1, 2. 1) ¿Tuku xlakata min kilhtamaku wi tuku ni akxilhaw? 2) ¿Tuku katsiyaw xlakata xTamapakgsin Dios?

CHUNA la wix katsiyata makgapitsi tiku akxilhkgo akxni wi tuku la ni akxtum tuku lakapastakkgo xlakata la lalh. Nachuna max wi tiku tuwa namakgkatsi liwana nalakapastaka tuku wanilh makuchina akxni xwaninita tuku xlitatatla. O max wi tiku ni tekgsa xlimalakkin o xlentes maski kxlakatin wi. ¿Tuku xlakata chuna la? Tiku katsikgo xlakata uma wankgo pi xtachuna la akxni wi tiku lakgaxokgo, chuna kitaxtu akxni pulaklhuwa tuku akxtum tlawaputunkan. Wankan pi kiʼakskititkan nila pulaklhuwa tuku akxtum tlawa.

² Lhuwa latamanin litaxtukgo la tiku lakgaxokgo xlakata ni katsikgo tuku kilhchanima tuku lama kkakilhtamaku. Max katsikgo pi kakilhtamaku lu talakgpalinit lata kata 1914, pero ni akgatekgskgo tuku xlikana kilhchanima. Xlakata tuku katsininitaw kBiblia, tlan nawanaw pi xTamapakgsin Dios milh kkata 1914, akxni Jesús Mapakgsina tlawaka kʼakgapun. Pero na katsiyaw pi nina xatakgatsin kgalhtikanit oracion «Kamilh mintamapakgsin. Katatlawalh mintalakaskin, chuna la kʼakgapun, nachuna kkatiyatni» (Mat. 6:10, TNM). Pero xlakata natatlawa xtalakaskin Dios kKatiyatni chuna la tatlawama kʼakgapun, pulana talakaskin  namalakgsputukan uma xalixkajni kakilhtamaku.

3. Xlakata likgalhtawakgayaw Biblia ¿la kinkamakgtayayan uma?

³ Xlakata limaxtuyaw kilhtamaku nalikgalhtawakgayaw xTachuwin Dios akxilhaw pi la uku kgantaxtuma tuku xwankanit pi nala. ¡Ni la amakgapitsi latamanin! Tlakg lilakgaputsakgo tuku xla xlatamatkan chu tuku lakaskinkgo chu wa xlakata ni akxilhkgo tuku masiya pi Cristo mapakgsinamaja lata kkata 1914 chu nialh makgas namasputu uma kakilhtamaku. Chu maski wix akglhuwata kata skujnanipat Dios, kalilakpuwanti uma takgalhskinin: «¿La uku tlakg kkatsiputun chuna la pulana tuku kilhchanima tuku lama kkakilhtamaku?». Chu maski wix nina makgas xtatayana Jehová, kalakpuwanti: «¿Tuku tlakg klilakgaputsa?». Maski tanu tanu la nakgalhtinana, kaʼakxilhwi pulaktutu tuku xlakata likatsiyaw pi Mapakgsina nema laksaknit Dios nialh makgas wi tuku natlawa xlakata katatlawalh xtalakaskin Dios kKatiyatni.

4, 5. 1) Lata kata 1914 ¿tuku tlawama Jesús asta la uku? (Kaʼakxilhti xapulana dibujo.) 2) ¿Tuku kilhchanima kgalhtutu tiku kgetawilakgonit kawayu nema stalanimakgolh Jesús? 3) ¿La kgantaxtunit uma tuku xwankanit?

⁴ Kkata 1914, Jesucristo tiku limasiyakan chatum tiku kgetawilanit tantum xasnapapa kawayu, mapakgsina tlawaka kʼakgapun chu lakapala tataxtucha xkawayu xlakata namalakgsputu uma xalixkajni xkakilhtamaku Satanás (kalikgalhtawakga Apocalipsis 6:1, 2). Capítulo 6 xla Apocalipsis wan pi akxni wilikanita xwa xTamapakgsin Dios tlakg lakpala nitlan xʼama tawila kakilhtamaku. Xʼama anan guerras, tatsinksni, tajatat chu atanu nema xʼama tlawa pi nanikan, chu uma tuku xʼama la kalimasiyakan kgalhtutu tiku kgetawilakgonit kawayu chu stalanimakgo Jesucristo (Apoc. 6:3-8).

⁵ Xwankanit pi guerra «namapanuy [takaksni] nkatiyatna», chu wa uma tuku lalh. Chuna lalh maski mapakgsinanin xlatalakkaxlanit nalamakgtaya chu ni nalatatlawa guerra. Ananit lhuwa guerras, pero tlan nawanaw pi xaPulana Guerra xLikalanka Katiyatni wa nema pulana tlawalh pi nialh tlan xtawi kakilhtamaku. Chu maski lata kata 1914 asta la uku tlakg lhuwa anan tumin chu científicos lhuwa tuku tlawakgonit, chuntiya anan tatsinksni kKatiyatni. Nachuna, nila tiku nawan pi kata kata lhuwa millón latamanin nikgo xlakata laklanka tajatat, tuku lakapala masputunan chu atanu tuku makgninan. Uma tuku lama, tlakg lipekua, tlakg makglhuwa chuna la, chu tlakg lhuwa tiku nikgo, la nikxni xlanit. ¿Akxilha tuku kilhchanima uma?

6. 1) ¿Tiku akxilhkgolh pi xkgantaxtuma tuku xwanit Biblia pi xʼama la? 2) ¿Tuku tlawakgolh?

⁶ Lhuwa latamanin tlakg xlilakgaputsamakgo xaPulana Guerra xLikalanka Katiyatni chu tajatat talilakgapasa gripe española. Pero natalan tiku kalaksakkanit naʼankgo kʼakgapun xkgalhkgalhimakgo pi kkata 1914 xʼama sputa xkilhtamaku tiku ni judíos, nema na limapakuwikan «nkilhtamaku ntu lakgchankgoy xakgmakgat chixkuwin» (Luc. 21:24). Ni xkatsikgo putum tuku xʼama la, pero xkatsikgo pi kkata 1914 wi tuku tlakg xlakaskinka xʼama la kxTamapakgsin Dios. Akxni akxilhkgolh pi xkgantaxtuma tuku Biblia xwanit pi xʼama la, ni pekuankgolh chu makatsininankgolh pi xwilikanita xTamapakgsin Dios. Uma tlawalh pi tlakg xkaputsastalanika, chu xlakata uma chuna lalh klakalhuwa kachikinin na limasiyalh pi xkgantaxtuma tuku xlichuwinankanit. Lhuwa kata alistalh, tiku xtalamakgasitsin Tamapakgsin lakkaxwilikgolh limapakgsin nema xkalitlawanilh tuku nitlan kskujnin Jehová. Nachuna katlawanika  tuku nitlan, katamaknuka kpulachin chu asta kamakgnika (Sal. 94:20; Apoc. 12:15).

7. ¿Tuku xlakata lhuwa latamanin ni akgatekgskgo tuku kilhchanima tuku lama kkakilhtamaku?

⁷ ¿Tuku xlakata lhuwa latamanin ni akxilhkgo pi Tamapakgsin wilikanita kʼakgapun maski lhuwa tuku chuna masiya? ¿Tuku xlakata ni akxilhkgo pi tuku lama kkakilhtamaku wa kgantaxtuma tuku xlichuwinanit Biblia chuna la lhuwa kata lichuwinankgonit xkachikin Dios? ¿Kaj wa kuenta tlawakgo tuku akxilhkgo? (2 Cor. 5:7.) ¿Kajwatiya kuenta tlawakgo tuku tlawaputunkgo chu ni akxilhkgo tuku Dios tlawama? (Mat. 24:37-39.) ¿Max tlakg kuenta tlawakgo xtalakapastakni chu tuku xlakaskinka akxilha xkakilhtamaku Satanás? (2 Cor. 4:4.) Talakaskin takanajla chu naʼakxilhaw tuku amakgapitsin nila akxilhkgo xlakata tlan naʼakgatekgsaw tuku tlawama xTamapakgsin Dios. ¡Lu lipaxuwayaw pi ni la lakgaxokgo akinin chu tlan akxilhaw tuku lama!

8-10. 1) ¿La kgantaxtunit 2 Timoteo 3:1-5? 2) ¿Tuku litasiya pi tlakg anan tuku nitlan?

⁸ Xlipulaktiy tuku likatsiyaw pi nialh makgas xTamapakgsin Dios namapakgsinan unu kKatiyatni wa uma: tuku nitlan tlawamakgolh latamanin tlakg talhuwima. Tuku wan 2 Timoteo 3:1-5 atsinu nina takgatsi akgtum siglo la kgantaxtuma, chu tlakg chuna tasiyama xlikalanka Katiyatni. ¿Akxilha pi chuna lama? Kaʼakxilhwi makgapitsi liʼakxilhtit nema chuna masiya (kalikgalhtawakga 2 Timoteo 3:1, 13).

⁹ Katamalakxtupi tuku nitlan xʼakxilhkan kkata 1940 ó 1950 chu tuku lama la uku, anta ktaskujut, tuku lilakgastanankan, chu ktakgaman chu la lhakganankan. Latlawanikan tuku nitlan chu talakgxtumit xalimaxana wa tuku tlakg lama. Makgapitsi nachuna wamputunkgo la tiku tlakg xalipekua xtayat, tiku tlakg tlawa xalimaxana o tlakg ni lakgalhamanan. Kkata 1950, tuku xtaxtu ktelevisión nema nitlan xʼakxilhkan la uku tlan lilakgastanankgo putum familia. Lhuwa latamanin akxilhkgonit pi tiku tatalakgxtumi xtachixku o xtapuskat limaklakaskinkgo tuku lilakgastanankan chu la lhakganankan xlakata amakgapitsin nakaʼakxilhkgo. ¡Lu lipaxuwayaw pi katsiyaw tuku Dios lakpuwan xlakata uma! (kalikgalhtawakga Judas 14, 15.)

 ¹⁰ Nachuna tlan tamalakxtumiyaw la xlikatsikgo laktsakat kamanan kkata 1950 chu la likatsikgo la uku. Natlatni xlilakgaputsakgo pi xkamanan kxkulikgolh, xwakgolh kuchu o ni xlilat la xtantlikgolh. La uku chali chali kinkamakatsinikanan tuku makgapekuanan. Chatum kgawasa tiku xkgalhi 15 kata kalimakgnilh pistola chatiy tiku xkataʼankgo kʼescuela chu kgalhkututu tiku katlawanilh tuku nitlan. Chu makgapitsi kamanan akxni xkgachikgo makgnikgolh chatum aktsu tsumat tiku xkgalhi akgnajatsa kata chu nikkgolh xtlat chu xtapuxnimat. Wankan pi kʼakgtum país xalak Asia xliputum tuku nitlan lanit kʼakgkaw kata nema titaxtunit, itat wa kamanan tiku chuna tlawakgonit. Nila tiku nawan pi kakilhtamaku tlakg nitlan wi.

11. ¿Tuku xlakata lhuwa latamanin ni akxilhkgo pi kakilhtamaku tlakg nitlan wi?

¹¹ Apóstol Pedro wa: «Akxni xlikgatsputnita nawan nkatuxawat, nalakatakinankgoy nkgalhkgamananin, nalilatamakgoy wa lantlata xtalakgxkgonalakanin, nitlan xtalakapastaknakan. Nawankgoy: “¿Tu akgspulalh [...] lantla wanit mpi namin? Xampi asta akxni yama nkilhtamaku, akxni nkinatlatnakan ntinikgolh, xlipaks xaliʼankgalhin chuna nkatuwaj, nitu ntalakgpaliy lantla asta akxni xakgasiyaj tikilhtsukulh nkatuxawat”» (2 Pedro 3:3, 4). ¿Tuku xlakata chuna likatsikgo? Chuna la tasiya, akxni wi tuku putum kilhtamaku akxilhaw, nialh kaks kinkamalakawaniyan. Komo xtayat tiku lakgapasaw lakapala talakgpali, uma kaks kinkamalakawaniyan. Pero xlakata tlakg lixkajni lamakgo latamanin chu lakatsuku talakgpali chuna la titaxtuma kilhtamaku, max nipara katikatsiw. Maski chuna, ni wamputun pi ni lipekua.

12, 13. 1) ¿Tuku xlakata ni nalixlajwananaw xlakata tuku lama kakilhtamaku? 2) ¿Tuku nakinkamakgtayayan natayaniyaw tuku Pablo wa pi “lu tuwa xʼama wan”?

¹² Apóstol Pablo kinkamakatsinin: «Xaʼawatiya kilhtamaku lu tuwa nawan» (2 Tim. 3:1, TNM). Pero ni wa pi nila tuku xʼamaw tlawayaw, wa xlakata ni kapekuaw chu ni kaxlawanaw. Wa Jehová nakinkamakgtayayan, xʼespíritu santo chu congregación xlakata natayaniyaw tapekua o tuku nitlan namin. Tlan ni namakgatsankgananiyaw Jehová xlakata «lanka litliwakga, ni kilakan, wa ntapakgsiniy Dios» (2 Cor. 4:7-10).

¹³ Lu kaks malakawaninan pi akxni Pablo lichuwinalh tuku xlalh kxaʼawatiya kilhtamaku limatsukilh uma tachuwin «kakatsi uma». Umakgolh tachuwin liwana masiya pi tuku tsokgli alistalh xlikana xʼama kgantaxtu. Wa xlakata, liwana katsiyaw pi uma xalixkajni kakilhtamaku tlakg nitlan ama tawila asta akxni Jehová namasputu. Tiku lichuwinankgo xlakata tuku lanit, tsokgwilikgonit pi akxni nina ksputa makgapitsi kachikinin lu nitlan la xlimakgo xlatamatkan. Nikxni chuna xtawilanit kilhtamaku chuna la tlakg nitlan wi uku. Lhuwa max ni kuentajtlawanikgo xlakata la wi kakilhtamaku, pero chuna la limakgolh xlatamatkan latamanin lata tsukucha kata 1914, liwana limasiyama pi xTamapakgsin Dios nialh makgas nalakgpali la wi kakilhtamaku.

14-16. ¿Tuku xlipulaktutu kinkamakgtayayan nakanajlayaw pi xTamapakgsin Dios lakatsu wi?

¹⁴ Wilapa xlipulaktutu tuku kinkamakgtayayan nalipawanaw pi lu lakatsu wi lisputni: tuku latilhanit kxkachikin Dios. Akxni nina xwilikan xTamapakgsin Dios kʼakgapun, tiku xkalaksakkanit nema ni xmakgxtakgkgo Dios lu xatapaxuwan kskujnanimakgolh. ¿Tuku tlawakgolh akxni akxilhkgolh pi ni kgantaxtulh tuku xlakpuwankgonit pi xʼama la kkata 1914? Tlakg lhuwa tiku chuntiya skujnanikgolh Jehová. Maski tuwa tuku titaxtukgolh chu kaputsastalanika atsinu ni putum tiku xatalaksakni ni makgxtakgkgolh Dios putum kxlatamatkan.

 ¹⁵ Akxni lichuwinalh tuku xʼama la kxaʼawatiya kilhtamaku Jesús wa: «Lu[...] xlikana kkawaniyan pi ni paks anikgoy katiwa tachixkuwitat xla yuma kilhtamaku mpala ni pulh nalay xlipaks yuma nkatuwaj» (kalikgalhtawakga Mateo 24:33-35). Akgatekgsaw o makgachakgxiyaw pi akxni wa «tachixkuwitat xla yuma kilhtamaku», Jesús xkilhchanima pulaktiy kstalaninanin tiku xʼankgolh kʼakgapun. Xapulana grupo akxilhkgolh tuku lalh kkata 1914 chu akgatekgskgolh pi Cristo tsukulh mapakgsinan uma kata. Wa tuku tlakg xlakaskinka ni wa pi xlamakgolh ama kata wata wa pi uma kata o akxni nina xchan uma kata kalilaksakka espíritu santo xlakata xʼankgolh kʼakgapun (Rom. 8:14-17).

¹⁶ Xlipulaktiy grupo nema kilhchanima «tachixkuwitat xla yuma kilhtamaku» wa xatalaksakni tiku na xlamakgolh akxni xlamakgolh xapulana grupo. Ni wa xlakaskinka pi na xlamakgolh akxni xlamakgolhku xapulana grupo kKatiyatni, wata xlakaskinka pi kalilaksakka espíritu santo akxni xlamakgolhku xapulana grupo. Wa xlakata, ni putum tiku xatalaksakni nema lamakgolh la uku litaxtukgo tiku Jesús kalichuwinalh akxni wa «tachixkuwitat xla yuma kilhtamaku». La uku, tiku xlipulaktiy grupo linkgoya kata. Pero xtachuwin Jesús nema tatsokgnit kMateo 24:34 liwana kinkawaniyan pi «ni paks anikgoy [nawan] tachixkuwitat xla yuma kilhtamaku», akxni namin lanka takatsanajwat, wa xlakata kaj makgapitsi xatalaksakni lamakgolhku nawan kKatiyatni ama kilhtamaku. Uma matliwakglha kintakanajlakan pi nialh makgas Jesucristo, Mapakgsina kxTamapakgsin Dios nakamalakgsputu tiku lixkajni likatsikgo chu nawili xasasti kakilhtamaku (2 Ped. 3:13).

17. Xlakata tuku akxilhwi ¿tuku katsiyaw?

¹⁷ ¿Tuku katsiyaw akxni akxilhaw pi kgantaxtuma uma pulaktutu tuku xwankanit pi nala? Jesús wa pi ni xʼama katsiyaw tukuya kilhtamaku chu tuku hora xʼama min xlisputni uma kakilhtamaku, chu xlikana ni katsiyaw (Mat. 24:36; 25:13). Pero Pablo wa pi «tlakg lakatsuwa wi nkiliakgaputaxtutkan, ni xawa lantla akxni xakgasiya ntikanajlaw» (kalikgalhtawakga Romanos 13:11). Katsiyaw pi lamaw kxaʼawatiya kilhtamaku. Komo liwana nalakputsananiyaw tuku wankanit pi nala chu tuku Jehová chu Jesús tlawamakgolh, naʼakxilhaw pi tuku kgantaxtuma limasiya pi talakatsuwima xlisputni kakilhtamaku.

18. ¿Tuku nakaʼakgspula tiku ni kgalhakgaxmatputunkgo xTamapakgsin Dios?

¹⁸ Tiku ni kanajlakgo pi Jesucristo tiku kgewi kawayu xasnapapa chu tlajanama makglhtinanit limapakgsin, nialh makgas nakatsikgo pi nitlan la xlakpuwankgo. Nitu nakamalakgtaxti. Lhuwa tiku nawankgo: «¿Tiku kawa natayaniy [...]?» (Apoc. 6:15-17, Hua Xasasti Talaccaxlan, [Coyutla]). Capítulo xla Apocalipsis nema stala masta xatakgalhtin. Xatalaksakni chu tiku nalatamakgo kkatiyatni wa “yakgo” nawan ama kilhtamaku, Dios tlan nakaʼakxilha. Alistalh, «lhuwa tachixkuwitat» xla atanu borregos nalakgtaxtukgo klanka takatsanajwat chu nalatamakgo kxasasti kakilhtamaku (Apoc. 7:9, Hua Xasasti Talaccaxlan, 1999; 7:13-15).

19. ¿Tuku lu lakaskinaw kamilh putum tiku kanajlayaw pi lakatsu wi lisputni?

¹⁹ Komo wa naʼakxilhaw la kgantaxtuma tuku wankanit kBiblia pi xʼama la kkinkilhtamakujkan, ni katilakgatiw tuku anan kxkakilhtamaku Satanás chu naʼakxilhaw tuku kgantaxtuma kkakilhtamaku. Cristo nialh makgas nakamalakgsputu latamanin xalak kʼuma lixkajni kakilhtamaku kguerra xla Armagedón (Apoc. 19:11, 19-21). ¡Lu napaxuwayaw ama kilhtamaku! (Apoc. 20:1-3, 6; 21:3, 4.)