1. ¿Tuku lu xlakaskinka kkintakakninkan?

¿MINIT kilhtamaku akxilhnita pi lhkawilikanit tukuwani Jehová kʼakgtum lanka chiki? Xlikana pi lu lipaxuwa akxni akxilhti, xlakata xtukuwani Dios lu xlakaskinka ktakaknin nema maxkiyaw: ¡akinin xtatayananin Jehová! Ni anan atanu takanajla tiku kalilakgapaskan xtukuwani Dios chuna la akinin. Pero, katsiyaw pi lanka tuku lakgayaw xlakata linaw uma tukuwani.

2. ¿Tuku kilitlawatkan xlakata linaw xtukuwani Dios?

² Xlakata Jehová tlan nakinkaʼakxilhan ni kajwatiya talakaskin namaklakaskinaw xtukuwani. Na talakaskin nalinaw kilatamatkan chuna la wan xlimapakgsin. Wa xlakata, Biblia kinkamalakapastakayan chatunu kskujnin: «Kamakgxtakgti tu nitlan» (Sal. 34:14). Apóstol Pablo liwana lichuwinalh pi lakgayaw tuku lu xlakaskinka akxni tsokgli: «Katamakgatlinikgolh ntalakgalhin xlipaks wa nti [mapakuwi xtukuwani Jehová]» (2 Tim. 2:19). Xlikana, xtatayananin kinkalilakgapaskanan xlakata mapakuwiyaw xtukuwani Jehová. Pero ¿la lakgmakganaw talakgalhin chu putum tuku nitlan?

3, 4. ¿Tukuya texto ni liwana akgatekgsnikgonit tiku liskujkgo nalakputsananikgo Biblia, chu tuku xlakata?

³ (Kalikgalhtawakga 2 Timoteo 2:19.) Kʼuma texto, Pablo lichuwinan «xtankgaxekga Dios, lu[...] tliwakglh wi» chu lichuwinan pulaktiy tuku lu xlakaskinka nema anta tatsokgnit. Xapulana wa pi «lakgapaskgoy nkimPuchinakan wa nti ntapakgsinikgoy», chu uma liwana tasiya pi kilhtiyakanit kNúmeros 16:5 (kaʼakxilhti xapulana artículo). Pero xlipulaktiy, niku wan «katamakgatlinikgolh ntalakgalhin xlipaks wa nti [mapakuwi xtukuwani Jehová]», tiku liskujkgo nalakputsananikgo Biblia ni liwana akgatekgsnikgonit. ¿Tuku xlakata?

⁴ Xlakata, maski tasiya pi Pablo xkilhtinit tuku xlichuwinama kTatsokgni xaHebreo, ni anan akgtum texto nema tatalakxtumi tuku lichuwinalh. Wa xlakata, ¿tuku xkilhchanima akxni wa: «Katamakgatlinikgolh ntalakgalhin xlipaks wa nti [mapakuwi xtukuwani Jehová]»? Pablo aku xlichuwinanit capítulo 16 xla Números, niku lichuwinan Coré tiku ni kgalhakgaxmatninalh. ¿Wa xkilhchanima xlakata Coré uma xlipulaktiy tuku lichuwinalh?

5-7 ¿Tuku lalh kxkilhtamaku Moisés nema lichuwinalh Pablo anta 2 Timoteo 2:19? (Kaʼakxilhti xapulana dibujo.)

⁵ Biblia wan pi Datán chu Abiram, xkamanan Eliab, tatayakgolh Coré xlakata nalakatakikgo Moisés chu Aarón (Núm. 16:1-5). Xlakgmakgankgo Moisés chu ni xkgalhakgaxmatkgo limapakgsin nema Dios xmaxkinit. Xlikana pi amakgolh lakchixkuwin chuntiya xwilakgo kxkachikin Jehová chu kalipekua xwilikgo xtakanajlakan tiku ni xmakgatsankgananikgo Dios. Pero akxni lakgchalh kilhtamaku natakatsi tiku xaxlikana xkakninanin Dios xwankgonit chu tiku ni xkgalhakgaxmatnankgo, Jehová liwana wa tuku xlitlawatkan xwanit.

⁶ Biblia kinkawaniyan: «Jehová kgalhtilh Moisés, chu wanilh: “Katachuwinanti kachikin, chu kawanti: «¡Katamakgatlinitit xtabernáculos Coré, Datán chu Abiram!»”. Moisés tunkun kalakgalh Datán chu Abiram, chu lakgkgolotsin tiku xwilakgolh kʼIsrael stalanikgolh. Moisés katachuwinalh tiku xtamakxtumikgonit chu kawanilh: “Katlawatit litlan, katamakgatlitit kxlakatinkan xchikkan xaxuwa uma lakchixkuwin tiku lixkajni likatsikgo, chu nitu kaxamatit tuku katapakgsini, xlakata ni naniyatit xlakata xtalakgalhinkan”. Xlakan tunkun tamakgatlikgolh kxlakatin xtabernáculo Coré, Datán chu Abiram, xliputuminika niku xyakgolh» (Núm. 16:23-27). Alistalh Jehová kamakgnilh tiku ni xkgalhakgaxmatnankgo. Pero xaxlikana xkakninanin Dios ni nikgolh, xlakata limasiyakgolh pi xlakgmakgankgo talakgalhin akxni tamakgatlinikgolh tiku ni xkgalhakgaxmatnankgo.

⁷ Jehová katsi tuku wi knaku chu katsi tiku ni makgatsankgananikgo chu tapakgsinikgo. Maski chuna, talakaskilh pi tiku xtatayakgo Jehová tunkun xtamakgatlinikgolh tiku nitlan xlikatsikgo. Wa xlakata, Pablo max xkilhchanima tuku wan Números 16:5, 23-27, akxni tsokgli: «Katamakgatlinikgolh ntalakgalhin xlipaks wa nti [mapakuwi xtukuwani Jehová]». Uma taʼakgatekgsa pi chuna xlilat xlakata aku xtsokgnit, «lakgapaskgoy nkimPuchinakan wa nti ntapakgsinikgoy», chu uma tachuwin na kilhchanima tuku xlanit kxkilhtamaku Moisés (2 Tim. 2:19).

8. ¿Tuku xlakata ni kajwatiya talakaskin namapakuwiyaw xtukuwani Jehová o namakgtapakgsiyaw kcongregación?

⁸ Akxni lichuwinalh tuku xlanit kxkilhtamaku Moisés, Pablo malakapastakalh Timoteo pi lakapala xlitamakgatlinit xwanit tiku nitlan xlikatsikgo, xlakata chuntiya tlan xtalalilh Jehová. Pero ni kajwatiya xtalakaskin  namakgtapakgsi kcongregación, chuna la ni kajwatiya xtalakaskin pi Coré chu tiku kstalanikgo xmapakuwikgolh xtukuwani Dios. Lu xlakaskinka pi putum kskujni Dios tunkun “natamakgatlinikgo talakgalhin”. Xlakata uma tuku wanika, ¿tuku xlitlawat xwanit Timoteo? ¿Chu tuku kinkamasiyaniyan uku xtastakyaw Pablo?

9. ¿La tlawanikgolh tuku nitlan congregación kxapulana siglo «wantu kaj xtalakapastaknikan wanti kaj akglakgwa» xchuwinankgo?

⁹ Anta kxTachuwin Dios liwana kinkawanikanan tuku kililakgmakgatkan. Akgtum liʼakxilhtit, akxni Pablo wanilh Timoteo tuku tatsokgnit 2 Timoteo 2:19, na wanilh pi nitlan komo nalitaʼakglhuwi «tachiwin» chu wanilh pi xtamakgatilinilh «talakapastakni [...] wantu nitu kgalhiy xlakgasi» (kalikgalhtawakga 2 Timoteo 2:14, 16, 23, Hua Xasasti Talaccaxlan, TXS, 1999). Makgapitsi tiku xalak congregación xmasiyamakgo tuku ni xaxlikana takanajla. Nachuna, makgapitsi wi tuku xwankgo xlakata xtawilalh taʼakglhuwit. Max ni xliputum xlakatsala tuku wan Biblia, pero xtlawa pi nitlan xlatalalinka kcongregación. Wa xlakata Pablo wanilh Timoteo pi xlakgmakgalh «wantu kaj xtalakapastaknikan wanti kaj akglakgwa» xchuwinankgo.

10. ¿Tuku natlawayaw akxni wi tiku nakinkamasiyaniputunan tuku ni min kBiblia?

¹⁰ Kxapulana siglo lu xʼanan kcongregación tiku xlakatayakgo xaxlikana takanajla pero la uku kaj min kilhtamaku tiku chuna tlawa. Pero, akxni wi tiku kinkamasiyaniputunan tuku ni min kBiblia, kililakgmakgatkan. Ni xlilat nakatataʼakglhuwiyaw tiku makgxtakgkgonit xaxlikana takanajla chu lakatayakgo, nipara kʼInternet, o atanu la nakatachuwinanaw. Maski xtachuwinamputuw xlakata makgtayaputunaw, lakatsalamaw xwa xlimapakgsin Dios nema aku lichuwinaw. Kskujnin Jehová lakgmakganaw putum tuku masiyakgo tiku makgxtakgkgonit xaxlikana takanajla.

11. 1) ¿Tuku max natlawa nalitaʼakglhuwikan «xtalakapastaknikan wanti kaj akglakgwa» chuwinankgo? 2) ¿La tlan nawilikgo tlan liʼakxilhtit lakgkgolotsin xalak congregación?

¹¹ Wi atanu tuku na tlawa pi kcongregación nitlan nalatalalinkgo, ni kajwatiya tiku makgxtakgkgonit xaxlikana takanajla chu lakatayakgo. Akgtum liʼakxilhtit, tuku tanu tanu lakpuwankan xlakata lilakgastan tlawa pi naliʼakglhuwatnankan «xtalakapastaknikan wanti kaj akglakgwa» chuwinankgo. Pero, komo wi tiku kamakgpuwantini amakgapitsin pi kalilakgastanankgolh tuku lakatsala tuku wan Biblia, nitlan komo lakgkgolotsin xalak congregación namaxkikgo talakaskin chuntiya chuna natlawa kaj xlakata ni tataʼakglhuwiputunkgo (Sal. 11:5; Efes. 5:3-5). Pero kuenta xlitlawatkan ni nawankgo tuku kaj xlakan lakpuwankgo. Wata xlikgalhakgaxmatatkan uma tastakyaw nema kamaxkikan lakgkgolotsin xalak congregación: «[Kakuentajtlawatit] nkgamputum x[borrego] Dios wa nti nkamakuintajlikanitantit, ni [...] kaj xaʼaklan timapakgsikgoyatit wa nti ntamakuintajlinitantit, chi wampi kaj xaliukxilhtit nawanatit xpalakatakan nkgamputum x[borrego] Dios» (1 Ped. 5:2, 3; kalikgalhtawakga 2 Corintios 1:24).

12, 13. 1) ¿La laksakkgo xtatayananin Jehová tuku nalilakgastanankgo? 2) ¿Tuku tastakyaw xalak Biblia makgtayanan xlakata liwana nalaksakkan lilakgastan? 3) ¿Tuku nema na tlawakan klatamat kilhchanima tastakyaw nema min kpárrafo 12?

¹² Xkachikin Dios ni kalakputsanani películas, videojuegos, libros o tatlakgni xlakata nakinkawaniyan tuku kililakgmakgatkan. ¿Tuku xlakata? Xlakata Biblia kamakgpuwantini kstalaninanin Cristo kalimasmanikgolh «kxtalakapastaknakan [...] nakatsiy ntu ni xatlan, chu ntu xatlan» (Heb. 5:14). Anta kBiblia katekgsaw tastakyaw nema kinkamakgtayayan liwana nalaksakaw tuku nalilakgastananaw. Chuna la putum tuku tlawayaw kkilatamatkan, akxni wi tuku nalaksakaw nalilakgastananaw, liwana «[kilikatsitkan] wantu lakgatiy nkimPuchinakan» (Efes. 5: 10). Biblia masiya pi natlatni na kalakgchan nawankgo tuku xfamilia tlan nalilakgastanankgo o tuku ni (1 Cor. 11:3; Efes. 6:1-4). *

¹³ Uma tastakyaw xalak Biblia nema kalichuwinaw ni kajwatiya kilhchanima lilakgastan. Tuku tanu tanu lakpuwankan xlakata la lhakganankan chu takaxtayakan, xlakata tuku likuchunkan chu tuku nawakan chu atanu tuku akstu kililaksakatkan max nalitaʼakglhuwikan. Wa xlakata, komo ni lakatsalamaka tuku wan Biblia, kskujnin Jehová ni nalitaʼakglhuwikgo uma, xlakata «kskujni nkimPuchinakan, ni [xlitaʼakglhuwit], wampi xasmalhwa xliwanat kxlakatinkan xlipaks amakgapitsin» (2 Tim. 2:24).

14. ¿Tuku liʼakxilhtit wililh Pablo xlakata xlimasiyalh pi lu xlakaskinka ni nakatalalinaw tiku ni tlan xtayatkan?

¹⁴ ¿Tuku atanu xlitlawatkan xlakata “natamakgatlinikgo ntalakgalhin xlipaks wa nti [mapakuwi xtukuwani Jehová]”? Ni natalalinkgo tiku tlawakgo tuku nitlan. ¿Tuku liʼakxilhtit wililh Pablo xlakata uma? Akxni xlichuwinanita «xtankgaxekga Dios, lu[...] tliwakglh wi» tsokgli xlakata akgtum “tlanka chiki”. Pablo wa pi anta «ni xman wa nkgalhikan [vasos] xla oro, chu xla plata, wampi na xa wa nkgalhikan xla kiwi, chu xla tiyat. Pus na chuna nchu makgapitsi, kaj xkakni likgalhikan, chi nchu wa makgapitsi, kaj [putum] ntu limaklakaskinkan» (2 Tim. 2:20, 21). Alistalh, Pablo kamakgpuwantinilh kstalaninanin Cristo natamakgatlinikgo vasos nema «kaj [putum] ntu limaklakaskinkan».

15, 16. ¿Tuku kinkamasiyaniyan liʼakxilhtit xla “tlanka chiki”?

¹⁵ ¿Tuku kilhchanima uma liʼakxilhtit? Pablo tamalakxtumi congregación akgtum “tlanka chiki”, chu tiku wilakgo anta, katamalakxtumi vasos o wa tuku maklakaskinkan kchiki. Kʼakgtum chiki makgapitsi tuku kamaklakaskinkan max wi tuku nalitaxkajwani. Wa xlakata ni akxtum katawilikan tuku ni xataxkajwani, la nema kamaklakaskinkan xlakata natlawakan liwat.

 ¹⁶ Nachuna, kskujnin Jehová xala uku tiku liskujkgo lu tlan nalinkgo xlatamatkan ni xlitalalitkan tiku wilakgo kcongregación chu chuntiya lakatsalakgo xtastakyaw Biblia (kalikgalhtawakga 1 Corintios 15:33). Komo ni nakatalalinaw kcongregación tiku chuntiya lakatsalakgo xtastakyaw Biblia, liwaka ni nakatalalinaw tiku ni xalak congregación xlakata makgapitsi “paxkikgo tumin, [...] ni kgalhakgaxmatkgo xnatlatnikan, [...] makgxtakgnankgo, [...] xʼakgsaninanin, [...] xalak luku, ni paxkikgo tuku tlan, akgskgawinankgo, [chu] tlakg paxkikgo wa tuku lipaxuwakgo nixawa Dios” (2 Tim. 3:1-5, TNM).

17. ¿La limasiyakgolh israelitas tiku ni xmakgxtakgkgo Dios pi xlakgmakgankgo tuku nitlan?

¹⁷ Biblia liwana kinkawaniyan pi israelitas tunkun tamakgatlinikgolh xchikkan xaxuwa xla Coré, Datán chu Abiram, akxni kawanika. Biblia wan pi «xlakan tunkun tamakgatlikgolh», ni lakpuwankgolh komo chuna o ni chuna xtlawakgolh (Núm. 16:24, 27). Chu kBiblia na wan la tlawakgolh: «Tamakgatlikgolh [...] xliputuminika niku xyakgolh». Tiku ni xmakgatsankgananikgo Dios kgalhakgaxmatnankgolh xliputum xnakujkan. Liwana masiyakgolh pi xtatayakgo Jehová chu xlakgmakgankgo tuku nitlan. ¿Tuku kinkamasiyaniyan xliʼakxilhtitkan?

18. ¿Tuku xkilhchanima Pablo akxni wanilh Timoteo: «Katamakgatlini xlipaks wa ni tlan xtatlawaputukan nkaman»?

¹⁸ Akxni naʼakxilhaw pi wi tuku nalaktlawa la talalinaw Jehová, tunkun kilitamakgatlinitkan chu ni nalakpuwanaw komo natlawayaw o ni. Wa uma tuku xkilhchanima Pablo akxni wanilh Timoteo: «Katamakgatlini xlipaks wa ni tlan xtatlawaputukan nkaman» (2 Tim. 2:22). Xlakata Timoteo lankata xwanit, max xkgalhiya 30 kata, ¿tuku xlakata Pablo maxkilh uma tastakyaw? Xlakata ni kajwatiya kamanan wa tiku tlawaputunkgo tuku nitlan. Wa xlakata, Timoteo xlitamakgatlinit xwanit «ntalakgalhin». Jesús na watiya tuku masiyalh akxni wa: «Lapi wa milakgastapu matlawiyan talakgalhin, kalakpimaxtuka, na makgat kamakganti» (Mat. 18:9, TXS, 1999). La uku, kstalaninanin Cristo tiku liwana kgalhakgaxmatkgo uma tastakyaw tunkun tamakgatlinikgo tuku max xlaktlawalh xtakanajlakan, ni lakpuwankgo komo chuna xlitlawatkan o ni.

19. ¿Tuku tlawakgonit makgapitsi natalan xlakata tunkun natamakgatlinikgo tuku max xlaktlawalh xtakanajlakan?

¹⁹ Makgapitsi tiku nila xmakgxtakgkgo kuchu akxni nina xtatayananin Jehová xlitaxtukgo, la uku lakapastakkgonit nipara tsinu nawakgo tuku kgalhi kuchu. Amakgapitsi ni lilakgastanankgo tuku maski nila wanaw pi nitlan, max natlawa pi nakgalhikgo nitlan talakpuwan (Sal. 101:3). Wa uma tuku titaxtulh chatum tala, tiku akxni nina xtatayana Jehová xwanit, xlakgati xʼan niku lixkajnit xtantlikan. Lata akxni xtatayana Jehová litaxtulh, maski an niku tantlikgo natalan, nialh tantli xlakata ni kgalhiputun nitlan talakpuwan chu ni natlawaputumpara tuku pulana xtlawa. Xlikana pi kstalaninanin Cristo ni kinkaskinikanan pi nipara tsinu nawayaw kuchu, nialh natantliyaw o ni natlawayaw atanu nema nila nawanaw pi nitlan. Pero putum akinin tunkun kilitamakgatlinitkan tuku max xlaktlawalh kintakanajlakan.

20. Maski min kilhtamaku tuwa nakinkakitaxtuniyan “natamakgatliniyaw talakgalhin”, ¿tuku kinkamatliwakglhan?

²⁰ Lanka tuku lakgayaw xlakata kgalhiyaw talakgalhaman nalinaw xtukuwani Dios. Talakaskin “natamakgatliniyaw talakgalhin” chu namakgxtakgaw tuku nitlan (Sal. 34:14). Xlikana, min kilhtamaku tuwa kinkakitaxtuniyan. Pero lu kinkamatliwakglhan nakatsiyaw pi Jehová putum kilhtamaku nakapaxki «wa nti ntapakgsinikgoy», tiku kgalhakgaxmatkgo (2 Tim. 2:19; kalikgalhtawakga 2 Crónicas 16:9a).