Kʼakgtum Salmo, mapakgsina David kilhtlilh: «Oh Dios, akit snun klakgati ktlawa tu wix lakgatiya, milimapakgsin kkgalhi nak kinaku xlakata nakmakgantaxtij» (Sal. 40:8). Maski lhuwa tuku tuwa titaxtulh kxlatamat, lu xlakgati xtlawa xtalakaskin Dios. Pero ni kajwatiya David tiku lipaxuwalh nakakninani xaxlikana Dios.

Akxni apóstol Pablo xlichuwinama Mesías, o Cristo, limaklakaskilh tuku wan Salmo 40:8. Tsokgli: «Akxni ntimilh nCristo nkatuxawat, wan: “Wa animalhna limakgnit, chu likaxtlawan, ni lakaskinti; wampi chixku kintlawa, kimaxkinita kintiyatliwa. Likaxtlawan xatalhkuyun, chu nkatuwa amakgapitsin xpuxokgo talakgalhin, ni lakaskinti”. Wa cha ktiliwaj: “Ukwi, lakimpi naktlaway mintalakaskin [...], kiDios. Xtachuna lantla nkintatsokgninit kxatakgasmilin tatsokgnun”» (Heb. 10:5-7).

Akxni xlama kKatiyatni Jesús lu xlakgati xakxilha putum tuku Dios tlawanit, akxtum xkatatawila xʼamigos chu xkatawayan tiku xkapaxki (Mat. 6:26-29; Juan 2:1, 2; 12:1, 2). Pero tuku tlakg xtlawaputun chu xmakgapaxuwa, wa pi natlawa xtalakaskin xTlat. Wa xlakata wa: «Kiliwat, wa naktlaway xtalakaskin nti nkimalakgachalh, chu na nakmasputuy xtaskujut ntu nkimaxkinit» (Juan 4:34; 6:38). Kstalaninanin katsinikgolh la tlan kgalhikan xaxlikana tapaxuwan, akxni xʼakxilhkgo tuku xtlawa Jesús. Xatapaxuwan kalitachuwinankgolh latamanin xla Tamapakgsin (Luc. 10:1, 8, 9, 17).

Jesús kamapakgsilh kstalaninanin: «Kapitit, na kamasiyunikgotit xlipaks akgmakgat chixkuwin, chu nalimunukgo[ya]tit kxtukuwini xaTlat, chu kxtukuwini xaKam, chu kxtukuwini spiritu santo. Chu na namasiyunikgoyatit mpi natlawakgoy xlipaks yuma ntu kkalimapakgsinitan. Na kakatsitit mpi xaliankgalhin [nakkatatawilayan] nchali  chali, asta nasputa [kakilhtamaku]» (Mat. 28:19, 20). Xlakata namakgantaxtiyaw uma taskujut, talakaskin nakatachuwinanaw latamanin kanikawa niku lamakgo, nakalakgamparayaw chu nakamasiyaniyaw tuku wan Biblia. Uma taskujut lu nakinkaliminiyan tapaxuwan.

Maski latamanin nakatsiputunkgo o ni, xlakata tuku lichuwinamaw, chuna la naʼakxilhaw kintaskujutkan wa nakinkamakgtayayan nalipaxuwayaw nalichuwinanaw Dios. ¿Tuku xlakata chuntiya lichuwinanaw xalakwan xalaksasti, maski latamanin ni kgaxmatputunkgo chu nitlan kinkalikatsinikgoyan? Xlakata akgatekgsaw pi akxni makglichuwinanaw chu kamasiyaniyaw amakgapitsin xlakata Biblia, limasiyayaw pi paxkiyaw Dios chu kintalatamankan. Komo ni chuna xtlawaw max lhuwa tiku xlakgtsankgakgolh: kilatamatkan chu xla amakgapitsin (Ezeq. 3:17-21; 1 Tim. 4:16). Wa xlakata kaʼakxilhwi tuku kamakgtayanit makgapitsi natalan, chuntiya nalipaxuwakgo akxni lichuwinankgo Dios maski ni kgaxmatputunkgo latamanin.

Takatsi pi akxni liwana lakpuwanaw tuku nawanaw tlan kitaxtu. Akgtum kilhtamaku, Amalia akxilhli kparque chatum chixku tiku xlikgalhtawakgama periódico. Lakgtalakatsuwilh chu kgalhskilh komo xmin kperiódico tlan tamakatsin. Akxni kgalhtilh pi nitu, Amalia wanilh: «Akit kliminiman tlan tamakatsin xlakata xTamapakgsin Dios». Uma tlawalh pi xkgaxmatniputulh chu wa pi tlan xtakgalhtawakgaka. Chu kgalhtutu tiku tsukulh katakgalhtawakga kparque.

Chatum tala wanikan Janice lichuwinalh Dios kxtaskujut. Akxni chatum policía tiku xkuentajtlawanan kxtaskujut chu xcompañera uma policía lu lakgatikgolh akgtum artículo xla Makatsinina, Janice kawanilh pi xʼama kalini makgatunu xtaxtulh. Chu na tsukulh lini atanu tiku xtaskuja, xlakata lu xlakgati tanu tanu temas xla Makatsinina chu ¡Despertad! Uma tlawalh pi atanu puskat tiku na anta kskuja kskinilh revistas. Janice wan: «¡Jehová lu kisikulunatlawanit!». Xla kalini revistas, kgalhakawitu tiku kataskuja.

Chatum superintendente viajante kawanilh tiku lichuwinankgo Dios pi akxni ankgo akgatunu chiki ni kajwatiya xwankgolh pi xtaspitparakgolh atanu kilhtamaku. Wata kawanilh pi xwankgolh: «¿Tlan xakmasiyanin la klimakgalhtawakgenanaw Biblia?». O nachuna: «¿Tukuya kilhtamaku chu tuku hora tlakg tlan xakmilh xlakata nachuwinamparayaw?». Superintendente viajante wa pi akgtum congregación nema chuna tlawalh, kaj akgtum semana, 44 tiku tsukuka kamakgalhtawakgekan.

Atanu tuku na lu tlan kitaxtu wa pi tunkun nataspitparayaw, ni katitaxtulh lhuwa kilhtamaku. ¿Tuku xlakata? Xlakata chuna, latamanin tiku tlan likatsikgo naʼakxilhkgo pi xlikana kamakgtayaputunaw naʼakgatekgskgo tuku wan Biblia. Akxni chatum puskat kgalhskinka tuku xlakata tsukulh  katakgalhtawakga xtatayananin Jehová, xla wa: «Ktsukulh katakgalhtawakga akxni kmakgkatsilh pi xkimpaxkikgo chu xkimakgtayaputunkgo».

Akxni Madaí nina makgas xkilanit Escuela xla Precursores, xkamakgalhtawakgemaja kgalhkukitsis latamanin chu kgalhkitsis tiku xkamakgalhtawakgeka xkamatitaxtininit atanu natalan. Makgapitsi tiku xkamakgalhtawakgemaka tsukukgolh ankgo ktamakxtumit. ¿Tuku makgtayalh Madaí lhuwa tiku xtsukulh kamakgalhtawakge? Escuela xla Precursores masiyanilh pi lu xlakaskinka nakaputsakan asta nakatekgskan latamanin tiku xtasiya pi xkatsiputunkgo xlakata Biblia. Atanu tala tiku na kamakgtayanit lhuwa latamanin nalakgapaskgo xaxlikana, wan: «Kkatsininit pi xlakata tlan nakamakgtayayaw tiku xlikana lakgapasputunkgo Jehová, talakaskin pi chuntiya nakaputsayaw».

Talakaskin lu naliskujaw xlakata nakalakgamparayaw tiku katsiputunkgo tuku wan Biblia chu nakamakgalhtawakgeyaw. Pero maski tuwa namakgkatsiyaw, ni tatalakxtumi tasikulunalin nema namakglhtinanaw. Komo liwana lakkaxwiliyaw la lichuwinanaw xTamapakgsin Dios, nakamakgtayayaw kintalatamankan «nalakgapaskgoy wa ntalulokgtat», chu uma nakalakgmaxtu (1 Tim. 2:3, 4). Liwana kakatsi uma: lu namakgapaxuwayan nalichuwinana Dios chu nakamasiyaniya amakgapitsin xlakata Biblia.