKgawasa, chu kPentecostés xla kata 33, Jesús tsukulh mapakgsinan congregación xla kstalaninanin nema xatalaksakni (Col. 1:13). Pero xtalakaskin chuntiya xkgalhkgalhilh kilhtamaku xlakata xlitaxtulh mapakgsina xlikalanka Katiyatni la tiku xwankanit pi xʼama min. Jehová wanilh: «Juu kuruks katawila pakgan nak kimpakgkana xlakata nakintamapakgsinana, asta akxni nakkamakgatlajakgo ti tasitsiniyan y afuerza natatatsokgostaniyan nak mintujun [o mintantun]» (Sal. 110:1).

18, 19. ¿Tuku natlawayaw xlakata tuku akxilhnitaw, chu tuku nakatsiniyaw kʼatanu artículo?

¹⁸ Lhuwa mil kata, talatlawakanit xtamapakgsin Jehová kʼakgapun chu kKatiyatni. Pero xla chuntiya mapakgsina. Chuna, xlakata chatum Tlat xapaxkina, kakuentajtlawalh skujnin tiku nikxni makgxtakgkgolh la Noé, Abrahán chu David. Uma tlawa pi akinin nakgalhakgaxmataw chu natalakatsuwiniyaw kiMapakgsinakan.

¹⁹ Pero ¿la litaxtu Jehová kimapakgsinakan la uku? ¿La tlan tapakgsiniyaw xTamapakgsin chu nalitaxtuya xkamanan tiku ni kgalhikgo talakgalhin? ¿Tuku skimaw akxni wanaw «Kamilh mintamapakgsin»? Umakgolh takgalhskinin natakgalhtikgo kʼatanu artículo.