1. ¿Tuku xlakata staktilhalh tapaxkit nema xlakgalhini Dios chu xKgawasa?

JESUCRISTO xKgawasa Jehová wa: «Kpaxkiy xaTlat» (Juan 14:31). Wampa: «Wa xaTlat, paxkiy xaKam» (Juan 5:20). Uma ni kaks nalilakawanaw xlakata Jesús lhuwa millones kata akxtum xtaskujma Jehová akxni nina xmin kKatiyatni. «Xapuxku skujni» xwanit (Prov. 8:30). Ama kilhtamaku lhuwa tuku katsinilh xlakata la xlikatsi xTlat, tapaxkit nema xlakgalhini tlakg staktilhalh.

2. 1) ¿Tuku wamputun napaxkiyaw Jehová? 2) ¿Tukuya takgalhskinin nakgalhti uma artículo?

² Akxni tiku lapaxki lu lalimasiyani. Salmista David kilhtlilh: «Kpaxkiyan [Jehová], porque wix klitatliwekglhan» (Sal. 18:1). Akinin nachuna kilipaxkitkan Jehová, xlakata xla lu kinkapaxkiyan. Chu komo nakgalhakgaxmataw Jehová, xla nakinkalimasiyaniyan xtapaxkit (kalikgalhtawakga Deuteronomio 7:12, 13). Pero, ¿la napaxkiyaw tiku ni akxilhaw? ¿Tuku wamputun paxkikan Jehová? ¿Tuku xlakata kilipaxkitkan? ¿La nalimasiyayaw pi paxkiyaw?

3, 4. ¿Tuku xlakata tlan paxkiyaw Jehová akinin latamanin?

³ «Dios chatum Espíritu», wa xlakata nila akxilhaw (Juan 4:24, TNM). Maski chatum espíritu tlan napaxkiyaw. Biblia asta kinkawaniyan  pi kapaxkiw. Akgtum liʼakxilhtit, Moisés wanilh kachikin Israel: «Milipaxkit Jehová miDios xliputum minaku chu xliputum milatamat chu xliputum militliwakga» (Deut. 6:5).

⁴ ¿Tuku xlakata tlan napaxkiyaw Dios? Kinkatlawan xlakata namaxkiputunaw kakni chu napaxkiputunaw. Akxni chuna tlawayaw kintapaxkitkan nema kgalhiniyaw tlakg staka chu tlakg paxuwayaw. Wa uma tuku xlichuwinama Jesús akxni wa: «Xatapaxuwan latamakgo tiku katsikgo pi lakaskinkgo tuku xla Dios, xlakata wa kalakgchan tamapakgsin kʼakgapun» (Mat. 5:3, TNM). Lhuwa na chuna wankgo pi latamanin lu chuna lilakachinitaw pi nakakninaniputunaw Dios. Tsokgna Abraham C. Morrison, kxlibro Man Does Not Stand Alone [Chixku ni akstu lama], tiwa: «Chuna la akxilhaw pi putum latamanin putsakgo tiku tlakg lanka xlakatsukut chu chuna la kanajlanikgo lu xlakaskinka kiliʼakxilhatkan».

5. ¿Tuku likatsiyaw pi tlan natekgsaw Dios?

⁵ ¿Kgalhini kuenta putsakan Dios? ¿Tlan natekgsaw? Tlan, xla lakaskin natekgsaw. Apóstol wa pi chuna akxni xkatachuwinama latamanin kʼAreópago. Anta tlan xtaʼakxilha Partenón, templo niku xkakninanikan diosa Atenea, nema diosa patrona xalak Atenas. Kalakpuwanti pi wix anta katakgaxpatpat lhuwa latamanin akxni Pablo tsuku lichuwinan «Dios nti ntlawalh nkatuxawat, chu xlipaks ntu ananiy», chu wan pi «ni anta xla wi kchiki ntani nkaj xatamakani[tlaw]». Na wampara: «Na mana watiya nchatum nkilhtsukut limalhuwilh xlipaks ni ntipalit nchixkuwin, lakimpi nalatamakgoy kxokgspun lantla xlikatlanka nkatiyatna; chu xtachuna lantla lakapastakli, chuna lilhkalh lantla namakgapalakgoy nchatunu, chu kxtiyatkan ntani nalatamakgoy. Xampi lakaskilh Dios naputsakgoy, mpalapi lantla naputsakgoy, xalan natakgskgoy, maski cha xlikana ni makgat kinkawilanin nchatunu nkin» (Hech. 17:24-27). Chuna, tlan natekgsaw Dios. Liwaka akgtujun millón a itat xtatayananin Jehová tekgskgonit chu xlikana paxkikgo.

6. ¿Tukuya limapakgsin wa Jesús pi «ntlakg xlakaskinka limapakgsin, chu na wa ntu ntlakg xatlanka»?

⁶ Tapaxkit nema kgalhiniyaw Jehová xaxlikana xliwanat. Akxni chatum fariseo kgalhskilh Jesús tukuya Limapakgsin tlakg xlakaskinka, xla lakatanks kgalhtilh: «“Xlipaks minaku nalipaxkiya [Jehová] Dios mimPuchina, chu xlipaks [milatamat], chu xlipaks mintalakapastakna”. Wa yuma wantu ntlakg xlakaskinka limapakgsin, chu na wantu ntlakg xatlanka» (Mat. 22:34-38).

7. ¿Tuku wamputun napaxkiyaw Jehová 1) xlipaks kinakujkan? 2) xlipaks kilatamatkan? 3) xlipaks kintalakapastaknikan?

⁷ ¿Tuku xkilhchanima Jesús akxni wa pi kilipaxkitkan Dios «xlipaks [kinakujkan]»? Xkilhchanima pi kilipaxkitkan xliputuminika kinakujkan, wamputun wantuku lakgatiyaw, tuku lakpuwanaw, chu tuku makgkatsiyaw. Na tiwa pi napaxkiyaw «xlipaks [kilatamatkan]», uma wamputun, putuminika kilatamatkan, tiku akinin chu tuku tlawayaw kkilatamatkan. Chu tuku wa awatiya: «Xlipaks mintalakapastakna», o putum tuku lakpuwanaw. Kilhchanima nalipaxkiyaw kiliputuminikakan chu putum tuku kgalhiyaw.

8. ¿Tuku natlawaputunaw komo paxkiyaw Dios?

⁸ Komo napaxkiyaw Jehová xliputuminika kinakujkan, kilatamatkan chu kintalakapastaknikan, ni namakgxtakgaw nalikgalhtawakgayaw Biblia, lu xatapaxuwan natlawayaw tuku nakinkaskiniyan chu xatapaxuwan nalichuwinanaw xTamapakgsin Dios (Mat. 24:14; Rom. 12:1, 2). Xaxlikana tapaxkit nema kgalhiniyaw Jehová natlawa pi tlakg natalakatsuwiniyaw (Sant. 4:8). Xlikana, nila putum nalichuwinanaw tuku xlakata kilipaxkitkan Dios, pero kalichuwinaw kaj makgapitsi.

9. ¿Tuku xlakata paxkiya Jehová?

⁹ Jehová kimalakatsukinakan chu kinkamaxkiyan  putum tuku maklakaskinaw. Pablo wa: «Wa lilamaw, na wa litatsuwajiyaw, chu na wa liananaw» (Hech. 17:28). Jehová kinkamaxkinitan uma lu stlan katiyatni niku lamaw (Sal. 115:16). Na kinkamaxkiyan tuku nawayaw chu atanu tuku na maklakaskinaw xlakata nalatamayaw. Wa xlakata Pablo tlan kawanilh tiku xkakninanikgo imágenes kListra pi «Dios xastakna», «ni wa ntilimakgaxtakgolh mpala kaj ni xʼanalh ntu nalilakgapaskgoy lantla tlan xla ntu ntlaway xampi kinkamakaminiyan s[e]n xala kʼakgapun, chu ntlan lananat, chu na kinkalimaxajan listakwan, chu ntapaxuwan kkinakukan» (Hech. 14:15-17). ¡Xlikana pi uma, tlawa napaxkiyaw xaTlan kiMalakatsukinakan! (Ecl. 12:1.)

10. ¿La makgkatsiya akxni lilakpuwana xtamakamastan Jesucristo?

¹⁰ Dios tlawanit pi kalakgtaxtuw ktalakgalhin chu klinin nema kinkamakgxtakgnin Adán. (Rom. 5:12.) Biblia wan: «Dios, kinkalimaukxilhniyan xtapaxkit, mpi akxni lakgalhinaninku xwanitaw, wa nCristo nti nkintikapalakanin» (Rom. 5:8). Komo xlikana nialh natlawayaw tuku nitlan chu nalimasiyayaw pi kanajlaniyaw xtamakamastan xKgawasa, Jehová nakinkatapatiyan kintalakgalhinkan. ¿Ni xlikana pi uma tlawa pi lu napaxkiyaw? ¡Lu paxtikatsiniyaw pi mastalh xKgawasa kimpalakatakan! (Juan 3:16.)

11, 12. ¿Tuku xlakata tlan wanaw pi Jehová Dios wa tiku mastay takgalhkgalhin?

¹¹ Jehová kinkamaxkiyan takgalhkgalhin nema tlawa pi napaxuwayaw chu lu tlan namakgkatsiyaw. (Rom. 15:13.) Takgalhkgalhin nema kgalhiyaw kinkamakgtayayan natayaniyaw tuku tuwa titaxtuyaw xlakata kintakanajlakan. Tiku kalaksakkanit naʼankgo kʼakgapun chu ni na makgatsankgananikgo Jehová, namakglhtinankgo “xtatlajakan xla latamat” kʼakgapun (Apoc. 2:10). Chu amakgapitsi xlakskujnin Jehová tiku ni makgxtakgkgo, nalatamakgo kKatiyatni akxni akgtum paraíso nawan (Luc. 23:43). ¿La kinkamamakgkatsiniyan umakgolh tuku kgalhkgalhimaw? ¿Ni xlikana pi lu kinkamakgapaxuwayan, tlan kinkamamakgkatsiniyan chu tlawa pi lu napaxkiyaw Dios tiku kinkamaxkiyan «xlipaks wantu tlan chu akgstitum»? (Sant. 1:17, Hua Xasasti Talaccaxlan, TXS, 1999.)

¹² Dios kinkamaxkinitan lu tlan takgalhkgalhin pi naʼanan talakastakwanat. (Hech. 24:15.) Xlikana pi lu katsan makgatsankgakan tiku paxkiyaw. Pero xlakata Dios wanit pi naʼanan talakastakwanat ni lu patinanaw «lantla amakgapitsin nti ni kgalhikgoy ntakgalhkgalhitin» (1 Tes. 4:13). Jehová lu kamalakastakwaniputun latamanin chu tlakg kamalakastakwaniputun kskujnin tiku ni makgatsankgananikgolh, la Job (Job 14:15). Kaj kalakpuwaw la namakgkatsiyaw akxni nalakastakwanankgo ninin chu naʼakxilhaw akxni akxtum natawilaparakgo familias chu amigos. ¡Tlakg napaxkiyaw kinTlatkan xalak akgapun! ¡Lu tlan likatsi Jehová xlakata kinkamaxkiyan uma lu tlan takgalhkgalhin!

13. ¿Tuku likatsiyaw pi Jehová xlikana kinkapaxkiyan?

¹³ Jehová lu kinkamakgtayaputunan. (Kalikgalhtawakga Salmo 34:6, 18, 19 chu 1 Pedro 5:6, 7.) Xlakata katsiyaw pi Dios ni kamakgxtakga xlakskujnin lu tlan makgkatsiyaw pi anta wilaw kxkachikin (Sal. 79:13). Chu tuku wanit pi nalimin tlakg litasiya pi kinkapaxkiyan. Jehová nalimaklakaskin xTamapakgsin Mesías nema namasputu tiku lixkajni likatsikgo, taʼakgchipat chu putum tuku nitlan anan kakilhtamaku, chu latamanin tiku kgalhakgaxmatkgo Dios tlan xatapaxuwan nalatamakgo putum kilhtamaku (Sal. 72:7, 12-14, 16). Xlakata uma takgalhkgalhin tlawa pi napaxkiyaw Jehová xliputum kinakujkan, kilatamatkan, kilitliwakgakan chu kintalakapastaknikan (Luc. 10:27).

14. ¿Tuku lanka talakgalhaman kinkamaxkinitan Jehová?

¹⁴ Kinkamaxkinitan lanka talakgalhaman pi xtatayananin nawanaw. (Is. 43:10-12.) Paxkiyaw Jehová xlakata kinkamaxkinitan talakgalhaman pi natatayayaw xTamapakgsin  chu nakaliniyaw tamakatsin nema tlan kamamakgkatsini tiku patinamakgolh. Tlan lu lakatanks nakawaniyaw chu nalimasiyayaw pi nakgantaxtu, xlakata anta kilhtiyayaw kxTachuwin Dios tiku xaxlikana, tiku putum makgantaxti tuku wan natlawa (kalikgalhtawakga Josué 21:45 chu 23:14). Chuna la akxilhaw, lhuwa tuku xlakata kilipaxkitkan Jehová. Pero ¿la nalimasiyayaw pi xlikana paxkiyaw?

15. ¿La kinkamakgtayayan nalikgalhtawakgayaw Biblia chu natlawayaw tuku katsiniyaw anta?

¹⁵ Ni namakgxtakgaw nalikgalhtawakgayaw Biblia chu natlawayaw tuku wan. Chuna limasiyayaw pi paxkiyaw Jehová chu lakaskinaw kakinkalipulalin xTachuwin (Sal. 119:105). Komo titaxtumaw tuku tuwa, nakinkamatliwakglhan nalikgalhtawakgayaw la umakgolh tachuwin: «Ama ti nak ixnaku snun lipuwan, akxni tlawa tu nitlan y takgalhtutsuwij, wix ni lakgmakgana», chu «Mapakgsina Dios wix tunkan kimakgtaya kun mintalakgalhaman. Akxni snun xakakgatuyuma nak kintapuwan, y ni xakkatsi tu naktlawaj wix kimakgtsi[ya]jti y maxki tapaxawan [kilatamat]» (Sal. 51:17; 94:18, 19). Jehová chu Jesús kalakgalhaman tiku patinamakgolh (Is. 49:13; Mat. 15:32). Akxni likgalhtawakgayaw Biblia kinkamakgtayayan naʼakxilhaw pi Jehová lu kinkamakgtayaputunan, uma tlawa pi tlakg napaxkiyaw.

16. ¿Tuku xlakata tlakg paxkiyaw Jehová akxni tlakg tlawayaw oración?

¹⁶ Ni namakgxtakgaw natlawayaw oración. Oración tlawa pi tlakg lakatsu natawilaniyaw “xkgaxmatna oración”, Jehová (Sal. 65:2). Akxni akxilhaw pi kinkakgalhtiyan kiʼoracioneskan, tlakg paxkiyaw. Akgtum liʼakxilhtit, max milh kilhtamaku akxilhwi pi nikxni mastanit talakaskin natitaxtuyaw chuna la nila xtayaniw (1 Cor. 10:13). Max akxni lu nitlan xtitaxtumaw tasaskiniw Jehová pi xkinkamakgtayan, chu makgkatsiw “tlanka tapaxuwan kkinakujkan” nema nitu xtachuna (Filip. 4:6, 7, TXS, 1999). Max milh kilhtamaku tlawaniw oración Dios pero ni takgaxmatli, la tlawalh Nehemías, chu alistalh akxilhwi pi Jehová kinkakgalhtin (Neh. 2:1-6). Chuna, akxni putum kilhtamaku “xakgatlilakaniyaw Dios” chu akxilhaw pi kinkakgalhtiyan kiʼoracioneskan, tlakg paxkiyaw chu likatsiyaw  pi nakinkamakgtayayan akxni natitaxtuyaw tuku tuwa xlakata kintakanajlakan (Rom. 12:12).

17. ¿La naʼakxilhaw tamakxtumit komo paxkiyaw Jehová?

¹⁷ Ni namakgxtakgaw tamakxtumit chu laklanka tamakxtumit. (Heb. 10:24, 25.) Israelitas xtamakxtumikgo xlakata xkgaxmatnikgolh Jehová, xlakgapaskgolh, xlakata liwana xkakninanikgolh chu xkgalhakgaxmatkgolh xLimapakgsin (Deut. 31:12). Komo xlikana paxkiyaw Jehová ni tuwa katimakgkatsiw natlawayaw xtalakaskin (kalikgalhtawakga 1 Juan 5:3). Wa xlakata ni kamakgatsankgaw tamakxtumit. Putum kilhtamaku kapaxkiw Jehová chuna la akxni lakgapaswi (Apoc. 2:4).

18. ¿Tuku taskujut makgtlawayaw xlakata paxkiyaw Dios?

¹⁸ Xatapaxuwan nalichuwinanaw «ntalulokgtat xla xatlan tamakatsinin». (Gál. 2:5.) Tapaxkit nema kgalhiniyaw Dios kinkamakgtayayan nawaniputunaw amakgapitsin xlakata xTamapakgsin Mesías, tiku natlawa guerra xpalakata «tankswa tachiwin» kʼArmagedón (Sal. 45:4; Apoc. 16:14, 16). ¡Lu lipaxuwayaw xlakata kamakgtayayaw latamanin nakatsikgo pi Dios kinkapaxkiyan chu tuku natlawa kimpalakatakan! (Mat. 28:19, 20.)

19. ¿Tuku xlakata kilipaxtikatsinitkan xtaskujutkan lakgkgolotsin xalak congregación?

¹⁹ Napaxtikatsiniyaw taskujut xla pulalinanin xla congregación. (Hech. 20:28.) Jehová wilinit lakgkgolotsin xalak congregación xlakata lakaskin lu tlan kakinkakitaxtunin. Xlakan litaxtukgo «la putatsekgni akxni min un chu litatsekgni akxni lipekua senan, xtachuna la chuchut kʼakgtum país niku xakaskakni, xtachuna la xmastalekg akgtum lanka chiwix xatsinka niku wi desierto» (Is. 32:1, 2). ¡Lu paxtikatsiniyaw pi wi niku natatsekgaw akxni wi lanka un o nakgalhiyaw niku naskgekgaw akxni lipekua chichinama! Uma liʼakxilhtit kinkamakgtayayan naʼakxilhaw la umakgolh lakgkgolotsin xalak kcongregación lu kinkamakgtayakgoyan, kinkamatliwakglhnikgoyan kintakanajlakan akxni titaxtuyaw taʼakglhuwit. Dios “kinkamaxkiyan lakchixkuwin” tiku kinkakuentajtlawakgoyan, komo kakgalhakgaxmataw limasiyayaw pi paxtikatsiniyaw pi kinkamakgtayakgoyan chu limasiyayaw pi paxkiyaw Cristo xAkgxakga congregación chu Jehová (Efes. 4:8; 5:23; Heb. 13:17).

20. Komo tlan natalalinaw Dios, ¿la nakgantaxtu tuku wan Santiago 1:22-25 kkilatamatkan?

²⁰ Komo «ni [...] kaj xman nakgaxtamaw xtachuwin Dios, wampi tlakg xlakaskinka nalitsakgsayaw, [o natlawayaw] kkilatamatkan» tlan natalinaw Dios (kalikgalhtawakga Santiago 1:22-25, TXS, 1999). «Nalitsakgsayaw», wamputun pi kintakanajlakan natlawa pi lu nalichuwinanaw xTamapakgsin Dios chu ni namakgatsankgayaw tamakxtumit. Xliputum kinakujkan paxkiyaw Dios wa xlakata kgalhakgaxmataw «xlimapakgsin», kilhchanima putum tuku Jehová lakaskin natlawayaw (Sal. 19:7-11).

21. ¿Tuku tlan natamalakxtumiyaw kiʼoracioneskan?

²¹ Tapaxkit nema kgalhiniyaw Jehová tlawa pi ni namakgxtakgaw oración. Sacerdotes xalak Israel chali chali xlilhkuyunitkan xwanit incienso Jehová. Lu lilakgatit pi mapakgsina David tamalakxtumilh incienso xʼoración akxni kilhtlilh: «Kalakgtakxtuchan jee kiʼoración la xajin incienso nima klilakgachixkuwiyan, y lata klakaliniyan kimakan nak kiʼoración, kalimanu la kililakgachixkuwin xala [kakgotanun]» (Sal. 141:2; Éx. 30:7, 8). Akxni xataktujun tasaskiniyaw Jehová, akxni malankiyaw, chu akxni paxtikatsiniyaw lu stlan katakgaxmatli la xamuksun incienso (Apoc. 5:8).

22. ¿Tuku naʼakxilhaw kʼartículo nema mima?

²² Jesús wa pi kilipaxkitkan Dios, pero nachuna amakgapitsin (Mat 22:37-39). Chuna la naʼakxilhaw kʼartículo nema aku mima, akxni paxkiyaw Jehová chu xtastakyaw, tlakg ni tuwa makgkatsiyaw napaxkiyaw amakgapitsin.