1. ¿Tukuya kachikin tawilalh xlakgxokgo apóstata Israel? (Kaʼakxilhti xapulana dibujo.)

JEHOVÁ lakkaxwililh congregación xla kstalaninanin Cristo kxapulana siglo chu uku lakkaxwiliparanit xaxlikana takaknin. Artículo nema titaxtulh katsiw pi xasasti kachikin xla kstalaninanin Cristo tawilalh xlakgxokgo kachikin apóstata Israel nema xlaksakkanit xlakata xlilh xtukuwani Jehová. Xlakata xkgalhi xtamakgtay Dios, uma xasasti kachikin lakgtaxtulh akxni masputuka Jerusalén kkata 70 (Luc. 21:20, 21). Tuku lalh kxapulana siglo litasiyalh tuku xʼama titaxtukgo kskujnin Jehová la uku. Xkakilhtamaku Satanás nialh makgas namasputukan, pero xkachikin Dios nalakgtaxtukgo «[k]xaʼawatiya kilhtamaku» (2 Tim. 3:1, TNM). ¿Tuku xlakata liwana katsiyaw pi chuna nala?

2. 1) ¿Tuku wa Jesús xlakata «tlanka takatsanajwat»? 2) ¿La natsuku «tlanka takatsanajwat»?

² Uma tuku wa Jesús xlakata akxni xʼama kinkatatawilayan chu xlakata xaʼawatiya kilhtamaku: «Wij nawan tlanka takatsanajwat, lantla niukxniku alay xtachuna, hasta akxni Dios timalakatsukilh katuxawat, chu nialh ukxni pala chuna katianampa alistalh» (Mat. 24:3, 21, Hua Xasasti Talaccaxlan, 1999). Lanka takatsanajwat natsuku akxni Jehová nakalimaklakaskin mapakgsinanin  xlakata namasputukgo «xatlanka Babilonia», putum nixaxlikana takanajla (Apoc. 17:3-5, 16). ¿Tuku nala alistalh?

3. Akxni masputukanita nawan nixaxlikana takanajla, ¿tuku nakatlawaniputunkan xkachikin Jehová?

³ Akxni masputukanita nawan nixaxlikana takanajla, Satanás chu xkakilhtamaku nakamasputuputun kskujnin Jehová. Biblia wanit xlakata «Gog xalak kxtiyat Magog»: «Chu wix xlikana nakalakgpina. La akgtum lanka un natanuyapi. Nalitaxtuya la puklhni nema tlawa pi puks natawila katiyatni, wix chu putum tiku tatayakgoyan chu lhuwa kachikinin tiku nataminkgoyan». Xlakata nitu kgalhikgo soldados chu akgtum kachikin nema ni tlawa guerra, natasiya pi xtatayananin Jehová lakapala nakamasputukan. Pero, ¡lu nitlan nakakitaxtuni tiku nakatlawaniputunkgo tuku nitlan! (Ezeq. 38:1, 2, 9-12.)

4, 5. ¿Tuku natlawa Jehová akxni Satanás namasputuputun xkachikin?

⁴ ¿Tuku natlawa Jehová akxni Satanás namasputuputun xkachikin? Nalimasiya pi wa lakgchan namapakgsinan, nakinkamakgtayayan. Komo katlawanimaka tuku nitlan kskujnin, wa Jehová tlawanimaka tuku nitlan (kalikgalhtawakga Zacarías 2:8). Wa xlakata kinTlatkan xalak akgapun lakapala nakinkalakgmaxtuyan. Akxni xkakilhtamaku Satanás masputukanita nawan kʼArmagedón, kʼguerra nema «ntlanka [x]kilhtamaku xliminat Dios nti mpaks kgalhiy xlitliwakga», ama kilhtamaku xlikana nalakgtaxtu xkachikin Dios (Apoc. 16:14, 16).

⁵ Xpalakata uma guerra Biblia wan: «“Jehová katakgalhi kachikinin akgtum taʼakglhuwit. Wa Jehová tiku nakatalakkaxla putum latamanin. Chu putum tiku lixkajnit likatsikgo, espada nakalimasputu”, chuna wanit Jehová. Wa uma tuku wanit Jehová wa tiku mapakgsi lhuwa soldados: “¡Kakgaxpattit! Naʼanan talakgaputsit akgatunu akgatunu kachikin, chu akgtum lanka un naliminkanacha asta niku tlakg lakgamakgat kkatiyatni. Chu tiku Jehová nakamakgni ama kilhtamaku natawilakgo xlikalanka katiyatni. Niti nakalakgtasa, niti nakasaka chu niti nakamaknu, [o nakamuju]. Natawilakgo la kgatsasa kkatiyatni”» (Jer. 25:31-33). Xkakilhtamaku Satanás namasputukan kʼArmagedón. Pero xkachikin Jehová nalakgtaxtu.

6, 7. 1) ¿Niku minkgonitancha tiku litalakgapaskgo «lhuwa tachixkuwitat»? 2) ¿La talhuwinit xkachikin Dios kata nema aku titaxtukgonit?

⁶ Xkachikin Dios xalak katiyatni chuntiya stakma, xlakata tiku tapakgsikgo anta, akgstitum linkgo xlatamatkan chu Dios tlan kaʼakxilha. Biblia liwana kinkawaniyan pi «nkimPuchinakan, [kaʼakxilha] wanti ntlan ntu ntlawakgoy, chu na akgaskgalalh [kakgaxmatni] xʼoracionkan» (1 Ped. 3:12). Tiku tlawakgo tuku tlan na kilhchanima «lhuwa tachixkuwitat», lu lhuwa latamanin tiku nalakgtaxtukgo «[k]tlanka takatsanajwat» (Apoc. 7:9, 14). ¿Lakpuwanita pi na tlan nalakgtaxtuya akxni umakgo lhuwa latamanin nalakgtaxtukgo?

⁷ ¿Niku minkgonitancha tiku litalakgapaskgo lhuwa latamanin? Kamamakxtumimaka xalak lakalhuwa kachikinin chuna la Jesús xwanit pi xʼama lay chu uma xʼama litasiya pi kinkatawilan: «Umakgolh xalakwan xalaksasti tamakatsin xla xtamapakgsin Dios natalichuwinan kputum katiyatni xlakata natamakatsininan kputum laklanka kachikinin; chu alistalh namin lisputni» (Mat. 24:14, TNM). Kxaʼawatiya kilhtamaku, wa uma tlakg xlakaskinka taskujut  nema tlawama xkachikin Dios, wa xlakata lhuwa millón latamanin katsinikgonit la nalikakninanikgo Dios «espíritu chu xaxlikana» (Juan 4:23, 24). Akgtum liʼakxilhtit, kata 2003 asta 2012, liwaka 2,707,000 tiku tamakamastanikgolh Dios chu tamunukgolh. La uku xlikalanka katiyatni wilakgo liwaka 7,900,000 xTatayananin Jehová, chu lhuwa millón tiku na katatamakxtumikgo, liwaka akxni lakapastakkan akxni tinilh Cristo. Katsiyaw pi lakapala stakma xkachikin Dios ni xlakata kintaskujutkan, wata «wa Dios nti mastakay» (1 Cor. 3:5-7). ¡Lu lipaxuwayaw pi kata kata tiku litalakgapaskgo lhuwa latamanin talhuwimakgo!

8. ¿Tuku xlakata kkinkilhtamakujkan, xkachikin Dios lu staknit?

⁸ Kskujnin Dios lu talhuwimakgolh xlakata wa Jehová tiku kamakgtayama (kalikgalhtawakga Isaías 43:10-12). Xwankanit: «Tiku ni lu lhuwa akgtum mil nawan, chu tiku xaʼaktsina akgtum tliwakga kachikin nawan. Akit, Jehová, nakmalakapali kxkilhtamaku» (Is. 60:22). Pulana, tiku kalaksakkanit naʼankgo kʼakgapun wa «tiku ni lu lhuwa» xwankgonit, pero Jehová sikulunatlawalh la xlichuwinankgo xTamapakgsin chu talhuwilh tiku kalaksakkanit naʼankgo kʼakgapun (Gál. 6:16). Xkachikin Jehová chuntiya stakma chuna la kamamakxtumimaka lhuwa latamanin.

9. ¿Tuku kilitlawatkan xlakata tlan namakgamakglhtinanaw tuku Jehová kinkawaniyan pi nakinkamaxkiyan?

⁹ Komo litaxtuyaw tiku naʼankgo kʼakgapun o tiku litalakgapaskgo lhuwa latamanin, Jehová kinkawaniyan pi nakinkamaxkiyan tlan latamat kkilhtamaku nema aku mima. Pero xlakata tlan namakglhtinanaw, kilimakgantaxtitkan xlimapakgsin Dios (Is. 48:17, 18). Kalilakpuwaw israelitas. Akxni xkgalhakgaxmatkgo Limapakgsin nema xmaxkikanit Moisés xlitamakgtayakgo, xlakata xkgalhi tipalhuwa laktlan tastakyaw xla latamat, xlakata talakgxtumit, akxni tlawakan akgtum negocio, la nakamakgastakkan kamanan chu la nakalikatsinikan amakgapitsin (Éx. 20:14; Lev. 19:18, 35-37; Deut. 6:6-9). La uku, xlimapakgsin chu xtastakyaw Jehová na kinkamakgtayayan. Chu ni akgtum takuka (kalikgalhtawakga 1 Juan 5:3). Komo nakgalhakgaxmatnanaw, napaxuwayaw kkilatamatkan chu wantuku tlakg xlakaskinka, kintakanajlakan tlakg nastaka (Tito 1:13).

10. ¿Tuku xlakata talakaskin nalimaxtuyaw kilhtamaku nalikgalhtawakgayaw Biblia chu nakakninaniyaw Dios kfamilia?

¹⁰ Xkachikin Jehová xalak katiyatni pulaklhuwa la tlakg tlan tawilama. Akgtum liʼakxilhtit, chali chali tlakg liwana akgatekgsaw tuku xaxlikana. Chuna xlilat, xlakata «xtijikan tiku xaʼakgstitum tsinu tsinu tsuku tlakg kaxkgakga asta akxni liwana kaxkgakgakgo» (Prov. 4:18). Wa xlakata, akstu kakinkakgalhskinkan: «¿Kkaʼakgatekgstilhama xalaksasti taʼakgatekgsni xalak Biblia? ¿Klikgalhtawakga Biblia chali chali? ¿Lu klikgalhtawakgaputun akxni taxtu xasasti likgalhtawakga? ¿Klimaxtunit akgtum kilhtamaku xla semana xlakata nakkakninani Dios kfamilia?». Tlawakan uma ni lu tuwa, kajwatiya talakaskin liwana nalakkaxwiliyaw kinkilhtamakujkan. Lu xlakaskinka chuntiya nalikgalhtawakgayaw Biblia, nalilatamayaw tuku katsiniyaw chu akxtum nataskujaw xkachikin Dios, liwaka la uku xlakata lu lakatsu wi lanka takatsanajwat.

11. ¿La litamakgtayanit xkachikin Dios akxni tamakxtumikgo xlakata nakakninanikgo Jehová?

¹¹ Xkachikin Jehová lakaskin pi tlan kakinkakitaxtunin, wa xlakata putum kilhtamaku kinkamalakapastakayan pi kuenta katlawaw xtastakyaw Pablo: «Kalilakapastaktit,  kalalimakgpuwantinitit nchatunu amakgapitsin ktapaxkit, chu kxalakwan tatlaw. Ni timakgaxtakgaw ntani ntamakgstokgaw lantla ntlawakgo makgapitsin xalismanin, wampi kaj nalamakgpuwantiniyaw; na kax natlawayaw mpi ukxilhaw ntalakatsuwimaja yama ntlanka kilhtamaku» (Heb. 10:24, 25). Akxni israelitas xtamakxtumikgo xlakata nakakninanikgo Jehová, xtatliwakglha xtakanajlakan. Uma kilhtamaku na lu xpaxuwakgo. Akgtum liʼakxilhtit, kalilakpuwaw tapaxuwan nema analh akxni tlawakgolh paskua xla Laktsu Chiki, kxkilhtamaku Nehemías (Éx. 23:15, 16; Neh. 8:9-18). Uku, nachuna kinkakitaxtuniyan akxni anaw ktamakxtumit chu xalaklanka tamakxtumit. Liwana kalitamakgtayaw uma xlakata nalimatliwakglhaw kintakanajlakan chu xatapaxuwan naskujnaniyaw (Tito 2:2).

12. ¿La kiliʼakxilhatkan talakgalhaman xlakata nalichuwinanaw xalakwan xalaksasti xla Tamapakgsin?

¹² Xlakata tapakgsiyaw kxkachikin Dios, kgalhiyaw talakgalhaman nalichuwinanaw «xatlan xtamakatsinin» (Rom. 15:16). Akxni lichuwinanaw «xatlan xtamakatsinin» litaxtuyaw «xtaskujnin» Jehová, tiku «xasantujlani» (1 Cor. 3:9; 1 Ped. 1:15). Na limakgtayananaw natamasantujli xtukuwani. ¡Lanka talakgalhaman kgalhiyaw akxni lichuwinanaw «lu xalilakgatit xalakwan xalaksasti xla Dios tiku xapaxuwana»! (1 Tim. 1:11, TNM.)

13. ¿Tuku kilitlawatkan xlakata tlan natawila kintakanajlakan chu nakgalhiyaw latamat?

¹³ Jehová lakaskin pi tlakg katalakatsuwiniw chu kamakgtayanaw kmakgapitsi taskujut nema tlawa xkachikin, xlakata chuna tlakg tatliwakglha kintakanajlakan. Moisés kawanilh israelitas: «Xlikana wa akgapun chu katiyatni tiku katsikgo tuku natlawayatit xlakata tuku kkawaniman uku, pi kwilinit kmilakatin latamat chu linin, tasikulunalin chu tuku nitlan nakitaxtuniyan; chu mililaksakat latamat xlakata nalatapaya, wix chu minkamanan, napaxkiya Jehová miDios, nakgaxpata xtachuwin chu ni namakgxtakga; xlakata wa milatamat chu wa tiku natlawa pi nalatapaya lhuwa kilhtamaku ktiyat nema Jehová kawanilh pi xʼama kamaxki minatlatni Abrahán, Isaac chu Jacob» (Deut. 30:19, 20). Chuna, nalatamayaw komo paxkiyaw, kgalhakgaxmataw chu ni makgatsankgananiyaw Jehová.

14. ¿Tuku xlakpuwan chatum tala xlakata xkachikin Dios?

¹⁴ Tala wanikan Pryce Hughes tiku makglhtinalh xaxlikana takanajla akxni nina xchan kata 1914, nikxni makgatsankgananilh Jehová chu xkachikin. Akxni xlichuwinama tuku xtitaxtunit kxlatamat, wa pi tuku tlakg xlakaskinka xkatsininit wa pi ni natamakgatlini xkachikin Jehová chu ni nalipawan xtalakapastakni latamanin. Uma makgtayalh natayani tuku tuwa titaxtulh kxtakanajla. Tala Hughes wa pi kajwatiya tuku tlawa pi tlan talalinaw Jehová, wa komo kgalhakgaxmataw putum tuku kinkawaniyan xkachikin nema lakkaxwilinit.

15. ¿Tukuya liʼakxilhtit masiya tuku kilitlawatkan akxni talakgpali la akgatekgsaw pulaktum tuku wan Biblia?

¹⁵ Komo lakaskinaw pi Jehová kakinkasikulunatlawan, natatayayaw chu tlan natlawayaw akxni wi tuku natalakgpali xlakata la taʼakgatekgsa tuku wan Biblia. Akgtum liʼakxilhtit, akxni xninita Jesús, akglhuwa mil kstalaninanin Cristo tiku judíos xwankgonit tuwa xmakgkatsikgo nialh natlawakgo tuku xwan Limapakgsin nema xmaxkikanit Moisés (Hech. 21:17-20). Pero kxcarta nema kamalakgachanilh Hebreos, Pablo kamakgtayalh naʼakgatekgskgo pi ni xkalimasantujlikanit tamakamastan nema xtlawakan «lantla wan limapakgsin», wata  «xpalakata mpi timakamastalh Jesucristo xtiyatliwa, ntu mana watiya makgtum ntlawalh» (Heb. 10:5-10). Lhuwa kstalaninanin Cristo tiku judíos xwankgonit, lakgpalikgolh tuku xlakpuwankgo chu tlakg tatliwakglhli xtakanajlakan. ¿Tuku kinkamasiyaniyan? Talakaskin na liwana nalikgalhtawakgayaw Biblia chu akxni xkachikin Jehová nalakgpali la akgatekgsaw pulaktum tuku wan Biblia chu amakgapitsi likgalhtawakga o chuna la lichuwinanaw Dios, kamakgamakglhtinaw.

16. 1) ¿Tuku xlakata lu lipaxuw nawan nalatamayaw kxasasti katiyatni? 2) ¿Tuku tlakg lakgatiya xkgantaxtulha xlakata xasasti katiyatni?

¹⁶ Putum tiku ni makgatsankgananikgo Jehová chu xkachikin namakglhtinankgo tasikulunalin. Tiku kalaksakkanit naʼankgo kʼakgapun natamapakgsinankgo Cristo (Rom. 8:16, 17). Chu tiku kgalhkgalhimakgo nalatamakgo kkatiyatni, lipaxuw nalatamakgo putum kilhtamaku kParaíso. Putum kgalhiyaw lanka talakgalhaman nakalitachuwinanaw kintalatamankan xasasti katiyatni nema Jehová wanit pi nalimin (2 Ped. 3:13). Anta «tiku tlan likatsikgo wa nakamaxkikan katiyatni, chu xlikana lu lipaxuw natawilakgo» (Sal. 37:11). «Natlawakgo chiki chu anta natawilakgo», chu nalipaxuwakgo «xtaskujutkan nema litlawakgonit xmakankan» (Is. 65:21, 22). Nialh katiʼanalh tiku nitlan nalikatsini atanu, nakgalhikgo putum tuku maklakaskinkgo chu tuku nawakgo (Sal. 72:13-16). Babilonia xaLanka nialhla katikaʼakgskgawilh latamanin xlakata masputukanita nawan (Apoc. 18:8, 21). Tiku nikgonit nalakastakwanankgo chu tlan nalatamakgo putum kilhtamaku (Is. 25:8; Hech. 24:15). Lu lipaxuw kilhtamaku nema aku mima, ¿ni xlikana? Lhuwa millón tiku tamakamastaninitaw Jehová. Komo chatunu chatunu namatliwakglhaw kintakanajlakan chu akxtum nataskujaw xkachikin Dios, namakglhtinanaw putum uma tuku Jehová wanit pi nalimin.

17. ¿La kiliʼakxilhatkan xkachikin chu takaknin nema maxkiyaw Jehová?

¹⁷ Nialh makgas namasputukan uma kakilhtamaku. Wa xlakata kamatliwakglhwi kintakanajlakan chu kapaxtikatsiniw putum tuku Jehová kinkamaxkinitan xlakata nakakninaniyaw. Katlawaw la salmista David, tiku kilhtlilh: «Kaj pulaktum tuku kskininit Jehová... chu wa tuku nakputsa, pi tlan naklatama kxchik putum kilatamat, xlakata nakakxilha la makgapaxuwanan Jehová chu xlakata nakpaxtikatsini akxni nakakxilha xtemplo» (Sal. 27:4, TNM). Chatunu akinin ni katamakgatliniw Jehová chu xkachikin, chu chuntiya kataskujwi.