PASCAL, tiku kstakli kʼakgtum aktsu kachikin xla Costa de Marfil niku ni anan tumin, xlakaskin tlakg xatlan latamat. Xla lu xlakgati boxearlinan chu xkgalhskinkan niku tlan xkitaxtunilh xlakata tuku xlakgati tlawa chu tlan xkgalhilh lhuwa tumin. Akxni xkgalhi 25 kata lakpuwa pi kʼEuropa tlan xkitaxtunilh. Pero ni xkgalhi kapsnat nema xtalakaskin xlakata xʼalh kʼuma kachikin wa xlakata kajwatiya tlan xtanulh komo xlakatsalalh limapakgsin.

Kata 1998 akxni xkgalhi 27 kata, Pascal tsukulh an niku xlakaskin. Titaxtulh niku pakgta Ghana, titaxtulh kachikin xla Togo chu Benín chu chalh kachikin nema wanikan Birni Nkonni, kʼNíger. Pero xtsankgani tuku tlakg tuwa. Xlakata xʼalh knorte, xtalakaskin xtitaxtulh xaskakni tiyat xalak Sahara kʼakgtum putlaw, chu xchalh asta pupunu Mediterráneo, xtawakalh kʼakgtum lancha nema xlilh kʼEuropa. Wa uma tuku xlakpuwanit natlawa, pero kʼNíger pulaktiy tuku titaxtulh nema ni maxkikgolh talakaskin xtlawalh tuku xlakaskin.

Pulana sputli xtumin. Chu xliʼakgtiy, lakgapasli Noé, chatum precursor tiku tsukulh limakgalhtawakga Biblia. Tuku katsinilh lakgchalh xnaku chu lakgpalilh tuku xlakpuwan xlakata latamat. Tuku xla takanajla lakgpalilh tuku xtlawaputun, chu diciembre xla kata 1999, tamunulh. Xlakata xmasiyanilh Jehová pi lu xpaxtikatsini, kata 2001 precursor litaxtulh kʼNíger, kachikin niku katsinilh xaxlikana. ¿La makgkatsilh xlakata tuku laksakli? Xla wan: «Liwana klimaklakaskima kilatamat».

Xtachuna la Pascal lhuwa lipaxuwakgo xlatamatkan xlakata skujnimakgo Dios. Xlakata natlawakgo tuku lakkaxwilikgonit, makgapitsi natalan ankgonit lata Europa asta África xlakata namakgtayanankgo niku tlakg talakaskin tiku nalichuwinan xTamapakgsin Dios. Max 65 natalan xalak Europa tiku kgalhikgo lata 17 asta 70 kata makgtayanamakgo klakalhuwa kachikinin xalak África occidental, la Benín, Burkina Faso, Níger chu Togo. * ¿Tuku tlawalh pi chuna xtlawakgolh chu la kakitaxtuninit?

Anne-Rakel, xalak Dinamarca, wan: «Kinatlatni misioneros xwankgonit anta kSenegal. Putum kilhtamaku lu tlan xlichuwinankgo xlatamatkan misioneros chu akit na chuna xakskujnaniputun Dios». Akgkukitsista kata, akxni nina xkgalhi puxamakitsis kata, alh latama kʼTogo niku makgtayanama kʼakgtum congregación xla señas. ¿Xlakata tuku laksakli tuku kamatlawilh amakgapitsin? Xla wan: «Alistalh kintala tsumat chu kintala kgawasa na minkgolh kʼTogo».

 Aurele, chatum tala xalak Francia tiku kgalhi 70 kata wa: «Akgkitsista kata lata ktajubilarlilh, chu kakxilhli pi pulaktiy tuku tlan xaktlawalh: tlan xaklatamalh kʼFrancia chu xakkgalhkgalhilh xmilh Paraíso, o xakputsalh la tlakg xakskujnilh Dios». Xla tlawalh tuku xaʼawatiya wa. Wa xlakata akgtutu kata kgalhi lata Albert-Fayette chu xpuskat ankgolh latamakgo kʼBenín. Aurele wan: «Xlakata kmiw skujnaniyaw Jehová unu wa tuku tlakg tlan ktlawanitaw kklilatamatkan». Chu xatapaxuwan wampara: «Chu makgapitsi kachikin niku wi xkilhpan pupunu lu lilakgatit tasiyakgo la Paraíso».

Clodomir chu xpuskat, Lysiane, akgkuchaxan kata lata makgxtakgkgolh Francia chu ankgolh kʼBenín. Pulana lu xlakapastakkgo xfamiliajkan chu xʼamigoskan, chu xlakpuwankgo pi ni xʼama smanikgo anta. Pero alistalh nialh pekuankgolh chu lu paxuwakgolh anta. Clodomir wan: «Uma akgkuchaxan kata, max kmakgtayanitaw chatum lataman akgatunu kata xlakata nakatsinikgo xaxlikana».

Sébastien chu Johanna, akgtum tamakgaxtokgat xalak Francia, ankgolh latamakgo kʼBenín kkata 2010. Sébastien wan: «Anan lhuwa taskujut kcongregación. Nakmakgtayananaw unu xtachuna xakaw niku chali chali masiyakan chu lhuwa tuku katsinikan». ¿Chu tiku kalitachuwinankan Dios tuku lakpuwankgo? Johanna wan: «Latamanin katsiputunkgo xaxlikana. Chu asta akxni ni klichuwinamaw Dios, kinkamachokgokanan ktiji xlakata nakinkatlawanikanan takgalhskinin xalak Biblia chu kinkaskinikanan likgalhtawakga». Xlakata kilatamakgolh alakatanu, ¿tuku kitaxtulh kxtamakgaxtokgatkan? Sébastien wan: «Tlawanit pi tlakg naklapaxkiyaw, lu klakgati xlakata tantaku akxtum klichuwinanaw Dios».

Eric chu xpuskat, Katy, liskujmakgo la precursores knorte kʼBenín, niku ni lhuwa lamaka. Akxni xlamakgolh kʼFrancia, tsukukgolh likgalhtawakgakgo artículos nema lichuwinankgo xlakata namakgtayanankan niku tlakg talakaskin tiku nalichuwinankgo Dios chu xakstu xkakgalhskinkan komo tlan skujnikgolh Dios putum kilhtamaku. Uma tlawalh pi xʼankgolh latamakgo kʼatanu país chu chuna tlawakgolh kkata 2005. Lata uma kata akxilhkgonit la stakma xkachikin Dios anta. Eric wan: «Akgtiy kata nema titaxtukgonit grupo xla Tanguiéta kajwatiya xʼanankgo 9 tiku lichuwinankgo Dios pero la uku wilakgo 30. Domingos tamakxtumikgo 50 asta 80 latamanin. Tapaxuwan nema kmakgkatsiyaw akxni akxilhaw la stakma xkachikin Dios ni tuku tatalakxtumi».

¿Tuku taʼakglhuwit titaxtukgo tiku ankgo makgtayanankgo? Benjamin, tiku kgalhi 33 kata, xtala Anne-Rakel. Kkata 2000 lakgapasli kDinamarca chatum misionero tiku xmakgtayanan kʼTogo. Benjamin lakapastaka: «Akxni kwanilh pi precursor xakwamputun, kinkgalhskilh: “¿Lakpuwanita pi tlan precursor nawana kTogo?”». Benjamin wampara: «Ama kilhtamaku nina xakkgalhi 20 kata, pero chatiy kinatalan anta xmakgtayanankgo, chu xʼama tlawa pi ni lu tuwa xakmakgkatsilh». Wa xlakata akxni xlakpuwanita uma alh latama kʼTogo. Pero xʼanan akgtum taʼakglhuwit, Benjamin ni xkatsi ni para akgtum tachuwin kfrancés. Xla wan: «Xapulana akgchaxan papaʼ lu tuwa kmakgkatsilh, xlakata ni lu lhuwa xakkatsi tachuwinan». Pero chuna la titaxtulh kilhtamaku tlakg katsinilh, chu la uku wi ksucursal xla Benín, niku makgtayanan kʼDepartamento de Envíos chu de Computadoras.

Eric chu Katy, nema lichuwinanitaw, xmakgtayanankgo kʼakgtum congregación niku chuwinankan atanu tachuwin kʼFrancia akxni nina xʼankgo kʼBenín. ¿Nachuna xʼama kakitaxtuni kʼÁfrica la kʼFrancia? Katy wan: «Nila xaktekgsaw akgtum tlan chiki. Lhuwa papaʼ xakwilaw kʼakgtum chiki niku ni xʼanan luz chu chuchut». Chu Eric wan: «Tiku lakatsu xwilakgo lu pixlanka xwilikgo tatlakgni katsisni. Talakaskin ni lakapala nasitsiya chu nalismaniputuna». Pero xchatiykan wankgo: «Tasikulunalin nema kmakgamakglhtinanitaw xlakata makgtayananaw niku ni lu talichuwinanit Dios ni tatalakxtumi tuku kmakgaxtakgnitaw».

Michel chu Marie-Agnès, atanu tamakgaxtokgat xla Francia, tiku max 60 kata kgalhikgo, ankgolh latamakgo kʼBenín akgkitsista kata. Xapulana xpekuankgo. Michel wan pi makgapitsi wankgolh pi lu tuwa xʼama kitaxtu komo xakaw latamayaw alakatanu. Xla wampara: «Xlikana xaktilipekuaw komo ni xakmakgkatsiw pi Jehová xkinkaliman. Kaw alakatanu xlakata naskujniyaw Jehová chu xla kinkamakgtayan».

Tiku makgtayanankgo niku tlakg talakaskin tiku nalichuwinankgo Dios wankgo pi lu xlakaskinka natakaxkgo akxni nina ankgonit. Xlakata uma talakaskin nalakkaxtlawakan putum, nakatsinikgo la nalatamakgo anta, nakatsikgo limaklakaskinkgo xtuminkan chu nalipawankgo Jehová (Luc. 14:28-30).

Sébastien, tiku lichuwinanitaw, wan: «Akxni nina xakminaw kʼBenín, akgtiy kata kmakiw kintuminkan. Ni lu lhuwa tumin xaklaktlawayaw klilakgastan chu ni xaktamawayaw tuku ni xakmaklakaskinaw».  Xlakata chuntiya namakgtayanankgo kʼatanu país akgatunu kata ankgo kʼEuropa makgapitsi papaʼ chu uma kamaxki talakaskin naliskujkgo la precursores kʼBenín amakgapitsi papaʼ.

Anta kʼÁfrica occidental max puxam laktsuman makgtayanamakgo chu Marie-Thérèse na anta makgtayanama. Xla xmatlawani akgtum autobús kʼFrancia, pero kkata 2006 skilh xmaxkika talakaskin ni skujli akgtum kata chu tlan xwa precursora kʼNíger. Tunkun katsilh pi wa uma latamat nema xlakaskin. Xla wan: «Akxni ktaspitli kʼFrancia, kskinilh kimpuxku xkilakgpalinilh kilhtamaku nema xakskuja, chu xla tlan akxilhli, wa xlakata la uku kskuja lata mayo asta agosto kʼFrancia, chu septiembre asta abril klitaxtu precursora kʼNíger».

Tiku pulana wilikgo xTamapakgsin Dios tlan lipawankgo pi Jehová nakamaxki tuku namaklakaskinkgo (Mat. 6:33, TNM). Kaʼakxilhwi tuku titaxtulh Saphira, chatum tala xalak Francia, ni tamakgaxtokgnit chu kgalhi 30 kata, precursora kʼBenín. Kata 2011 taspitpa kʼFrancia xlakata xmastokgli xtumin chu tlan xʼalh xliʼakgchaxan kata kʼÁfrica. Xla wan: «Viernes xwanit xaʼawatiya kilhtamaku nema xakama skuja. Pero chuntiya xakama tamakgxtakga akgtiy semanas kʼFrancia chu xakmaklakaskin taskujut akgtiy semana xlakata xakkgalhilh tumin nema xakmaklakaskin. Ktlawanilh oración Jehová chu kwanilh tuku xaktitaxtuma. Alistalh, niku mastakan taskujut kinkilhminika kteléfono xlakata xaktawi xlakgxokgo akgtiy semana tiku nila skuja uma kilhtamaku». Lunes, Saphira alh kxasasti taskujut xlakata tiku ni xʼama skuja xmasiyanilh tuku xʼama tlawa. «Nila xakkanajla, pero kkatsilh pi ama chatum tala tiku xmaklakaskin akgkaw kilhtamaku xlakata tlan xʼalh Escuela xla Precursores. Puxku xwaninit pi kajwatiya xʼama maxki talakaskin ni skujli komo xtekgskgolh tiku xtawilalh xlakgxokgo. Tala na kskininit tamakgtay Jehová, ¡chu xla kinchatiykan kinkakgalhtin!»

Makgapitsi tiku ankgolh makgtayanankgo kʼÁfrica occidental anta tamakgxtakgkgolh, chu makgapitsi ni lhuwa kata anta latamakgolh alistalh taspitparakgolh xkachikinin. Maski chuna, chuntiya kamakgtayama kilhtamaku nema anta makgtayanankgolh. Katsinikgolh pi xaxlikana tapaxuwan kgalhiyaw akxni skujniyaw Jehová.