1, 2. ¿La katachuwinan Jehová kskujnin?

CHUNA la titaxtutilhanit kilhtamaku pulaklhuwa la Jehová kapulalinit kskujnin. Milh kilhtamaku maklakaskilh ángeles, tamanixni o wi tuku kamaʼakxilhnilh kskujnin xlakata nakamakatsini tuku xʼama la o xlakata nakalakgayawa akgtum taskujut (Núm. 7:89; Ezeq. 1:1; Dan. 2:19). Milh kilhtamaku Dios kalaksakli lakchixkuwin tiku xpalakachuwinankgolh chu xmakatsininankgolh xlimapakgsin. Pero maski tanu tanu tuku Jehová limaklakaskilh, tiku kgalhakgaxmatkgolh makglhtinankgolh lhuwa tasikulunalin.

² La uku, Jehová kinkalipulalinan Biblia, xʼespíritu santo, chu congregación (Hech. 9:31; 15:28; 2 Tim. 3: 16, 17). Lu tlan la kinkapulalinan, xtachuna la komo xkgaxmatwi akgtum tachuwin kkinchakgenkan nema wan: «Wa uma tiji. Anta katlawantit» (Is. 30:21). Na limaklakaskin Jesús xlakata nakinkatachuwinanan, xlakata wa tiku lakgayawanit congregación chu limaklakaskin «skujni xalipaw chu xaskgalala» (Mat. 24:45, TNM). Xlakaskinka kiliʼakxilhatkan la kinkapulalinan Jehová chu nakgalhakgaxmataw; kajwatiya chuna tlan nalatamayaw putum kilhtamaku (Heb. 5:9).

3. ¿Tuku max natlawa pi ni nastalaniyaw xtapulalit Jehová? (Kaʼakxilhti xapulana dibujo.)

³ Satanás katsi pi komo mastayaw talakaskin kakinkapulalin  Jehová, tlan nalakgtaxtuyaw, wa xlakata lhuwa tuku tlawa xlakata ni nakgalhakgaxmatniyaw Dios. Chu kinakujkan na tlan tlawa pi ni nakgalhakgaxmatnanaw (Jer. 17:9). Wa xlakata, kaʼakxilhwi tuku natlawayaw xlakata nitu natlawa pi ni nakgaxmataw tuku Dios kinkawaniyan. Na kaʼakxilhwi tuku xlakata lu makglhuwa natachuwinanaw Jehová nakinkamakgtayayan tlan natalalinaw maski tlan o nitlan tuku titaxtumaw.

4. ¿La tlawa Satanás xlakata namakgtanu kxtalakapastaknikan latamanin?

⁴ Satanás limaklakaskin tamakatsin nema nixaxlikana chu tuku kaj taʼakgsanin xlakata namakgtanu tuku lakpuwankgo latamanin (kalikgalhtawakga 1 Juan 5:19). Tuku tatsokgnit, radio, televisión chu Internet talakgatumi xlikalanka Katiyatni. Maski uma max kinkamakgtayakgoyan, makglhuwa masiyakgo pi tlan tlawakan tuku xlimapakgsin Jehová wan pi nitlan (Jer. 2:13). Akgtum liʼakxilhtit, lichuwinankgo pi akxni lakchixkuwin latatamakgaxtokga ni talakgalhin, chu uma tlawa pi lhuwa nalakpuwankgo pi tuku wan Biblia xlakata tiku tatamakgaxtokga xtachixku, lu malakatsali (1 Cor. 6:9, 10).

5. ¿La natlawayaw xlakata ni nakinkaʼakgskgawiyan tuku Satanás lichuwinan?

⁵ ¿Tuku tlan natlawakgo tiku paxkikgo xlimapakgsin Jehová xlakata ni nalitaʼakgskgawikgo tuku Satanás lichuwinan? ¿La tlan nakatsikgo tuku tlan chu tuku nitlan? “Nakgaxmatkgo xtachuwin Dios chu namakgantaxtikgo.” (Sal. 119:9.) Tastakyaw nema masta xTachuwin Dios kinkamakgtayayan nakatsiyaw tuku xaxlikana tamakatsin chu tuku kaj taʼakgsanin (Prov. 23:23). Jesús wa tuku tatsokgnit kBiblia akxni lichuwinalh pi chixku xlakaskinka «nalilatamay xlipaks ntachuwin wa ntu wan Dios» (Mat. 4:4). Uma wamputun pi kilikatsinitkan namakgantaxtiyaw xtastakyaw Biblia kkilatamatkan. Akgtum liʼakxilhtit, akxni Jehová nina xmatsokgninan limapakgsin xlakata ni natlawakan talakgxtumit xalimaxana, José akgatekgsli pi xlakgalhinalh xlakatin Dios komo xtatalakgxtumilh xpuskat Potifar. Nipara tsinu lakpuwa pi ni nakgalhakgaxmata Jehová maski uma puskat xwani pi katatamalh (kalikgalhtawakga Génesis 39:7-9). Maski uma puskat makglhuwa wanilh pi katatamalh, José kgaxmatnilh Jehová chu ni wa ama puskat. ¿Tuku kinkamasiyaniyan? Xlakata nakatsiyaw tuku tlan chu tuku nitlan lu xlakaskinka nakgaxmatniyaw Jehová chu nipara tsinu nakgaxmataw tuku wan Satanás.

6, 7. ¿Tuku natlawayaw xlakata Satanás ni nakinkaliʼakgskgawiyan xtastakyaw?

⁶ Kakilhtamaku litsama tamasiyat nema ni lakxtum, wa xlakata latamanin lakpuwankgo pi nila tekgskan xaxlikana takanajla. Pero Jehová tlawanit pi tiku xlikana tekgsputunkgo xtapulalit ni tuwa natekgskgo. Kajwatiya kililaksakatkan tiku nakgaxmatniyaw. Xlakata nila chatiy tiku kgaxmatniyaw talakaskin nakgalhlakgapasaw  Jesús chu nakgaxmatniyaw, xlakata wa tiku Jehová lakgayawanit nakamapuchwayani xborrego (kalikgalhtawakga Juan 10:3-5).

⁷ Jesús wa: «Kuintaj katlawatit lantla nkgaxpatpatit» (Mar. 4:24). Jehová liwana kinkawaniyan tuku natlawayaw chu tuku tlan kitaxtu, pero xlakata kuenta natlawayaw chu nakgalhakgaxmataw talakaskin nalakkaxwiliyaw kinakujkan. Komo ni kuenta natlawayaw max nakgaxmatniyaw nixatlan xtastakyaw Satanás chu ni katikgaxmatwi xtastakyaw Dios. Nikxni kamastaw talakaskin pi napulalin kilatamatkan xtalakpuwan kakilhtamaku nema min ktatlakgni, kvideos, compañeros, makgalhtawakgenanin chu tiku wankgo pi lu katsinikgo (Col. 2:8).

8. 1) ¿La max natlawa kinakujkan pi nakinkaʼakgskgawiyan Satanás? 2) ¿Tuku max nakinkaʼakgspulayan komo ni kuenta natlawayaw tuku kinkamakatsiniman pi wi tuku nitlan tlawamaw?

⁸ Satanás katsi pi akinin tlawaputunaw tuku nitlan. Akxni limaklakaskin uma xlakata nakinkamatlawiyan tuku nitlan, tuwa tamakgkatsi ni namakgatsankgananiyaw Jehová (Juan 8:44-47). Kalilakpuwaw tiku xlakata kajwatiya kuentajtlawa tuku lipaxuwama, tlawalh tuku nipara xlakpuwan pi natlawa (Rom. 7:15). ¿Tuku tlawalh pi chuna xakgspulalh? Max xnaku, tsinu tsinu nialh kgaxmatnilh tuku wan Jehová. Max ni akxilhli tuku xlitasiya pi wi tuku nitlan xtlawama, o max ni akxilhputulh. Akgtum liʼakxilhtit, max nialh xtlawa oración, nialh lhuwa xlichuwinan Dios la xapulana o nialh xʼan ktamakxtumit. Alistalh, tlawalh tuku lu xtlawaputun chu tlawalh tuku xkatsi pi nitlan xwanit. ¿Tuku natlawayaw xlakata nichuna nakinkaʼakgspulayan? Lu kuenta kilitlawatkan tuku litasiya pi nitlan tuku tlawamaw chu nalakgpaliyaw tuku talakaskin. Komo kgaxmatniyaw tuku kinkawaniyan Jehová, nikxni katikgaxmatwi tuku lakataya xaxlikana takanajla (Prov. 11:9).

9. ¿Tuku xlakata lu xlakaskinka tunkun naʼakxilhaw akxni tlawaputunaw tuku nitlan chu namapanuyaw?

⁹ Akxni tunkun tekgskan akgtum tajatat, max tlan napaksa tiku tatatla. Nachuna komo naʼakxilhaw pi tlawaputunaw tuku nitlan chu tunkun nalakgmakganaw, Satanás ni xastakna “kintikachipan” xlakata nakinkamatlawiyan tuku xla lakaskin (2 Tim. 2:26). Wa xlakata, komo naʼakxilhaw pi mastanitaw talakaskin pi kintapuwankan chu tuku tlawaputunaw nalakatsala tuku Jehová lakgati, ¿tuku natlawayaw? Tunkun kalakgtaspitwi Jehová, kakgaxmatniw xliputum kinakujkan, xtachuna la xmalakiw kintakgenkan (Is. 44:22). Akxni nitlan laksakaw tuku natlawayaw max lu nalakgpali kilatamatkan chu  lu nakinkamakgapatinanan kʼuma kakilhtamaku. ¡Tlakg tlan lakapala natalakgpaliyaw akxni nina mokgosaw!

10, 11. 1) ¿La limasiyakan tatlankit? 2) ¿Tuku kinkamasiyaniyan nixatlan xliʼakxilhtit Coré, Datán chu Abiram?

¹⁰ Kilikatsitkan pi kinakujkan tlan natlawa pi natamakgatliniyaw Jehová. Akgtum liʼakxilhtit, kalilakpuwaw tatlankit chu tamakglakgatin chu la umakgolh natlawa pi nialh nakgaxmatniyaw Jehová chu nitlan nakinkakitaxtuniyan. Tiku tlankajwa malakatsali tuku xakstu lakpuwanikan. Max lakpuwan pi lakgchan natlawa tuku xla lakaskin chu niti xliwanit tuku natlawa. Chu max asta nalakpuwan pi ni talakaskin natlawa xtastakyaw amakgapitsi kstalaninanin Cristo o lakgkgolotsin xalak congregación chu nipara xtastakyaw xkachikin Dios. Tiku chuna lakpuwan nila kgaxmata tuku Jehová wan.

¹¹ Akxni Israel xlamakgo kdesierto, Coré, Datán chu Abiram ni kgalhakgaxmatkgolh Moisés chu Aarón. Xlakata tlankajwa xwankgonit kakninaniputunkgolh Jehová la xlakaskinkgo. ¿Tuku tlawalh Jehová? Kamalakgsputulh chu nachuna putum tiku ni xkgalhakgaxmatnankgo (Núm. 26:8-10). Uma tuku lalh kinkamasiyaniyan pi akxni ni kgalhakgaxmatkan Jehová, nitlan kitaxtu. Na kinkamalakapastakayan pi «pulana wi tatlankit chu alistalh nitlan kitaxtu» (Prov. 16:18; Is. 13:11).

12, 13. 1) Kalichuwinanti akgtum liʼakxilhtit nema masiya pi tamakglakgatin nitlan kitaxtu. 2) Kalichuwinanti la tsuku staka tamakglakgatin komo ni lakapala namapanukan.

¹² Na kalichuwinaw tamakglakgatin. Tiku makglakgatinan lhuwa tuku tlawa chu lakatsala tuku tlan. Akxni Naamán xpuxku soldados sirios mapaksanika xlepra, lhuwa tuku xmaskiwiputun palakachuwina Eliseo, pero xla ni lakaskilh. Pero Guehazí, kskujni Eliseo makglakgatinalh tamaskiwin, wa xlakata lakpuwa: «Xlikana pi chuna la lama Jehová akit nakstalani chu wi tuku nakskini». Ni makatsinilh Eliseo, stalanilh Naamán chu wanilh tuku ni xlikana xlakata xmaxkika «akgtum talento xaplata chu maktiy lhakgat». Alistalh na akgskgawilh xpalakachuwina Jehová. ¿Tuku akgspulalh Guehazí tiku lu xmakglakgatinan? ¡Pasalh xlepra Naamán! (2 Rey. 5:20-27.)

¹³ Tamakglakgatin max ni lhuwa tuku nalitsuku. Pero komo ni namapanukan, lakapala staka chu namakgatlaja chatum lataman. Xliʼakxilhtit Acán limasiya pi lakapala staka chu kgalhi litliwakga. Acán wa: «Akxni kakxilhli kxlakgstipan tuku tlan xtiyaw kJericó maktum lhakgat xla tiku lu xlakaskinka xalak Sinar, lu stlan xwanit, chu liwaka akgtiy kilos xla plata chu akgtum barra xla oro nema tsinkan liwaka itat kilo, lu klakgatilh chu ktiyalh». Ni lakgmakgalh tuku nitlan xtlawaputun wata kgalhanalh chu matsekgli kxchik tuku xkgalhanit. Akxni takatsilh xtalakgalhin Acán, Josué wanilh pi Jehová xʼama malakgaxokge. Chu chuna lalh, watiya uma kilhtamaku Acán chu xfamilia kaʼaktalamakgnika (Jos. 7:11, 21, 24, 25). Putum akinin max namakglakgatinanaw la Acán. Wa xlakata kalakgmakgaw «xlipaks ntamakglakgatin» (Luc. 12:15). Max namin kilhtamaku nalakpuwanaw tuku nitlan o nalakapastakaw talakgxtumit xalimaxana, pero lu xlakaskinka namachokgoyaw tuku lakpuwanaw chu ni namastayaw talakaskin pi tuku tlawaputunaw nastaka chu nakinkamatlawiyan talakgalhin (kalikgalhtawakga Santiago 1:14, 15).

14. ¿Tuku natlawayaw komo akxilhaw pi kgalhiyaw tsinu tatlankit o tamakglakgatin?

¹⁴ Tatlankit chu tamakglakgatin lu nitlan tuku kinkaliminiyan. Komo nalilakpuwanaw tuku nitlan kitaxtu nakinkamakgtayayan ni namastayaw talakaskin pi uma  tuku nitlan, natlawa pi nialh nakgaxmataw tuku Jehová kinkawaniyan (Deut. 32:29). Anta kBiblia, Dios ni kajwatiya kinkamasiyaniyan xatlan tiji, na kinkawaniyan tuku tlan kitaxtu akxni anta tlawanaw chu tuku nitlan kitaxtu akxni tamakgatliniyaw. Komo kinakujkan wi tuku kinkamatlawiputunan kaj xlakata tlankajwa akinin o makglakgatinanaw, tlan xwa nalakpuwanaw tuku nakinkakitaxtuniyan, tuku nakakitaxtuni tiku kapaxkiyaw chu wantuku tlakg xlakaskinka, la nakitaxtu xlakata la talalinaw Jehová.

15. ¿Tuku kinkamasiyaniyan xliʼakxilhtit Jesús xlakata la natachuwinanaw Jehová?

¹⁵ Jehová lakaskin pi tlan kakinkakitaxtunin (Sal. 1:1-3). Lhuwa tuku kinkalipulalinan chu akxni tlakg maklakaskinaw (kalikgalhtawakga Hebreos 4:16). Asta Jesús, tiku ni xkgalhi talakgalhin xtalakaskin natachuwinan Jehová, wa xlakata putum kilhtamaku xtlawani oración. Chu Jehová pulaklhuwa la makgtayalh chu pulalilh. Malakgachanilh xʼángeles xlakata xmatliwakglhkgolh, maxkilh xʼespíritu santo, chu pulalilh akxni laksakli kgalhkutiy apóstoles. Nachuna, Jehová chuwinancha kʼakgapun xlakata xlimasiyalh pi xKgawasa xkgalhi xtamakgtay chu tlan xakxilha (Mat. 3:17; 17:5; Mar. 1:12, 13; Luc. 6:12, 13; Juan 12:28). Chuna la Jesús, talakaskin nawaniyaw Jehová putum tuku wi kkinakujkan (Sal. 62:7, 8; Heb. 5:7). Komo chuna natlawayaw, tlan natalalinaw chu nalinaw kilatamatkan chuna la nalimalankiyaw.

16. ¿Tuku kilitlawatkan xlakata Jehová nakinkamakgtayayan nakgaxmataw tuku wan?

¹⁶ Maski Jehová kamaxki xtastakyaw putum latamanin, ni kamafuerzalini natlawakgo. Talakaskin naskiniyaw xʼespíritu santo komo lakaskinaw kakinkapulalin chu xla xatapaxuwan nakinkamaxkiyan (kalikgalhtawakga Lucas 11:10-13). Biblia wan: «Kuintaj katlawatit lantla nkgaxpatatit» (Luc. 8:18). Akgtum liʼakxilhtit, xaʼakgsanina xlitaxtuw komo kskiniw Jehová kakinkamakgtayan ni natlawayaw talakgxtumit xalimaxana pero xʼakxilhwi tiku ni lhakganankgonit o xʼakxilhwi películas niku tasiya talakgxtumit xalimaxana. Wata talakaskin putum kilhtamaku natawilayaw niku anan xʼespíritu santo. Katsiyaw pi ktamakxtumit xalak congregación wi xʼespíritu santo Jehová. Lhuwa natalan, akxni kgaxmatkgo tuku wan Jehová ktamakxtumit, akxilhkgonit pi kxnakujkan xʼanan tuku nitlan chu lakgpalikgonit tuku talakaskin, uma kamakgtayanit ni nakgalhikgo lhuwa tapatin (Sal. 73:12-17; 143:10).

17. ¿Tuku xlakata nitlan kitaxtu akstu nakinkalipawankanan?

¹⁷ Kalakapastakwi David xmapakgsina Israel xalamakgasa. Akxni kgawasaku xwanit makgatlajalh lanka chixku xwanikan Goliat. Titaxtulh kilhtamaku, soldado litaxtulh chu mapakgsina, kuentajtlawalh xkachikin chu lhuwa tuku xlakaskinka laksakli natlawa. Pero akxni xakstu lipawanka, xnaku akgskgawilh, wa xlakata tatlawalh Bat-seba talakgxtumit xalimaxana chu asta mamakgnininalh xchixku, Urías. Pero akxni Jehová wanilh pi nitlan tuku xtlawanit, tataktujulh, litayalh xtalakgalhin chu tlan talalimpa Jehová (Sal. 51:4, 6, 10, 11).

18. ¿Tuku nakinkamakgtayayan nakgaxmataw tuku wan Jehová?

¹⁸ Katlawaw xtastakyaw 1 Corintios 10:12 chu ni akstu kakinkalipawankan. Xlakata nila akstu “pulalinaw kintatukitkan”, max wa Jehová nakgalhakgaxmatniyaw o max wa Satanás (Jer. 10:23). Wa xlakata, putum kilhtamaku katlawaw oración chu kastalaniw xtapulalit espíritu santo. Chuna, liwana kakgaxmatwi tuku kinkawaniyan Jehová.