Chatum tlat xalak Brasil wan: «Lu klipaxuwayaw kakninaniyaw Dios kfamilia, nipara kmakgkatsiyaw la titaxtu hora». Chatum tlat xalak Japón wan pi xkgawasa tiku kgalhi 10 kata ni makgkatsi la titaxtu hora chu ni lakaskin namakgalhsputukgo. ¿Tuku xlakata? Xatlat wan: «Lu lakgati tlawa chu makgapaxuwa».

Xlikana, ni putum kamanan lu lakgatikgo. Makgapitsi ni paxuwakgo akxni kakninanikgo Dios kfamilia. ¿Tuku xlakata? Xlakata lakgachanikgo. Chatum tlat xalak Togo wan pi «ni xlilat nalakgachanikan akxni kakninanikan Jehová». Pero, komo chuna makgkatsikgo, ¿wa xlakata la tlawakan? Lhuwa familias akxilhkgonit pi kakninanikan Dios kfamilia, tlan litaxtu la wa Isaías xlakata sábado, «wantuku lu lipaxuwakan» (Is. 58:13, 14).

Natlatni tiku kstalaninanin Cristo katsikgo pi familia nalipaxuwakgo uma kilhtamaku komo anan tapaxuwan. Ralf, tiku kgalhtutu xlaktsuman chu chatum kgawasa, wan pi akxni kakninanikgo Dios kfamilia tasiya la kaj kgalhchuwinamakgo chu ni la akgtum takgalhtawakga; xputumkan wi tuku wankgo. Xlikana, max tuwa natlawakan anta natawilaputunkgo chu kuenta natlawakgo. Chatum tse wan: «Ni putum kilhtamaku kkgalhi litliwakga xlakata nalipaxuwakan takaknin kfamilia chuna la xaklakaskilh». ¿Tuku tlan natlawakgo natlatni xlakata tlakg nalakgatikgo xkamanan?

Tlat xalak Alemania tiku chatiy xkamanan wan: «Komo natalakaskin tlan wi tuku nalakgpaliyaw». Natalia tiku kgalhi chatiy laktsuman, wan: «Tuku tlakg xlakaskinka kakxilhaw wa pi ni watiya watiya tuku naktlawayaw wata klakgpaliyaw». Lhuwa familias pulaklhuwa la  mapitsikgo xtakgalhtawakgakan. Cleiton, xalak Brasil, tiku kgalhi chatiy kamanan wan: «Uma tlawa pi tlakg xalipaxuw nawan chu putum nachuwinankgo». Xlakata tlan nakamakgtayakgo la maklakaskinkgo, natlatni tlan namapitsikgo takgalhtawakga komo tanu tanu xkatakan kamanan. Natlatni tlan nalakpuwankgo tuku maklakaskinkgo chatunu xalak xfamilia chu natalakgpali komo natalakaskin, tuku nakatalikgalhtawakgakgo chu la natlawakgo.

Xlakata xtakgalhtawakgakan ni watiya watiya nawan, ¿tuku tlawakgo makgapitsi familias? Makgapitsi akxni matsukikgo, kilhtlinikgo Jehová. Juan xalak México wan: «Uma tlawa pi nakpaxuwayaw chu kinkamakgtayayan naklilakpuwanaw tuku naklikgalhtawakgayaw». Xfamilia laksakkgo takilhtlin nema lichuwinan tuku nalikgalhtawakgakgo ama katsisni.

Atanu familias makxtum likgalhtawakgakgo pulaktum tuku xalak Biblia. Xlakata ni kaj pulaktum la natlawakan, xchatunukan kamapitsinikan nalikgalhtawakgakgo tuku wankgo tiku tanu tanu talichuwinanama. Chatum tlat xalak Japón wan pi pulana ni lu xlakgati akxni chuna xkgalhtawakgakgo. Pero chatiy xkamanan lu xlipaxuwakgo akxni xʼakxilhkgo pi xnatlatnikan xlakgatikgo wi tuku akxtum xkatatlawakgo. Makgapitsi familia tlawakgo tuku tlawakgolh tiku talichuwinama tuku likgalhtawakgamakgolh kBiblia. Roger, xalak Sudáfrica tiku chatiy kamanan wan: «Akxni wi tuku likgalhtawakgakan kBiblia kamanan akxilhkgo tuku natlatni ni xakʼakxilhnitaw».

Tuku na tlan natlawakan, wa akgtum aktsu arca la nema titlawalh Noé o templo nema titlawalh Salomón. Max kaks nalilakawankan akxni liwana nalakputsanankan xlakata uma. Anta kʼAsia, chatum aktsu tsumat tiku kgalhi akgkitsis kata, xnatlatni chu xnana, o xtsiyuna, tlawakgolh akgtum takgaman nema masiya niku apóstol Pablo lichuwinantapulilh Dios. Atanu familias tlawakgonit takgaman nema takilhti klibro xla Éxodo. Donald, xalak Togo, tiku kgalhi 19 kata wan: «Xlakata pulaklhuwa la kkakninaniyaw Dios kfamilia uma tlawa pi tlakg lilakgatit nawan chu kinkamakgapaxuwayan». Xlakata tlakg nalipaxuwayatit la nakakninaniyatit Dios kfamilia, ¿wi tuku min kmintalakapastakni nema tlan xtlawatit?

Maski tlakg lilakgatit lakgpalitilhakan la kakninanikan Dios kfamilia, xlakata xlikana nalitamakgtayakan, talakaskin pi pulana nalikgalhtawakgakgo tuku naʼakxilhkgo. Min kilhtamaku kamanan tuwa namakgkatsikgo nakgalhtawakgakgo lhuwa horas, wa xlakata xatlat xlilakpuwanat tuku natlawakgo chu nalimaxtu kilhtamaku xlakata nalakkaxwili. Chatum tlat wan: «Akxni liwana klakkaxwili, putum lipaxuwakgo». Chatum tlat xalak Alemania kawani xfamilia tuku nalikgalhtawakgakgo semanas nema aku mimakgolh. Chu kʼBenín, kʼakgtum familia niku kgalhikan kgalhchaxan kamanan min kilhtamaku akxilhkgo akgtum DVD akxni kakninanikgo Dios. Chu xlakata putum nakatsikgo tuku naʼakxilhkgo, xatlat kamaxki maktum kapsnat niku limin takgalhskinin nema xlikgalhtitkan. Xlikana, tlakg tlan kitaxtu akxni pulana akxilhkan tuku nalikgalhtawakgakan.

Komo putum katsikgo tuku natalikgalhtawakga tlan nalichuwinankgo chuna la natitaxtutilha kilhtamaku chu nalakaskinkgo kachalh ama kilhtamaku. Komo chatunu chatunu wi tuku kalakgchan, namakgkatsikgo pi lu xlakaskinka tuku nalitaxtukgo akxni kakninanikgo Dios kfamilia.

Lhuwa familias tuwa makgkatsikgo nakakninanikgo Dios kfamilia akgatunu semana.

Lhuwa natlatni lhuwa horas skujkgo xlakata nakakchani akgtum papaʼ, la chatum tlat xalak México tiku taxtu kxchik kamakgchaxan tsisa chu chin asta kamakgtsayan hora katsisni. Namin kilhtamaku natalakaskin nalakgpalikan kilhtamaku chu hora xlakata wi tuku natatlawa kxkachikin Dios.

Maski wi tuku tuwa nala talakaskin nalakkaxwiliyaw pi nakakninaniyaw Dios kfamilia akgatunu semana. Anta kʼTogo, chatum aktsu tsumat wanikan Loïs tiku kgalhi 11 kata wan: «Maski min kilhtamaku ni sokg kmatsukiyaw xlakata wi tuku kinkamamakgapalin, ni kmastayaw talakaskin ni nakkgalhtawakgayaw». Xlakata ni namakgatsankgayaw kintakgalhtawakgakan tlan nawan natlawayaw akxni tsukuma semana, chuna komo wi tuku nakinkamalaktlawiyan, tlan natlawakan atanu kilhtamaku xla semana.

Chuna la litapakuwi, kakninanikan Dios kfamilia na litaxtu takaknin nema maxkiyaw Jehová. Kaliskujti xlakata akgatunu semana putum xalak mifamilia nalimalankikgo Jehová «xalakgskgata toros xla [x]kilhnikan» (Os. 14:2). Kaliskujti xlakata putum nalipaxuwakgo uma kilhtamaku, «xlakata xtapaxuwan Jehová wa mimputatsekgnikan» (Neh. 8:9, 10).