1, 2. 1) ¿Tukuya tamakgaxtokgat lu nalipaxuwakan kʼakgapun? 2) ¿Tukuya takgalhskinin naʼakxilhaw uku?

ANKGALHIN lin kilhtamaku xlakata natalakkaxwili tuku natatlawa kʼakgtum tamakgaxtokgat. Pero kalichuwinaw akgtum lu xlakaskinka tamakgaxtokgat, xla chatum mapakgsina. Kalilakpuwanti: ¡akgtiy mil kata lata lakkaxwilimaka! Chu la uku nialh makgas tsankga pi tsumat natatamakgaxtokga xlitatawilat. Ni makgas xchik Mapakgsina nalitatsamay tatlakgni chu lhuwa tiku xalak akgapun nakilhtlikgoy: «Paxkatsinilh Dios. Xampi mapakgsinan Dios nkimPuchinkan, wa nti nkgalhiy litliwakga. Kapaxuwaw, na kalikatasaw ntapaxuwan, chu na kamaxkiw nkakni; xampi chinitta xlitapuchuwat nkalhniluj [o Borrego]. Na xalanita [o takaxnit] wi ntsumat xlitatawilat» (Apoc. 19:6, 7).

² “Kalhnilu” tiku nalimin lhuwa tapaxuwan xtamakgaxtokgat wa kilhchanima Jesucristo (Juan 1:29). ¿La lhakgananit xlakata xtamakgaxtokgat? ¿Tiku tsumat nema natatamakgaxtokga? ¿La kaxyawakanit uma tsumat xlakata uma kilhtamaku? ¿Tukuya kilhtamaku natamakgaxtokgkgo? Katsiyaw pi uma tamakgaxtokgat lu nalipaxuwakan kʼakgapun, pero ¿na nalipaxuwakgo tiku  nalatamakgo kKatiyatni putum kilhtamaku? Lu katsiputunaw xtakgalhtin uma, wa xlakata kaʼakxilhparaw Salmo 45.

3, 4. 1) ¿La tasiya lhakgat nema wilinit Litatawilat tiku natamakgaxtokga? 2) ¿Tuku tlawa pi lu napaxuwa? 3) ¿Tiku kilhchanima «reina» chu «ixlaktsumajankan reyes» tiku na tapaxuwakgo Litatawilat?

³ (Kalikgalhtawakga Salmo 45:8, 9.) Litatawilat Jesucristo wilinit tlakg xatlan klhakgat xlakata natamakgaxtokga. Xlilat pi klhakgat nalimuksun «tlakg xatlan perfumes», la mirra chu casia, tuku xlilakkaxtlawakan aceite nema xlimaklakaskinkan xamakgan Israel xlakata nalaksakkan tuku xlakaskinka (Éx. 30:23-25).

⁴ Tatlakgni xalak akgapun nema takgaxmata kxchik mapakgsina tlawa pi tiku natamakgaxtokga tlakg nalipaxuwa xlakata talakatsuwima xtamakgaxtokgat. Uma na lipaxuwa «reina», kilhchanima xkachikin Dios kʼakgapun, litakgatsi «ixlaktsumajankan reyes», uma kilhchanima ángeles. Anta kʼakgapun wankan: «Kapaxuwaw, na kalikatasaw ntapaxuwan, [...]; sampi chinitta xlitapuchuwat nkalhniluj».

5. ¿Tiku uma «xpuskat nkalhniluj»?

⁵ (Kalikgalhtawakga Salmo 45:10, 11.) Katsiyaw tiku natamakgaxtokga, pero ¿tiku tsumat nema natatamakgaxtokga? Ni kaj chatum tsumat, kilhchanima xcongregación tiku kalaksakkanit. Cristo xAkgxakga uma congregación (kalikgalhtawakga Efesios 5:23, 24). Xlakan natamapakgsinankgo Cristo kTamapakgsin Mesiánico (Luc. 12:32). Uma 144,000 tiku kalilaksakkanit espíritu «stalanikgo nkalhnilu nkani kawa [niku] an» (Apoc. 14:1-4). «Xpuskat nkalhniluj» litaxtukgo chu akxtum tatawilakgo niku wi xputawilh kʼakgapun (Apoc. 21:9; Juan 14:2, 3).

6. 1) ¿Tuku xlakata kawanikan xatalaksakni «istsumat rey»? 2) ¿Tuku xlakata kawanikan pi nialh kalakapastakli xpulataman?

⁶ Tsumat tiku ama tamakgaxtokga ni kaj watiya wanikan “tsumat”, wata la «istsumat rey» (Sal. 45:13). ¿Tiku uma «rey»? Wa Jehová, xlakata wa tiku tlawa pi kstalaninanin Cristo «xlakgskgatan» kawankgolh (Rom. 8:15-17). Umakgolh xatalaksakni kawanikan: «Yan [o nialh] kalakapastakti mimpulataman y ixlitalakgapasni mintiku [xalak kkatiyatni]». Xlilakapastakatkan «wa ntu xala talhman, ni wa ntu xala katiyatna» (Col. 3:1-4).

7. 1) ¿La makaxtilhanit Cristo tiku xpuskat nawan? 2) ¿Tsumat, la akxilha tiku ama tatamakgaxtokga?

⁷ Chuna la titaxtunit lhuwa ciento kata Jesús makaxtilhanit tiku xpuskat nawan xlakata kilhtamaku akxni natamakgaxtokgkgo kʼakgapun. Apóstol Pablo wa pi «mpaxkilh nCristo nkgamputum nkanajlanin, chu na tiakstumastalh xpalakatakan. Lakimpi namasantujlikgoy lantla nalichakgakgoy ntachuwin ntu xtachuna mpala chuchut. Lakimpi nakstumakamastanikan nkgamputum nkanajlanin kxlakatin xtachuna lu[...] lilakgatit xlitatawilat ntu ni tu mpala pasanit, chu ni mpala tu nkgalhi winchulu, chu ntu mpala ayuj xtachuna; chi wampi lu[...] xasantujlani nawan, ni mpala tu pasanit» (Efes. 5:25-27). Pablo na kawanilh xatalaksakni kstalaninanin Cristo kCorinto xalamakgasa: «Xalakgkatsana nkit kmimpalakatakan lantla Dios nkalakgkatsanan. Xampi kkakgalhtinaninitan natatawilayatit nCristo, xtachuna mpi lu[...] man wa minchixkukan nawan, lakimpi nakkamakamastayan xpuskat nCristo nawanatit, xtachuna nchatum nti nkajku xaʼakgstitum tsumat» (2 Cor. 11:2). Litatawilat, Mapakgsina Jesucristo, “stlan” akxilha tiku ama tatamakgaxtokga xlakata xtakanajla. Chu tsumat litatawilat lilakgapasa la “xmalana” chu “takilhputani” tiku xchixku ama wan.

8. ¿Tuku xlakata wankan pi tsumat litatawilat «lilakgatit kaxyawakanit»?

⁸ (Kalikgalhtawakga Salmo 45:13, 14a.) Tsumat litatawilat «lilakgatit kaxyawakanit» xpalakata xtamakgaxtokgat. Anta kʼApocalipsis 21:2 tamalakxtumikan akgtum kachikin, xaSasti Jerusalén, chu wan pi «tlan xkaxya [...] nchatum ntsumat natatawila xlitatawilat». Uma kachikin xalak akgapun kgalhi «xmakgaxkgakganat Dios» chu lu makgskgo xtachuna «akgtum lu[...] lilakgatit chiwix, xtachuna nchiwix xla jaspe, lu[...] lakgskgakgay» (Apoc. 21:10, 11). Kʼlibro xla Apocalipsis akxni lichuwinankan xlistlan xaSasti Jerusalén lu lakswan tachuwin maklakaskinkan (Apoc. 21:18-21). ¡Wa xlakata salmista wan pi tsumat litatawilat «lilakgatit kaxyawakanit»! Uma chuna xlilat xlakata tamakgaxtokgat anta kʼakgapun tlawamaka.

9. 1) ¿Tiku uma «rey» nema linikan tsumat litatawilat? 2) ¿La lhakgananit uma tsumat?

⁹ Tsumat litatawilat linkan kxlakatin tiku ama tatamakgaxtokga, Mapakgsina Mesías. Xla “lichakganit ntachuwin ntu xtachuna mpala chuchut”, wa xlakata «xasantujlani [...], ni mpala tu pasanit» (Efes. 5:26, 27). Pero na xlilhakganat chuna la xlilat xlakata natamakgaxtokga. ¡Chu xlikana pi lhakgananit la xlilat! «Ixlhakgat litaxanatlin oro» chu «kun lakxanatwa lhakgat nalinkan nak ixlakatin rey». Xpalakata kilhtamaku akxni natatamakgaxtokga Borrego «xastlan lino ntilimalhakganikaj, xasyokgokgo, na xaslipwa, xampi wa xastlan lino, wa xtachuna nkilitaxtuy xatlan xtatlawkan ksantujlanin Dios» (Apoc. 19:8).

10. ¿Tukuya kilhtamaku natamakgaxtokga Borrego?

¹⁰ (Kalikgalhtawakga Apocalipsis 19:7, Hua Xasasti Talaccaxlan, TXS, 1999.) ¿Tukuya kilhtamaku natamakgaxtokga Borrego? Maski Biblia wa pi «xtaskin, [...] litakaxtayanit klhakgat» xpalakata natamakgaxtokga, versículos nema minkgo alistalh ni lichuwinan la natamakgaxtokga. Wata lichuwinama la nasputa lanka takatsanajwat (Apoc. 19:11-21). ¿Wamputun uma pi tamakgaxtokgat tlawakan akxni Mapakgsina Jesucristo, nina tlajanan? Ni chuna. Tuku tatsokgnit klibro xla Apocalipsis ni katsokgkanit chuna la xlititaxtutilhat. Anta kSalmo 45, tatsokgnit pi Mapakgsina tampatawakanita xʼespada chu “tlajanama nak guerra”, kamalakgsputuma xtalamakgasitsin, alistalh natlawakan xtamakgaxtokgat (Sal. 45:3, 4).

11. ¿Tuku nala akxni Cristo nina tamakgaxtokga?

¹¹ Wa xlakata, uma tuku nala. Pulana namasputukan «mpuskat» tiku sta xmakni, Babilonia xaLanka, putum nixaxlikana takanajla (Apoc. 17:1, 5, 16, 17; 19:1, 2). Alistalh, Cristo namalakgsputu xkakilhtamaku Akgskgawini kʼArmagedón, kilhchanima «ntlanka [x]kilhtamaku xliminat Dios nti mpaks kgalhiy xlitliwakga» (Apoc. 16:14-16; 19:19-21). Chu xaʼawatiya, Mapakgsina namakgatsi xtatlaja akxni namakan kxakapulhman Satanás chu xdemonios, nila tuku katikatlawanikgolh latamanin, la xanin nalitaxtukgo (Apoc. 20:1-3).

12, 13. 1) ¿Tukuya kilhtamaku natlawakan xtamakgaxtokgat Borrego? 2) ¿Tiku napaxuwakgo kʼakgapun xpalakata xtamakgaxtokgat Borrego?

¹² Kxaʼawatiya kilhtamaku akxni nikgo xatalaksakni kamalakastakwanikan kʼakgapun. Akxni nina makgas masputunit nawan Babilonia xaLanka, Jesús nakamamakxtumi kxpaxtun putum tiku litaxtu tsumat litatawilat (1 Tes. 4:16, 17). Putum tiku litakgatsi “tsumat litatawilat” natawilakgoyacha kʼakgapun akxni nina min guerra xla Armagedón. Akxni titaxtunita nawan uma guerra, tlan natlawakan xtamakgaxtokgat Borrego. ¡Xlikana pi lu lipaxuw nawan uma kilhtamaku! Apocalipsis 19:9, Hua Xasasti Talaccaxlan, [Coyutla], wan: «Kana lipaxuw amakgolh cristianos wanti kalilaksakkanit pi nataʼan  tamakgpaxkuajnan [...] nak xputamakgaxtokgni Cristo». Xlikana pi 144,000 tiku litakgatsi tsumat litatawilat lu napaxuwakgo. Chu Litatawilat lu nalipaxuwa pi makxtum nakatatawila putum tiku natamapakgsinankgo kʼakgapun (Luc. 22:18, 28-30). Pero ni kajwatiya Litatawilat chu tsumat lu lipaxuwakgo uma tamakgaxtokgat.

¹³ Chuna la akxilhwi, lhuwa ángeles nakilhtlikgo kʼakgapun: «Kapaxuwaw, na kalikatasaw tapaxuwan, chu na kamaxkiw kakni, xampi chinitta xlitapuchuwat Kalhniluj, naxalanita wi ntsumat xlitatawilat» (Apoc. 19:6, 7). ¿Chu xlakskujni Jehová tiku wilakgo kKatiyatni? ¿Na nakatapaxuwakgo?

14. ¿Tiku uma «laktsumajan» nema talichuwinan kSalmo 45?

¹⁴ (Kalikgalhtawakga Salmo 45:12, 14b, 15.) Palakachuwina Zacarías wa pi xaʼawatiya kilhtamaku latamanin xalak lakalhuwa kachikinin makxtum xʼamakgo talakgo Israel xaʼespiritual. Tsokgli: «Namin kilhtamaku nala pi kgalhakaw lakchixkuwin xalak tipalhuwa kachikinin chu tipalhuwa xtachuwinkan nachipakgo, chuna, nachipakgo klhakgat chatum chixku tiku judío, chu nawankgo: “Xlikana nakkataʼanan, xlakata kkgaxmatnitaw pi Dios katalaman”» (Zac. 8:23). Anta kSalmo 45:12 wan pi «kgalhakaw lakchixkuwin» kilhchanima «laktsumajan xala nak Tiro» chu «ricos» xalak kachikin. Xlakan kamakgtayakgo xatalaksakni tiku wilakgojku kKatiyatni chu putsakgo xtamakgtaykan xlakata naskujnanikgo Jehová. Lata kata 1935, lhuwa millón latamanin mastakgonit talakaskin pi xatalaksakni kstalaninanin Cristo “nakaliminkgo kxaʼakgstitum” (Dan. 12:3). Tiku kamakgtayakgo kstalaninanin Cristo xatalaksakni, mapanukgonit kxlatamatkan putum tuku xmaxkajwanilh  xtakanajlakan, wa xlakata kawanikan laktsumajan. Umakgolh «laktsumajan» tiku stalanimakgo tsumat litatawilat, tamakamastanikgonit Jehová chu ni makgxtakgkgo Mapakgsina Jesucristo.

15. ¿Tuku tlawakgonit «laktsumajan» xlakata namakgtayakgo xatalaksakni tiku wilakgolhku kKatiyatni?

¹⁵ Uma tiku litakgatsi tsumat litatawilat nema wilakgolhku kKatiyatni lu paxtikatsinikgo xtamakgtaykan uma «laktsumajan» xlakata lichuwinankgo xlikalanka Katiyatni uma «xalaksasti tamakatsin xla xtamapakgsin Dios» (Mat. 24:14, TNM). Ni kajwatiya «spiritu chu tsumat litatawilat wankgoy: “Katat”», nachuna tiku kgaxmatkgo wankgo: «Katat» (Apoc. 22:17). Chuna, “amakgapitsi borrego” kgaxmatkgonit akxni xatalaksakni wankgo «Katat» chu makgtayanankgo namalakgatumikgo uma tamakatsin kKatiyatni (Juan 10:16, TXS, 1999).

16. ¿Tuku talakgalhaman kamaxkinit Jehová amakgapitsi borregos?

¹⁶ Xatalaksakni kapaxkikgo “amakgapitsi borrego” chu lipaxuwa pi Jehová, xTlat Litatawilat kamaxkinit talakgalhaman pi nalipaxuwakgo xtamakgaxtokgat Borrego. Uma «laktsumajan» tiku stalanimakgo tsumat litatawilat «[xa]tapaxuwan natamin». Chuna, amakgapitsi borregos tiku nalatamakgo kKatiyatni na napaxuwakgo chuna la putum kakilhtamaku akxni natamakgaxtokga Borrego kʼakgapun. Lu xlilat pi Apocalipsis wan pi uma «lhuwa tachixkuwitat», tiku skujnikgo Dios kKatiyatni, yakgo «kxlakatin laktawilh mpumapakgsin chu na kxlakatin nkalhnilu». Umakgolh skujnimakgo Dios kxkilhtin xtemplo xaʼespiritual (Apoc. 7:9, 15).

17, 18. 1) ¿Tuku nakitaxtu xlakata xtamakgaxtokgat Borrego? 2) ¿Tiku nalitaxtukgo xkamanan Cristo kxTamapakgsin xaʼAkgtum Mil Kata?

¹⁷ (Kalikgalhtawakga Salmo 45:16.) «Laktsumajan» tiku stalanimakgo tsumat tiku natatamakgaxtokga Cristo kʼakgapun, tlakg nalipaxuwakgo akxni naʼakxilhkgo tuku nakitaxtu kxasasti kakilhtamaku xlakata uma tamakgaxtokgat. Jesucristo nakamalakastakwani “xnatikun”, o xnatlatni, tiku nalitaxtukgo la “xkamanan” xalak katutsu (Juan 5:25-29; Heb. 11:35). Makgapitsi «príncipes» nakatlawa xlikalanka Katiyatni. Nachuna, max nakalaksaka makgapitsi lakgkgolotsin xala uku xlakata napulalinkgo taskujut kxasasti kakilhtamaku (Is. 32:1).

¹⁸ Anta kxTamapakgsin xaʼAkgtum Mil Kata, Cristo nalitaxtu xnatlatni amakgapitsi latamanin. ¿Tuku xlakata? Xlakata tiku namakglhtinankgo latamat putum kilhtamaku nakamaxkikan xpalakata kanajlanikgo xtamakamastan Jesucristo (Juan 3:16). Chuna nalitaxtu «Tlat tiku putum kilhtamaku wi» (Is. 9:6, 7).

19, 20. ¿Tuku kamamakgkatsini kstalaninanin Cristo xala uku xlakata tuku lilakgatit nala nema lichuwinan Salmo 45?

¹⁹ (Kalikgalhtawakga Salmo 45:1, 17.) Chuna la akxilhaw, tuku lalh nema lichuwinan Salmo 45 lu xlakaskinka xlakata kstalaninanin Cristo. Xatalaksakni tiku wilakgolhku kKatiyatni lu lipaxuwakgo pi nialh makgas naʼankgo kʼakgapun xlakata natatamakxtumikgo xnatalan chu xLitatawilat. Amakgapitsi borregos tlakg xatapaxuwan kgalhakgaxmatkgo xMapakgsinakan, paxtikatsinikgo uma lanka talakgalhaman pi akxtum taskujkgo xatalaksakni tiku lamakgolhku kKatiyatni. Akxni tamakgaxtokgnita nawan, Cristo chu tiku natamapakgsinankgo lhuwa tasikulunalin nakamaxkikgo latamanin nema nipara tsinu lakpuwanaw la xlilhuwa nawan (Apoc. 7:17; 21:1-4).

²⁰ Akxni lakpuwanaw tuku aku nala, chu la nakgantaxtutilha «xatlan tachiwin» xlakata xTamapakgsin Mesías, ¿ni xlikana pi makatsininamputunaw xtukuwani? Wa xlakata, ¡kamalankiw Mapakgsina «kanikxniwa», putum kilhtamaku!