NI KLISITSILH maski ni lhuwa tiku minkgolh kgaxmatkgo kintaʼakgchuwin. Lata aktsujku xakwanit lu xamaxana akit. Akxni aktsujku xakwanit xaktatsekga akxni wi tiku xmin kkinchikkan, maski xakkalakgapasa.

Max kaks nalilakawananit nakkawaniyan pi lhuwa taskujut nema kilakgayawakanit kxkachikin Jehová, talakaskinit lhuwa tiku nakkatachuwinan, wantiku kkatalalin chu wantiku ni kkalakgapasa. Pero putum kkilatamat xamaxana akit chu kmakgkatsi pi nila tuku ktlawa, wa xlakata putum tuku tlan ktlawanit, ni kiʼakstu ktlawanit, wa Jehová kimakgtayanit. Kakxilhli pi Jehová xlikana makgantaxti uma xtachuwin: «Akit nakmatliwakglhan. [...] akit nakmakgtayayan. Chuna, lu xlikana akit naklimatliwakglhan kimpakgastakat xla xaʼakgstitum» (Is. 41:10). Pulaktum tuku Jehová kilimakgtayalh wa natalan. Nakkalitachuwinanan makgapitsi chu naklimatsuki akxni aktsujku xakwanit.

Akgtum tsisa domingo, kata 1940, Elsie Huntingford chalh kkinchikkan niku xakkakuentajtlawayaw animales chu xakchanananaw, kxsuroeste Ontario. Kintse alh malaki chu kintlat tiku na lu xamaxana xwanit ni ktaxtuw,  pero xakkgaxmatmaw tuku xwanimaka kintse. Kintlat lakpuwa pi tala Elsie kaj kstanama chu pi kintse xʼama makgtamawa tuku ni xmaklakaskin, wa xlakata kintlat talakatsuwilh chu wanilh tala pi nitu xaklakaskinaw. Pero tala kgalhskilh: «¿Ni katsiputunatit tuku wan Biblia?». Kintlat kgalhtilh: «Kkatsiputunaw».

Lu tlan kilhtamaku laksakli tala Elsie xlakata nakinkalakgapaxialhnanan. Kinatlatni xmakgtapakgsikgo Iglesia Unida de Canadá, pero nina lhuwa kilhtamaku xtitaxtunit nialh xʼankgo. ¿Tuku xlakata? Xlakata tiku xpulalin takanajla xmawaka akgtum lista niku xlaktanukan ksikulan, niku xwi xtukuwanikan tiku xtapakgsikgo ksikulan chu xmastakgonit xtuminkan. Xtukuwanikan xkawilikanit chuna la xlilhuwa tumin xmastakgonit chatunu chatunu. Kinatlatni tiku ni lu lhuwa tumin xkgalhikgo, putum kilhtamaku xaʼawatiya xwilikan xtukuwanikan chu tiku xpulalinkgo Iglesia xkamamakgkatsinikgo pi tlakg xlimastatkan xwanit. Pero ni kajwatiya uma, chatum tiku xpulalin takanajla wa pi atanu tuku xkanajla, pero ni xmasiya xlakata ni xmakgatsankgaputun xtaskujut. Wa xlakata nialh kaw kIglesia, pero chuntiya xakputsamaw Dios.

Xlakata uma kilhtamaku ni xkamaxkikan talakaskin xtatayananin Jehová nalichuwinankgo Dios kʼCanadá, tala Elsie kajwatiya xlimaklakaskin maktum Biblia chu maktum xatsitsakga aktsu libreta niku xtsokgwili tuku xkinkamasiyaniyan. Alistalh, akxni akxilhli pi ni xakamaw malakgsiyayaw, tsukulh limin atanu likgalhtawakga xalak Biblia, chu akinin liwana xakmatsekgaw akxni xakkgalhtawakgakgoyaw. *

Tala Elsie lu xlichuwinan Dios maski lu tuwa xwanit. Xlakata lu xatapaxuwan xlichuwinan Dios uma kaks kimalakawanilh chu na klaksakli nakskujnani Jehová. Kinatlatni tamunukgolh kata 1948 chu akit ktamunulh akxni xakkgalhi 17 kata, 27 xla febrero kata 1949. Ktamunulh niku xkamujununikan xchuchutkan animales. Akxni xaktamununita, klakpuwa precursor nakwan.

Ni tunkun precursor klitaxtulh. Xaklakpuwan pi xtalakaskin pulana nakmastokga tumin. Kskujli kʼakgtum banco chu na kskujli kʼakgtum kʼoficina, pero xlakata aktsujku xakwanit, lakapala  xaklaktlawa tuku xaktlaja. Chatum tala wanikan Ted Sargent kiwanilh pi ni xakpekualh chu xaklipawa Jehová (1 Crón. 28:10). Uma kimakgtayalh chu ktsukulh liskuja precursorado noviembre kata 1951. Kajwatiya xakkgalhi 40 dólares, akgtum bicicleta xalakgwan chu akgtum xasasti portafolio. Pero Jehová putum kilhtamaku kimaxkilh tuku xakmaklakaskin. ¡Lu kpaxtikatsini pi Ted kimakgpuwantinilh precursor nakwan! Tuku klaksakli lhuwa tasikulunalin kiliminilh.

Akgtum tsisni akxni ksputmaja papaʼ xla agosto kata 1952, kinkilhminikancha Betel xla Toronto. Kiwanika pi xaktsukulh makgtayanan kBetel papaʼ xla septiembre. Maski xamaxana xakwanit chu ni amakgtum xakan lakgapaxialhnan sucursal, lu klipaxuwalh akxni kkatsilh pi nakan, xlakata amakgapitsi precursores lu tlan xkilitachuwinankgonit Betel. Lakapala kmakgkatsilh pi la kkinchik xakwi.

Akxni kajku akgtiy kata xakchanit kBetel, klitaxtulh siervo de congregación, (la uku kalilakgapaskan tiku kamakgtaya nalakkaxwilikgo xtaskujutkan amakgapitsi lakgkgolotsin) xlakgxokgo Bill Yacos kʼakgtum congregación kʼToronto. Xakkgalhi 23 kata, xakkmakgkatsi la aktsu kgawasa tiku nitu xkatsi. Tala Yacos, lu tlan kilikatsinilh chu kimasiyanilh la naktlawa kintaskujut. Jehová lu kimakgtayalh.

Tala Bill Yacos, tiku tsinu kgelanka chu ni lu lanka xwanit putum kilhtamaku xlakalitsin, xlikana xkapaxki amakgapitsin. Xkapaxki natalan chu natalan na xpaxkikgo. Xlismaninit xkalakgapaxialhnan natalan, chu ni kaj akxni xkgalhikgo taʼakglhuwit. Kiwanilh pi nachuna xaktlawalh chu akxtum xakkataʼalh natalan akxni xʼankgo lichuwinankgo Dios. Kiwanilh: «Ken, kakalimasiyani natalan pi kapaxkiya. Uma natlawa pi natapatikgoyan tuku nitlan tlawaya».

Lu tasiyanit la Jehová kimakgtayanit lata enero kata 1957. Uma papaʼ ktatamakgaxtokgli Evelyn, tiku xkilanit kclase 14 xla Escuela de Galaad. Akxni nina xaktamakgaxtokgaw, Evelyn xlichuwinan Dios kʼQuebec niku xchuwinankan francés. Xlakata lu lhuwa tiku xtapakgsikgo kʼIglesia Católica, tuwa xwanit xlichuwinankan Dios. Pero Evelyn ni makgxtakgli Jehová chu chuntiya lichuwinalh Dios.

Kimpuskat, na putum kilhtamaku kimakgtayanit (Efes. 5:31). Akxni aku xaktamakgaxtokgnitaw litasiyalh pi xla ni makgxtakgnan. Xaklakkaxwilinitaw nakanaw kʼFlorida (Estados Unidos) xlakata aku xaktamakgaxtokgnitaw, pero kajku akgtum kilhtamaku xtitaxtunit lata xaktamakgaxtokgnitaw, sucursal kiwanilh pi xakalh kBetel xalak Canadá kʼakgtum curso nema xʼama makgapala akgtum semana. Evelyn chu akit xaktlawaputunaw putum tuku Jehová xkinkaskinin, wa xlakata nialh kaw niku pulana xakkamputumaw. Ama semana Evelyn lichuwinalh Dios lakatsu kʼsucursal. Maski ni chuna xlichuwinankan Dios la xla xlismaninit, pero uma ni malakgachokgolh.

Akxni sputli uma semana, kaks kinkamalakawanin tuku kinkamakatsinikan. Superintendente de circuito klitaxtulh chu kimalakgachaka kxnorte Ontario. ¡Kaj kalakpuwantit! Aku xaktamakgaxtokgnit,  kaj 25 kata xakkgalhi chu lhuwa tuku ni xakkatsi. Pero klipawaw pi Jehová xʼama kinkamakgtayayan chu kaw. Lu lipekua xlonkgnama kʼCanadá akxni kkatatawakaw ktren amakgapitsi superintendentes viajantes tiku liwana xkatsinikgo natlawakgo uma taskujut chu xtaspitmakgo niku xkamalakgachakanit namakgtayanankgo. ¡Lu kinkamatliwakglhkgon! Xlakata ni anta xaklhtataw niku xakwilaw, chatum tala kinkawanin pi xakkaw lhtatayaw kcuarto nema kxokgonit xlakata anta xʼama lhtata. Lichali, xaklakgapaxialhnamawa aktsu grupo xalak Hornepayne, kajku akgkukitsis kilhtamaku xtitaxtunit lata xaktamakgaxtokgnitaw chuna la xakkalitachuwinaman pulana.

Lhuwaku tuku xʼama talakgpali kkilatamatkan. Akxni xakliskujmaw taskujut xla distrito akxni ksputmaja kata 1960, kiwanika pi xakkalh clase 36 xla Escuela de Galaad, akgtum curso nema makgapala akgkaw papaʼ, chu xʼama tsuku kxkilhtsukut febrero kata 1961 kʼBrooklyn (Nueva York). Lu kpaxuwalh, pero klilipuwa akxni kkakxilhli pi Evelyn ni xtasanikanit. Evelyn wanika pi xtsokgli maktum carta niku xwa pi ni xʼanan taʼakglhuwit komo xakstu xtamakgaxtakglhli kʼCanadá akgkaw papaʼ chuna la amakgapitsin natalan lakpuskatin tiku na chuna xtitaxtumakgo. Maski Evelyn tasalh akxni lakapastakli la xlilhuwa kilhtamaku ni akxtum xakamaw tawilayaw, kinchatiykan klakpuwaw pi kilianat xwanit chu Evelyn paxuwalh xlakata xkatsi pi lhuwa chu lu xlakaskinka tuku xakama katsini.

Akxni akit xakwi kʼBrooklyn, Evelyn kskujma Betel xla Canadá, niku kgalhilh talakgalhaman pi akxtum xtawi kxcuarto Margaret Lovell, chatum tala tiku na xatalaksakni xwanit xlakata xʼalh kʼakgapun. Maski lu xaklalakapastakaw, Jehová kinkamakgtayan naklipaxuwayaw kintaskujutkan. Lu klipaxuwalh pi Evelyn tlan tlawalh ni akxtum xaktawilaw xlakata tlakg tlan xakskujnaniw Jehová chu xkachikin.

Akgtutu papaʼ xakwi kʼGalaad, akxni tala Knorr, tiku xpulalima taskujut xla xtatayananin Jehová, kintlawanilh akgtum lu tlan invitación. Kinkgalhskilh komo xaklakgatilh xakmakgaxtakgli Escuela de Galaad chu xaktaspitli kʼCanadá xlakata instructor xakwa xla Escuela del Ministerio del Reino anta ksucursal. Pero kiwanilh pi nitu xkimafuerzalinima. Komo xakmasputuputun Escuela de Galaad tlan chuna xaktlawalh, misionero xakwa chu max xkimalakgachaka atanu país. Na kiwanilh pi komo xaklaksakli naktaspita kʼCanadá, max nikxni xkiwaniparaka pi xakalh kʼEscuela de Galaad, chu max alistalh xkimalakgachaka antiya kʼCanadá xlakata naklichuwinan Dios. Kiwanilh pi komo xaklakaskin, xaktachuwinalh kimpuskat chu alistalh xakwanilh tuku xaklakpuwanit.

Ni talakaskilh nakkgalhskin Evelyn, xlakata xakkatsi la xakxilha taskujut xalak xkachikin Jehová. Putum kilhtamaku kinchatiykan klakpuwanitaw pi maski atanu tuku klakgatiyaw, nakanaw niku xkachikin Jehová nakinkamalakgachayan. Wa xlakata lakapala kwanilh tala Knorr: «Klakpuwanitaw pi naktlawayaw putum tuku xkachikin Jehová nakinkaskiniyan».

Wa xlakata abril kata 1961 ktaxtucha kʼBrooklyn chu ktaspitli kʼCanadá chu instructor xla Escuela del Ministerio del Reino klitaxtulh. Alistalh  kmakgtapakgsiw kfamilia Betel xalak Canadá. Alistalh kaks klilakawa akxni kiwaniparaka pi xakkalh clase 40 de Galaad, nema xʼama tsuku kata 1965. Amakgtum Evelyn tsokgpa maktum carta niku xwan pi ni xʼanan taʼakglhuwit maski ni akxtum xaktawilaparaw. Pero ni lhuwa semanas titaxtulh, kinkawanikan atanu tamakatsinin. ¡Evelyn na wanika pi na xʼalh kclase!

Akxni xakchanitaw kʼEscuela de Galaad, tala Knorr kinkawanin pi tiku xkinkamasiyanimakan francés, xʼamaka kinkamalakgachakanan kʼÁfrica. Pero ¿niku kinkamalakgachakan akxni kmasputuw kinclaseskan? ¡Anta kʼCanadá! Superintendente xla sucursal kiliyawaka (la uku wanikan coordinador xla Comité de Sucursal). Xlakata kajku 34 kata xakkgalhi klakapastaka pi kwanilh tala Knorr: «Lu kgawasaku akit». Xla kimakgtayalh xlakata xakkmakgkatsilh pi tlan xakama tlawa uma taskujut. Nachuna lata kmatsukilh uma taskujut, akxni nina xaklaksaka wi tuku naktlawa lu xlakaskinka, pulana xakkakgalhskin natalan tiku xlinkgoya kata chu lu xkatsinikgo.

Anta kBetel lhuwa tuku kkatsininitaw xlakata xatlan xliʼakxilhtit natalan tiku ni makgatsankgananikgo Dios. Kkalakgachixkuwili chu kkamaxki kakni natalan, tiku na makgtapakgsikgo kʼComité de Sucursal. Na lhuwa tuku kinkamasiyanikgonitan lhuwa ciento natalan tiku kajku lakgkgawasan chu wantiku linkgoya kata, nema kkalakgapasnitaw chuna la titaxtunit kata unu kBetel, chu xala alakatanu congregaciones niku kkimakgtayananitaw.

Anta kBetel tlan kkamasiyaninit chu kkamatliwakglhnit xtakanajlakan amakgapitsi natalan. Apóstol Pablo wanilh Timoteo: «Tliwakglh katapini yuma ntu nkatsininita». Chu na wanipa: «Wa ntu nkinkgaxpatninita kxlakatinkan amakgapitsin nti na malulokgkgoy, wa yuma namakuintajlikgoya wa nchixkuwin nti akgstitum [...], wa nti na chuna ntlan namasiyunikgoy amakgapitsin» (2 Tim. 2:2; 3:14). Tipuxamakutujun kata kskujnit kBetel. Min kilhtamaku natalan kinkgalhskinkgo tuku kkatsininit putum uma kilhtamaku. Kkakgalhti: «Putum kilhtamaku katlawa tuku xkachikin Dios skiniyan. Chu kalipawanti pi Jehová namakgtayayan».

Kmakgkatsi la komo kgotanaku akxni kchalh kBetel, akxni kgawasaku chu xamaxana xakwanit. Pero putum uma kilhtamaku nema titaxtunit Jehová kimakgachipalima. Limaklakaskin xtapaxkit chu xtamakgtay kinatalan chu kiwani: «Ni kapekuanti. Akit [...] nakmakgtayayan» (Is. 41:13).