UMA kata namakgatsi akgtum ciento kata akxni xapulana tamatitaxtilh «Foto-Drama de la Creación», lu tlan nema tamatitaxtilh xlakata nakgaxmatkan chu naʼakxilhkan pi Biblia wa xTachuwin Dios. Kilhtamaku akxni lu xkanajlanikan evolución, nitlan xlichuwinankan takanajla chu ni xkanajlanikan pi anan tuku xaxlikana xmasputunit xtakanajlakan lhuwa latamanin, «Foto-Drama» lichuwinalh pi Jehová wa Malakatsukina.

Charles T. Russell, tiku xpulalin taskujut nema xtlawakgo xLikgalhtawakgananin Biblia, lu xputsa la lakapala chu tlan nakitaxtu nalichuwinankgo xaxlikana. Liwaka puxamakaw kata, xLikgalhtawakgananin Biblia xlimaklakaskinkgonit likgalhtawakga nema xmaxtukan kʼimprenta, pero ama kilhtamaku wi tuku xasasti maklakaskinkgolh: cine.

Kata 1890 tsukulh taxtukgo películas nema ni xtakgaxmata. Chu kata 1903, tamatitaxtilh akgtum película xla takanajla ksikulan xalak Nueva York. Wa xlakata akxni tala Russell matsukilh «Foto-Drama» kata 1912 aku xtsukuma cine. Russell liwana xkatsi pi tlan xlimaklakaskilh uma, xlakata natalichuwinan xaxlikana xalak Biblia chu tlakg tlan xkitaxtulh, ni xtachuna likgalhtawakga nema xmaxtukan kʼimprenta.

Akxni matitaxtika «Foto-Drama» akgtsayan horas xmakgapala, wa xlakata pulaktati tlawaka. Chu xkgalhi 96 akatsunin taʼakgchuwin xalak Biblia chu xlikgalhtawakga chatum tiku lu xlakgapaskan. Lhuwa tuku xtitaxtu xwilinikanit tatlakgni. Lhuwa tiku xkatsinikgo uma, xtlawakgo pi akxni xtaʼakxilha tuku xtitaxtuma na xtakgaxmata chu tipalhuwa colores xwanit dibujos chu anta xtasiya tuku tlakg xlakgapaskan nema xtalichuwinan kBiblia.

Atsinu ni putum película nema maxtuka anta tlawaka kFiladelfia, Nueva York, París chu kLondres, niku kaj makan xlitlawakgo akgatunu dibujos xla diapositivas chu películas tiku lu xkatsinikgo maninankgo. Anta niku xtlawakan dibujos kBetel lu lhuwa liskujkgolh natlawakgo dibujos chu xlakgpalikgo  diapositivas akxni xtalakgpakglha. Ni kajwatiya tamaklakaskilh nema tamawaka niku katsinikan tlawakan películas. Na kYonkers (Nueva York) kagrabarlika betelitas tiku litaxtukgolh, Abrahán, Isaac chu ángel tiku ni maxkilh talakaskin Abrahán xmakgnilh xkgawasa (Gén. 22:9-12).

Chatum xmakgtayana tala Russell kawanilh periodistas xlakata uma tuku maklakaskinkgolh: «Tlakg nakatsiputunkgo latamanin xlakata Biblia nixawa la xapulana xtatlawanit xlakata takanajla». ¿Tuku lakpuwankgolh xpulalinanin takanajla? ¿Lipaxuwakgolh xlakata tlakg tlan tuku xkalimasiyanika latamanin xlakata Dios? Nichuna. Wata tiku xpulalinkgo takanajla nitlan lichuwinankgolh «Foto-Drama». Asta makgapitsin pulalinanin ni xkamaxkiputunkgo talakaskin latamanin naʼakxilhkgo. Kʼakgtum kachikin, asta makgalhxtukgolh luz.

Maski chuna, latamanin matsamakgolh teatros xlakata naʼakxilhkgo «Foto-Drama» nema ni xʼamakgo xokgokgo, anta kʼEstados Unidos xmatitaxtikan k80 kachikinin chali chali. Lhuwa latamanin nikxni xʼakxilhkgonit película niku chuwinankan. Xlakata tsinu tsinu xmaxtukan fotografia, xtasiya la aktsu xtilan xtaxtuma kxputsiksna chu xtasiya la xpakglha xanat. Tuku talichuwinalh limasiya la xlilhuwa kgalhi xliskgalala Jehová. Chuna la talichuwinalh xapulana, akxni xtaxtuma tala Russell kFoto-Drama, chatum tiku kaj xakxilhma wa: «¡Tlakg xtachuna tasiya tala Russell ni xawa tala Russell!».

Historiador xalak cine Tim Dirks lichuwinalh pi «Foto-Drama» wa «xapulana nema xtakgaxmata niku xchuwinankan, xtatsuwikan chu a color xtasiya chu xmaklakaskinkan la akgtum lámpara nema xmatitaxtitilha diapositivas». Akni nina xtaxtu Foto-Drama makgapitsi películas na wa maklakaskinkgolh uma, pero ni kʼakgtuminika película xmaklakaskinkgonit, chu ni xtakilhtinit Biblia. Chu tlakg lhuwa tiku akxilhkgolh nixawa amakgapitsi películas, akxni kajku akgtum kata maxtuka, akxilhkgolh akgnajatsa millones latamanin kNorteamérica, kʼEuropa, kʼAustralia chu Nueva Zelanda.

«Foto-Drama» tsukuka matitaxtikan 11 xla enero kata 1914 kʼNueva York. Titaxtulh akgtujun papaʼ tsukulh xaPulana Guerra xLikalanka Katiyatni. Maski tsukulh uma guerra lhuwa latamanin kilakgolh akxni tamatitaxtilh «Foto-Drama» xlikalanka kkatiyatni chu tlan makgkatsikgolh kxlatamatkan xlakata talichuwinalh putum tuku nalimin xTamapakgsin Dios. Chuna la naʼakxilhputunkan, «Foto-Drama» lu xlakaskinka kitaxtulh kata 1914.