1. 1) Akinin latamanin, ¿tuku maklakaskinaw? 2) ¿La tlan nakgalhiyaw uma tuku maklakaskinaw?

LATAMANIN lu maklakaskinaw pi amakgapitsin lu tlan kakinkatalalinkgon. Wankan pi chatiy latamanin tlan latalalin akxni lu lapaxki chu liwana lalakgapasa. ¿Ni xlikana pi putum lipaxuwayaw akxtum katatawilayaw kifamiliajkan chu kiʼamigoskan tiku kinkapaxkikgoyan, xlakaskinka kinkaʼakxilhkgoyan chu kinkaʼakgatekgsnikgoyan? Pero tiku talakaskin lu natalalinaw nixawa amakgapitsin, wa lu xaLanka kiMalakatsukinakan (Ecl. 12:1).

2. 1) ¿Tuku kinkawaniyan Jehová? 2) ¿Tuku xlakata lhuwa tiku nila kanajlakgo uma?

² Anta kxTachuwin Jehová kinkawaniyan pi katalakatsuwiniw, chu wan pi komo chuna natlawayaw xla “na nakinkatalakatsuwiniyan” (Sant. 4:8). ¡Uma lu kinkamatliwakglhan! Pero, lhuwa nila kanajlakgo pi Dios katalakatsuwiniputun; makgkatsikgo pi ni kaminini natalakatsuwinikgo o lakpuwankgo pi lu makgat kawilanilh. ¿Xlikana tlan xʼamigo Jehová nawanaw?

3. ¿Tuku kilikanajlatkan?

³ Kilikanajlatkan pi tlan natalakatsuwiniyaw Jehová, xlakata “ni makgat kawilanilh” tiku xlikana tekgsputun (kalikgalhtawakga  Hechos 17:26, 27 chu Salmo 145:18). Maski makglakgalhinanin akinin kiDioskan lakaskin katalakatsuwiniw chu xʼamigos kawaw (Is. 41:8; 55:6). Salmista liwana xkatsi uma, wa xlakata uma tuku tsokgli xlakata Jehová: «Wix Tiku kgaxmata oración, nalakgminkgoyan putum latamanin. Snun kapaxawalh nama chixku ti wix laksaka y malakatsuwiya» (Sal. 65:2, TNM; Sal. 65:4). Kaʼakxilhwi xliʼakxilhtit xlakata tiku lakgtalakatsuwilh Dios: mapakgsina Asá. Chu kaʼakxilhwi tuku wan Biblia xlakata tuku tlawalh Jehová. *

4. ¿Tukuya tlan liʼakxilhtit wilinilh Asá kachikin Judá?

⁴ Mapakgsina Asá tatayalh xaskulunku takaknin, xlakata mapanulh tiku kstakgo xmaknikan ktemplo chu takaknin nema xkamaxkikan ídolos, pulaktiy tuku lu xtalismaninit kpaís (1 Rey. 15:9-13). Wa xlakata tlan kawanilh kachikin «pi [x]putsakgolh Jehová xDioskan xnatlatni xalamakgasa chu xmakgantaxtikgolh limapakgsin». Jehová sikulunatlawalh xtamapakgsin, xapulana akgkaw kata tlan tawilakgolh. Asá xkatsi pi uma takaksni wa Jehová xkamaxkinit. Wa xlakata wanilh kachikin: «Putsanitaw Jehová kiDioskan. Putsanitaw, chu xla tlawa pi tlan natawilayaw» (2 Crón. 14:1-7). ¿Tuku lalh alistalh?

5. 1) ¿Tuku lalh nema tlawalh pi xlitasiyalh komo Asá xlikana xlipawan Jehová? 2) ¿Tuku lalh alistalh?

⁵ Kalakpuwanti pi wix Asá. Zérah xalak Etiopía kalimima 1,000,000 lakchixkuwin chu 300 carro xla guerra, mimakgo tatlawakgo guerra Judá (2 Crón. 14:8-10). Pero wix kaj 580,000 soldados kgalhiya. ¡Xlakan makgtiy tlakg lhuwa ni xawa wix! ¿Tuku natlawaya? ¿Akstu nakgalhskinkana tuku xlakata Dios mastama talakaskin kalalh uma? ¿Miʼakstu nalipawankana o nalipawana Jehová? Tuku Asá tlawalh limasiyalh pi lu tlan xtalalin Jehová chu xlipawan. Asá skinilh Jehová: «Kakilamakgtayaw, Jehová kiDioskan xlakata xlikana kkalipawanan, chu kmintukuwani kminitanchaw xlakata nakkatatlawayaw guerra umakgolh lhuwa latamanin. Wix Jehová kiDioskan. Ni kamasta talakaskin pi chixku natlajayan». ¿La kgalhtilh Jehová uma tuku Asá tasaskinilh? «Katlajalh etíopes.» ¡Nipara chatum xtalamakgasitsin lakgtaxtulh! (2 Crón. 14:11-13.)

6. ¿Tuku tlawalh Asá nema na kilitlawatkan?

⁶ ¿Tuku xlakata Asá tlan lipawa pi Dios xʼama pulalin chu xʼama kuentajtlawa? Xlakata, chuna la wan Biblia, tlawalh «tuku tlan kxlakatin Jehová» chu xnaku «xliputuminika skujnanilh Jehová» (1 Rey. 15:11, 14). Akinin na kiliskujnanitkan Dios xliputum kinakujkan. Lu xlakaskinka chuna natlawayaw komo tlan talalimputunaw la uku chu kilhtamaku nema aku mima. Jehová wi tuku tlawanita xlakata natalakatsuwiniyaw chu nakinkamakgtayayan tlan natalalinaw chu ni namakgxtakgaw. ¡Lu paxtikatsiniyaw! Kaʼakxilhwi pulaktiy la Dios tlawanit pi katalakatsuwiniw.

7. 1) ¿Tuku tlawanit Jehová xlakata natalakatsuwiniyaw? 2) ¿Tuku tlakg xlakaskinka limaklakaskin Jehová xlakata tlawa pi natalakatsuwiniyaw?

⁷ Jehová limasiyalh xtapaxkit akxni tlawalh uma lilakgatit katiyatni. Chu chali chali limasiya pi kinkapaxkiyan xlakata kinkamaxkiyan tuku maklakaskinaw kkilatamatkan (Hech. 17:28; Apocalipsis [Revelación] 4:11). Wantuku tlakg xlakaskinka, kinkamaxkiyan tuku maklakaskinaw kkintakanajlakan (Luc. 12:42). Chu na kinkawaniyan pi wa tiku kinkakgaxmatniyan  akxni tlawaniyaw oración (1 Juan 5:14). Pero, talakgmaxtut wa tuku tlakg xlakaskinka limasiya pi kinkapaxkiyan chu wa tuku limaklakaskin xlakata natalakatsuwiniyaw chu uma tlawa pi natalakatsuwiniputunaw (kalikgalhtawakga 1 Juan 4:9, 10, 19). Jehová makamilh xKgawasa xlakata xkinkalakgmaxtun ktalakgalhin chu klinin (Juan 3:16).

8, 9. ¿La makgtayanan Jesús xlakata nakgantaxtu tuku Jehová lakpuwanit natlawa?

⁸ Jehová tlawanit pi asta tiku latamakgolh akxni nina xmin Cristo kalitamakgtayakgolh talakgmaxtut. Lata akxni lichuwinanka pi xʼama min chatum Lakgmaxtuna, kxlakatin Jehová xtaxokgonita talakgmaxtut, xlakata xkatsi pi tuku lakpuwanit natlawa xʼama kgantaxtu (Gén. 3:15). Lhuwa siglo titaxtulh, apóstol Pablo maxkilh paxtikatsini Dios xlakata “xtalakgmaxtut nCristo Jesús”. Chu na wa pi Dios xkatapatimakgolh «xtalakgalhinkan nchixkuwin» nema tlawakgolh (Rom. 3:21-26). Nila xtalakatsuwiniw Dios komo ni wa xpalakata Jesús.

⁹ Kaj xlakata xtamakgtay Jesús, tiku taktujukgo tlan lakgapaskgo Jehová chu tlan talalinkgo. ¿Tuku lichuwinan Biblia xlakata uma? Pablo tsokgli: «Wa Dios, kinkalimaʼukxilhniyan xtapaxkit, mpi akxni lakgalhinaninku xwanitaw, wa nCristo nti nkintikapalakanin» (Rom. 5:6-8). Jehová chu Jesús kinkamaxkikgon uma tamakamastan ni wa xlakata xkinkamininiyan, wata xlakata lu kinkapaxkikgoyan. Jesús wa: «[Ni ti] la nkilakgmin, lapi ni wa xaTlat nti nkimalakgachalh, ni xkiliminilh». Chu atanu kilhtamaku wa: «[Ni ti] katilakgalh xaTlat lapi ni kit nkimpalakata» (Juan 6:44; 14:6). Pero, ¿la kinkamalakatsuwiyan Jehová xpalakata Jesús? Limaklakaskin xʼespíritu santo. Xpalakata xʼespíritu tlawa pi katalakatsuwiniw chu kinkamakgtayayan ni natamakgatliniyaw xlakata tlan nakgalhiyaw latamat nema ni nasputa (kalikgalhtawakga Judas 20, 21). Pero kaʼakxilhwi atanu la Jehová tlawa pi katalakatsuwiniw.

10. ¿La kinkamakgtayayan Biblia tlakg natalakatsuwiniyaw Dios?

¹⁰ Kʼuma artículo lichuwinanitawa versículos xla 14 libros xalak Biblia. Komo ni xkgalhiw Biblia, ¿la xlikatsiw pi tlan natalakatsuwiniyaw kiMalakatsukinakan? ¿La xlikatsiw tuku kilhchanima talakgmaxtut chu tuku xlikatsiw pi Jehová limaklakaskin Jesús xlakata natalakatsuwiniyaw? Jehová limaklakaskilh xʼespíritu santo xlakata xtsokgka Biblia, niku kinkawaniyan la likatsi chu tuku lu tlan lakpuwanit natlawa. Akgtum liʼakxilhtit, kʼÉxodo 34:6, 7, Jehová wa pi xla «chatum Dios xalakgalhamana chu tlan likatsi, ni lakapala sitsi, lhuwa kgalhi tapaxkit nema ni makgxtakgnan chu xaxlikana, lhuwa mil chuntiya kalimasiyani tapaxkit, tapatinan akxni tlawakan tuku nitlan, akxni lakatsalakan limapakgsin chu akxni tlawakan talakgalhin». ¿Tiku ni natalakatsuwiniputun tiku chuna likatsi? Jehová katsi pi akxni tlakg nalakgapasaw xlakata tuku wan kBiblia, tlakg nakanajlayaw pi xlikana lama chu tlakg natalakatsuwiniyaw.

11. ¿Tuku xlakata talakaskin nalikgalhtawakgayaw xlakata xtayat chu xtiji Dios? (Kaʼakxilhti xapulana dibujo.)

¹¹ Anta niku tsuku takgalhchuwin xla libro Acerquémonos a Jehová wan la tlan natalalinkan Dios: «Akxni wi tiku talalinkan, talalinkan xlakata lakgapaskan, chu xlakaskinka akxilhkan chu lakgatikan tayat nema kgalhi. Wa xlakata lu xlakaskinka nalikgalhtawakgakan xtayat chu la likatsi Dios, chuna la lichuwinan Biblia». Jehová tlawalh pi xtsokgka xTachuwin chuna la tlan xʼakgatekgswi. ¡Lu paxtikatsiniyaw!

12. ¿Tuku xlakata Jehová maklakaskilh latamanin xlakata xtsokgkgolh Biblia?

 ¹² Jehová tlan xtlawalh pi ángeles xtsokgkgolh Biblia. Xlakata umakgolh lu katsiputunkgo kimpalakatakan chu tuku tlawayaw (1 Ped. 1:12). Xlikana pi tlan xtsokgkgolh tamakatsin nema Dios xkamaxkiputun latamanin. Pero ¿chuna xlakpuwankgolh la lakpuwankgo latamanin? ¿Tlan xlimasiyakgolh tuku makgkatsiyaw, maklakaskinaw chu tuku litaxlajwaniyaw? Ni, chu Jehová xkatsi. Wa xlakata tlawalh pi lakchixkuwin xtsokgkgolh Biblia, chu chuna tlakg litamakgtayayaw. Ni tuwa akgatekgsaw tuku lakpuwankgolh chu tuku makgkatsikgolh tiku tsokgkgolh Biblia chu tiku kalichuwinankgolh. Tlan liwana akgatekgsaw tuku xlilipuwankgo, tuku ni liwana xʼakgatekgskgo, xlipekuankgo chu tuku nitlan xtlawakgo, na tlan lipaxuwayaw tuku xlipaxuwakgo chu tuku tlan kakitaxtunilh. Xtachuna la palakachuwina Elías, putum lakchixkuwin tiku tsokgkgolh Biblia «xtachuna lantla nkin» xwankgonit (Sant. 5:17, Hua Xasasti Talaccaxlan, 1999).

13. ¿La makgkatsiya akxni likgalhtawakgaya oración nema tlawalh Jonás?

¹³ Akgtum liʼakxilhtit, kalakpuwanti tuku makgkatsilh Jonás akxni tsalalh xlakata ni xmakgantaxtiputun taskujut tuku Jehová xmaxkinit. Komo chatum ángel xtitsokgli uma tuku titaxtulh, nila liwana xwa tuku Jonás makgkatsilh. Lu tlan pi wa Jonás tiku Jehová limaklakaskilh xlakata xtsokgli tuku titaxtulh chu na xtsokgli oración nema tlawanilh Dios akxni pulhman xtajumacha kpupunu. Jonás wa: «Akxni kilatamat xtaxlajwanima, Jehová wa tiku klakapastakli» (Jon. 1:3, 10; 2:1-9).

14. ¿Tuku xlakata tlan akgatekgsaw tuku Isaías tsokgli?

¹⁴ Na kalakpuwanti tuku tsokgli Isaías. Akxni akxilhli xlilanka Jehová kʼakgtum visión, katsilh pi lu makglakgalhina xwanit,  wa xlakata wa: «¡Kgoxota akit! ¡Xlakata max xanin nakwan, xlakata kintachuwin xataxkajwani chu anta klama kkachikin niku xataxkajwani chuwinankan, xlakata kilakgastapu akxilhnit Mapakgsina, Jehová tiku pulalin lhuwa soldados!» (Is. 6:5). Chatum ángel nila xtiwa uma tachuwin, pero Isaías tlan chuna wa chu akinin tiku makglakgalhinanin chuna la xla, tlan akgatekgsaw tuku makgkatsilh.

15, 16. 1) ¿Tuku xlakata tlan akgatekgsaw tuku amakgapitsi latamanin makgkatsikgo? Kalichuwinanti liʼakxilhtit. 2) ¿Tuku nakinkamakgtayayan tlakg natalakatsuwiniyaw Jehová?

¹⁵ ¿Tlan chatum ángel xtiwa pi “ni xminini tuku namakglhtinan” chuna la wa Jacob, o xwa pi «lakgalhina» xmakgkatsikan chuna la wa Pedro? (Gén. 32:10; Luc. 5:8.) ¿Xpekualh chuna la pekuankgolh kstalaninanin Jesús? ¿Xtalakaskilh pi ángeles ni xpekuankgolh chu tlan xlichuwinankgolh xalakwan xalaksasti maski xkaputsastalanika, chuna la Pablo chu amakgapitsi kstalaninanin Cristo? (Juan 6:19; 1 Tes. 2:2.) Ni chuna, xlakata ángeles ni chuna la latamanin chu nipara tsinu kgalhikgo talakgalhin. Pero akinin makglakgalhinanin. Wa xlakata, akxni amakgapitsi latamanin wankgo tuku makgkatsikgo, tunkun kaʼakgatekgsniyaw. Akxni likgalhtawakgayaw xTachuwin Dios, xlikana pi tlan katapaxuwayaw tiku paxuwakgo chu katatasayaw tiku tasakgo (Rom. 12:15).

¹⁶ Komo nalilakpuwanaw tuku wan Biblia xlakata la kalikatsinilh Jehová kskujnin xala makgasa tiku ni makgatsankgananikgolh, lhuwa tuku nakatsiniyaw xlakata kiDioskan, tiku makgakgalhinalh chu xlakata paxkinan katalakatsuwinilh umakgolh latamanin maski makglakgalhinanin xwankgonit. Chuna tlakg nalakgapasaw chu tlakg napaxkiyaw. Uma natlawa pi tlakg natalakatsuwiniyaw (kalikgalhtawakga Salmo 25:14).

17. 1) ¿Tuku tastakyaw maxkika Asá? 2) ¿Tuku xtitaxtuma Asá akxni lakatsalalh xtastakyaw Azarías, chu la kitaxtunilh?

¹⁷ Akxni Asá xkatlajanita soldados xalak Etiopía, palakachuwina Azarías kamaxkilh Asá chu kachikin akgtum xatlan tastakyaw. Kawanilh: «Jehová nakatatawilayan, komo wixin ni namakgxtakgatit; chu komo naputsayatit, namasta talakaskin natekgsatit; pero komo namakgxtakgatit, xla nakamakgxtakgan» (2 Crón. 15:1, 2). Lu nitlan, pero chuna la titaxtulh kilhtamaku Asá lakatsalalh uma tastakyaw. Akxni tamapakgsin xla akgkaw tribus xla Israel xkatatlawaputunkgo guerra, Asá putsalh xtamakgtay Siria. Ni wa Jehová skinipa tamakgtay, wata skinilh tamakgtay uma kachikin nema ni xkakninani Jehová. Dios wanilh: «Lu nitlan tuku tlawanita xlakata uma, la uku lhuwa tiku natatlawayan guerra». Chu chuna lalh (2 Crón. 16:1-9). ¿Tuku kinkamasiyaniyan uma?

18, 19. 1) ¿Tuku kilitlawatkan komo tamakgatlininitaw Jehová? 2) ¿La tlan natalakatsuwiniyaw Jehová?

¹⁸ Nikxni katamakgatliniw Jehová. Komo tamakgatlininitaw tsinu, katlawaw xtastakyaw Oseas 12:6: «Militaspitnit miDios, chuntiya kapaxkinanti chu katlawa tuku xaʼakgstitum; chu putum kilhtamaku kalipawanti miDios». Tlakg katalakatsuwiniw Jehová, kapaxtikatsiniw akxni lilakpuwanaw talakgmaxtut chu chali chali kalikgalhtawakgaw xTachuwin, Biblia (kalikgalhtawakga Deuteronomio 13:4).

¹⁹ Salmista tsokgli: «Nakputsa la tlakg naktalakatsuwini Dios, wa kimaxki lipaxaw latamat» (Sal. 73:28). Akinin nachuna tlawaputunaw. Wa xlakata, chuntiya kalakgapaswi Jehová; chuna tlakg nakatsiyaw tuku xlakata kilipaxkitkan. Komo natalakatsuwiniyaw, xla na nakinkatalakatsuwiniyan ¡la uku chu putum kilhtamaku!