Anta kxTachuwin Dios ni wan pi ni tlan.

Lhuwa tuku tatsokgnit xalak Biblia masiya pi milh kilhtamaku kalhkuyaka tiku xnikgonita o kaj xlukutkan (Jos. 7:25; 2 Crón. 34:4, 5). Akxni wi tiku chuna xtlawanikan max wi tiku xlakpuwa pi ni xminini liwana namaknukan. Pero makglhuwa akxni chuna tlawaka ni chuna xwamputun.

Kalichuwinaw mapakgsina Saúl chu kgalhtutu xkamanan. Akxni nikgolh xtatlawamakgolh guerra filisteos. Tiku na anta nilh wa Jonatán xkgawasa Saúl tiku xʼamigo David xwanit tiku ni xmakgxtakga. Akxni makgapitsi israelitas tiku xwilakgolh kJabés-galaad katsikgolh pi kamakgnika, kisakkgolh xmaknikan, lhuyukgolh, chu maknukgolh xlukutkan. Alistalh, David wa pi lu tlan tuku xtlawakgonit (1 Sam. 31:2, 8-13; 2 Sam. 2:4-6).

Tuku wan Biblia xlakata tiku nikgonitta wa talakastakwanat: Dios nakamaxkipara latamat tiku nikgonit. Nakamalakastakwanikan maski lhkuyuka o ni, Jehová tlan nakamaxki xasasti xmaknikan. Kalilakpuwaw akxni xkalhkuyuputunkan kgalhtutu hebreos tiku ni xmakgxtakgkgo Dios kʼhorno, xlakata Nabucodonosor chuna xmapakgsinanit. Ni xtalakaskin napekuankgo xlakata xʼamaka kalhkuyukan, xkatsikgo pi Jehová xkamalakastakwanilh (Dan. 3:16-18). Na chuna, kinatalankan tiku ni makgxtakgkgolh Dios, makgapitsi nikgolh chu kalhkuyuka kʼcampos de concentración nazis. Chu anan xlakskujnin Dios tiku nikgonit xlakata wi tuku lakapala lakgpasalh o atanu la nikgolh chu ni akgataxtukgolh xmaknikan. Pero nakamalakastakwanikan (Apoc. 20:13).

Ni talakaskin pi Jehová namamakxtumi xtiyatliwa tiku ninit xlakata tlan namalakastakwani. Akgtum liʼakxilhtit, wa tiku kamalakastakwanikan xlakata kalaksakkanit naʼankgo kʼakgapun. Chuna la Jesús «staknampa kʼespíritu», akxni kamalakastakwanikan watiya tiku nilh, watiya xtalakpuwan chu la xmakgkatsi chu tuku xlakapastaka, pero xmaknikan ni tasiya xlakata espíritus. Ni linkgo xtiyatliwakan kʼakgapun (1 Ped. 3:18; 1 Cor. 15:42-53; 1 Juan 3:2).

Xlakata tlan nakinkamalakastakwanikanan ni wa talakaskin pi nitu nalani kimaknikan. Wata wa talakaskin pi nakanajlakan pi Dios tlan malakastakwaninan chu chuna tlawaputun (Hech. 24:15). Xlikana, max ni akgatekgsaw putum la Dios tlawalh uma tuku kaks malakawaninan akxni malakastakwaninalh makgasa chu la natlawa alistalh. Maski chuna, lipawanaw Jehová, tiku kinkamaxkinitan tuku “xaliukxilhtit lantla mpaks nalikanajlayaw”, wa pi Jesús malakastakwanika (Hech. 17:31; Luc. 24:2, 3).

Akxni nalakpuwankan tuku natlawakan xlakata xmakni tiku niy, kstalaninanin Cristo xlilakpuwanatkan tuku talismani, chu la namakgkatsikgo tiku xalak kxkachikin chu wa tuku wan limapakgsin (2 Cor. 6:3, 4). Wa xlakata, komo namastayaw xlakata nalhkuyukan tiku nilh, akinin nalaksakaw o kifamiliajkan.