KATHERINE, xalak Estados Unidos, tamunulh akxni xkgalhi 16 kata. Lu xlakaskinka xakxilha nalichuwinan Dios, anta niku xlama ni xtekgsa tiku xkatsiputun xlakata xTamapakgsin Dios. Xla wan: «Xaklikgalhtawakga xlakata tiku kskininit Dios pi xmalakgachanilh tiku xmakgtayalh nalakgapasa. Akit xaktekgsputun tiku chuna xwaninit Dios, pero ni ktekgsli».

Akxni akglhuwata kata anta xlichuwinanit Dios, Katherine tsukulh lakpuwan pi xʼalh latama niku latamanin tlakg xkgaxmatputunkgolh xalakwan xalaksasti tamakatsin. Pero wi tuku xlilakgaputsa. Kaj makgtum xtamakgatlininit xfamilia chu akxni makgat xwilacha, chali chali lu xkalakapastaka. ¡Chu kaj akgtiy semana ni akxtum xkatawi! ¿Tlan xtayanilh nakatamakgatlinipara? Pero tuku tlakg tliwakga xwanit wa pi xpaxuwaputun xlakata xkamakgtayalh tiku lakgapasputunkgo Jehová. Wa xlakata, akxni xlakpuwanita lakalhuwa niku tlan xʼalh, malakgachalh maktum carta ksucursal xalak Guam, chu wanika tuku xkatsiputun. Julio kata 2007, akxni xkgalhi 26 kata, alh latama kSaipán, akgtum isla xalak Pacífico, max 10,000 kilómetros xlimakgat xwi xchik. ¿La kitaxtunilh?

Akxni nina makgas xtitaxtunit lata xchanit kxasasti xcongregación, Katherine lakgapasli Doris, tiku max xkgalhi 45 kata chu tsukulh limakgalhtawakge Biblia. Akxni xlikgalhtawakgakgonita akgtutu capítulos xla libro ¿Tuku xlikana masiyay Biblia?, Katherine ni xkatsi tuku natlawa. Xla wan: «Doris lu tlan xkgalhtawakgama, chu akit xaklakaskin pi lu tlan xkitaxtunilh. Wa xlakata, xaklakpuwan pi tlakg tlan xwa komo xlakgalh chatum tala puskat tiku tlakg xkatsini, max tiku na xkgalhi xkata, xlakata akit nikxni xakmakgalhtawakgenit tiku putum kilhtamaku xkgalhtawakgaputun». Wa xlakata skinilh Jehová pi xmakgtayalh natekgsa tiku tlan xlipawa chu xmakgalhtawakgelh Doris. Alistalh, lakpuwa nalitachuwinan Doris tuku xlakpuwanit.

Katherine wan: «Akxni nina xaklitachuwinan, Doris kiwanilh akgtum xtaʼakglhuwit. Kkgaxmatnilh chu alistalh kwanilh la Jehová xkimakgtayanit akxni nachuna xaktitaxtunit». Alistalh, Doris paxtikatsinilh Katherine chu wanilh: «Jehová maklakaskiman. Ama kilhtamaku akxni chipi kkinchik, lhuwa hora xaklikgalhtawakganit Biblia. Xaktasama, xaktasaskinima Dios pi wi  tiku xmalakgachalh xlakata xkimakgtayalh nakʼakgatekgsa tuku wan Biblia. Alistalh, lakgatlakgti kimalakcha. ¡Jehová kgaxmatli kiʼoración!». Katherine tasa akxni lakapastaka ama kilhtamaku. Xla wan: «Tuku kiwanilh Doris wa litaxtulh xtakgalhtin kiʼoración. Jehová kimakatsinilh pi tlan chuntiya xakmakgalhtawakgelh».

Doris tamunulh kkata 2010, chu la uku lhuwa tiku kalimakgalhtawakge Biblia. Katherine wan: «¡Lu kpaxtikatsini Jehová pi tuku xaklakaskin kgantaxtulh!». La uku, precursora especial litaxtu kKosrae, atanu isla xalak Pacífico chu lu paxuwa.

Liwaka akgtum ciento natalan lakchixkuwin chu lakpuskatin, tiku kgalhikgo 19 asta 79 kata, ankgonit latamakgo kMicronesia xlakata naskujnanikgo Dios niku tlakg talakaskin tiku nalichuwinankgo Dios. Erica, tiku chalh kʼGuam kkata 2006 akxni xkgalhi 19 kata, lichuwinan tuku makgkatsikgo umakgolh natalan tiku lipaxuw skujnanikgo Dios: «Akxni precursor litaxtukan anta niku latamanin lu katsiputunkgo tuku xaxlikana, lu tlan limakgkatsikan. Lu kpaxtikatsini Jehová xlakata kimakgtayanit chuna nakskujnani. ¡Uma xlikana latamat!». La uku precursora especial kʼEbeye (Islas Marshall). Xlikana, tuwa tuku titaxtukan akxni ankan skujnanikan Dios kʼatanu país. Kaʼakxilhwi pulaktutu chu tuku tlawakgo tiku ankgonit latamakgo kMicronesia.

Nialh lhuwa tuku nakgalhiputunkan. Simon, chalh kPalaos kkata 2007, akxni xkgalhi 22 kata. Akxni chalh, katsilh pi kaj ni lhuwa tumin xʼama tlaja, ni xtachuna la xtlaja kʼInglaterra. Xla wan: «Kkatsilh pi nila xakama tamawa putum tuku xaklakaskilh. La uku, liwana klaksaka tukuya liwat naktamawa chu kputsa niku ni lu tapalaxla. Chu komo wi tuku talakgalhi, ktamawa tuku maski ni xasasti xlakata naklikaxtlawa chu kputsa tiku nakimakgtaya». ¿La makgtayalh xlakata xtalakaskin ni lhuwa tuku xkgalhilh kxlatamat? Simon wan: «Kkatsinilh tuku xlikana kmaklakaskin xlakata naklatama chu la tlan ni lhuwa tumin xaklaktlawalh. Makglhuwa kakxilhnit la Jehová kinkuentajtlawanit. Kʼuma akgtujun kata la kskujnanima Dios unu, nikxni kintsankganinit tuku nakwa chu niku naklhtata». Chuna, Jehová kakuentajtlawa tiku ni lhuwa tuku kgalhiputunkgo xlakata pulana wiliputunkgo xTamapakgsin (Mat. 6:32, 33).

Lu lakapastakkan familia. Erica wan: «Ni xaklamakgxtakgaw kkifamilia, wa xlakata xaklakpuwan pi lu xakkalakapastakli chu ni xatapaxuwan xaklichuwinalh Dios». ¿Tuku tlawalh xlakata ni lu xlakapastakli xfamilia? Wampara: «Akxni xakwijku kkinchik, klikgalhtawakgalh makgapitsi artículos xla La Atalaya nema xlichuwinan akxni lu lakapastakkan familia. Kʼakgtum artículo xlitachuwinan chatum tse tiku wanilh xtsumat: “Jehová tlakg tlan kuentajtlawayan nixawa akit”. Uma tachuwin lu kimatliwakglhli». Hannah chu xchixku tiku wanikan Patrick, skujnanikgo Dios kMajuro (Islas Marshall). Xlakata ni lu nalakapastaka  xfamilia Hannah lakpuwan la nakamakgtaya natalan xalak congregación. Xla wan: «Putum kilhtamaku kpaxtikatsini Jehová xlakata kkakgalhi natalan xlikalanka katiyatni; xlakan na kifamilia litaxtukgo. Komo ni xkimaxkikgolh xtamakgtaykan nikxni xaktiskujnanilh Dios niku tlakg talakaskin».

Nakatalalinkan tiku anta wilakgolh. Simon wan: «Akxni chankan kʼakgtum país nema ni lakgapasa, tanu putum tuku anta tlawakan. Min kilhtamaku nitlan kmakgkatsi xlakata kwan tuku klakaskin nalilitsinkan pero niti kiʼakgatekgsni». Erica wan: «Pulana xakmakgkatsi pi niti kuenta xkintlawani, pero uma kimakgtayalh naklakapastaka tuku xlakata xakkanit anta. Ni xakkanit xlakata xlakaskinka xkiʼakxilhka, wata xlakata tlakg xakskujnanilh Jehová». Chu wampara: «Chuna la titaxtulh kilhtamaku lhuwa tiku ktsukulh tlan kkatalalin, chu lu xlakaskinka kkaʼakxilha». Simon liskujli xlakata xkatsinilh palauano, uma tlawa pi tlakg lhuwa tiku nakatalalin, chu na xʼamigos nakatlawakgo natalan tiku lamakgolh kʼuma kachikin (2 Cor. 6:13). Xlakata xkatsiniputun xtachuwinkan, natalan paxkikgolh. Chuna, akxni akxtum skujkgo natalan tiku aku chankgo chu natalan xala anta, xputumkan tlan kakitaxtuni, xlakata tsukukgo lu tlan latalalinkgo. ¿Tuku atanu tasikulunalin makglhtinankgo tiku xatapaxuwan ankgo skujkgo niku tlakg talakaskin?

Apóstol Pablo tsokgli: «Wanti lanka chananan lhuwa makgalananan» (2 Cor. 9:6, Xasasti Talaccaxlan, [Coyutla]). Tuku wan uma texto na kakilhchani tiku lakputsakgo la tlakg naskujnanikgo Dios. ¿La kakitaxtuninit tiku ankgonit kMicronesia?

Anta kMicronesia wijku lhuwa tiku tlan nakalimakgalhtawakgekan Biblia chu tlan kaʼakxilhkan la stakkgo xtakanajlakan latamanin tiku lakgapaskgo xaxlikana xalak Biblia chu lilatamakgo. Patrick chu Hannah na lichuwinankgolh Dios kʼAngaur, akgtum aktsu isla niku lamakgolh kaj 320 latamanin. Xlinkgoya akgtiy papaʼ la xlichuwinamakgo Dios akxni tekgskgolh chatum puskat tiku xakstu xmakgastakma xkgawasa chu tsukukgolh masiyanikgo xlakata Biblia. Uma puskat xatapaxuwan katsinilh xaxlikana xalak Biblia chu lakgpalilh xlatamat. Hannah wan pi akxni xkilakgapaxialhnankgonita, akxni xchatiykan xtaspitkgo kxchikkan chu xʼankgo kxbicicletas, xlalakaʼakxilhkgo chu xwankgo: «¡Paxtikatsinilh, Jehová!». Chu wampara: «Akit kkatsi pi Jehová tlan atanu tuku xtitlawalh xlakata uma “aktsu borrego” xtilakgapasli, pero xlakata kskujnanimaw niku tlakg talakaskin, akinin ktekgswi chu kmakgtayaw nalakgapasa Jehová. Uma kaj pulaktum tuku ktitaxtunitaw kkilatamatkan chu lu tlan klimakgkatsiyaw». Chuna la wan Erica, «nila wankan putum tapaxuwan nema tamakgkatsi akxni wi tiku makgtayaya xlakata nalakgapasa Jehová».

Anan lhuwa países niku tlakg talakaskin tiku nalichuwinan xTamapakgsin Dios. ¿Na tlan xpit makgtayanana? Kaskini Jehová kamakgtayan tlakg naskujnaniputuna. Kakatachuwinanti lakgkgolotsin xalak congregación, superintendente xla circuito o natalan tiku lichuwinankgonit Dios kʼakgtum país niku tlakg talakaskin tamakgtay. Akxni naʼakxilha pi tuku lakkaxwilipat lu tlan kitaxtuma, kamalakgacha maktum carta ksucursal nema pulalin taskujut anta niku pimputuna chu tlakg kakgalhskininanti. * Max na tlan makxtum nakatalaya lhuwa mil natalan, kamanan chu tiku linkgoya kata, tiku nina tamakgaxtokgkgonit chu tiku tamakgaxtokgkgonita, tiku xlakata xatapaxuwan ankgonit skujkgo niku tlakg talakaskin makglhtinankgonit laklanka tasikulunalin.