¿Likgalhtawakganitata xaʼawatiya artículos xla Makatsinina? Kaʼakxilhti komo tlan nakgalhtiya umakgolh takgalhskinin:

¿Tuku hora xla 14 xla nisán xlimakgnitkan xwanit borrego?

Makgapitsi biblias wankgo pi xlimakgtnitkan xwanit borrego «kkakgotanun», o smalankgan: akxni xtsankganita chichini pero akxni xʼananku xkgakganat (Éx. 12:6) (15/12, páginas 18 chu 19).

¿Tuku tastakyaw xalak Biblia nakamakgtayakgo lakgkgawasan chu laktsuman nalaksakkgo tuku tlan?

1) Pulana kaputsatit xTamapakgsin Dios, chu xtalakaskin (Mat. 6:19-34). 2) Kalipaxuwa xlakata skujnaniya amakgapitsin (Hech. 20:35). 3) Kalipaxuwa naskujnaniya Jehová la uku (Ecl. 12:1) (15/1, páginas 19 chu 20).

¿Tiku uma kgalhatati matlawanimakgo xkawayujkan lata kkata 1914?

Jesús, tiku kgewi tantum xasnapapa kawayu tamakxtucha kʼakgapun Akgskgawini chu xdemonios. Tiku kgewi xaspinini kawayu kilhchanima guerras nema anankgonit kkakilhtamaku. Tiku kgewi xatsitsakga kawayu kilhchanima tatsinksni. Tiku kgewi xalhmukuku kawayu limin tajatat nema kamakgnikgo lhuwa latamanin (Apoc. 6:2-8) (1/2, páginas 6 chu 7).

¿Tukuya kilhtamaku natlawakan xtamakgaxtokgat Borrego? (Apoc. 19:7.)

Akxni Mapakgsina Jesucristo, malakgsputunita nawan Babilonia xaLanka, chu akxni titaxtunita nawan Armagedón (15/2, página 10).

¿Tuku xlakata judíos xapulana siglo «xkgalhkgalhimakgo yama kilhtamaku» akxni xmilh Mesías? (Luc. 3:15.)

Nila nawanaw pi judíos xapulana siglo liwana xʼakgatekgskgo tuku Daniel xtsokgnit xpalakata akxni xʼama min Mesías (Dan. 9:24-27). Pero, max xkgaxmatkgonit tuku chatum ángel kawanilh makgapitsi mapuchwayaninanin o tuku wa palakachuwina Ana akxni akxilhli aktsu Jesús ktemplo. Nachuna, astrólogos chankgolh kJerusalén xlakata xputsamakgo «xreykan judíos» (Mat. 2:1, 2). Alistalh, Juan tiku xMununan makatsininalh pi nialh makgas xʼama tasiya Cristo (15/2, páginas 26 chu 27).

¿Tuku tlan tlawayaw xlakata namakgantaxtiyaw tuku wanaw? (2 Cor. 1:18.)

Xlikana pi namin kilhtamaku akxni natalakaskin nalakxtlawayaw tuku wanitaw natlawayaw. Pero komo kstalanina Cristo wi tuku litaya, xlikana xlimakgantaxtit (15/3, página 32).

¿Tuku tlan natlawayaw xlakata ni nakaʼakxilhaw tiku ni lhakganankgonit?

Pulaktutu tuku namakgtayayan wa uma: 1) komo kaj xamakgtum natasiya tiku ni lhakganankgonit, tunkun katalakapanu; 2) kuentajkatlawaw tuku lakapastakaw: kalakapastakwi tuku xatlan chu katlawaniw oración Dios, chu 3) kuentajkatlawaw tuku tlawayaw: ni kaʼakxilhwi películas o ni katanuw kʼInternet niku tasiyakgo tiku ni lhakganankgonit (1/4, páginas 10 asta 12).

¿Tuku nitlan kitaxtu akxni chatum kstalanina Cristo makgxtakga xfamilia xlakata naʼan makgskuja alakatanu?

Lu nitlan tawila xtalakapastaknikan kamanan chu asta xtayatkan o nakasitsinikgo xnatlatnikan, komo ni akxtum wilakgolh. Chu tamakgaxtokgat tiku ni akxtum wilakgo max nalaʼakgskgawi (15/4, páginas 19 chu 20).

¿Tuku xlakata xkachatukxkan tiku nitlan xlikatsikgo tiku xkaxtokgowakakan kkiwi?

Romanos xkamakgnikgo kkiwi tiku nitlan xlikatsikgo. Judíos skinkgolh pi tiku xpaxtuwakakgolh Jesús xkachatukxka. Akxni xchatukxkan nialhtu tuku xlitamakgtaya chu ni makgas xtitaxtu xniy xlakata xjikswa. Chuna ni xtalakaskin anta xtawakakgolh kkiwi tantaskaka (Deut. 21:22, 23) (1/5, página 11).

¿Tuku akgtati takgalhskinin kililakapastakatkan akxni kalitachuwinanaw Dios latamanin?

¿Tiku nakkatachuwinan? ¿Niku nakkatachuwinan? ¿Tukuya hora tlakg tlan nakkatachuwinan? ¿La nakmatsuki takgalhchuwin? (15/5, páginas 12 asta 15.)

¿La xlilhuwa latamanin kamakgni lixkuli?

Siglo nema titaxtulh kamakgnilh akgtum ciento millón latamanin. La uku, akgatunu kata kamakgni max akgchaxan millón latamanin (1/6, página 3).