Kalilakpuwanti uma atanu. Akgtum tamakgaxtokgat wanikgo tala puskat tiku xakstu kakuentajtlawa chatiy laktsu xkamanan pi akxtum kakatawayankgolh kakgotanon. Akxni kawanikan, laktsu kamanan lu paxuwakgo. Lakaskinkgo pi kachalha ama kilhtamaku. Pero, akxni tsankga akgtum kilhtamaku, tamakgaxtokgat wanikgo uma familia pi wi tuku lalh chu nila akxtum nawayankgo. Alistalh, uma tala katsilh tuku xlanit. Akxni xlakkaxlakgonita, uma tamakgaxtokgat kawanika pi akxtum xkatawayankgolh atanu xʼamigoskan watiya ama kilhtamaku chu xlakan wankgolh pi tlan.

Xlikana kstalaninanin Cristo kilimakgantaxtitkan tuku wanaw. Akxni wi tuku litayayaw ni kajwatiya nawanaw “tlan chu alistalh nialh namakgantaxtiyaw wantu litayayaw” (2 Cor. 1:18, Hua Xasasti Talaccaxlan, TXS, 1999). Pero, chuna la limasiya umakgolh liʼakxilhtit, ni lakxtum tuku titaxtuyaw. Max namin kilhtamaku xlikana natalakaskin nalaktlawayaw tuku litayanitaw. Apóstol Pablo chuna titaxtulh.

Akxni Pablo xwi kʼÉfeso kkata 55, akxni xlimakgtutu xʼanit lichuwinantapuli Dios, xpatakutputun pupunu Egeo, xʼamputun kʼCorinto chu alistalh kʼMacedonia. Akxni xkitaspitli kJerusalén, xlakpuwanit naʼan kCorinto xlimakgtiy, xlakata max natalan xalak ama kachikin xmaxkikgolh tumin nema xatapaxuwan xʼama malakgachanikgo natalan kJerusalén (1 Cor. 16:3). Chuna wan 2 Corintios 1:15, 16: «Xpalakata mpi aktanks xakkatsi yuma, wa xapulh xakka[t]ilakgataxtuputunan, lakimpi aktiyu nalipaxuwayatit. Sampi ktipuwa mpi akxni kkatilakgtaxtunitana nawan, nakan chi nchu kMacedonia; akxni nchu naktaspita kMacedonia, nakkalakgmimpalayan numaja nakminaw nchu kJudea».

 Max kmaktum carta nema xkamalakgachaninit, xkawaninit natalan xalak Corinto tuku xlakpuwanit natlawa (1 Cor. 5:9). Pero, akxni nina makgas xkatsokgninit uma carta, Cloe chu tiku xalak xchik makatsinikgolh pi kcongregación xalak Corinto xʼanan laklanka taʼakglhuwit (1 Cor. 1:10, 11). Wa xlakata, Pablo lakgpalilh tuku xlakapastaknit natlawa chu tsokgli carta nema uku lilakgapasaw xaPulana carta nema kamalakgachanilh corintios. Kʼuma carta xatalakgalhaman kastakyawalh natalan. Na kawanilh pi lakgpalilh niku xʼama an, pulana xʼalh kMacedonia chu alistalh kCorinto (1 Cor. 16:5, 6). *

Akxni kstalaninanin Cristo xalak Corinto makglhtinankgolh xcarta takgateksa pi akxni, makgapitsi nema «[x]litaxtukgoy laktlanka apóstoles» xalak congregación wankgolh pi Pablo ni xmakgantaxtiy xtachuwin. Akxni Pablo akstu palakachuwinanka, kgalhskininalh: «Chuna mpi akxni ktilakapastakli naktlaway yuma, ¿p[i] kaj kawa takgaman klitlawalh? Su wantu klakapastaka naktlaway, ¿p[i] xtachuna chu klakapastaka naktlaway lantla amakgapitsin nchixkuwin xala katuxawat, lantla wankgoy: “Xlikanaj” wampi wa kxtapuwan, ni katsi lapi chuna?» (2 Cor. 1:17; 11:5).

¿Kaj ni xlakaskinka xakxilha Pablo tuku xwanit natlawa? ¡Ni chuna! Tachuwin «kaj kawa takgaman» akxni tamatitaxti kʼatanu tachuwin wamputun tuku ni lipawankan chu wa lilakgapaskan tiku ni makgantaxti xtachuwin. Pablo wa: «Wantu klakapastaka naktlaway, ¿p[i] xtachuna chu klakapastaka naktlaway lantla amakgapitsin nchixkuwin xala katuxawat?». Uma takgalhskinin xkamakgtayalh natalan xalak Corinto xakxilhkgolh pi Pablo ni lakgpalilh tuku xʼama tlawa kaj xlakata ni xlakaskinka xakxilha tuku xwanit.

Pablo lakatanks kakgalhtilh: «Stalanka katsiy Dios pi kin ni chuna kgalhchuwinanaw pala nakwanaw “Tlan”, chu alistalh chu nialh kmakgantaxtiyaw wantu klitayayaw» (2 Cor. 1:18, TXS, 1999). Pablo lakgpalilh tuku xlakpuwanit natlawa xlakata xlakaskin lu tlan xkakitaxtunilh natalan xalak uma kachikin. Anta 2 Corintios 1:23 wan pi chuna xtlawanit xlakata “xkalakgkatsan”. Xlakata chuna tlawalh, kamaxkilh kilhtamaku xlakkaxtlawakgolh taʼakglhuwit akxni xla nina xkalakgan. Chu akxni xwi kMacedonia, lu lipaxuwalh akxni Tito makatsinilh pi carta nema xkamalakgachaninit natalan xalak Corinto xkamakgtayanit chuna la xlakaskin: xtlawanit pi nitlan xlimakgkatsikgolh tuku nitlan xtlawamakgolh (2 Cor. 6:11; 7:5-7).

Tuku xlimawakamaka Pablo xkilhchanima pi komo nila xkanajlanikan akxni xwan tuku xʼama tlawa, na nila xkanajlanikan akxni xlichuwinan Dios. Pero, xla kamalakapastakalh natalan xalak Corinto pi xkalitachuwinanit tuku Jesucristo xmasiya. Kawanilh: «Xampi kin [kstalaniyaw] yama Jesucristo wanti Silvano, Timoteo, chu kit kliʼakgchuwinanaw, xlikana pi wa xKgawasa Dios, chu xla nitu malaknuy wantu ni katimakgantaxtilh» (2 Cor. 1:19, TXS, 1999). Jesucristo, xliʼakxilhtit Pablo, putum tlan xkanajlanikan. Putum kilhtamaku lichuwinalh tuku xaxlikana, kxlatamat chu akxni xlichuwinan Dios (Juan 14:6; 18:37). Komo putum tuku lichuwinalh Jesús xlikana xwanit chu tlan xkanajlakan, chu Pablo na wa tuku xlichuwinan, uma xkilhchanima pi tuku xlichuwinan apóstol na tlan xkanajlakan.

Jehová “makgantaxti tu malaknu natlawa” (Sal. 31:5). Chuna masiya tachuwin nema Pablo tsokgli alistalh: «Xampi wa xlipaks xtamalaknun Dios, litatakgsniy nCristo mpi xlikanaj». Xlakata Jesús ni makgatsankgananilh Dios akxni xlama unu kKatiyatni uma tlawalh pi nila xlakpuwanka pi tuku Jehová wanit natlawa ni katikgantaxtulh. Pablo wampara: «Na wa xpalakata [Jesús] liwanaw; “Chuna kalalh”, nalimaxkiyaw nkakni Dios» (2 Cor. 1:20). Jesús wa tiku limapakuwikan «Chuna kalalh», tiku tlan likanajlakan pi nakgantaxtu putum tuku Jehová wanit natlawa.

 Xtachuna la Jehová chu Jesucristo nikxni akgsaninankgo, Pablo xwan tuku xlikana xmakgantaxtiputun (2 Cor. 1:19). Ni xlitaxtu tiku nila xkanajlanikan, xtachuna «nchixkuwin xala katuxawat» (2 Cor. 1:17). Wata “spiritu lilatamalh” (Gál. 5:16). Putum tuku xtlawa xlimasiya pi xkapaxki amakgapitsin. Akxni xwan tlan xwamputun tlan.

La uku tiku ni kuentajtlawakgo xtastakyaw Biblia wi tuku wankgo pi natlawakgo chu ni makgantaxtikgo komo wi tuku la, nema ni lu xlakaskinka o akxni kalakgchin tuku tlakg lakgatikgo. Akxni latatlawakan negocio, ni putum kilhtamaku makgantaxtikan tuku wankan, maski tsokgwilikanit. Lhuwa latamanin nialh akxilhkgo tamakgaxtokgat la akgtum talakkaxlan nema tlawakgo lichatiy chu xlimakgapalat putum xlatamatkan. Xlakata lhuwa lakxtlawakgo xtamakgaxtokgatkan kxlakatinkan mapakgsinanin, uma limasiya pi ni lu xlakaskinka akxilhkgo tamakgaxtokgat chu lakpuwankgo pi tlan lakapala lakxtlawakan (2 Tim. 3:1, 2).

Akxni wi tuku wana, ¿xlikana makgantaxtiya? Chuna la akxilhwi akxni tsukulh uma artículo, namin kilhtamaku xlikana natalakaskin nalakxtlawayaw tuku wanitaw natlawayaw, ni xlakata ni xlakaskinka akxilhaw, wata xlakata wi atanu tuku ni kinkamaxkiyan talakaskin. Pero komo kstalanina Cristo tiku wi tuku litaya, xlikana xlimakgantaxtit (Sal. 15:4; Mat. 5:37). Komo chuna natlawa, nalilakgapaskan pi makgantaxti tuku wan, putum kilhtamaku wan tuku xaxlikana, chuna tlan kanajlanikan (Efes. 4:15, 25; Sant. 5:12). Komo naʼakxilhkgo amakgapitsi pi tlan lipawankana, max na nakgaxmatniputunkgoyan akxni nakalitachuwinana xTamapakgsin Dios. Wa xlakata, akxni wi tuku nawana, kamakgantaxti.